Ouhumandu tji mba ri nozombura 13 oupanga wandje kuna Jehova wa ngundipara. Ovanatje mbaatu hiti pamwe oskole aave munika tjimuna ve nouyara ouingi, nu ee vanga okukara nouyara mbwo wina. Ami ee munu kutja ouzeu okuṱakamisa ozoveta zovanene vandje nomirari vya Mukuru, nu wina ee munu kutja okurikotamena ku Jehova oviungura ovingi. Ami ee kambura kutja Jehova okeri, posi yokutja hi mba ri noupanga wopopezu kuna ye.

Hina pu mba isa okuzuvarisa oparukaze posi yokutja hee zuvarisa tjinene. Indu tji mba piti motjiungura tjokuzuvarisa ami hee rirongerisa nawa, kunao ya ri ouzeu okuuta poo okukayendisa ehungi. Mena ranao, hi mba ri novandu okuyaruka ko poo ovahongwa vOmbeibela. Iho tja tjita kutja e ha vanga okupita motjiungura tjokuzuvarisa. Ami ee ripura kutja, ‘Hapo ovandu varwe ve yenena vi okuzuvarisa otjivike atjihe nomueze auhe?’

Indu tji mba ri nozombura 17, ee vanga okuzapo ponganda. Kunao, mba toora omitwaro vyandje nu e tjindire koAustralia. Indu tji mba zapo ponganda, otjiṋa ho tja hihamisa ovanene vandje. Owo aave  rikende, posi yokutja aave munu kutja me kayenda komurungu okukarera Jehova.

MoAustralia, ami hee piti tjinene motjiungura tjokuzuvarisa. Nu hee kara pozombongarero zombongo aruhe. Mba tjita oupanga ku nomitanda vyarwe mbyaavi kara pozombongarero zombongo, nokuyenda kozombaa okukanwa nokukapunda eyuva ependukirwa. Indu tji me ripura ohunga noruveze ndwo, ami mbi muna kutja mba ri mouatjiri nu wina ee tjiti oviṋa vyouye, posi yokutja hi mba ri nondjoroka.

Kombunda yozombura ape mbari, mba hakaena ku nomukazendu omukambure ngwa tjita kutja mbi ripure ohunga nomuano mee hupu. Ami ee kara pu novakazendu ovakambure vetano ovakombe, nu twa ṋanga omutarere worukondwa pu nomukazendu we Tamara, okukara puna eṱe oure wotjivike. Indu omurumendu we tjaa ungura oviṋa vyombongo, Tamara aa uhara puna eṱe nu aatu yoroka pamwe. Tjiri otjiṋa ho aatji ndji tjatere. Eye wa ri omundu omurisusuparise nomupaturuke. Tjiri, ya ri otjiṋa otjinanambango okumuna omundu ngu ungurira Jehova tjinene nao okutjita oruveze okuyoroka puna eṱe.

Tamara wa ri omundu wondjoroka nomupyuke. Orusuvero rwe kouatjiri na kotjiungura tjokuzuvarisa aaru ndji hingi kutja mbi kare tjimuna ye. Eye wa ri nondjoroka okuungurira Jehova otja pu ma yenene, posi yokutja ami hi mba ri nondjoroka mena rokutja hee mu ungurire tjinene otja pu me yenene. Ongaro ye ombwa nondjoroka ndjaa raisa ya ṱuna tjinene kehupo randje. Otjihorera tje tja tjita kutja mbi ripure ohunga nepu enanḓengu rokutja, Jehova u vanga kutja ovakarere ve avehe ve mu karere “nenyando.”—Eps. 100:2.

Ami ee zeri okukara nondjoroka Tamara ndja ri nayo, posi yokutja ee hepa okutjita omarundurukiro kutja mbi kare nondjoroka ndjo. Nu kombunda yozombura ape ndatu, mba uta okutjita omarundurukiro. Ami mba uta okurirongerisa kotjiungura tjokuzuvarisa nu povikando tjiva ee ungura otjomukandjira omuvatere. Okutjita nao kwe ndji vatera kutja e ha tira nu mbi yanḓipare. Otja tje  ungurisa Ombeibela tjinene motjiungura tjokuzuvarisa, kwa tjita kutja mbi yorokere otjiungura tjokuzuvarisa. Kombunda yoruveze orusupi, ami mba uta okukarera otjomukandjira omuvatere omueze auhe.

Ami mba uta okutoorora omapanga woviwondo avihe mbaave ungura nawa mouatjiri, nu mba ri nondjoroka okuungurira Jehova. Ovihorera vyawo oviwa vye ndji vatera kutja mbi ripurire koviṋa ovinahepero mehupo randje, nokuuta okulesa Ombeibela eyuva arihe. Mba uta okuyorokera otjiungura tjokuzuvarisa tjinene nu mba rira omukandjira omukarerere. Tjiri, okutjita nao kwe ndji yetera ondjoroka nu ee munu kutja owami okaṋepo kombongo.

Kombunda yombura imwe, mba hakaena kuna Alex omundu omuwa nomupaturuke, nu ngwa suvera Jehova notjiungura tjokuzuvarisa. Eye wa ri omuvatere wombongo, nu wa karera otjomukandjira oure wozombura hamboumwe. Eye wina aa vatere notjiungura tjokuzuvarisa mehi ndi Malawi oure womieze hambombari nga ku hambondatu, mena rokutja kwa ri nouhepe wovazuvarise. Ingwo Alex aa kara tjinene pu novahindwa mba ri otjihorera otjiwa ku ye, nu mbe mu tunduuza okukayenda komurungu okutwapo Jehova poruveze orutenga mehupo re.

