1, 2. Otjisanekero tjiṋe tji ma tji raisa ohepero kongurameno kokutoora ondando ohunga noviṋa vyongamburiro?

EṰE matu yenene vi okutjiwa Mukuru? Oko okunahapero okukonḓonona omahongero aehe wozongamburiro ozengi are? Iho kamaatji yenenisiwa. Nandarire kutja eṱe matu yenene okutjita iho, eṱe matu tjiwa vi kutja omahongero yeṋe nge ri omasemba?

² Mena rokutja kuna omahongero nga haṋika ohunga naMukuru, eṱe tjiri matu hepa omuano wokutjiwa ouatjiri, ongurameno ndji mai yakurwa i ovandu avehe. Okusaneka: Ngatu tje pe na ozombata poruveze romarandero ohunga noure werapi. Ingwi omurandise ma tja erapi oro ozometa ndatu, nungwari ingwi omurande ma munu kutja oro esupi kehi yanao. Otjiṋa ihi matji zengururwa vi? O mokusaneka indi erapi nokayereke kozometa.

3. Omenaratjike Ombeibela tji ya tjangwa?

³ Opo pena otjisaneke poo ongurameno yokuzikamisa omapu wozongamburiro? Ii, oyo Ombeibela. Mukuru wa tjangisa Ombeibela kutja ovandu akuhe ve rihonge ouatjiri ohunga naye. Omayovi omangete wayo ya pirindwa. Oyo ya rundururwa ombomba poo motupa momaraka okukapita 2 100. Ape kangamwa omundu ma yenene okulesa ouatjiri ohunga naMukuru meraka re omuini.

4. Ondjivisiro iṋe ndji ri mOmbeibela?

⁴ Ombeibela otjiyandjewa otjihuze okuza  kuMukuru. Oyo i handjaura oviṋa mbi tu hena atja tu tjiwa momuhingo warwe. Oyo i turaera ohunga na imba mbe hupa momaturiro wozombepo. Oyo i vandurura ouripura, outjiukwa woundu nondando yaMukuru. Oyo i hungira ohunga nomatjindiro we wovandu oure wozombura omayovi nḓa kapita. Oyo i hungira oviṋa mbi mavi tjitwa moruyaveze. Nu oyo i raisa kutja ondjira ndji twara komuinjo waaruhe matu i munu vi.

5. Otjihorera tjiṋe tji matji raisa kutja Ombeibela oyo i ri mombwaneno nomakonḓononeno?

⁵ Pena omapu omengi ngu maye yenene okutuvatera okukambura kutja Ombeibela tjiri Embo raMukuru. Epu rimwe orondi rokutja Ombeibela oyo i ri ombwaneno nomakonḓononeno. Moruveze rwarukuru ovandu mouparanga wouye aave ripura kutja ehi rahavera kotjiṋa tjimwe poo otjikuao. Otjotjihorera, moAfrika kOutokero, ovandu aave kambura kutja ehi ra ṱaṱera konyoka ndje riyanga povikando 3 500 kombanda no kehi yehi. Nungwari omutjange wOmbeibela ozombura 3 500 nḓa kapita wa tjangere kutja Mukuru wa “rekarekisa ehi kombanda yopoṋa pu pe ri tjo,” otja ovakonḓonone tji ve raisa.—Job 26:7.

6. Otjiraisiro tjiṋe otjinenenene tjokutja Ombeibela ya za kuMukuru?

⁶ Otjiraisiro otjinenenene tjokutja Ombeibela tjiri ya za kuMukuru otjo hi tjomaṱakamisiro omasemba mokuhunganeka oruyaveze. Mukuru tjiri u tjiwa oruyaveze, keri tjimuna ovaprofete wovandu, avihe mbi ma hungire aruhe vi rira ouatjiri.

7. Omaprofetero wOmbeibela yeṋe tjiva nga yenenisiwa morukapitaveze?

⁷ Omaprofetero wOmbeibela omasere ya yenenisiwa moruveze rwarukuru. Otjotjihorera, ozombura 700 komeho Ombeibela ya hungira mondja kutja Jesus ma kwaterwa motjihuro tja Betlehem nu opo pa tjitwa nao. (Mika 5:2; Mateus 2:3-9) Pendje nomaprofetero warwe omengi ohunga naJesus, Ombeibela wina oyo ya hunganeka kutja Jesus ma pundukwa i omusuko nu ma hororwa kovimariva oviselveri 30. Omaprofetero ingo wina ya rira ouatjiri. Tjiri kape nomundu ngwa tja yenena okuhunganeka oviṋa imbyo.—Jesaja 7:14; Sakarja 11:12, 13; Mateus 1:22, 23; 27:3-5.

8. Omaprofetero wOmbeibela yeṋe tjiva nge yenenisiwa kundino nu owo ye heya tjike?

⁸ Omaprofetero omengi wOmbeibela oyo  ye yenenisiwa moruveze rwetu. Inga i tjiva wawo:

• “Otjiwaṋa tjimwe matji sekamene otjiwaṋa otjikwao, nouhona umwe mau rwisa ouhona oukwao. Mamu kara omanyinganyingiro wehi omatirise, nondjara nomitjise momahi pekepeke.”—Lukas 21:10, 11.

• ‘Ourunde mau takavara.’—Mateus 24:12.

• ‘Momayuva omasenina ovandu mave ripahere oveni ouwa, nu mave rire omakorokope novehinanḓuviro kovanene vawo, ovanautwe novindandi mba tonda ouwa; noveriyere vatjinene; owo mave rarukire oviṋa komeho yokusuvera Mukuru.’—2 Timoteus 3:1-5, sasaneka EEP.

Ove mo itavere kutja oviṋa imbi vi tjitwa kundino? Ouatjiri nousemba womaprofetero wOmbeibela vi raisa kutja Ombeibela kambo rakauriri. Oro Embo raMukuru nda suvirirwa.—2 Timoteus 3:16.

9, 10. Otjikeṋa tji matji raisa kutja Mukuru kena pa yandjera ovandu okurundurura Ombeibela?

⁹ Ngatu tje oove omunangetjefa nu wa yandja orutuu romazeva kovaungura woye. Nu indu omunavita na ove tja rundurura ove mbi wa tjanga, ove mo tjiti vi? Ove kona ku ṱuna imbi mbya rundururwa are? Momuano otjingewo, Mukuru eye ka yandjere ovandu okurundurura ouatjiri wEmbo re Ombeibela.

¹⁰ Imba mba rora okurundurura omahongero wEmbo raMukuru kave toṋene. Eṱe tji matu sasaneke Ombeibela ndji tuna yo kundino kuna omatjanguririro wOmbeibela yarukuru, oyo i yemwe. Ihi matji raisa kutja Ombeibela oyo kai na puya rundururwa momakapitiro wozombura.