Indu tji tu ri pu novakambure ovakwetu, eṱe tu kara noumune tjimuna wOmbara David ngwa tja: “Okokuwa nonyuṋe ovangu nomarumbi tji mave tura pamwe nave twara kumwe omitima.” (Epsalme 133:1) Ombwaneno yetu kai ya uriri nao. Auhe wetu ma sokukondja kutja pe kare ombwaneno ndjo.

1. Otjikaṋena tjiṋe tjapeke tji tu muna mokati kovakarere va Mukuru?

Indu tji wa karyangera ombongo ndji ri mehi rarwe, ove mape ya o ha zuu eraka ndi mari hungirwa mo, posi ya o munu kutja wa yakurwa norusuvero momiano omingi. Omena raye? Mena rokutja tji matu konḓonona Ombeibela tu ungurisa omambo yemwe apehe pu tu ri. Nu tu kondja okuraisasana orusuvero. Kainatja kutja twa tura pi, eṱe atuhe momerikotameneno wetu twa ‘wana kumwe nomutima umwe nouripura umwe.’—1 Ovakorinte 1:10.

2. Mo yenene okutjita vi kutja pe kare ombwaneno?

‘Suverasaneye tjiri nomutima auhe.’ (1 Petrus 1:22) Hapo mo yenene vi okuṱakamisa eronga ndo? Yandja ombango kovikaṋena oviwa vyavarwe, pendje nokutara koungundipare wawo. O kara pu na imba uriri mba suvera oviṋa mbi wa suvera, nungwari kondja okutjiwa ovakambure mbe nozongaro nḓa panguka ku inḓa ozoye. Eṱe wina matu yenene okuungura oukukutu okuisa mo ombangu ngamwa ndji mape ya atu kara na yo ku novakambure ovakwetu.—Lesa 1 Petrus 2:17. a

3. Mo tjiti vi indu tji wa pitasana oumune ku nOmukriste omukweṋu?

Eṱe kaweṱe ohomonena, nandarire kutja tu nombwaneno. Povikando tu pindikisa varwe poo nandarire atu hihamisasana. Ku nao, Embo ra Mukuru ri tu raera kutja ngatu “isirasane,” nu wina ri tja: “Mamu sokuisirasana otja Muhona punga e mu isira.” (Lesa Ovakolose 3:13.) Eṱe tu hihamisa Jehova povikando ovingi, posi ya eye u tu isira. Ku nao, Jehova u undjira ko kutja tu isire ovakambure ovakwetu. Indu tji wa munu kutja wa hihamisa omukweṋu, tenga po okuṱuna otjiṋa ho.—Lesa Mateus 5:23, 24. b

 KONḒONONA OUKOTO

4. Kondja okuhinokukara nombangu

Eṱe tu vanga okusuvera ovakambure ovakwetu avehe. Posi ya mape ya a rire ouzeu okuyakura omundu ngwa panguka ku eṱe. Otjikwaye tji matji yenene okutuvatera? Lesa Oviungura 10:34, 35, nu okuzambo hungirira komapuriro nga:

• Jehova u yakura ovandu voviwaṋa avihe okurira Ovahongonone ve. Omomuano uṋe mu mo yenene okuhorera ku ye ohunga nomuano mbu u vara varwe mba panguka kove?

• Ongaro iṋe yombangu ovandu ovengi momaturiro woye ndji ve raisa, ove ndji u hi nokuvanga okuhorera?

Lesa 2 Ovakorinte 6:11-13, nu okuzambo hungirira kepuriro ndi:

• Omomuano uṋe mu mo yenene okuraisa orusuvero kovakambure ovakweṋu avehe mba panguka kove?

5. Isirasaneye nu mu hangane

Jehova ka kara nouzeu okutuisira, nandarire kutja eye kamaa kahepa kutja eṱe tu mu isire. Lesa Epsalme 86:5, nu okuzambo hungirira komapuriro nga:

• Matu rihongo tjike metjangwa ndi ohunga nomuano Jehova me isira?

• Ongwaye tji u nondangi kondjesiro ye?

• Ovikwaye mbi mape ya avi tjiti kutja i rire ouzeu ku eṱe okuzuvasana ku na varwe?

Omomuano uṋe mu matu yenene okuhorera ku Jehova nokukara nombwaneno ku novakambure ovakwetu? Lesa Omiano 19:11, nu okuzambo hungirira kepuriro ndi:

• Indu omukweṋu tje ku pindikisa, mo tjiti vi kutja u rundurure ongaro ndjo?

 Povikando tjiva tu pindikisa varwe. Nu iho tji tja tjitwa matu sokutjita vi? Nyanda OKAVIDIO, nu okuzambo hungirira kepuriro ndi mari kongorere mba.

• Omukazendu omukambure mokavidio wa tjita vi kutja pe kare ohange?

 OKUYARUKIRA PO OUSUPI

Ove mo yenene okuvatera kutja pe kare ombwaneno mombongo, indu tji mo isire nokuraisa orusuvero kovakambure ovakweṋu avehe.

Okurizemburukisa

• Otjikeṋa tji matji ku vatere kutja u ise okukara nombangu?

• Hapo mo tjiti vi indu tji wa pitasana oumune ku nomukambure omukweṋu?

• Ongwaye tji mo vanga okuhorera komuano Jehova me isira varwe?