OZOMBURA ngambeno 40 komurungu woruveze, Ovahongwa vOmbeibela va tjiukisire kutja mombura 1914, maku kara ovitjitwa ovinanḓengu. Ovyo vya ri ovingetjitwa, nu oviraisiro viṋe mbi raisa kutja ombura ndji 1914 ya ri ombura onanḓengu?

Mu Lukas 21:24 Jesus wa tja: “Jerusalem matji jatua i ovahaiden, nga omayuva uovahaiden tji je urisiua.” [EEP] Jerusalem tja ri  otjihuro ohongora tjomuhoko wOvajuda, nu mu tjo omu mwa ri ohoromende yozombara nḓaaze kongorerasana okuza morukwato rwOmbara David. (Epsalme 48:1, 2) Posi yokutja ozombara nḓa za pangukire kozombara zarwe. Ozo za ri “kotjihavero tjouhona tji tja zikwa i Muhona,” otja ovakuramene po vaMukuru omuini. (1 Ekuruhungi 29:23) Jerusalem okutja aatji kuramene po ouhonapare waJehova.

Ouhonapare waMukuru mbwi wa uta ruṋe ‘okuyatwa i ovahaiden,’ nu omomuano uṋe? Ihi tja tjitwa mombura ndji 607 K.O.Z. indu Jerusalem tji tja haverwa i Ovababilon. ‘Otjihavero tjouhona tji tja zikwa i Muhona,’ katja ri nomundu, mena rokutja ozombara zorukwato rwaDavid kaze yandjererwe okuhonapara rukwao. (2 Ozombara 25:1-26) ‘Omayatero’ nga atjaye karerera nga aruhe po? Kako, orondu omuengeli Gabriel wa raera Maria kutja Jesus ma pewa “otjihavero tjouhona tjaihe mukururume David.” (Lukas 1:32, 33) Okutja Jerusalem atjatji yatwa poo okuhaverwa i ovahaiden ngandu Jesus tja rire Ombara.

 Otjitjitwa otjinanḓengu hi atjatji tjitwa ruṋe? Jesus wa raisa kutja ovahaiden mave honapara oure woruveze ndwa tuwa po. Ehungi ndi ri mu Daniel ekondwa 4 mari tu pe omuhunga wokutja oruveze ndwo maru kara noure mbu ṱa pi. Oro mari tu raere ohunga noruroto rwOmbara Nebukadnesar yaBabilon ndu maru tjama nomaprofetero. Eye wa muna omuti omure tjinene mbwa kewa. Otjiunda tjomuti mbwo kaatji hapa orondu tja kutirwe nekwamo rotjitenda nongoporo. Omuengeli wa tjivisa kutja, ngape kapite ‘ozombura hambombari.’—Daniel 4:10-16.

MOmbeibela, omiti povikando tjiva aavi ungurisiwa okukuramena po ouhonapare. (Esekiel 17:22-24; 31:2-5) Okutja omakondero womuti nga maye sasaneke kutja ouhonapare waMukuru, mbwaau kuramenwa po i ozombara mu Jerusalem, mau isapewa vi. Posi yokutja, otjirimunikise matji raisa kutja ‘omayatero waJerusalem’ kaye nakukarerera, nungwari maye kara “ozombura hambombari” uriri. Inḓa kazombura otja ozombura azehe, nungwari ozombura zomaprofetero uriri. Nu hapo ozombura nḓa ze noure mbu ṱeki pi?

Omavandururiro 12:6, 14 mari raisa kutja ozombura ndatu nohinga ze ṱa ‘pomayuva eyovi nomasere yevari nomirongo hamboumwe.’ Okutja ozombura hambombari (3 1⁄2 + 3 1⁄2) ze ṱeki pomayuva 2 520 (1 260 + 1 260). Nungwari ovahaiden ingee aave ‘yata’ ouhonapare waMukuru kombunda yomayuva 2 520 indu Jerusalem tji tja za nokuyandekwa. Oukahu kutja omahunganekero nga maye kamburire mo oruveze orure tjinene okukapita omayuva 2 520. Okuisira ku Numeri 14:34 na Esekiel 4:6, ngu maye hungire ohunga ‘nombura imwe keyuva arihe,’ okutja “ozombura hambombari” zomaprofetero maze hee ozombura 2 520.

Ozombura nḓa 2 520 za uta mu Seninaṋi (Oktomba) 607 K.O.Z., indu Jerusalem tji tja haverwa i Ovababilon na indu ombara yorukwato rwaDavid tji ya isakewa kotjihavero tjayo tjouhona. Oruveze ndwi rwa yanda mu Seninaṋi mombura ndji 1914. Oruveze ndwo ‘omayuva wovahaiden’ otji ya yanda, nu Jesus Kristus a zikwa otja Ombara yaMukuru yomeyuru. *—Epsalme 2:1-6; Daniel 7:13, 14.

 Otja Jesus pa hunganeka, otjiraisiro ‘tjomeero’ we otjOmbara yomeyuru tja munikira kovitjitwa ovinene mbi tjitwa mouye, tjimuna ovita, ondjara, omanyinganyingiro wehi nomitjise. (Mateus 24:3-8; Lukas 21:11) Ovitjitwa mbyo vi hongonona oukahu kutja mombura ndji 1914 Ouhona womeyuru waMukuru otji wa zikwa nu okuza kombura ndjo ‘omayuva omasenina’ wouye mbwi otji ya uta.—2 Timoteus 3:1-5.