Ena raMukuru oJehova nu oro ri heya kutja “eye ma yenenisa ondando ngamwa aihe ndje ripurire ko.” Jehova oMukuru omunamasaaehe nu eye wa mema oviṋa avihe. Eye u nomasa wokutjita ngamwa atjihe tja tye okutjita.

MOtjiheberi, ena raMukuru aari tjangwa nozoleṱera ine. MOtjiingirisa, ozoleṱera nḓo ze kuramenwa po i omapose nga YHWH poo JHVH. Ena raMukuru ri munika mOmatjangwa omatengatenga wOtjiheberi povikando ape 7 000. Ovandu mouye auhe ve ungurisa omaisaneno pekepeke wena ndi Jehova, nu ve ri isana momuano mbu tjiukwa tjinene meraka rawo.

▸ Ekond. 1, opar. 15

Omutjange wOmbeibela oMukuru, nungwari eye wa ungurisa ovarumendu kutja ve i tjange. Ihi tja sana na indu otjiuru tjoskole tji tja raere omutjangerepo woskole okutjanga orutuu ndu nomeripura wotjiuru tjoskole. Mukuru wa ungurisa ombepo ye ondjapuke okuvatera ovatjange vOmbeibela okutjanga omeripura We. Ombepo yaMukuru ye ve vatera momiano omingi, povikando tjiva aave munu ovirimunikise poo aave kara noturoto nu okuzambo aave tjanga oviṋa mbyo.

▸ Ekond. 2, opar. 5

Inga omahongero nge kahurura ouatjiri wOmbeibela. Okutara kotjihorera, omurari mbu tja, “Otjikaro tjovandu ovavi tji zunḓa omihingo omiwa,” u tu honga kutja ovandu mbu tu kara pamwe mave yenene okutuhwanga ovikaro vyawo momuano omuwa poo omuvi. (1 Ovakorinte 15:33) Wina omurari mbu tja, “Ihi omundu tji ma kunu, wina otji ma kondo,” u tu honga kutja kamaatu yenene okuyepa ovikongorereko vyovitjitwa vyetu.—Ovagalate 6:7.

▸ Ekond. 2, opar. 12

Indji ombuze okuza ku Mukuru. Mape ya ai rire omakahururiro wombango yaMukuru, omahongero ohunga nomeritjindiro omakohoke, erakiza poo ombanguriro. Wina mape ya ai rire ombuze ohunga noviṋa mbi mavi katjitwa moruyaveze. MOmbeibela mu na omaprofetero omengi nga yenenisiwa rukuru.

▸ Ekond. 2, opar. 13

Omaprofetero omengi wOmbeibela ohunga na Messias ya yenenisiwa i Jesus. Tara kokaonga nga “ Omahunganekero ohunga na Messias.”

▸ Ekond. 2, opar. 17, omambo wokehi.

Jehova wa mema ehi kutja ri rire oparadisa nomaturiro kovandu mbe mu suvera. Nu ondando ye ngunda kai ya runduruka. Moruyaveze rwopopezu Mukuru ma ka isa po ovitjitwa ovivi na yandja omuinyo waaruhe kovakarere ve.

▸ Ekond. 3, opar. 1

Satan omuengeli ngwa uta okupirukira Mukuru. Eye u i sanewa Satan, ndi mari hee kutja “Omupirukire” orondu u rwisa Jehova. Nu wina u isanewa Omudiaboli, ndi mari hee kutja “Omuyamburure.” Eye wa rukwa ena ndi mena rokutja u kora ovizeze ohunga na Mukuru nu u pukisa ovandu.

▸ Ekond. 3, opar. 4

Jehova wa mema ovaengeli rukuru ngunda e hi ya mema ehi. Owo va memwa kutja ve kare meyuru. Ku novaengeli vokombanda yomangete esere. (Daniel 7:10) Owo ve nomana, nu ve novikaṋena mbya panguka. Ovaengeli ovaṱakame noverisusuparise kave vanga kutja ovandu ve rikotamene ku wo. Owo ve novihako pekepeke noviungura mbya haṋika. Tjiva vyoviungura mbi okukarera komurungu wotjihavero tjaJehova tjouhona, okutwara ombuze ye, okutjevera nokuhongorera ovakarere vaJehova kombanda yehi. Owo wina ve yandja omberero ye nokuyandja oruvara koviungura vyokuzuvarisa. (Epsalme 34:7; Omavandururiro 14:6; 22:8, 9) Moruyaveze, owo mave karwa puna Jesus movita vyaArmagedon.—Omavandururiro 16:14, 16; 19:14, 15.

