1, 2. Omomuano uṋe Jesus ma rira omuhongore onongo?

 NGATU tje mu ri mouyenda motjihuro otjiwa nu mamu hongorerwa i omundu ngu ma tjiwa otjihuro nawa. Nu ootjikando otjitenga ku eṋe okuya motjihuro hi, okutja mamu ṱaṱere komambo aehe omuhongore ngwi ngu ma hungire. Povikando tjiva, mape ya amu zeri okumuna otuveze tjiva otuwa motjihuro hi tu mu hiya urikirwa ngunda. Nungwari tji mwa pura komuhongore weṋu ohunga notuveze twi, eye ke nokumuraera ngandu oruveze tji rwa yenene ku ye okumuurikira otuveze two. Otja oruveze tji maru kayenda, eṋe mamu yende amamu tjaterwa i ondjiviro ye, orondu me mu raere oviṋa mbi mamu sokutjiwa moruveze ndu mamu hepa okuvitjiwa.

² Ovakriste vatjiri ve ri mongaro otjingeyo ndjo, yovaryange. Eṱe wina tu rihonga nonḓero ohunga notjihuro otjiwatjiwa, “otjihuro tji tji nomazikameno omazeu,” tji tji ri Ouhona waMukuru. (Hebr. 11:10) Indu Jesus tja ri kombanda yehi eye aa hongo ovemukongorere ovingi ohunga nOuhona mbwo. Nu hapo wa zira omapuriro wawo aehe nokuveraera oviṋa avihe ohunga nOuhona moruveze rumwe? Kako. Eye wa tja: “Ami ingee mbi noviṋa ovingi okumuraera, nungwari nambano eṋe kamaamu vi uru.” (Joh. 16:12) Otjomuhongore onongo movahongore avehe, Jesus kena pa yandja ouzeu kovahongewa ve mokuvetjivisa oviṋa mbyaave ha yenene okutjinda.

3, 4. (a) Jesus aa hongo vi ovandu ovaṱakame ohunga nOuhona waMukuru? (b) Matu kakonḓonona tjike mekondwa ndi?

³ Jesus wa hungira omambo nga tjangwa mu Johanes 16:12 mongurova ye osenina kombanda yehi. Jesus atja yenena vi okuhonga ovandu ovaṱakame ohunga nOuhona waMukuru kombunda yonḓiro ye? Eye wa raera ovaapostele ve kutja: ‘Ombepo youatjiri, mai mu hongorere mouatjiri auhe.’ (Joh. 16:13) Matu yenene okuvara ombepo ondjapuke otjomuhongore womuretima. Oyo omuano Jesus mbwe ungurisa okuhonga ovemukongorere oviṋa ngamwa avihe mbi mave vanga okutjiwa ohunga nOuhona waMukuru moruveze ndu mave hepa okuvitjiwa.

⁴ Indjeye tu tare kutja ombepo yaJehova aai hongorere vi Ovakriste vatjiri okumuna ondjiviro yatjiri ohunga nOuhona. Rutenga matu tara kokutja twe ya vi kondjiviro yokutja Ouhona waMukuru wa uta ruṋe okuhonapara. Okuzambo matu katara kutja ovanane vOuhona mbwi oowaṋi, ve nomaundjiro watjike nokutja  imba mbu mave riwisa kehi yOuhona mbwi oouṋe. Korusenina, matu katara kutja ovakongorere vaKristus va muna vi omazuviro omawa ohunga nokutja okurira ovaṱakame kOuhona ku kamburira mo tjike.

5, 6. (a) Ovakonḓonone vOmbeibela va ri noumune uṋe woposyo ohunga nomazikiro wOuhona, noruveze rwomakondero? (b) Ongwaye oumune woposyo mbwo tji u ha sokutupa omakeyakeyero ohunga nokutja Jesus tjiri aa hongorere ovakongorere ve?

