Mape ya mo itavere kutja ondjiviro onḓiṱi ndji wa toora ohunga novirihongwa ovitenga vyOmbeibela ye kurisa orusuvero rwoye ku Jehova. Matu sokutjita kutja orusuvero ndwo ru kurireko. (1 Petrus 2:2) Omaundjiro woye womuinyo waaruhe maye rekareka kokutja ove mo kayenda komurungu okutumbuka popezu na Mukuru mokurihonga Embo re poo indee.​—Lesa Johanes 17:3; Judas 21.

Otja ondjiviro yoye ohunga na Mukuru pu mai kuru, ongamburiro yoye wina opu mai kurireko. Ongamburiro ndjo mai ku vatere kutja u tjate ku Mukuru. (Ovaheberi 11:1, 6) Oyo mai ku hingi kutja u ritanaure komauvi woye nu u tjite omarundurukiro ngu maye heperwa po mehupo roye.​—Lesa Oviungura 3:19.

Otja ovandu avehe tji ve tjaterwa okuraera ovandu varwe ombuze ombwa, ove mape ya o kara nonḓero yokuraera varwe ohunga na imbi mbi we rihonga. Otja tji mo kayenda komurungu okurihonga Ombeibela, otji mo rihongo okuungurisa Ombeibela okukahururira varwe ongamburiro yoye mu Jehova nombuze ombwa.​—Lesa Ovaroma 10:13-15.

Ovandu ovengi ve uta okuraera omapanga poo ovazamumwe vawo ombuze ombwa. Ungurisa ongengezero tji mo hungire na wo. Pendje yokuveraera kutja ongamburiro yawo i ri posyo, ve raera ohunga nomakwizikiro Mukuru nga tjita. Wina zemburuka kutja ovandu potuingi ve tjaterwa i otjikaro tjoye otjiwa kombanda yaimbi mbi mo hungire.​—Lesa 2 Timoteus 2:24, 25.

Okukonḓonona Embo raMukuru maku ku vatere okukura moupanga woye na Mukuru. Kombunda, mo yenene okukara noupanga  wapeke na Jehova. Nu tjiri mo yenene okurira owaJehova omuini, no rire okaṋepo keṱunḓu re.​—Lesa 2 Ovakorinte 6:18.

Ove mo yenene okukurisira ko oupanga woye na Mukuru indu tji wa kayenda komurungu okukonḓonona Embo re. (Ovaheberi 5:13, 14) Ningira umwe wOvahongonone vaJehova me rihonge Ombeibela puna ove nombatero yembo ndi Ombeibela mai yenene okutuhonga tjike? Otja tji mo rihongo ovingi okuza mEmbo raMukuru, ove wina opu mo kara nondoṋeno mehupo roye.​—Lesa Epsalme 1:1-3; 73:27, 28.

Ombuze ombwa i za ku Jehova, Mukuru omunauṋingandu. Ove mo yenene okutumbuka popezu na Mukuru indu tji wa tumbuka popezu novandu ve. (Ovaheberi 10:24, 25) Ove tji wa kayenda komurungu nozongondjero zoye zokutjata ku Jehova, ove mo kamuna omuinyo waaruhe. Okutumbuka popezu na Mukuru tjiri ootjiṋa otjiwatjiwa ove tji mo yenene okutjita.​—Lesa 1 Timoteus 1:11, EEP; 6:19.