▸ Ekond. 3, opar. 5; Ekond. 10, opar. 1

Otjiṋa atjihe tji tji ri momitima vyetu, mouripura wetu poo otjiṋa tji matu tjiti nu tji tji ri ombirukira nombango yaJehova, otjo ouvi. Mena rokutja ouvi u teya oupanga wetu kuna Mukuru, eye we tu pa omatwako nomirari mbi tu vatera kutja atu ha tjitire owina ouvi. Jehova kombutiro wa memene oviṋa avihe ohomonena, posi yokutja Adam na Eva tji va toorora okuhina okukara nonḓuviro ku Jehova, owo va tjita ouvi nu kava ri ohomonena rukwao. Owo va uta okukurupa, kombunda owo va ṱa, nu mena rokutja eṱe twa rumata ouvi okuza ku wo, eṱe wina tu kurupa nokukoka.

▸ Ekond. 3, opar. 7; Ekond. 5, opar. 3

Imbi ovita vyaMukuru mbi mavi yekuyandeka ouye waSatan nouvi auhe.

▸ Ekond. 3, opar. 13; Ekond. 8, opar. 18

Ouhona waMukuru ohoromende Jehova ndja zikamisa meyuru. Jesus Kristus ongu honapara otjOmbara yohoromende ndji. Moruyaveze, Jehova ma kaungurisa Ouhona mbwi okuisapo ouvi auhe. Ouhona waMukuru mau kahonaparera ehi arihe.

▸ Ekond. 3, opar. 14

Mukuru wa mema Jesus komurungu woviṋa avihe. Jehova wa hinda Jesus kombanda yehi kutja me yekuṱira ovandu avehe. Kombunda yonḓiro ye, Jehova we mu pendura movakoke. Jesus nai u honapara meyuru otjOmbara yOuhona waMukuru.

▸ Ekond. 4, opar. 2

Ombeibela ya hunganeka kutja Messias me ya ruṋe. Ihi matji tjitwa komaandero woruveze ndu isanewa ozombura 69 povikando 7, nḓa uta mombura ndji 455 K.O.Z. na ze yanda mombura ndji 29 O.Z.

Matu tjiwa vi kutja za yanda mombura ndji 29 O.Z.? Ozombura 69 povikando 7 za uta mombura ndji 455 K.O.Z. indu Nehemia tja vaza moJerusalem na utu okutungurura otjihuro. (Daniel 9:25; Nehemia 2:1, 5-8) Tji twa vara ozombura 483 (69 x 7) okuza kombura ndji 455 K.O.Z., maze tu twara kombura ndji 29 O.Z. Mombura ndji Jesus otja papitisiwa na rire Messias!—Lukas 3:1, 2, 21, 22.

 Omahunganekero otjingeyo wina ya hunganeka kutja ozombura nḓa 483 tji za manuka mape kara ozombura zarwe 7. Nu mokati kozombura 7 nḓa, mombura ndji 33 O.Z., Messias otjaa sokuzepewa mombura nu momautiro wombura ndji 36 O.Z., ombuze ombwa yOuhona waMukuru otjaai sokuzuvarisiwa moviwaṋa avihe nu kakOvajuda uriri.—Daniel 9:24-27.

▸ Ekond. 4, opar. 7

Ombeibela i honga kutja Jehova Mukuru ongu ri Omuute nokutja eye wa mema Jesus komurungu wokumema oviṋa avihe vyarwe. (Ovakolose 1:15, 16) Jesus kangu ri Mukuru Omunamasaaehe. Eye kena pa tja u ṱeki pu Mukuru. Moruveze rwanao, eye wa tja: “Tate, Eye tjinga e ri omunene pu Ami.” (Johanes 14:28; 1 Ovakorinte 15:28) Posi yokutja, ozongamburiro tjiva ze honga kutja Mukuru ovandu vetatu mumwe: Ihe, Omuna nombepo ondjapuke. Omambo nga “oomukuru vetatu mumwe” kaye mo mOmbeibela. Omahongero nga ye ri posyo.

Ombepo ondjapuke omasa waMukuru, nge ungurisa okuyenenisa ombango ye. Ombepo ondjapuke kamundu. Okutara kotjihorera, Ovakriste ovakuru ve ‘urisirwe nOmbepo Ondjapuke,’ nu Jehova wa tja: “Me tirire Ombepo yandje kombanda yovandu avehe.”—Oviungura 2:1-4, 17.

