Embo ndi “omukandjira” popengi ri ungurisiwa komundu ngu tenga po nu ngu patururira varwe ondjira kutja ve kayende mo. Jesus wa ri tjimuna omukandjira orondu eye wa hindwa kombanda yehi okuyekuzuvarisa ombuze ndji yandja omuinyo nokupaturura ondjira kondjamo yovandu. (Mateus 20:28) Ndino, ovakongorere vaJesus ve kayenda mozondambo ze okukondja pu mave yenene kutja ve “kaise po ovandu ovahongewa” ve. (Mateus 28:19, 20) Tjiva va uta okukara norupa motjiungura tji tu isana otjiungura tjovakandjira.

Omukandjira omundu ngu zuvarisa oruveze aruhe. Ovahongonone vaJehova avehe ovazuvarise vombuze ombwa. Posi yokutja tjiva vawo va rongerisa ehupo rawo kutja ve karere otjovakandjira ovakarerere mbe ungura ozoiri 70 momueze auhe motjiungura tjokuzuvarisa. Kutja ve yenene okutjita nao, ovengi ve ungura eyuva ehinga poo omayuva tjiva motjivike moviungura vyawo vyokurihupisa. Movirongo mu mu nouhepe ounene wovazuvarise vombuze ndji, ovazuvarise tjiva ve zikwa otjovakandjira vapeke mbe ungura ozoiri 130 poo zokombanda yanao motjiungura tjokuzuvarisa. Ovakandjira va kowa mehupo ndi hi noviṋa ovingi, ave nongamburiro kutja Jehova me ve pe avihe mbi mave hepa. (Mateus 6:31-33; 1 Timoteus 6:6-8) Imba mbe ha yenene okukara norupa motjiungura tjokuzuvarisa oruveze aruhe, ve yenena okuungura otjovakandjira ovavatere. Ihi tji ve vatera kutja ve yerurure ozoiri zawo ko 30 poo 50 momueze.

Omukandjira u hingwa i orusuvero ndwe na ro ku Mukuru novandu. Otja Jesus, eṱe tu muna ounahepero wokutja ovandu ve tjiwe ohunga na Mukuru nozondando ze. (Markus 6:34) Nu eṱe tu nondjiviro ndji mai yenene okuvevatera nai nokuvepa omaundjiro omawa woruyaveze. Orusuvero kovandu ondu hinga omukandjira okuyandja oruveze nomasa we motjiungura tjokuvatera varwe. (Mateus 22:39; 1 Ovatesalonika 2:8) Momuano mbwi wina ongamburiro yomukandjira i kurirako. Eye u tumbuka popezu na Mukuru nu u muna ondjoroka onyingi tjinene.​—Oviungura 20:35.

• Ove otjo tja omukandjira omundu ngu ri vi?

• Otjikeṋa tji tji hinga ovandu ovengi okurira ovakandjira voruveze aruhe?