ONGAMBURIRO i tupa omasa tjinene. Otjotjihorera, nandarire kutja Satan u vanga okunyona oupanga wetu kuna Jehova, ongamburiro i tu vatera “okuzemisa oviku vyomuriro vyaingwi umwe Omurunde.” (Ef. 6:16) Indu tji tu nongamburiro matu yenene okutuurunga omauzeu omanene nge ri tjimuna ozondundu. Jesus wa raera ovahongewa ve na tja: “Andakuzu mu nongamburiro ndji ṱeki pondwi yomumosteri, itjamu yenena okutja nai kondundu ndji: ‘Humburuka u kakurame mbena!’ noyo itjai humburuka.” (Mat. 17:20) Mena rokutja matu tjiwa kutja ongamburiro mai yenene okupamisa oupanga wetu kuna Jehova, eṱe tu sokuripura omapuriro nga: Ongamburiro otjikeṋa? Ongaro yetu yomoukoto i ṱuna vi kongamburiro yetu? Eṱe matu yenene vi okupamisa ongamburiro yetu? Nu matu sokukara nongamburiro mu uṋe?—Rom. 4:3.

Ongamburiro i kamburira mo ovingi kombanda yokutjiwa imbi Ombeibela mbi i hungira, nandarire “ozombepo ozohakohoke wina ze kambura nu aze zezerisiwa i ondiriro.” (Jak. 2:19) Hapo ongamburiro otjikeṋa?

Ombeibela i kahurura ongamburiro motupa 2. Otjitenga, “ongamburiro oyo okuriyameka koviṋa, mbi tu undja.” (Hebr. 11:1) Ove tji u nongamburiro, u kambura nomasa kutja oviṋa avihe Jehova mbye hungira ouatjiri nu mavi yenenisiwa. Otjotjihorera, Jehova wa raera Ovaisrael na tja: “Ami mba tjita omerikutiropamwe puna omutenya nouṱuku, kokutja aruhe ovyo vi kare po motuveze twavyo otusemba; omerikutiropamwe nga kamaaye teyewa ko. Momuhingo tjingewo Ami mba tjita omerikutiropamwe nomukarere wandje David.” (Jer. 33:20, 21) Hapo wa rora okutira kutja eyuva kamaa ri piti poo kamaa ri hiti, tji matji tjiti kutja ape ha kara omutenya nouṱuku? Ove tji u nongamburiro momazikameno woviutwa nge tjita kutja ehi ri tanauke ku ro orini nokutanauka ongondoroka neyuva, hapo u sokukeyakeya kutja Omuute ngwa twapo omazikameno nga kamaa yenenisa omakwizikiro we? Kako!—Jes. 55:10, 11; Mat. 5:18.

Otjitjavari, ongamburiro ‘okutjiwa, tjiri, imbi mbi ha munika,’ nomeho nungwari okuviri. (Hebr. 11:1) Omomuano uṋe? Ngatu tje okanatje ke ku pura kutja, ‘mo tjiwa vi kutja omuinyo wevaverwa okuuri?’ Nandarire kutja ove koya rora okumuna omuinyo wevaverwa, mo yenene okuraera okanatje ngo ohunga noviṋa mbi raisa kutja omuinyo wevaverwa okuuri. Tjimuna okukekahururira omuano mu tu suvana, oviraisiro mbi raisa kutja ku nombepo, noviṋa vyarwe. Indu omuatje tja munu kutja tjiri eye ma yenene okukambura moviṋa otja imbyo, eye u uta okuzuva nawa kutja ma yenene okukambura motjiṋa tji tji ha munika. Momuano otjingewo, ongamburiro ya zikamena koviraisiro vyatjiri.—Rom. 1:20.