▸ Ekond. 4, opar. 12; Ekond. 15, opar. 17

Omena ratjike Ovakriste vatjiri tji ve ha ungurisa otjikoroise momerikotameneno wawo?

1. Otjikoroise tja ungurisiwa momerikotameneno woposyo oruveze orure. Moruveze orukuru otjo aatji ungurisiwa momerikotameneno wokoviutwa na movitjitwa vyotukatuko vyoviwaṋa ovinavisenginina. Mozombura 300 ozondenga kombunda yonḓiro yaJesus, Ovakriste kaave ungurisa otjikoroise momerikotameneno wawo. Kombunda yanao, Omuhonapare wOvaroma wena Constantine ongwa tjita kutja otjikoroise tji rire otjihako tjOukriste. Otjihako hi aatji ungurisiwa okutjiukisa ongamburiro yOukriste kovandu ovengi. Posi yokutja otjikoroise katji notjiṋa na Jesus Kristus. Embo ndi New Catholic Encyclopedia ra kahurura kutja: “Otjikoroise tji munika mozombazu zovahaidena na inḓa zokomurungu waKristus.”

2. Jesus kena pa ṱira kotjikoroise. Embo rOtjigrike nda torokwa otja “otjikoroise” ri heya “otjihenḓe” poo “omuti.”  Ombeibela ndji The Companion Bible i kahurura kutja: “Kape notjiṋa momatjangwa wOtjigrike [mEtestamente Epe] tji tji raisa kutja omiti vivari.” Jesus wa ṱira kotjihenḓe.

3. Jehova ka vanga kutja tu ungurise oviserekarera momerikotameneno wetu ku ye.—Eksodus 20:4, 5; 1 Ovakorinte 10:14.

▸ Ekond. 5, opar. 12

Jesus wa rakiza ovahongewa ve kutja ve zemburuke onḓiro ye. Owo ve tjita nao ombura aihe tji ya tjiti 14 ku Nisan, meyuva otjingero ndi Ovaisrael ndaave zemburuka Opaska. Omboroto nomavinu, mbi kuramena po orutu nombinḓu yaJesus vi ka raisiwa ku auhe ngwe ya kOmariro Omayapuke. Imba mbu mave kahonapara puna Jesus meyuru ve rya omboroto nokunwa omavinu. Imba mbe nomaundjiro wokuhupa kombanda yehi nga aruhe ve raisa ondengero mokuyenda kOmariro Omayapuke, posi yokutja owo kave ri omboroto nokunwa omavinu nga.

▸ Ekond. 5, opar. 21

MOmatjangwa wOtjiheberi nOtjigrike, embo ndi “omuinyo” aari ungurisiwa okuhungira ohunga (1) nomundu, (2) otjinamuinyo, (3) omuinyo womundu poo wotjinamuinyo. Kunao Ombeibela yetu yOtjiherero opu i zokutoroka embo ndi “omuinyo” otja “ovandu,” “ovinamuinyo,” “omuinyo womundu poo wotjipuka.” Tara kovihorera tjiva:

• Omundu. ‘Momayuva nga Noa tjiya ungura ihi otjitendeze, [“omiinjo,” EEP] ovandu ouṱiṱi mba ri motjitendeze, avehe kumwe hambondatu, va yamenwe i omeva.’ (1 Petrus 3:20) Imba, embo ndi “omuinyo” mari hee ovandu, okutja oNoa, omukazendu we, ovanatje vawo ovazandu vetatu novakazendu vawo.

• Otjinamuinyo. “Nu Ndjambi wa tja: ‘Momeva ngamu nyangatare ovinamuinyo ngamwa avihe, nozonḓera ngaze tuke  kombanda yehi mevaverwa reyuru!’” Okuzambo Ndjambi wa tja: “‘Ehi ngari ete ovinamuinyo otja komihoko vyayo: Ozonyanda nozongombe, novipuka mbi honahona, novipuka vyokuti otja komihoko vyavyo.’ Nu pa kara nao.”—Genesis 1:20, 24.

• Omuinyo womundu poo wotjinamuinyo. Okupitira mu Jeremia, Jehova wa raera Baruk na tja: “Ami me eta oumba kovandu avehe, nungwari ove mo taurisa omuinyo woye, ngamwa ku mo i.” (Jeremia 45:5) Indu Jesus, tja ri kombanda yehi, eye wa tja: “OwAmi ngu mbi ri omurise omuwa. Omurise omuwa u yandjera ozonḓu ze omuinyo we.”—Johanes 10:11.

