5 Indu Jesus tja muna otjimbumba tjovandu, eye wa ronda kondundu. Nu tja za nokuhaama, ovahongewa ve ve ya ku ye, 2 nu wa uta okuvehonga oviṋa mbi:

3 “Ovaṋingandu imba mbe tjiwa kutja ve hepa Mukuru, mena rokutja Ouhona womeyuru owawo.

4 “Ovaṋingandu imba mbe ri moruhoze, mena rokutja mave huhumiṋwa.

5 “Ovaṋingandu imba ozongozu, a mena rokutja mave rumata ehi.

6 “Ovaṋingandu imba mbe zera oviṋa ovisemba tjinene, mena rokutja Mukuru ma yenenisa ozonḓero zawo okuura.

7 “Ovaṋingandu imba mbe isira, mena rokutja owo mave isirwa.

8 “Ovaṋingandu imba mbe nomitima omiwa, mena rokutja mave munu Mukuru.

9 “Ovaṋingandu imba mbe tjita ohange, mena rokutja mave isanewa ovanatje va Mukuru.

10 “Ovaṋingandu imba mbe tatumisiwa mena rokutjita oviṋa ovisemba, mena rokutja Ouhona womeyuru owawo.

11 “Oweṋe ovaṋingandu indu ovandu tji mave mu yamburura, nokumutatumisa, nokuhungira ovizeze ohunga na eṋe mena randje. 12 Nyandeye nu mu yoroke, mena rokutja Mukuru me mu pe ondjambi onene. Ovandu mba hupire komurungu weṋu, wina va tatumisirwe mena rokuzuvarisa ombuze ya Mukuru.

13 “Oweṋe omongwa wouye mbwi, posi ya indu omongwa tji u hi nokutjata otjomongwa, owo kamaau ungurisiwa. Nungwari mau yumbwa pendje nau yatwa i yovandu.

14 “Oweṋe ondjerera youye.Otjihuro tji tja tungwa kombanda yondundu kamaatji horekwa. 15 Ovandu tji va yakisa erambe, owo kave twa kehi yotjiyemere, nungwari ve twa kotjitiha kutja ri ete ondjerera kovandu avehe mbe ri mondjuwo. 16 Momuano tjingewo, tjiteye kutja ondjerera yeṋu i yere komurungu wovandu, kokutja ve yenene okumuna oviungura vyeṋu oviwa nokuyandja ondjozikiro ku Iho ngu ri meyuru.

17 “Amu munu kutja mbe ya okuyekuisa po Omatwako poo omambo wOvaprofete. bAmi hi ere okuyeisa po, nungwari mbe ya okuyeyenenisa. 18 Tjiri me mu raere kutja ma rire oupupu keyuru nehi okuhinokukara po, pendje noleṱera imwe yOmatwako okuhinokukara po. Oviṋa avihe mbya tjangwa mo, mavi yenenisiwa. 19 Ku nao, auhe ngu hi nokuṱakamisa etwako eṱiṱiṱiṱi, nokuhonga varwe okutjita nao, kamaa yakurwa mOuhona womeyuru. Posi ya, auhe ngu kongorera Omatwako nokuhonga varwe okukara nonḓuviro ku wo, ma yakurwa mOuhona womeyuru. 20 Tjiri me mu raere kutja indu tji mu hi nongamburiro onyingi okukapita Ovafarisei c na imba mbe honga Omatwako, eṋe kamaamu yandjerwa okuhita mOuhona womeyuru.

21 “Eṋe mamu tjiwa kutja ovandu voruveze orukuru va raererwe kutja: ‘Eṋe kamu sokuzepa. Ingwi auhe ngu ma zepa ma etwa kotjombanguriro okuyekupangurwa.’ 22 Posi ya, me mu raere kutja auhe ngwa pindikira omukwao ma etwa kotjombanguriro. Nu auhe ngu ma hungire omukwao omambo omavi, ma pangurwa kOtjombanguriro Otjinene. Nu auhe ngu ma tja  omukwao eyova nu otjiporoporo, ma kanyonwa mu Gehenna. d

23 “Indu ove tji mo eta ombunguhiro e yoye ku Mukuru, nu o zemburuka kutja omukweṋu we ku pindikire, 24 yesa ombunguhiro f yoye komurungu wotjipunguhiro. Rutenga twende u katjite ohange ku nomukweṋu, nu okuzambo u yekuyandja ombunguhiro g yoye.