Ongamburiro tjinga aya zikamena koviraisiro vyatjiri, omundu kutja ma kare nongamburiro, rutenga ma sokukara ‘nondjiviro youatjiri.’ (1 Tim. 2:4) Posi yokutja, ondjiviro ndjo kaya yenena. Omuapostele Paulus wa tjanga kutja, “tu kambura nomitima vyetu.” (Rom. 10:10) Omundu ka sokukambura mouatjiri uriri posi yokutja ma sokuuvara pondondo yokombanda. Tja tjiti nao, otji ma yenene okuhupa momuano mbu mau yorokisa Mukuru. (Jak. 2: 20) Omundu ngu hi nondangi kouatjiri mape ya a nakaura oviraisiro vyouatjiri, mena rokutja ke nokuvanga okurundurura oviṋa mbye kambura mo poo ma vanga okutjita oviṋa otja kombango ye. (2 Petr. 3:3, 4; Judas 18) Momuano otjingewo, moruveze rwOmbeibela kavandu avehe mba muna ovihimise, mba kara nongamburiro. (Num. 14:11; Joh. 12:37) Ombepo ondjapuke i tjita kutja omundu ma kare nongamburiro indu tja suvere tjiri imbi mbi ri ouatjiri.—Gal. 5:22; 2 Tes. 2:10, 11.

Mokati kovandu mba ri nongamburiro yomasa, umwe wawo wa ri Ombara David. (Hebr. 11:32, 33) Posi yokutja, kavandu avehe meṱunḓu ra David mba ri nongamburiro. Otjotjihorera, otjikando tjimwe erumbi ra David Eliab wa raisa okuhinongamburiro indu tja vyiura David nokumuraera kutja ke nepu ewa rokupindikira omatokero wa Goliat. (1 Sam. 17:26-28) Kape nomundu ngu rumata ongamburiro poo ngu kwatwa nayo, kunao David wa ri nongamburiro mena roupanga we kuna Mukuru.

MEpsalme 27, David wa raisa kutja pe ya vi ma kare nongamburiro yomasa nao. (Ezeva 1) David ee ripura oukoto ohunga noviṋa mbya tjitwa morukapitaveze nomuano Jehova ma rwisa ovanavita na ye. (Ezeva 2, 3) Eye tjiri wa raisa ondangi kondjuwo ya Jehova ondjapuke. (Ezeva 4) David ee rikotamene ku Mukuru pondjuwo ondjapuke pu novakambure ovakwao. (Ezeva 6) Eye tjiri aa paha Jehova mongumbiro. (Ezeva 7, 8) David wina aa vanga okuhongwa ohunga nozondjira za Mukuru. (Ezeva 11) Ongamburiro ya ri otjikaṋena otjinanḓengu ku David, mena ranao, eye wa pura kutja, “hapo etje kara pi nokuhina ongamburiro?”—Ezeva 13, NW.

Ove mo yenene okukara nongamburiro tjimuna David indu tji wa horere komuano we wokuripura noviṋa mbyaa tjiti, mbi ri mEpsalme 27. Ongamburiro tjinga i zikamena kondjiviro youatjiri, ove mo sokukonḓonona Embo ra Mukuru nomambo nga zikamena kOmbeibela. Nu iho matji tjiti kutja u kare notjikaṋena ho nombatero yombepo ondjapuke. (Eps. 1:2, 3) Twapo oruveze okuripura oukoto ku imbi mbi mo konḓonona. Tji wa tjiti nao, ondangi yoye ku Jehova mai kurire ko. Mena rokutja u nondangi ku Jehova, ove mo kara nonḓero yokuvanga okurikotamena ku ye pozombongarero zombongo nokuraera varwe ohunga nomaundjiro woye. (Hebr. 10:23-25) Nu wina tu raisa kutja tu nongamburiro indu tji ‘matu kumbu aruhe nokuhaurwa.’ (Luk. 18:1-8) Kunao, “kumbeye nokuhaisa ko” ku Jehova ama mu kambura kutja ‘Eye u mu pa imbi mbi mwa hepa.’ (1 Tes. 5:17; 1 Petr. 5:7) Ongamburiro i tjita kutja tu tjite oviṋa ovisemba nu indu tji matu tjiti nao, ongamburiro yetu i kurira ko.—Jak. 2:22.

Ongurova komurungu onḓiro ye, Jesus wa raera ovahongewa ve kutja, “kambureye mu Ndjambi nu  wina kambureye mu Ami.” (Joh. 14:1) Kunao matu sokukara nongamburiro mu Jehova na wina mu Jesus. Omomiano viṋe mu mo yenene okukara nongamburiro mu Jesus? Ngatu tare komiano 3.

