1-2. Matu tjiwa vi kutja ena ra Jehova enanḓengu ku Jesus?

 KAPE notjiṋa otjinanḓengu tjinene ku Jesus okukapita ena ra Jehova. Nu kape nomundu warwe ngwa tjiukisa ena ra Jehova okukapita ye. Morupa ndwa kapita, twe rihongo kutja Jesus we riyandjera okuṱa okuraisa kutja Jehova omuyapuke, nokuraisa kutja ozondjira ze azehe ozosemba. (Mar. 14:36; Hebr. 10:​7-9) Nu kombunda yOzombura Eyovi zOuhonapare we, Jesus ma yarura ouvara auhe ku Ihe mena rokutja ma vanga kutja Jehova ma pewe ondjozikiro aihe. (1 Kor. 15:​26-28) Oviṋa avihe Jesus mbya tjitira Jehova vi raisa kutja eye wa suvera Jehova tjinene.

² Jesus we ya kombanda yehi okuyekuraera ovandu oviṋa avihe Jehova mbyaa vanga kutja ve tjiwe. (Joh. 5:43; 12:13) Eye wa tjiukisa ena ra Ihe kovahongewa ve. (Joh. 17:​6, 26) Eye aa hongo mena ra Jehova nokutjita ovihimise mena ndo. (Joh. 10:25) Nu wina Jesus wa ningira Jehova okutjevera ovahongewa ve “momasa wena [re].” (Joh. 17:11) Oukahu kutja ena ra Mukuru ra ri otjiṋa otjinanḓengu tjinene ku Jesus okukapita otjiṋa ngamwa. Nu hapo omundu ma yenene okutja Omukriste posi ya a ha tjiwa poo a ha ungurisa ena ra Jehova?

3. Matu katara ku ye morupa ndwi?

³ Mena rokutja oweṱe Ovakriste vatjiri, tu horera ku Jesus indu tji matu raisa orusuvero nondengero kena ra Jehova. (1 Petr. 2:21) Morupa ndwi, matu katara kutja omena raye Jehova tja yandja ena re ku imba mbe zuvarisa “Ombuze Ombwa yOuhona.” (Mat. 24:14) Matu katara kutja ena ra Jehova mari sokukara nomaheero yeṋe kourike wetu.

“OTJIUAṊA KENA RE”

4. (a) Ovikwaye Jesus mbya raera ovahongewa ve ngunda e hi ya yaruka keyuru? (b) Epuriro riṋe ndi matu kahungirira ko?

⁴ Ngunda e hi ya yaruka keyuru, Jesus wa raera ovahongewa  ve kutja: “Ombepo Ondjapuke tji ye ya kombanda yeṋu, eṋe mamu hara omasa nu amu rire ovendjihongonone moJerusalem na mehi arihe raJudea noraSamaria nga komaandero wehi.” (Oviung. 1:8) Ku nao, ovahongewa aave hepa okuzuvarisa ombuze ombwa akuhe nu ka moIsrael atjiyerike. Komaandero, ovandu avehe mouye aave yenene okumuna oruveze okurira ovakongorere va Jesus. (Mat. 28:​19, 20) Posi ya Jesus wa tja: “[Mamu] rire ovendjihongonone.” Hapo ovahongewa ovape mba aave hepa okutjiwa ena ra Jehova, poo aave sokurira ovahongonone va Jesus uriri? Ovitjitwa mbya tjangwa mOviungura ekondwa 15, mavi tu vatere okuzira epuriro ndo.

5. Omomuano uṋe ovaapostele novanene vombongo moJerusalem mu va raisa kutja ovandu avehe aave hepa okutjiwa ena ra Jehova? (Wina tara kotjiperendero.)

⁵ Mombura ndji 49 O.Z., ovaapostele novanene vombongo ve ya pamwe moJerusalem okuhungirira kepu rokutja ovandu mbe ha ri Ovajuda aave hepa okusukarisiwa poo indee kutja ve rire Ovakriste. Komaandero wehungi ndo, Jakobus, omuangu wa Jesus wa tja: “[Petrus] wa zu nokumuraera nambano nai kutja Ndjambi wa raisa ombango ye yokuyakura omihoko vyarwe indu tje ritoororera otjiwaṋa mokati kawo [poo okuritoororera mu uo otjiuaṋa kena re, EEP].” Ena ra uṋe Jakobus ndaa hungirire ko? Otja komambo womuprofete Amos nga hungira, Jakobus wina wa tja: “Noviwaṋa avihe opu mavi ere ku Ami, na wina omihoko vyarwe avihe mbi mba isana okurira ouini wandje [poo mba isanenua ena randje, EEP].” (Oviung. 15:​14-18) Ovahongewa ovape mba aave sokurihonga ohunga na Jehova nu owo wina aave ‘sokuisanenua kena re.’ Iho matji hee kutja owo aave hepa okutjiukisa ena ra Mukuru ku varwe, nu ovandu aave sokuvetjiwa otjovandu mbe kuramena po ena ndo.