⁵ Otja tji twa muna mEkondwa 2 rembo ndi, oure wozombura ozengi Ovakonḓonone vOmbeibela aave munu kutja ombura ndji 1914 mai rire ombura onanḓengu momayenenisiro womakwizikiro wOmbeibela. Posi yokutja, oruveze ndwo aave kambura kutja omeero waKristus ya uta mombura ndji 1874, nu eye wa uta okuhonapara meyuru mombura ndji 1878, nokutja Ouhona kau nokuzikwa nga mu Seninaṋi wombura ndji 1914. Omakondero aaye sokukara ko okuza kombura ndji 1874 nga ku indji 1914 naye yanda momaworonganisiro wovatwirisiwa okutwarewa keyuru. Hapo omazuviro omavi ngo maye tu pe omakeyakeyero wokutja Jesus tjiri aa hongorere ovandu ovaṱakame mbo okupitira mombepo ondjapuke?

⁶ Kako, katjiperi! Ripura rukwao ohunga notjisasanekero pomautiro wekondwa ndi. Ndovazu ovaryange mba aave ripura oviṋa nokupura omapuriro omengi ohunga notjihuro hi, mape hee kutja omuhongore kari nondjiviro osemba tje ha zirire omapuriro wawo aehe oruveze ndwo po? Kako katjiperi! Momuano otjingewo, nandarire kutja ovakarere vaMukuru povikando tjiva wina ve kondja okutjiwa ohunga nondando yaJehova ngunda oruveze rwombepo ondjapuke okuvehongorera kouatjiri mbwo aru hiya yenena, oukahu kutja Jesus u ve hongorera. Okutja ovandu ovaṱakame ve yakura omavyuriro nu ve rundurura oumune wawo nomerisusuparisiro.—Jak. 4:6.

7. Ovakarere vaMukuru va serwa ondaya yokutjiwa ouatjiri uṋe wOmbeibela?

⁷ Mozombura nḓa kongorera kombura ndji 1919, ovakarere vaMukuru va serwa ondaya yokumuna ondjerera onyingi youatjiri wOmbeibela. (Lesa Epsalme 97:11.) Mombura ndji 1925, pa pitisiwa orupa ndwa nana ombango yovengi tjinene mokambo nga The Watch Tower, ndwa ri nepu rOtjiingirisa ndi “Ongwatero yotjiwaṋa.” Orwo rwa yandja otjiraisiro otjikahu okuza mOmatjangwa tjokutja Ouhona waMukuru mbu honaparerwa i Messias wa zikwa mombura ndji 1914, otjomayenenisiro womakwizikiro wotjisasanekero tjomukazendu womeyuru ngu ma panduka, ngwa tamunwa mOmavandururiro ekondwa 12. a Orupa ndwi komurungu rwa raisa kutja omauzeu nondatumisire ndje ya kovakarere vaJehova mozombura nḓo, vya ri oviraisiro ovikahu kutja Satan wa nakaurwa okuza keyuru nu wa ri “nomazenge omanene, tjinga ama tjiwa kutja u noruveze orusupi uriri.”—Omavan. 12:12.

8, 9. (a) Ounanḓengu wOuhona waMukuru wa uta okumunikwa ruṋe? (b) Omapuriro yeṋe ku matu kahungirira ko?

⁸ Ouhona hapo ounanḓengu pu pe ṱa pi? Mombura ndji 1928, okambo nga The Watch Tower ka uta okuraisa kutja Ouhona ounanḓengu tjinene kombanda yondjamo ndja za motjisuta tjonguturiro. Otjiperi kutja okupitira mOuhona mbu honaparerwa i Messias mbwi, Jehova ma yapura ena re, ma raisa ousemba we womananeno nu ma yenenisa ozondando ze azehe ohunga novandu.

⁹ Oowaṋi mbu mave kahonapara puna Kristus mOuhona  mbwo? Oowaṋi kombanda yehi mbu mave riwisa kehi yOuhona mbwo? Nu ovakongorere vaKristus mave sokuungura oviungura viṋe?

10. Oure woruveze orure ovakarere vaMukuru va ri nomazuviro yeṋe ohunga novandu mba 144 000?

¹⁰ Ozombura ozengi komurungu wombura ndji 1914, Ovakriste vatjiri aave tjiwa rukuru kutja ovakongorere vaKristus ovaṱakame 144 000 mave kahonapara puna ye meyuru. b Ovakonḓonone vOmbeibela mbwo va muna kutja otjivaro ho otjivaro tjatjiri nokutja tja uta okuyenenisiwa okuza meserewondo etenga.

