EHONGWA 35
Omiano mu matu yenene okutjita ozondando ozombwa
Atuhe tu hepa okutjita ozondando. Nu ozondando nḓu tu tjita ze yenena okutuṱuna momuano omuwa poo omuvi, nu ze ṱuna koupanga wetu na Jehova. Otjotjihorera, mape ya atu hepa okutoorora kutja matu kara pi, omomuano uṋe mu matu rihupisa oveni, nokutja matu vanga okukupa poo okukupwa. Indu tji matu tjiti ozondando ozombwa, matu yenene okukara nehupo ewa nokuyorokisa Jehova.
1. Mo yenene vi okuungurisa Ombeibela okukuvatera okutjita ozondando ozombwa?
Ngunda au hi ya tjita ondando, kumba ku Jehova okuningira ombatero, nu konḓonona Ombeibela okumuna kutja Jehova u noumune uṋe ohunga nondando ndjo. (Lesa Omiano 2:3-6.) Mozongaro tjiva, Jehova u tu pa erakiza ekahu. Nu otjiṋa otjisemba tji mo yenene okutjita, okuṱakamisa erakiza ndo.
Hapo tjike indu tji pe hi nerakiza ekahu rOmbeibela ndi mari ku raere kutja mo sokutjita vi? Jehova me ku urikire “ondjira mu mo sokuryanga.” (Jesaja 48:17) Omomuano uṋe? Mape kara omirari vyOmbeibela mbi mavi yenene okukuvatera. Omirari vyOmbeibela ouatjiri mbu tjiukisa omeripura noumune wa Mukuru. Potuingi, indu tji matu lese ehungi rOmbeibela, tu muna omuano Mukuru me fula ohunga notjiṋa kaaṋi ho. Indu tji twa munu omuano Jehova me fula, matu yenene okutjita ozondando nḓu maze mu yorokisa.
2. Ovikwaye mbi mo sokutara ko ngunda au hi ya tjita ondando?
Ombeibela i tja: “Omunazondunge u tjevera omikambo vye.” (Omiano 14:15) Ihi matji hee kutja ngunda atu hi ya toora ondando, matu sokutwa po oruveze okuripurira koviṋa mbi matu vanga. Otja tji mo tara koviṋa avihe mbi mo yenene okutjita, ripura omuini kutja, ‘Omirari viṋe vyOmbeibela mbi me yenene okuṱakamisa? Ondando iṋe ndji mai ndji pe ohange momuinyo? Omomuano uṋe ondando yandje mu mai ṱunu ku varwe? Nu tjinenenene, hapo oyo mai yorokisa Jehova?’—Deuteronomium 32:29.
Jehova u nousemba okuturaera kutja ovikwaye mbi ri ovisemba na imbi mbi he ri ovisemba. Indu tji matu utu okutjiwa nawa omirari vye nomatwako we, natu kara nonḓero okuyeṱakamisa, tu rongerisa omeritjiviro wetu womomutima. Omeritjiviro wetu womomutima ye tu vatera okuhaṋa pokati kouwa nouvi. (Ovaroma 2:14, 15) Tji twa rongerisa omeritjiviro wetu womomutima nawa, maye tu vatere okutjita ozondando ozombwa.
KONḒONONA OUKOTO
Rihonga omuano omirari vyOmbeibela nomeritjiviro wetu womomutima mu ye tu vatera okutjita ozondando ozombwa.
3. Yandjera Ombeibela okukuhongorera po
Omomuano uṋe omirari vyOmbeibela mu mavi tu hongorere po, indu tji matu tjiti ozondando? Nyanda OKAVIDIO, nu okuzambo hungirira komapuriro ngu maye kongorere mba.
-
Okukara nouyara wokuritoororera oveni ku heya tjike?
-
Ongwaye Jehova tje tu pa ouyara wokuritoororera oveni?
-
Ovikwaye mbye tu pa okutuvatera kutja tu yenene okutjita ozondando ozosemba?
Kutja tu mune otjihorera tjomurari wOmbeibela, lesa Ovaefese 5:15, 16. Okuzambo, hungirira komuano mu mo yenene ‘okuungurisa oruveze ndu u na rwo momuhingo omusemba’ kutja . . .
-
u lese Ombeibela aruhe.
-
u rire epanga ewa romorukupo, omunene omusemba, poo omuatje omuwa.
-
u kare pozombongarero zombongo.
4. Rongerisa omeritjiviro woye womomutima okutjita ozondando ozombwa
Indu tji pe nerakiza ekahu mOmbeibela ohunga notjiṋa kaaṋi, mape ya a rire oupupu okutjita ondando. Hapo tjike indu tji pe hi nerakiza ekahu? Nyanda OKAVIDIO, nu okuzambo hungirira kepuriro ndi mari kongorere mba.