6-7. (a) Omena raye Jesus tje ya kombanda yehi? (b) Epu riṋe rarwe enanḓengu Jesus nde era kombanda yehi?

⁶ Ena ra Jesus ri heya kutja “Jehova Omuyame,” nu Jehova wa ungurisa Jesus okuyama ovandu avehe mbe nongamburiro mu ye na mOmuna we. Jesus we ya kombanda yehi okuyekuyandja omuinyo we. (Mat. 20:28) Indu tja suta otjisuta tjonguturiro, eye wa tjita  kutja ovandu ve yenene okuisirwa ozondjo zawo nu ve kahupe nga aruhe.—Joh. 3:16.

⁷ Hapo omena ratjike ovandu tjaave hepa otjisuta tjonguturiro? Omena roviṋa mbya tjitwa motjikunino tja Eden. Otja tji pa hungirwa morupa ndwa kapita, ovanene vetu ovatenga ooAdam na Eva, va pirukira Jehova, nu mena ranao va pandjara ouyara wokuhupa nga aruhe. (Gen. 3:​6, 24) Posi ya, Jesus we ya kombanda yehi okuyekutjita otjiṋa otjinanḓengu tjinene tji tja kapita okuyama ovanatje va Adam na Eva. Satan wa kora ovizeze ovivi ohunga na Jehova. (Gen. 3:​4, 5) Ku nao, ovandu aave hepa okutjiwa kutja ena ra Jehova eyapuke neye ke noviṋa ovivi mbya tjita. Nu Jesus ongwa ri omundu omusemba okuraisa otjiṋa hi mena rokutja eye aa kuramene po Jehova momuano omusemba, nu aa tjiti avihe Jehova mbyaa vanga kutja ma tjite.

8. Ovikwaye ovakongorere avehe va Jesus mbyaave sokuyakura?

⁸ Ovakongorere avehe va Jesus Ovajuda na mbe he ri Ovajuda, aave hepa okukara nongamburiro kutja ondjamo yawo i za mu Ihe ya Jesus, Jehova Mukuru. (Joh. 17:3) Owo wina aave sokutjiukirwa kena ra Jehova tjimuna Jesus. Owo aave hepa okutjiwa ounahepero wokuyapura ena ndo kutja ve yamwe nokukahupa nga aruhe. (Oviung. 2:​21, 22) Ku nao, ovakongorere avehe ovaṱakame va Jesus aave hepa okurihonga ohunga na Jehova na Jesus wina. Matu munu kutja omena raye Jesus tja pata ongumbiro ye ndji ri mu Johanes 17 nomambo nga: “Ami mbe ve tjiukisa ena roye, nu me panḓere pokutjiukisa, kokutja orusuvero ndu u raisa ku Ami ru kare mu wo, nAmi wina mbi kare mu wo.”—Joh. 17:26.

“OWEṊE OVAHONGONONE VANDJE”

9. Omomuano uṋe mu matu yenene okuraisa kutja ena ra Jehova enanḓengu kweṱe?

⁹ Ovakongorere avehe va Jesus vatjiri mave hepa okuyapura ena ra Jehova. (Mat. 6:​9, 10) Eṱe matu sokuvara ena ra Jehova kombanda yomana ayehe. Nu matu hepa okuraisa otjiṋa ho movitjitwa vyetu. Hapo matu sokutjita vi okuyapura ena ra Jehova nokuraisa kutja imbi Satan mbya hungira ohunga na Jehova kauatjiri?

10. Ovikwaye mbi tu lesa mekondwa 42 nga ko 44 membo ra Jesaja? (Jesaja 43:9; 44:​7-9) (Wina tara kotjiperendero.)

¹⁰ Mu Jesaja ekondwa 42 nga ko 44 matu rihongo kutja matu sokutjita vi kutja tu yapure ena ra Jehova. Omatjangwa ngo ye hungira ohunga notjisasanekero tjombanguriro. Motjombanguriro ho, Jehova ma ningire ovandu mbe he rikotamene ku ye okuyandja oviraisiro mbi raisa kutja oomukuru vawo ooMukuru vatjiri poo indee. Tjimuna ovandu tji ve tjita motjombanguriro, eye ma pura kutja pe nozohatoi nḓu maze yenene okuraisa otjiṋa ho. Posi ya ozo kaze po.—Lesa Jesaja 43:9; 44:​7-9.

