Hapo ove oo tjiwa?
Omena raye ovandu vozonganda tjaave karere morupa rwovita rwOmbara David?
MORUPA rwovita rwOmbara David mwa ri ovarwe mbe ha ri Ovaisrael, tjimuna Selek ngwa zire koAmon, Urija Omuheti, na Jitma ngwa zire koMoab. a (1 Ekuruh. 11:39, 41, 46) Wina mwa ri “Ovakreti nOvapleti” na varwe mba zire “koGat” morupa rwovita rwa David. (2 Sam. 15:18) Pe munika aayo Ovakreti nOvapleti omuhoko nOvafilisti nu imba mba zire koGat va ri Ovafilisti wina.—Esek. 25:16; Jos. 13:2, 3; 1 Sam. 6:17, 18.
Omena raye David tja yandjera ovandu vozonganda morupa rwe rwovita? Eye wa ri nongamburiro kutja owo ovaṱakame ku ye, nu tjinenenene ku Jehova. Otjotjihorera, ohunga nOvakreti nOvapleti, embo rimwe romambo ra tja: “Owo va panḓera pouṱakame ku David nandarire kehi yozongaro ozonḓeu mounane we.” Omomuano uṋe mu va raisa ouṱakame wawo? Indu “Ovaisrael” tji va isa Ombara David nave kongorere “omundu otjiporoporo wena Seba,” Ovakreti nOvapleti va yandja oruvara ku David mokumuyama indu Seba tjee mu pirukire. (2 Sam. 20:1, 2, 7) Otjikando tjarwe, omuatje omuzandu wOmbara David wena Adonija, wa kondja okurizika otjombara. Posi yokutja, Ovakreti nOvapleti va panḓera pouṱakame ku David nave vatere okuzika Salomo otjombara, mena rokutja ongwa toororerwe i Jehova.—1 Ozomb. 1:24-27, 38, 39.
Omundu warwe wozonganda ngwa panḓera pouṱakame ku David, ya ri Itai ngwa za koGat. Itai novarwe ve ozombanḓe 600 va yandja oruvara kOmbara David indu omuatje omuzandu wa David wena Absalom tja pirukira David, nu tja kondja okupopa ovarumendu Ovaisrael okumuzika otjombara. David wa raera Itai kutja ke nokuhepa okumurwira po, mena rokutja eye omundu wozonganda. Posi yokutja Itai wa tja: “Tjimbe tjaMuhona omunamuinyo na ove, muhona ombara, koṋa omuhona wandje ku ma i, indu kutja okonḓiro poo okomuinyo, ami, omukarere woye, oku me kakara!”—2 Sam. 15:6, 18-21.
Itai wa ri omuṱakame ku David, ombara ndja twirisiwa i Jehova
Kainatja kutja Ovakreti, Ovapleti novandu tjiva mba za koGat va ri ovandu vozonganda, owo va raisa ondengero ku Jehova otja Mukuru watjiri, na ku David otjombara ndja twirisiwa i Jehova. Tjiri David wa ri nondangi onene okukara novarumendu ovaṱakame mba mba ri motjimbumba tje.
a Etwako ra Mukuru nda tjangwa mu Deuteronomium 23:3-6 aari tjaere Ovaamoni nOvamoab okukara mombongo yOvaisrael. Nungwari, pe munika aayo etwako ndo aari hungirire komundu okurira okaṋepo kotjiwaṋa tjOvaisrael nu kaari tjaere omundu wozonganda okukara poo okutura mokati kOvaisrael. Tara membo ndi Insight on the Scriptures, Embo 1, pomuk. 95.