11. Imba mbu mave karira ovakupwa vaKristus, poo ovahonapare va puna ye, va yenda amave hara ondjiviro iṋe ohunga notjiungura tjawo kombanda yehi?

¹¹ Nu hapo imba mbu mave karira ovakupwa vaKristus, poo ovahonapare va puna ye va pewa oviungura vyaye ngunda ave ri kombanda yehi? Owo va muna kutja Jesus aa yandja ombango tjinene kotjiungura tjokuzuvarisa, nokutja aatji hitasana ku noruveze rwomakondero. (Mat. 9:37; Joh. 4:35) Otja tji twa muna mEkondwa 2, owo aave munu kutja oruveze rwomakondero maru kambura ozombura 40, nu maru yanda indu ovatwirisiwa tji mave twarewa keyuru. Nungwari, mena rokutja oviungura vya kayenda komurungu kombunda yozombura 40 tji za kapita, aape hepwa omakahururiro. Nai tu tjiwa kutja oruveze rwomakondero tjiri rwa uta mombura ndji 1914. Orwo rwa ri oruveze rwokuhaṋa ovikokotwa kozondombora, pu mape hee kutja, okuhaṋa Ovakriste ovatwirisiwa novaṱakame ku imba ovoposyo. Oruveze rwokuyandja ombango komawongero wotjihupe tja imba mbu mave i keyuru nambano rwa tumbuka!

12, 13. Otjisasanekero tjaJesus ohunga novasuko omurongo na ihi tjovimariva ovisilveri, vya yenenisiwa vi momayuva omasenina?

¹² Okuza kombura ndji 1919, Kristus aa hongorere omukarere omuṱakame nomunazondunge kutja ma yandje ombango tjinene koviungura vyokuzuvarisa. Mokuyandja otjiraisiro tjomayuva omasenina kovemukongorere, Jesus wa raisa kutja ovakongorere ve ovatwirisiwa mave kayendisa vi otjiungura tjokuzuvarisa. Omomuano uṋe? Motjisasanekero tje ohunga novasuko omurongo, eye wa raisa kutja ovatwirisiwa mave sokukara katumba, nave ṱakamisa oupanga wawo kuna Jehova tji mave vanga kutja ve kare norupa momukandi mbu mau tjitwa meyuru indu Kristus tji ma wanisiwa ku ‘nomukupwa’ we, mbe ri ovandu 144 000. (Omavan. 21:2) Okuzambo, motjisasanekero tje ohunga novimariva ovisilveri, Jesus wa honga kutja ovakarere ve ovatwirisiwa mave ungura  oukukutu mokuyenenisa oviungura eye mbye ve pa.—Mat. 25:1-30; 28:19, 20.

¹³ Oure weserewondo nda kapita Ovakriste ovatwirisiwa va raisa kutja ve ungura oukukutu nokutja ve ri katumba. Kunao, nokuhina omakeyakeyero okukara katumba kwawo maku serwa ondaya! Nu hapo oviungura vyomakondero mavi yandere pomaworonganisiro wotjihupe tja imba 144 000 uriri poo indee?

14, 15. Ovimbumba viṋe vine ku kwa hungirirwa membo ndi The Finished Mystery?

¹⁴ Ovarumendu novakazendu ovaṱakame oruveze orure aave vanga okutjiwa ohunga ‘notjimbumba otjinene’ tji tja tamunwa mOmavandururiro 7:9-14. Ngunda kandwa ri oruveze rwaKristus rwokutjiukisa kutja otjimbumba otjinene hi tji kuramena po uṋe, okutja ovingi mbyaavi hungirirwa ohunga nepu ndi vya pangukire tjinene kouatjiri oukahu mbu twa suvera nu mbu tu tjiwa ndino.