Otjitenga, vara otjisuta tjonguturiro otjotjiyandjewa Mukuru tja yandja kove. Omuapostele Paulus wa tja: “Mbi nomuinyo mongamburiro mOmuna wa Ndjambi, ngwe ndji suverere nu ngwe riyandjera ami omuinyo we.” (Gal. 2:20) Tji u nongamburiro mu Jesus, ove u kambura kutja otjisuta tjonguturiro matji yenene okukuvatera. Omauvi woye ye yenena okuisirwa, u kara nomaundjiro wokukahupa nga aruhe. Nu otjisuta tjonguturiro ootjiraisiro otjinenenene tjokutja Mukuru we ku suvera. (Rom. 8:32, 38, 39; Ef. 1:7) Indu tji wa kambura tjiri kutja matji yenene okukuvatera, ove ko nokukara noumune ouvi ohunga na ove omuini.—2 Tes. 2:16, 17.

Otjitjavari, ombunguhiro ya Jesus ya tjita kutja tu yenene okutumbuka popezu na Jehova okupitira mongumbiro. Mena rotjisuta tjonguturiro, eṱe tu yenena okukumba ku Jehova “noupandi . . . kokutja tu kapewe ounyaṋutima nu tu kamune otjari okuvaterwa moruveze orusemba.” (Hebr. 4:15, 16; 10:19-22) Ongumbiro i tu pa omasa kokutja tu nakaure omarorero wokutjita ouvi.—Luk. 22:40.

Otjitjatatu, kara nonḓuviro ku Jesus. Omuapostele Johanes wa tjanga kutja, “auhe ngwa kambura mOmuna, u nomuinyo waaruhe; nu auhe ngu hi nonḓuviro kOmuna, kamaa munu omuinyo, nungwari omberero ya Ndjambi mai kara kombanda ye.” (Joh. 3:36) Johannes wa raisa ombangu pokati kokukara nonḓuviro nokuhina onḓuviro. Kunao, ove u raisa kutja u nongamburiro mu Jesus indu tji mo kara nonḓuviro ku ye. Ove u tjita nao mokukongorera “etwako ra Kristus” ndi ri avihe eye mbya honga nokurakiza. (Gal. 6:2) Ove wina u kara nonḓuviro ku Jesus indu tji mo kongorere omuhunga mbu tu pewa okupitira ‘momukarere omuṱakame nomunazondunge.’ (Mat. 24:45) Nu tji u nonḓuviro ku Jesus, ove mo kara nomasa okutuurunga omauzeu nge ri tjimuna ovivepo ovinamasa.—Luk. 6:47, 48.

Otjikando tjimwe, omurumendu umwe wa ravaera ku Jesus na tja: “Me kambura, arikana vatera ingwi okuhinongamburiro kwandje!” (Mar. 9:24) Omurumendu ngwi wari nongamburiro onḓiṱi, posi yokutja aa tjiwa kutja ma hepa ongamburiro onyingi. Tjimuna omurumendu ngwi, eṱe atuhe matu kara mozongaro tjiva mu matu hepa ongamburiro onyingi. Nu matu yenene okupamisa ongamburiro yetu nai. Otja tji twa munu, matu yenene okupamisa ongamburiro yetu indu tji twa konḓonona Embo ra Mukuru nokuripurira ko oukoto, tji matji tjiti kutja tu kare nondangi ku Jehova. Ongamburiro yetu mai kurire ko indu eṱe novakambure ovakwetu tji twe rikotamene ku Jehova nokuraera varwe ohunga nomaundjiro wetu nokupanḓera pokukumba. Kombanda yanao, indu tji matu pamisa ongamburiro yetu, eṱe tu muna ondjambi onene. Embo ra Mukuru ri tu rakiza kutja, “vakwetu, panḓereye pongamburiro yeṋu ondjapuke tjinene nu mu zikame mu yo . . . Kareye morusuvero rwaNdjambi.”—Judas 20, 21.