25 “Indu omundu tji ma vanga okukutwara kotjombanguriro, zengurura ouzeu mbwo tjimanga. U zengurura ngunda amu ri mondjira okuyenda kotjombanguriro. Tjarwe mape ya e ku yandja komupangure, nu omupangure e ku pe omberero nu e ku yandja komukarere wouhona. Okuzambo o paterwa monḓorongo. 26 Ami tjiri me ku raere kutja ove ko nokupita ngandu tji wa sutu ovimariva vyoye avihe.

27 “Eṋe mwa zuvire kutja: ‘Ko nokukatuka ko orukupo.’ 28 Posi ya ami me mu raere kutja auhe ngu ma tara komukazendu noruhuro wa katuka orukupo momeripura we. 29 Ku nao, indu eho roye tji mari ku putarisa, homona nu u ri imbirahi. Onawa okupandjarisa otjiṋepo tjimwe tjorutu rwoye, pendje norutu rwoye aruhe okunyonwa mu Gehenna. h 30 Nu indu eke roye tji mari ku putarisa, konda nu u ri imbirahi. Onawa okupandjarisa otjiṋepo tjimwe tjorutu rwoye, pendje norutu rwoye aruhe okunyonwa mu Gehenna. i

31 “Nu wina kwa za: ‘Auhe ngwa teya orukupo ku nomukazendu we, ma sokumupa ombapira yokuteya orukupo.’ 32 Posi ya ami me mu raere kutja omurumendu ka sokuteya orukupo, ndoovazu omukazendu we ka tjitire oruvakiro. j Indu omurumendu tja teya orukupo, eye mape ya a tjiti kutja omukazendu we ma katuke orukupo. Nu omundu auhe ngwa kupu omukazendu ngo, wina wa katuka orukupo.

33 “Eṋe wina mamu tjiwa kutja ovandu voruveze orukuru va raererwe kutja: ‘Ove ko sokutjita oruyano nu o he ru yenenisa. Ove mo sokutjita avihe mbi wa kwizikira Jehova.’ 34 Posi ya, ami me mu raere kutja amu yana oparukaze.mu yana keyuru, mena rokutja otjihavero tjouhona wa Mukuru tji ri ngo. 35 Nu amu yana kehi, mena rokutja oro oruveze Mukuru pe ṱizira ozombaze ze. Nu amu yana koJerusalem, mena rokutja iho otjihuro tja Mukuru. 36 Amu yana nomiinyo vyeṋu, orondu kamaamu tjiti kutja ondjise imwe i rire ombapa poo onḓorozu. 37 Indu tji mwa tja mamu tjiti otjiṋa, eṋe tji tjiteye. Indu tji mwa tja kamu nokutjita otjiṋa, amu tji tjiti. Indu tji mamu hungire oviṋa nokuhinokuvitjita, mamu horere kOmudiaboli.

38 “Eṋe mwa zuvire kutja: ‘Eho keho neyo keyo.’ 39 Nungwari, ami me mu raere kutja: O rwisa omundu omurunde.Indu omundu tje ku vete orupyu kotjitama tjimwe, wina mu yandjera kutja me ku vete orupyu kotjitama iho tjarwe. 40 Nu indu omundu tji ma vanga okukutwara kotjombanguriro mena rokutja ma vanga okukambura ombanda yoye yomoukoto, mu pa indji yokombanda wina. 41 Nu indu omundu ngu ri mouvara tje ku ningire okutjita otjiṋa, tjita ovingi okukapita imbi mbye ku ningire.  42 Indu omundu tje ku ningire otjiṋa, mu pa. Nu indu omundu tji ma vanga okuyazema k otjiṋa okuza kove, o tja kako.

43 “Eṋe mwa zuvire kutja: ‘Suvera omukweṋu nu u tonde omunavita na ove.’ 44 Posi ya, ami me mu raere kutja suvereye ovanavita na eṋe nokukumbira imba mbu mave mu tatumisa. 45 Indu tji mwa tjiti nao, eṋe mamu raisa kutja mu horera ku Tate weṋu womeyuru. Eye u yerisa eyuva kovandu ovavi novawa. Nu u tjita kutja i roke kovandu mbe tjita oviṋa oviwa na imba mbe tjita oviṋa ovivi. 46 Indu tji mwa suvera imba mbe mu suvera uriri, kamaamu munu ondjambi. Nandarire ovasutise votjimariva tjouhona l ve tjita nao. 47 Nu indu tji mamu raisa ouwa komapanga weṋu uriri, eṋe kamu nokutjita otjiṋa tjapeke. Orondu ovandu voviwaṋa vyarwe wina ve tjita nao. 48 Eṋe mamu sokuraisa orusuvero okuura, tjimuna Iho womeyuru tje tjita.