¹⁵ Mombura ndji 1917, embo ndi The Finished Mystery ra tja: “pena ovimbumba vivari mbi mavi i keyuru, nu pena vivari mbi mavi kara kombanda yehi.” Oouṋe mba ri movimbumba 4 vyovandu mbi? Otjimbumba otjitenga, mwa ri novandu 144 000 mbu mave kahonapara puna Jesus meyuru. Otjitjavari, mwa ri na imba votjimbumba otjinene. Moruveze ndwo aape kamburwa kutja otjimbumba otjinene aatji kuramene po Ovakriste ngunda mba ri mozokereka zoposyo. Owo va ri nongamburiro posi yokutja kaya ri nomasa yokuvevatera okuritoorera omuhunga omusemba. Okutja, owo tji va i keyuru mave kapewa ovihako vyokehi. Owo aave kambura kutja mape kara otjimbumba otjitjatatu tji matji kara kombanda yehi, ihi tjovandu “ovananḓengu voruveze orukuru,” tjimuna ooAbraham, Moses na varwe mba ri ovaṱakame. Nowo mave kara novihako ovinene pu imba ovotjimbumba otjitjaine, tjovandu mouye.

16. Ouatjiri uṋe wOmbeibela mbwe ya kondjerera mombura ndji 1923 na indji 1932?

¹⁶ Ombepo ondjapuke ya vatera vi ovakongorere vaKristus okuzuva nawa ouatjiri wOmbeibela mbu tu vara pondondo yokombanda ndino? Otjiṋa hi tja tjitwa kouṱiṱiṱiṱi okupitira motupa otuingi twondjerera youatjiri wOmbeibela ndji va muna. Komautiro wombura ndji 1923, okambo nga The Watch Tower ka yandja ombango kotjimbumba tji tji hi nomaundjiro wokuyenda keyuru tji matji kara kombanda yehi kehi yomahongorero waKristus. Mombura ndji 1932, okambo nga The Watchtower ka hungira ohunga na Jonadab (Jehonadab), ngwe rikuta ku nOmbara yaIsrael ondoororwa Jehu kutja ve rwise ongamburiro yoposyo. (2 Ozomb. 10:15-17) Okambo nga ka tja pe notjimbumba tjovandu moruveze rwetu mbe ri tjimuna Jonadab, oko komurungu ka weza kutja Jehova ma vatere kutja otjimbumba hi tji “tuurunge ovita vyaArmagedon” kutja tji kahupe kombanda yehi.

17. (a) Ouatjiri uṋe ounanḓengu wOmbeibela mbwe ya kondjerera mombura ndji 1935? (b) Omazuviro omape ohunga notjimbumba otjinene ya ṱuna vi kOvakriste ovaṱakame? (Tara kokaongo nga “ Onguturiro onene.”)

¹⁷ Mombura ndji 1935 pa munikwa ondjerera yarwe onanḓengu youatjiri. Pomaworonganeno omanene nga ri motjihuro tjaWashington, D.C., otjimbumba otjinene tja tjivisiwa kutja matji kara nomaundjiro wokukahupa kombanda yehi, tjimuna ozonḓu nḓa tamunwa mehungi raJesus ohunga nozonḓu nozongombo. (Mat. 25:33-40) Otjimbumba otjinene matji kara norupa  motjimbumba ‘tjozonḓu inḓa ozarwe’ Jesus nḓa tja: “Ozo wina mbi sokukezeeta.” (Joh. 10:16) Indu Mbuti J. F. Rutherford, tja tja: “Avehe mbe nomaundjiro wokuhupa nga aruhe kombanda yehi arikana ngave sekame,” ohinga yovandu avehe mba ri mbo va sekama! Eye wa tja: “Tareye! otjimbumba otjinene!” Ovengi va ri nondjoroka onene okuzuva kutja ve nomaundjiro waye koruyaveze.

18. Ovakongorere vaKristus va uta vi okuyandja ombango kotjiungura tjokuzuvarisa, nu kwa kongorera tjike?

¹⁸ Okuza koruveze ndwo Kristus wa raisira ovakongorere ve omuhunga wokutja ve tware ombango yawo kokuworonganisa ovandu avehe votjimbumba otjinene mbu mave tuurunga ondatumisire ondirise nokuhinotjipo. Kotjirutenga omaworonganisiro nga kaaye munika otjotjiṋa otjinanḓengu. Otjikando tjimwe Mbuti Rutherford wa tja: “Mape munika aayo ‘otjimbumba otjinene’ hi, katji nokurira otjinene.” Otjingaperi kutja nai tu tjiwa omuano Jehova mbwa sera otjiungura tjomakondero ondaya okuza koruveze ndwo! Kehi yomahongorero waJesus nombepo ondjapuke, ovatwirisiwa notjimbumba ‘tjozonḓu zarwe’ otja komakwizikiro waJesus mavi rire “orupanda rumwe rwozonḓu” ndu maru ungura pamwe kehi ‘yomurise umwe.’