-
Omikambo viṋe omukazendu omukambure mokavidio mbya toora, okurongerisa omeritjiviro we womomutima nokutjita ozondando nḓu maze yorokisa Jehova?
Ongwaye tji tu ha sokuningira varwe okututjitira po ozondando nḓu matu sokutjita oveni? Lesa Ovaheberi 5:14, nu okuzambo hungirira komapuriro nga:
-
Nandarire kutja oupupu okuningira varwe okututjitira ozondando, ovikwaye mbi matu sokupangura poo okurityera po oveni?
-
Ovikwaye mbi mavi yenene okutuvatera okurongerisa omeritjiviro wetu womomutima nokutuvatera okutjita ozondando ozombwa?
Tjimuna otjikarata tjehi, omeritjiviro wetu womomutima ye tu vatera okutjita ozondando ozombwa mehupo
5. Raisa ondengero komeritjiviro womomutima wovandu varwe
Ovandu ve tjita ozondando nḓa panguka. Matu raisa vi ondengero komeritjiviro womomutima wovandu varwe? Tara kozongaro mbari nḓa:
Ongaro 1: Omukazendu omukambure ngwa suvera okurihwa oviṋa vyokurimunikisa nawa momurungu, wa tjindire kombongo yarwe ku ku novakambure mbe ha tjaterwa okumuna varwe ave riṱunu tjinene momurungu.
Lesa Ovaroma 15:1 no 1 Ovakorinte 10:23, 24, nu u hungirire komapuriro nga:
-
Otja komazeva ngo, ovikwaye omukazendu omukambure ngo mbi mape ya a tjiti? Hapo mo tjiti vi indu tji u ri pu nomundu ngu nomeritjiviro womomutima nge hi nokumuyandjera okutjita otjiṋa tjorive, ngunda inga owoye amaye ku yandjere?
Ongaro 2: Omurumendu omukambure ma tjiwa kutja Ombeibela kai tjaere okunwa otjikariha, posi ya eye wa toorora okuhinokuṱuna kotjikariha. Eye wa ṋangwa komeerowapamwe pu ma munu ovakambure ovakwao amave nu otjikariha.
Lesa Omuzuvarise 7:16 nOvaroma 14:1, 10 nu u hungirire komapuriro nga:
-
Otja komazeva ngo, ovikwaye omurumendu omukambure mbi mape ya a tjiti? Hapo mo tjiti vi indu tji u ri pu nomundu ngu nomeritjiviro womomutima nge hi nokumuyandjera okutjita otjiṋa, ngunda inga owoye amaye ku yandjere?
Omikambo viṋe mbi tjita kutja tu tjite ozondando ozombwa?
1. Ningira Jehova okukuvatera okutoora omukambo omusemba.—Jakobus 1:5.
2. Konḓonona Ombeibela nomambo nga zikamena kOmbeibela okumuna omirari mbi mavi ku vatere. Ove wina mo yenene okupaha ombatero kOvakriste mbe nondjiviro.
3. Ripurira kokutja ondando ndji mo tjiti mai ṱunu vi komeritjiviro woye womomutima na inga wovandu varwe.
OVANDU TJIVA VE TJA: “Ove u nousemba okutjita otjiṋa ngamwa atjihe tji mo vanga. Hi nokuwari noumune wovandu varwe.”
-
Ongwaye tji twa sokuripurira koumune wa Mukuru, na koumune wovandu varwe?
OKUYARUKIRA PO OUSUPI
Tu tjita ozondando ozombwa indu tji matu ripurire komuano Jehova me fula ohunga notjiṋa kaaṋi, nokuripura kutja oviṋa mbi matu tjiti mavi vatere varwe poo mavi ve hihamisa.
Okurizemburukisa
-
Mo yenene vi okutjita ozondando nḓu maze yorokisa Jehova?
-
Mo yenene vi okurongerisa omeritjiviro woye womomutima?
-
Mo yenene vi okuraisa ondengero komeritjiviro womomutima wovandu varwe?
RIHONGA OVINGI
Mo yenene vi okutjita ozondando nḓu maze pamisa oupanga woye ku na Mukuru?
“Tjita ozondando nḓu maze yozike Mukuru” (Oruhungu, 15 ku April, 2011)
Rihonga ovingi ohunga nomuano Jehova me tu pa ondunge.
Tara kutja ovikwaye mbya vatera omurumendu umwe okutjita ondando onḓeu.
Rihonga ohunga nomuano mu mo yenene okuyorokisa Jehova, indu tji pe hi nerakiza ekahu rokutja mo sokutjita vi.
“Hapo ove aruhe u hepa erakiza rOmbeibela?” (Oruhungu, 1 ku Desemba, 2003)
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