6 “Amu tjiti oviṋa oviwa komurungu wovandu okuritjatisa ku wo. Indu tji mwa tjiti nao, Iho womeyuru ke nokumupa ondjambi. 2 Ku nao, indu tji mo yandja oviṋa ku varwe, o tjivisa kovandu tjimuna omundu tji ma posisa ohiva. Imbwo oomuano imba mbe tjita aayo ovasemba mbu ve tjita mozondjuwo zomaworonganeno wombongo. a Owo ve tjita nao kokutja ovandu ve ve tange. Ami tjiri me mu raere kutja indjo ondjambi aiyerike ndji mave munu. 3 Posi ya indu tji mo tjitire varwe oviṋa oviwa, o tjivisa kovandu. 4 O tjiti kutja ovandu ve mune oviṋa oviwa mbi mo tjitire varwe. Okuzambo Iho ngu muna avihe me ku pe ondjambi.

5 “Wina, indu tji mamu kumbu amu ritjindi tjimuna imba mbe tjita aayo ve tjita oviṋa ovisemba. Owo va suvera okukurama nokukumba mozondjuwo zomaworonganeno wombongo b na momivanda vyotjihuro kokutja ovandu ve ve mune. Ami tjiri me mu raere kutja indjo ondjambi aiyerike ndji mave munu. 6 Posi ya indu tji mo kumbu, hita metuwo roye, u pate omuvero, nu u kumbe ku Iho womeyuru. Iho womeyuru ngu ha munika posi ya ngu muna avihe me ku pe ondjambi. 7 Indu tji mo kumbu, o yarukire po omambo tjingewo rukwao na rukwao. Ovandu mbe hi nokutjiwa okurikotamena ku Mukuru ve tjita nao. Owo ve muna kutja Mukuru ma puratene ku wo mena rokutja ve kumba ozongumbiro ozonde. 8 Amu kara tjimuna wo. Iho ma tjiwa imbi mbi mamu hepa nandarire ngunda amu hi ya ningira.

9 “Mamu sokukumba nai:

“‘Tate wetu ngu ri meyuru, matu kumbu kutja ovandu ve raise ondengero kena roye. 10 Nu matu kumbu kutja Ouhona c woye u honapare kombanda yehi, nokutja oviṋa vi tjitwe kombanda yehi otja kombango yoye, tjimuna tji vi tjitwa meyuru. 11 Arikana tu pa ovikurya d meyuva randino. 12 Tu isira koviṋa ovivi mbi tu tjita, otja tji twa isira imba mbe tjita oviṋa ovivi kweṱe. 13 Nu tu vatera indu tji matu rorwa, nokututjevera komunaurunde.’

14 “Ku nao, indu tji mwa isire varwe koviṋa ovivi mbi ve mu tjiti, Tate weṋu womeyuru wina me mu isire. 15 Posi ya tji mu hi nokuisira varwe koviṋa ovivi mbi va tjiti kweṋe, Tate weṋu ke nokumuisira indu tji mwa tjiti oviṋa ovivi.

16 “Indu tji mamu ritjaere kovikurya, amu tjiti kutja ovandu ve mune kutja mamu ritjaere kovikurya, tjimuna ovandu mbe tjita aayo ovasemba. Owo ve ningisa ondjenda kokutja varwe ve tjiwe kutja mave ritjaere kovikurya. Tjiri me mu raere kutja indjo ondjambi aiyerike ndji mave munu. 17 Posi ya indu tji mo ritjaere kovikurya, ṱuna ozondjise zoye nokurikoha momurungu. 18 Tji wa tjiti nao ovandu kamaave  munu kutja mo ritjaere kovikurya. Tate woye ngu ri meyuru nga rire ngwe ku munu. Okuzambo Iho ngu muna avihe me ku pe ondjambi.

19 “Iseye okuungura oukukutu kutja mu rire ovatumbe nokupwika omauini kombanda yehi. Orondu oupuka e nomureru mavi yenene okuvinyona, nu mavi yenene okuvakwa i yomarunga. 20 Nungwari, ungureye oukukutu okutjita oviṋa Mukuru ngu ri meyuru mbye muna kutja ovinanḓengu. Orondu meyuru oupuka f nomureru kamaavi yenene okuvinyona, nu omarunga kamaaye yenene okuvivaka. 21 Mena rokutja oviṋa mbi ri ovinanḓengu tjinene kove, ombi u ripura na vyo aruhe.