19. Matu yenene vi okukara norupa mokukurisa otjimbumba otjinene?

¹⁹ Otjingi tjovandu ovaṱakame mave kahupa moparadisa kombanda yehi nga aruhe, kehi youvara waKristus novahonapare va puna ye 144 000. Katjiṋa otjiwa nao okuripurira komuano Kristus mbwa hongorera ovakarere vaMukuru kutja ve vaze kondjiviro ombwa youatjiri wOmbeibela ohunga nomaundjiro woruyaveze? Tjiri tu nondjingonekero onene okuraera imba mbu tu zuvarisira ohunga nomaundjiro ngo! Ngatu kondje okukara norupa orunene moviungura vyokuzuvarisa otja ozongaro zetu pu maze yandjere, kutja otjimbumba otjinene tji kayende komurungu okukura motjivaro. Okutjita nao maku eta ondjozikiro kena raJehova!—Lesa Lukas 10:2.

20. Otjira tjaSatan tja zikama motupa tuṋe, nu Ovakriste mape ya ave twa vi ouṱakame wawo moumba?

²⁰ Otja ovakarere vaMukuru tjaave rihongo ovingi ohunga nOuhona, owo aave hepa okuzuva nawa kutja okukara nouṱakame kohoromende yomeyuru ndji, ku kamburira mo tjike. Ohunga nepu ndi, mombura ndji 1922, okambo nga The Watch Tower ka raisa kutja pe novira vivari, otjira tjaJehova na ihi otjaSatan. Otjira tjaSatan tja zikama mozongetjefa, ozongamburiro zoposyo novira vyozopolitika. Imba mbe nouṱakame kOuhona waMukuru mbu honaparerwa i Kristus kave sokutwa ouṱakame wawo moumba mokurihitisa moviṋa ovivi mbi norupa notjira tjaSatan. (2 Kor. 6:17) Otjiṋa hi matji hee tjike?

21. (a) Omukarere omuṱakame wa rakiza vi ovakarere vaMukuru ohunga nozongetjefa ozonene? (b) Mombura ndji 1963, okambo nga The Watchtower ka tjivisa tjike ohunga na “Babilon otjinene”?

²¹ Ovikurya vyombepo mbi za komukarere omuṱakame vya tjiukisa omauhasemba nge tjitwa mozongetjefa ozengi nu vya rakiza ovakarere vaMukuru kutja ave he riyandjere okupukisiwa i okuriwongera omauini otja ovandu ovengi pu ve tjita. (Mat. 6:24) Momuano otjingewo, omambo wetu aaye yandja ombango tjinene kouatjiri ohunga nozongamburiro nḓe ri motjira tjaSatan. Mombura ndji 1963, okambo nga The Watchtower ka raisa oukahu kutja  “Babilon otjinene” katji kuramena po ozongamburiro zOvakriste voposyo uriri nungwari wina tji kuramena po ozongamburiro zoposyo mouye auhe. Okutja, otja tji matu kamuna ovingi mEkondwa 10 rembo ndi, ovakarere vaMukuru momahi aehe na mozombazu azehe va vaterwa kutja ve ‘pite mu tjo,’ nokurikohorora kovitjitwa vyozongamburiro azehe zoposyo.—Omavan. 18:2, 4.

22. Moruveze rwOvita vyOuye Ovitenga, otjingi tjovakarere vaMukuru omambo nge ri mOvaroma 13:1, aave ye zuu vi?

²² Nambano tjike ohunga novira vyozopolitika mbi ri motjira tjaSatan? Hapo Ovakriste vatjiri mave sokukara norupa movita nozombata nḓe kara pokati koviwaṋa? Moruveze rwOvita vyOuye Ovitenga, Ovakonḓonone vOmbeibela va uta okuzuva nawa kutja ovakongorere vaKristus kave sokukara norupa mokuzepa ovakwao. (Mat. 26:52) Posi yokutja, ovengi aave munu kutja omambo nge ri mOvaroma 13:1 ohunga nokuriwisa kehi “youhonapare” aaye hee kutja mave sokurikuta kotjira tjovita, okuzara omizaro vyovarwe vovita, nokutoora ovirwise; posi yokutja tji va ningirwa okuzepa omunavita, owo mave sokuyaha meyuru uriri.