  Okuweza ko, indu omundu tji ma tjiti otjiṋa ‘nomuinyo we auhe,’ mape hee kutja we riyandjere okutjita nao nu ma ungura otjiṋa ho oukukutu. (Mateus 22:37; Deuteronomium 6:5) Embo ndi “omuinyo” wina ri yenena okuungurisiwa okukahurura omundu ngu ri pokuṱa poo ngwa ṱu.—Job 33:22.

▸ Ekond. 6, opar. 5; Ekond. 15, opar. 17

MOmatjangwa wOtjiheberi nOtjigrike, embo ndi “ombepo” mOmbeibela ri heya oviṋa pekepeke. Nungwari oro wina ri heya otjiṋa tji tji ha munika kovandu, tjimuna ombepo poo omuinyo mbu suvanwa i ovandu novinamuinyo. Omambo nga wina ye hungira ohunga novandu vombepo nombepo ondjapuke oyo ndji ri omasa waMukuru. Ombeibela kai hongo kutja pe notjiṋa tji tji hupa komurungu kombunda yonḓiro yomundu.—Eksodus 35:21; Epsalme 104:29; Mateus 12:43; Lukas 11:13.

▸ Ekond. 6, opar. 5; Ekond. 15, opar. 17

Gehenna ena roruveze ndwa ri pendje yaJerusalem paape yumbwa nokunyosirwa ondova. Kape notjiraisiro kaaṋi tjokutja moruveze Jesus tjaari kombanda yehi ovandu novinamuinyo aavi nyosirwa nokutatumisirwa poruveze ndwi. Okutja Gehenna kai kuramene po oruveze ndu ha munika pu pe  tatumisirwa nokunyosirwa ovandu mba ṱu nga aruhe. Okutja indu Jesus tja hungira ohunga na imba mbu mave yumbwa mu Gehenna, eye aa hee omayandekero waaruhe.—Mateus 5:22; 10:28.

▸ Ekond. 7, opar. 20

Indji oyo ongumbiro Jesus ndja honga ovahongewa ve okuveraisira omuano wokukumba. Oyo i tjiukwa otjongumbiro ndji Tate yetu. Okutara kotjihorera, Jesus we tu honga okukumba kutja:

• “Ena roye ngari yapurwe”

  Tu kumba kutja Jehova ma kohorore ena re kovizeze avihe, kutja ovandu avehe meyuru na kombanda yehi ve yozike nokutenga ena raMukuru.

• “Ouhona woye ngau ye”

  Tu kumba kutja ohoromende yaMukuru i yekuyandeka ouye waSatan nokutja i honaparere ehi nokutjita kutja ri rire oparadisa.

• ‘Ombango yoye ngai tjitwe kombanda yehi’

  Tu kumba kutja ombango yaMukuru kehi i yenenisiwe kutja ovandu avehe mbe nonḓuviro nu ohomonena ve hupe nga aruhe mOparadisa otja Jehova paa vanga indu tja mema ovandu.

▸ Ekond. 8, opar. 2

Jehova wa yandja otjisuta tjonguturiro kutja ma yame ovandu kouvi nonḓiro. Otjisuta tjonguturiro tja ri otjisuta tjaatji hepwa okuyarura po imbi omuinyo ohomonena omurumendu omutenga Adam mbwa pandjarisa, nokuṱuna oupanga wovandu kuna Jehova. Mukuru wa hinda Jesus kehi kutja me yekuṱira ovanauvi avehe. Mena ronḓiro yaJesus, ovandu avehe mave yenene okukahupa nga aruhe nokurira ohomonena.

▸ Ekond. 8, opar. 21; Ekond. 9, opar. 13

Omaprofetero nge ri mu Daniel ekondwa 4 ye tu honga kutja Mukuru ma ziki Ouhona we mombura ndji 1914.

Omahunganekero: Jehova wa yandja oruroto kOmbara Nebukadnesar ohunga nomuti omure tjinene mbwa kewa. Oruroto ndwi ru raisa kutja kotjiunda tjomuti mbwi, kwa twirwe ekwamo rotjitenda nongoporo okutjaera kutja omuti mbwi au ha hapa nga ‘ozombura hambombari’ tji za kapita. Okuzambo mau hapa rukwao.—Daniel 4:1, 10-16.