22 “Omeho woye ye ri tjimuna erambe ndi ku pa ondjerera. Indu omeho woye tji maye yandja ombango koviṋa ovisemba, ove mo kara nondjerera ndji mo hepa. 23 Posi ya indu omeho woye tji ye tara koviṋa mbi he ri oviwa, orutu rwoye aruhe maru kara monḓorera. Tjiri otjihihamise indu ondjerera ndji ri move tji ya rire onḓorera.

24 “Kape nomundu ngu ma yenene okuungurira ovahona vevari. Indu tja suvere umwe, eye ma tondo ingwi owarwe, nu tje ri omuṱakame ku umwe, eye kamaa raisa ondengero ku ingwi owarwe. Ku nao, indu ovimariva tji vi ri oviṋa ovinanḓengu mehupo reṋu, kamaamu yenene okukarera Mukuru.

25 “Ku nao, me mu raere kutja, iseye okurikenda ohunga nokutja mamu ri ye poo mamu nu ye, nu iseye okurikenda ohunga nokutja mamu zara ye. Omiinyo vyeṋu ominanḓengu tjinene okukapita ovikurya, nu otutu tweṋu otunanḓengu okukapita ozombanda nḓu mu zara. 26 Yandjeye ombango kouzera. Owo kau kunu poo okukonda nokupwika ovikokotwa, posi ya Iho womeyuru u u risa. Eṋe oweṋe ovananḓengu tjinene pouzera. 27 Kape nomundu ngu ma yenene okuweza nandarire oiri imwe komuinyo we mokurikenda. 28 Nu wina, omena raye tji mu rikenda ohunga nozombanda? Rihongereye okuza koumbloma mbu hapa mokuti. Owo kau ungura oukukutu poo okuungura ozombanda, 29 posi ya ami me mu raere kutja nandarire Ombara Salomo ke na pe rihwikikire nawa tjimuna oumbloma mbwi. 30 Mukuru u tjita kutja oumbloma mbwi u munike nawa, nandarire kutja u hapa eyuva rimwe nu eyuva rarwe au kukuta nu ovandu ave u nyosa. Ku nao, eye me mu tjitire ovingi nandarire kutja kamu nongamburiro yomasa. 31 Amu rikende kutja mamu ri tjike, poo mamu nu tjike, poo mamu rizara tjike. 32 Mena rokutja ovandu mbe rikenda ohunga noviṋa mbi, owomba mbe hi nokutjiwa Mukuru. Iho womeyuru ma tjiwa rukuru kutja mamu hepa oviṋa avihe mbi.

33 “Tjiteye kutja Ouhona wa Mukuru, nonḓuviro yeṋu ku ye vi rire oviṋa ovinanḓengu tjinene mehupo reṋu, nu Mukuru me mu pe avihe mbi mamu hepa. 34 Ku nao, amu rikende ohunga neyuva ndi mari kongorere ko. Eyuva ndi mari kongorere ko ri nomerikendero waro omape. Eyuva arihe ri nomauzeu waro.

7 “Iseye okupangura ovandu varwe kokutja eṋe oveni amu ha pangurwa. 2 Eṋe mamu pangurwa momuano mu mu pangura varwe, nu mamu tjindwa momuano mu mu tjinda varwe. 3 Omena raye tji u muna okatekero komuti meho romukweṋu, posi ya tji u ha munu otjiti otjinene meho roye omuini? 4 Poo ongwaye tji mo raere omukweṋu kutja, ‘Eta mbi isa mo okatekero komuti ku ke ri meho roye,’ ngunda meho roye amu notjiti otjinene. 5 Munavineya, rutenga isa mo otjiti otjinene tji tji ri meho roye, nu okuzambo otji mo yenene okumuna nawa kutja u ise mo okatekero komuti ku ke ri meho romukweṋu.

6 “Amu yandja oviṋa vya Mukuru kozombwa nu amu yumbu oviṋa vyeṋu ovihuze kozombinda. Indu tji mwa tjiti nao, ozo maze  yata ku vyo uriri nu okuzambo aze tanauka okumurwisa.