11. Jehova u tja vi kovakarere ve otja tji pa tjangwa mu Jesaja 43:​10-12?

¹¹ Lesa Jesaja 43:​10-12. Jehova u tja nai kovakarere ve: “Oweṋe ovahongonone vandje. . . . Ami erike owAmi ngu mbi ri Muhona.” Jehova u ve ningira okuzira epuriro ndi mari tja: “Pe na Ndjambi warwe posi yandje are?” (Jes. 44:8) Eṱe tu nondjingonekero onene okuzira epuriro ndo. Eṱe tu raisa kutja kape na Mukuru warwe pendje na Jehova moviṋa mbi matu hungire na mbi matu tjiti. Ena re ri ri kombanda yomana ayehe. Eṱe tu  raisa momuano mbu tu hupa kutja twa suvera Jehova tjiri nu oweṱe ovaṱakame ku ye, nandarire kutja Satan u tjita kutja i rire ouzeu kweṱe. Momuano mbwo, eṱe tu nouyara okuvatera okuyapura ena ra Jehova.

12. Hapo omaprofetero nge ri mu Jesaja 40:​3, 5 ya yenenisiwa vi?

¹² Indu tji matu yandja oruvara kena ra Jehova, eṱe tu horera ku Jesus Kristus. Jesaja wina wa hunganeka ohunga nomundu ngu ma ‘ṱunine Muhona ondjira.’ (Jes. 40:3) Hapo iho tja yenenisiwa vi? Johanes Omupapitise wa ṱunina Jesus ondjira, posi yokutja ya ri ondjira ya Jehova mena rokutja Jesus we ya mena ra Jehova nu aa hungire mena ra Jehova. (Mat. 3:3; Mar. 1:​2-4; Luk. 3:​3-6) Omaprofetero tjingewo ya tja: “Indino ouvara waMuhona mau vandururwa.” (Jes. 40:5) Hapo owo wa vandururwa vi? Indu Jesus tje ya kombanda yehi, eye wa kuramena po Jehova momuano omusemba nu ya ri aayo Jehova omuini ongwe ya kombanda yehi.—Joh. 12:45.

13. Matu yenene vi okuhorera ku Jesus?

 ¹³ Tjimuna Jesus, eṱe oweṱe Ovahongonone va Jehova. Eṱe tu tjinda ena ra Jehova nu tu raera ovandu avehe mbu matu hakaene ohunga nozondjito ze ozombwa. Kutja tu rire ovahongonone ovawa, eṱe wina matu sokutjiukisa oviṋa Jesus mbya tjita okuyapura ena ra Jehova. (Oviung. 1:8) Kape nomundu ngwa hongonona Jehova okukapita Jesus nu eṱe tu kongorera otjihorera tje. (Omavan. 1:5) Omomuano uṋe warwe mu matu raisa kutja ena ra Jehova enanḓengu kweṱe?

ENA RA JEHOVA RI HEYA TJIKE KWEṰE?

14. Otja kEpsalme 105:​3, eṱe tu noumune uṋe ohunga nena ra Jehova?

¹⁴ Eṱe tu rihivira ena ra Jehova. Epsalme 105:3 (EEP) mari tja: “Ritangeje mena roujapuke ue;: nomutima uaimba, mbe paha Jehova, ngau njande.” Iho tji yorokisa omutima wa Jehova indu tji matu rihivire ena re. (Jer. 9:​23, 24; 1 Kor. 1:31; 2 Kor. 10:17) Eṱe tu nondjingonekero okuraera varwe kutja Jehova omuyapuke nu avihe mbye tjita ovisemba. Eṱe katu sokuṱohoṋi okuraera imba mbu tu ungura pamwe, na mbu tu hita pamwe oskole, novararanganda, na varwe kutja oweṱe Ovahongonone va Jehova. Omudiaboli u vanga okututjaera okuhungira ku na varwe ohunga nena ra Jehova. (Jer. 11:21; Omavan. 12:17) Satan na imba mbe handjaura ovizeze vye ve vanga kutja ovandu ve zembe ena ra Jehova. (Jer. 23:​26, 27) Posi ya mena rorusuvero rwetu kena ra Jehova, eṱe tu vanga okumutanga oruveze aruhe.—Eps. 5:11; 89:16.