23, 24. Moruveze rwOvita vyOuye Ovitjavari, twa ri nomazuviro yeṋe ohunga nOvaroma 13:1, nu ovakongorere vaKristus va vaterwa vi okuya kondjiviro youatjiri?

²³ Otja Ovita vyOuye Ovitjavari tjaavi utu mombura ndji 1939, okambo nga The Watchtower ka hungira oukahu ohunga nokuhina okutoorora omunda moviṋa vyouye. Okambo nga ka raisa oukahu kutja Ovakriste kave sokukara norupa oparukaze movita na mozombata nḓe kara pokati koviwaṋa mouye waSatan. Ondjivisiro ndjo tjiri ye ya moruveze ndu ri rwo! Kunao, ovakongorere vaKristus va yamwa kutja ave ha tura ondjo yokuzepa ndje ya koviwaṋa ovingi movita mbyo. Nungwari, okuutira mombura ndji 1929, omambo wetu aaye tja ouhonapare mbu hungirwa mOvaroma 13:1 kau kuramene po ozohoromende zovandu nungwari aau kuramene  po Jehova na Jesus. Aape hepwa omazuviro warwe omasemba ohunga nepu ndi.

²⁴ Ombepo ondjapuke ya hongorera ovakongorere vaKristus komazuviro omawa ngo mombura ndji 1962, indu okambo nga The Watchtower komayuva 15 ku Tjikukutu na inga 1 raTjitarazu tji wa hungirira oukahu ketjangwa rOvaroma 13:1-7. Korusenina, ovakarere vaMukuru va uta okuzuva nawa omurari womambo Jesus nga hungira indu tja tja: “Yandjeye ovyombara kombara, nu imbi ovyaNdjambi yandjeye ku Ndjambi.” (Luk. 20:25) Ovakriste vatjiri nai ve tjiwa kutja ouhonapare mbwi, ozohoromende zovandu mouye nokutja Ovakriste vatjiri mave sokuriwisa kehi yawo. Posi yokutja, omeriwisiro nga ye nomirari. Indu ozohoromende zovandu tji ze tu ningire okutjita oviṋa mbi hi nokuraisa onḓuviro ku Jehova Mukuru, eṱe matu ziri otja ovaapostele tji va zira indu tji va tja: “Omundu wa sokukara nonḓuviro ku Ndjambi komeho yokukara nonḓuviro kovandu.” (Oviung. 5:29) MEkondwa 13 no 14 rembo ndi, matu kerihonga ovingi ohunga nokutja ovakarere vaMukuru va ungurisa vi omurari wokutja kave sokutoorora omunda.

25. Ongwaye tji u nondangi onene komuano ombepo ondjapuke mu yekuvatera okumuna omazuviro omawa ohunga nOuhona waMukuru?

²⁵ Ripura noviṋa avihe ovakongorere vaKristus mbi va hongwa ohunga nOuhona meserewondo nda kapita. Twe rihonga ohunga nokutja Ouhona waMukuru wa zikwa ruṋe meyuru, nokutja ounanḓengu pu pe ṱa pi. Tu nondjiviro osemba ohunga nomaundjiro yevari kovandu ovaṱakame, wokukahupa meyuru na inga wokuhupa kombanda yehi. Nu tu tjiwa kutja matu raisa vi ouṱakame wetu kOuhona waMukuru ngunda amatu riwisa kehi yomauhonapare wouye. Ripura omuini kutja, ‘Ami e tje tjiwa ouatjiri ounanḓengu mbwi andakuzu Jesus Kristus kavaterere omukarere omuṱakame kombanda yehi kutja ma zuve ouatjiri mbwo nokutuhonga?’ Tjiri ondaya onene okuhongorerwa i Kristus nombepo ondjapuke!