Mombura ndji 2003, ami na Alex twa kupasana nu ngamba tu kayenda komurungu okukarera Jehova oruveze aruhe. Eṱe twe rihonga omapu omengi omananḓengu nu Jehova we tu sera ondaya momiano omingi.

Mombura ndji 2009, eṱe twa ṋangwa okukakarera otjovahindwa moTimor-Leste, ndi ri mokakoverwahi ka Indonesia. Eṱe kaatu undjire ko nu aatu tjaterwa, posi yokutja wina aatu tira. Kombunda yomieze vitano, eṱe twa vaza moDili tji tja ri otjihuro ohongora.

Ehupo retu ra runduruka tjinene ku indi ndi twa iririre. Eṱe aatu sokuiririra ombazu ombe, eraka rarwe, ovikurya nomuano wokuhupa. Nu motjiungura  tjokuzuvarisa potuingi aatu hakaene novandu mba ri ovasyona, mbe ha ri nomahongero omawa nu mbaave ṋiṋikiziwa. Nu wina twa muna ovandu ovengi mba wire momuinyo nu mba hihamisirwe kotutu mena rovita noutwe mbwa ri mo. *

Tjiri otjiungura tjokuzuvarisa tja ri otjiwa tjinene. Otjotjihorera, otjikando tjimwe mba hakaena ku nomuatje ngwa wire momuinyo wozombura 13, wena Maria. * Ina wa ṱa ozombura ozonḓiṱi komurungu wanao nu ya ri ouzeu okuhakaena kuna ihe aruhe. Maria kaa tjiwa kutja ma vanga okuyenenisa tjike mehupo re, tjimuna ovanatje ovengi omakura we. Otjikando tjimwe eye aa riri indu tjee ndji raere ohunga nongaro mari. Posi yokutja, ami hee mu zuu mena rokutja tjandje ngunda hiya tjiwa eraka re nawa. Ami mba kumba ku Jehova okundjivatera kutja mbi mu tunduuze, nu mba uta okumulesera omatjangwa ngu maye mu huhumiṋa. Kombunda yozombura ozonḓiṱi mba muna omuano ouatjiri mu wa rundurura ongaro, ombunikiro nehupo ra Maria. Eye wa papitisiwa nu nai u novahongwa ve omuini vOmbeibela. Ndino, Maria orupa rweṱunḓu enene rovakarere va Jehova nu u muna kutja wa suverwa.

Jehova u sera ondaya kotjiungura tjokuzuvarisa moTimor-Leste. Nandarire kutja ovazuvarise ovengi va papitisiwa ozombura omurongo nḓa kapita, ovengi ve karera otjovakandjira, ovavatere vombongo poo ovanene vombongo. Nu varwe ve ungura pomberoo yomatorokero okuvatera okutoroka omambo nga zikamena kOmbeibela momaraka nge hungirwa mo. Ku ndji pa ondjoroka tjinene okuzuva tji mave imbura nondjoroka pozombongarero zombongo, nokumuna omuano mu ve noupanga ouwa kuna Jehova.

Otjiungura tjetu moTimor-Leste tja pangukire tjinene kehupo moAustralia, posi yokutja eṱe tjiri twari nondjoroka tjinene. Povikando aatu rondo moumbesi mu mwe ura ovandu mbe nomahundju nga kahisiwa, novihape ovingi pekepeke okuza kotuveze twomarandisiro. Omayuva tjiva, aatu rihongo ku nomuhongwa wOmbeibela mokandjuwo okaṱiṱi koupyu ku ka ri nondova pehi nozohunguriva nḓu maze tupuka ongondoroka. Nandarire kehi yozongaro nḓo ami ee ripura kutja, ‘Tjiri ihi otjiyandjanyuṋe.’

Tji me ripura na indu tji mba ri omutanda, ami tjiri mbi nondangi kutja ovanene vandje va kondja nomasa okundjihonga ohunga na Jehova, nokundjipa omasa moruveze oruzeu ndwo. Mba yenena okumuna omayenenisiro womambo nge ri mOmiano 22:6 mehupo randje. Mama na tate ve nondjoroka kutja ami na Alex tu kayenda komurungu okukarera Jehova. Okuza kombura ndji 2016, eṱe tu karera otjovavarure vozombongo morukondwa rworutavi rwomberoo ya Australasia.

Ouzeu kwami okumuna kutja pa ri oruveze tji mbi hina ee yorokere otjiungura tjokuzuvarisa. Tjiri nai mba suvera otjiungura tjokuzuvarisa. Ami mbe rihonga kutja, nandarire kutja u ri mongaro iṋe ondjoroka yatjiri i za mokukarera Mukuru nomutima auhe. Tjiri ozombura 18 nḓu mba karera Jehova puna Alex ze ndji yetera ondjoroka yatjiri mehupo randje. Ami nai mbi zuva nawa ouatjiri womambo omutjange wEpsalme David nga hungira ku Jehova. Eye wa tja: “Avehe mbe riyameka kOve, ngave yoroke, aruhe ve imbure nondjoroka. . . . Avehe mbe Ku suvera kokutja ve tange ena roye.”—Eps. 5:11.