15. Okuisana ena ra Jehova ku heya tjike?

¹⁵ Eṱe tu kayenda komurungu okuisana ena ra Jehova. (Joel 2:32; Rom. 10:​13, 14) Okuisana ena ra Jehova ku heya okutjiwa nokuungurisa ena ndo. Nu wina ku heya okutjiwa Mukuru kutja omungendu, okukara nongamburiro mu ye, nokupaha omuhunga poo ombatero ku ye. (Eps. 20:7; 99:6; 116:4; 145:18) Okuisana ena ra Jehova wina ku heya okuraera varwe ohunga nena ndo novikaṋena vye oviwa. Nu eṱe tu ve vatera okurundurura ehupo rawo kokutja ve yenene okuyorokisa omutima wa Jehova nokutja ve yamwe.—Jes. 12:4; Oviung. 2:​21, 38.

16. Omomuano uṋe mu matu yenene okuraisa kutja Satan omunavizeze?

¹⁶ Eṱe tu riyandjera okumuna omauzeu kutja tu yandje ohiviro kena ra Jehova. (Jak. 5:​10, 11) Tji matu kayenda komurungu okurira ovaṱakame ku Jehova nandarire kutja matu munu omauzeu, eṱe tu raisa kutja Satan omunavizeze. Indu Job tja ri nomuinyo, Satan wa tja nai ohunga na imba mbe karera Jehova: “Omundu ma isa oviṋa vye avihe andakuzu eye ma sora okukara nomuinyo.” (Job 2:4) Satan wa tja ovandu ve karera Jehova indu tji mave munu oviṋa oviwa uriri, posi ya indu tji va munu omauzeu owo mave isa okumukarera. Job wa raisa kutja oviṋa avihe mbyo kauatjiri kaparukaze. Ndino eṱe wina tu raisa kutja eṱe kamaatu isa okukarera Jehova nandarire indu ehupo tji ra rire ezeu poo indu Satan tji ma kondjo okututjaera. Eṱe matu yenene okukara nongamburiro okuura kutja Jehova ma kayenda komurungu okututjevera mena rena re.—Joh. 17:11.

17. Omomuano uṋe warwe mu matu yenene okueta ohiviro kena ra Jehova otja tji pa tamunwa mu 1 Petrus 2:12?

¹⁷ Eṱe tu raisa ondengero kena ra Jehova. (Omiano 30:9; Jer. 7:​8-11) Mena rokutja ovandu ve tjiwa kutja oweṱe Ovahongonone va Jehova, oviṋa mbi tu tjita mape ya avi eta ohiviro kena re poo avi zunḓa ena re. (Lesa 1 Petrus 2:12.) Mena ranao eṱe tu vanga okueta ohiviro ku Jehova mokupitira moviṋa mbi matu hungire na movitjitwa vyetu.  Tji twa tjiti nao, eṱe matu eta ohiviro kena re nandarire kutja oweṱe ovanauvi.

18. Omuano uṋe warwe mu matu yenene okuraisa kutja ena ra Jehova enanḓengu tjinene kweṱe? (Wina tara komambo wokehi.)

¹⁸ Eṱe tu rikendera ena ra Jehova tjinene okukapita eṱe oveni. (Eps. 138:2) Omena raye okutjita nao tji ku ri okunahepero? Mena rokutja indu tji matu tjiti oviṋa mbi mavi yorokisa omutima wa Jehova, ovandu potuingi mape ya ave ha tjaterwa nu mape ya ave hungire oviṋa ovivi ohunga na eṱe. a Indu Jesus tja ṱa ovandu aave mu vara otjomukatuke woveta, nu ve mu tondere. Posi ya Jesus we riyandjerere okuṱa momuano mbwo kokutja ma yandje ohiviro kena ra Jehova. Eye ‘kaa ṱohoṋi’ poo okurikenda tjinene ohunga noumune wovandu varwe ohunga na ye. (Hebr. 12:​2-4) Eye aa yandja ombango kokutjita ombango ya Jehova.—Mat. 26:39.

19. Ove u noumune ohunga nena ra Jehova nu omena raye?

¹⁹ Eṱe tu tjaterwa okukarera Jehova nu ondjingonekero onene okuisanewa Ovahongonone va Jehova. Mena ranao, eṱe tu kayenda komurungu okumutanga nandarire kutja varwe mave tu yamburura. Ena ra Jehova enanḓengu tjinene kweṱe nandarire okukapita omuano ovandu varwe mu ve tu vara. Ku nao, ngatu rimanene okukayenda komurungu okutanga ena ra Jehova nandarire kutja Satan u kondja okututjaera. Momuano mbwi eṱe tu raisa kutja ena ra Jehova enanḓengu tjinene kweṱe tjimuna tji ri ri enanḓengu ku Jesus Kristus.