Omaprofetero nga maye hee tjike ku eṱe?: Omuti mau kuramene po ouhonapare waMukuru. Oure wozombura ozengi Jehova aa ungurisa ozombara moJerusalem okuhonaparera otjiwaṋa tjaIsrael. (1 Ekuruhungi 29:23) Posi yokutja ozombara nḓo kaza ri nouṱakame ku ye rukwao nu ouvara wazo wa yanda. Jerusalem tja yandekwa mombura ndji 607 K.O.Z. Indwi ondwa ri omautiro “wozombura hambombari.” (2 Ozombara 25:1, 8-10; Esekiel 21:25-27) Indu Jesus tja tja: ‘Omihoko vyarwe mavi tombo Jerusalem nga omayuva wawo wina tji ya kapita,’ eye aa hungire ohunga ‘nozombura hambombari.’ (Lukas 21:24) Okutja ‘ozombura hambombari’ kazena pu za yanda indu Jesus tja ri kombanda yehi. Jehova wa kwizika kutja ma ziki Ombara momaandero “wozombura hambombari.” Omahonaparero wombara ombe Jesus, mau eta ozondaya ozengi kovakarere vaMukuru kombanda yehi nga aruhe.—Lukas 1:30-33.

‘Ozombura hambombari’ ze noure mbu ṱa pi?: ‘Ozombura hambombari’ za ri noure wozombura 2 520. Tji twa vara ozombura 2 520 okuza kombura ndji 607 K.O.Z., maze tu twara kombura ndji 1914. Mombura ndjo Jehova otja zika Jesus, ngu ri Messias, otjOmbara yOuhona We meyuru.

 Hapo twa muna vi otjivaro hi 2 520? Ombeibela i tja ozombura ndatu nohinga ze ṱa pomayuva 1 260. (Omavandururiro 12:6, 14) Okutja ‘ozombura hambombari’ ze ṱeki pomayuva 2 520. Omayuva 2 520 ye ṱeki pozombura 2 520 okuisira komuano omayuva mu ye varwa momahunganekero wOmbeibela nge tja “ombura imwe keyuva arihe.”—Numeri 14:34; Esekiel 4:6.

▸ Ekond. 8, opar. 23

Embo ndi “omuengeli otjiuru” ri heya “omuengeli ohivirikwa.” Ombeibela i tamuna omuengeli otjiuru umwe uriri nu ena re oMikael.—Daniel 12:1; Judas 9.

Mikael ongu ri Omuhongore wotjimbumba tjovita tjovaengeli ovaṱakame. Omavandururiro 12:7 mari tja: “Mikael novaengeli ve va rwisire otjitjupamuriro, notjo wina tje ve rwisire novaengeli vatjo.” Embo rOmavandururiro ri tja Omuhongore wotjimbumba tjaMukuru tjovita oJesus, okutja Mikael ena raJesus rarwe.—Omavandururiro 19:14-16.

▸ Ekond. 9, opar. 4

Omambo nga ye heya oruveze indu tji maku tjitwa oviṋa ovihimise kombanda yehi ngunda Ouhona waMukuru au hi ya yandeka ouye waSatan. Omambo tjimuna ‘omaandero wouye mbwi’ na inga “Omeero wOmuna wOmundu,” ye ungurisiwa momaprofetero wOmbeibela nu ye hungira ohunga noruveze rumwe. (Mateus 24:3, 27, 37) ‘Omayuva omasenina’ ya uta indu Ouhona waMukuru tji wa uta okuhonapara meyuru mombura ndji 1914 nu maye yanda indu ouye waSatan tji wa yandekwa movita vyaArmagedon.—2 Timoteus 3:1; 2 Petrus 3:3.

▸ Ekond. 9, opar. 5

Ombendukiro orondu Mukuru tja kotora omundu ngwa ṱire komuinyo rukwao. Ombeibela i hungira ohunga nomahungi 9 wovandu mba pendurwa. Elia, Elisa, Jesus, Petrus na Paulus va pendura ovandu mba ṱire. Oviṋa mbi aavi tjitwa nomasa waMukuru porwawo. Jehova wa kwizika kutja ma pendura ovandu “ovawa novavi” kutja ve ture kombanda yehi. (Oviungura 24:15) Ombeibela wina i hungira ohunga na imba mbu mave pendurwa okukahupa meyuru. Ihi matji tjitwa indu imba mba toororwa poo mba twirisiwa i Mukuru ve kahupe meyuru puna Jesus tji va pendurwa .—Johanes 5:28, 29; 11:25; Ovafilipi 3:11; Omavandururiro 20:5, 6.