7 “Kayendeye komurungu okuningira ku Mukuru oviṋa mbi mamu hepa, neye me mu pe. Kayendeye komurungu okupaha nu mamu munu imbi mbi mamu hepa. Kayendeye komurungu okuningira ku ye kutja me mu hitise, nu eye me mu paturura. 8 Auhe ngu ma ningire ma pewa, nu auhe ngu ma paha ma munu, nu auhe ngu ma ningire okuhita ma patururirwa. 9 Otjingaperi kutja omuatje woye tje ku ningire ovikurya, ove ko nokumupa ewe. 10 Poo tje ku ningire ehundju, ove ko nokumupa onyoka. 11 Nandarire kutja mu tjita oviṋa ovingi ovivi, eṋe mu tjiwa okuyandja oviyandjewa oviwa kovanatje veṋu. Ku nao, mamu yenene okukara nongamburiro kutja Iho weṋu womeyuru ma yandja oviṋa oviwa ku imba mbe mu ningira.

12 “Avihe mbi mamu vanga kutja ovakweṋu ve tjite kweṋe, eṋe wina nga rire mbi mwa tjiti ku wo. Inga onge ri omahongero wOmatwako nOvaprofete. g

13 “Hitireye momuvero imbwi omukwaṋi, mena rokutja omuvero imbwi omuparanga omunene tjinene nu u twara konyoneno, nu ovengi ve hitira mu wo. 14 Posi ya omuvero nondjira ndji twara komuinyo oyo ongwaṋi, nu ovandu ovaṱiṱi uriri ombe i muna.

15 “Ṱakamiseye ovandu mbe ya kweṋe nokukorovizeze mena ra Mukuru. Owo ve tjita aayo ozongozu tjimuna ozonḓu, posi ya mouatjiri owo ve ri tjimuna ovipuka vyomokuti mbi nondjara nu mbi mavi vanga okumuhihamisa. 16 Tjimuna tji mu tjiwa omuti okuza kotjihape, eṋe mamu tjiwa ovandu mba okuza kovitjitwa vyawo. h Eṋe kamaamu vaza omandjembere komuti womakuya poo ovihape vyoutji i kozohongwe. 17 Momuano tjingewo, omuti omuwa u eta ovihape oviwa, posi ya omuti omuvi u eta ovihape ovivi. 18 Omuti omuwa kamaau eta ovihape ovivi, nu omuti omuvi kamaau eta ovihape oviwa. 19 Omuti mbu hi nokueta ovihape oviwa, u kondwa nau yumbwa momuriro. 20 Momuano tjingewo, eṋe mamu yenene okumuna ovandu mbe korovizeze mena ra Mukuru, otja kovitjitwa vyawo. j

21 “Kaauhe ngu ma tja u ndji karera ngu ma rire orupa rwOuhona womeyuru, nungwari owomba aveyerike mbe tjita ombango ya Tate ngu ri meyuru. 22 Eyuva mari ya ovengi tji mave ya kwami nokutja: ‘Muhona, Muhona, eṱe twa hungira ohunga na ove ku varwe, twa ungurisa ena roye, twa ungurisa ousemba woye okupitisa ozombepo ozombi. Twa tjita ovihimise ovingi mena romasa woye. Ko nokutuzemburuka?’ 23 Okuzambo ami me ve raere kutja: ‘Ami hi na pu mbe mu tjivirwe. Za poeye pu ami, vatjiteye vouvi.’

24 “Ku nao, auhe ngu ma puratene kwami nokutjita imbi ami mbi me hungire, eye u ri tjimuna omundu onongo ngwa tunga ondjuwo ye kombanda yewe enene. 25 Indu ombura tji ya roka naku pupu, naku ya otjivepo otjinamasa tji tje riveta mondjuwo, oyo kai wire mena rokutja ya tungwa kombanda yewe enene. 26 Posi ya, ingwi auhe ngu ma puratene komambo wandje nokuhinokuyetjita, eye ma sana ku nomundu eyova ngwa tunga ondjuwo ye kombanda yomuheke. 27 Indu ombura tji ya roka naku pupu, naku ya otjivepo otjinamasa tji tje riveta mondjuwo, oyo ya wira pehi nu ai nyonoka oparukaze.”

28 Indu Jesus tja mana okuhungira, otjimbumba tjovandu tja himisirwe i yomuano mbwaa hongo, 29 mena rokutja eye ee ve hongo momuano mbwau raisa kutja u nomasa nga za ku Mukuru, nu kaa hongo tjimuna ovandu mbaave ve hongo Omatwako. k