▸ Ekond. 9, opar. 13

Oundjai u kamburira mo oviṋa tjimuna, okukondja okuhakaena nozombepo, kutja okuyenda omuini poo okupitira monganga yomuzorondu poo mombetere. Ovandu mbe ungurisa oundjai ve tjita nao mena rokutja ve kambura momahongero woposyo wokutja ombepo yovandu mba ṱa i hupa komurungu kombunda yonḓiro yawo nokutja owo ve rira oviruru poo ozombepo ozonamasa. Ozondemone wina ze kondjisa okupukisa ovandu kutja ave ha kara nonḓuviro ku Mukuru. Okutara kozonyose nḓe kara momambo nondando yokuvanga okutjiwa oruyaveze, okuuka, okuvetera, oundjai, ovizerika, nokuvanga okukonḓonona oviṋa mbi tjitwa mouye wozombepo, avihe mbi vi notjiṋa noundjai. Omambo omengi, tjimuna nge ungurisa ozonyose okutjivisa oruyaveze rwomundu, ozomuvi, omizumbi, omanyando noviperendero vi tjita kutja ovandu ve mune aayo oundjai poo ozondemone kaze notjipo tji ze eta. Otuzo otuingi tu matu tjama nozonḓiro tjimuna okuhaama etando, okuyambera, omaisakero womakutu, okuravaera kovaṱi poo oviṋa ohamukwao na imbyo vi tu hakaenisa kuna ozondemone. Ovandu potuingi ve ungurisa ovipurukise tji mave kondjo okuungurisa omasa wozondemone.—Ovagalate 5:20; Omavandururiro 21:8.

▸ Ekond. 10, opar. 10; Ekond. 16, opar. 4

Jehova oMukuru Omunamasaaehe neye ongwa mema evaverwa arihe. (Omavandururiro 15:3) Kunao eye opazokurira Omuini woviṋa avihe nu u nouyara kombanda yoviutwa vye. (Epsalme 24:1; Jesaja 40:21-23; Omavandururiro 4:11) Eye wa zikamisa omatwako koviṋa avihe mbya uta. Jehova wina u nouyara wokuzika ovandu okurira ovanane. Eṱe tu yandja oruvara kousemba waMukuru womananeno indu tji matu mu raisire orusuvero nokukara nonḓuviro ku ye.—1 Ekuruhungi 29:11.

▸ Ekond. 11, opar. 10

Okuriiparekisira owina okuzepera owina okanatje ku ke hi ya kwatwa. Katjiṋa tji tji etwa i oumba poo mena rongaro yorutu rwomundu. Okuza koruveze okanatje tji ka ungurwa, oko kake rire orupa rwarwe rworutu rwaina. Nungwari oko ke rira okandu karwe ku ko okeni.

▸ Ekond. 13, opar. 5

Imbwi omuano womapangero ombinḓu aihe poo otupa twayo tune mu i nanwa momundu umwe nai tuwa momundu warwe poo ombinḓu ndji pwikwa okuzambo ai kotorwa morutu rwomundu rukwao. Ombinḓu ya zikama motupa tune twi: o-plasma, o-red blood cells, o-white blood cells, no-platelets.

▸ Ekond. 13, opar. 13

Embo ndi “omavyuriro,” mOmbeibela kari ungurisiwa otjembo rarwe kokuvera omundu. Tji matu vyurwa tu pewa omuhunga, tu hongwa nokurongwa. Jehova katatumisa poo ke nombeze na imba mbe vyura. (Omiano 4:1, 2) Jehova u yandja otjihorera otjiwa kovanene. Omavyuriro Jehova nge yandja ye kara nondoṋeno tjinene nga tji ye hinga omundu okusuvera omavyuriro. (Omiano 12:1) Jehova wa suvera ovakarere ve nu u ve honga. Eye u vepa omirari mbi ve raisira kutja ozongaro zeṋe nḓe ri ozombi nu ihi tji ve vatera okurihonga okuripura nokutoora omikambo mbi tjata ku Mukuru. Kovanene, omavyuriro ye kamburira mo kutja ve vatere ovanatje vawo okuzuva nawa epu ndi mave sokukarera nonḓuviro ku wo. Wina ku heya okuvehonga okusuvera Jehova, okusuvera Embo re Ombeibela nokuzuva omirari vyayo nawa.

▸ Ekond. 14, opar. 13

Ozo ozombepo ozombi nozohamunika nḓe nomasa omahimise. Ozondemone ovaengeli ovarunde. Ovaengeli mba va rira ovarunde indu tji ve ritjita oveni ovanavita na Mukuru mokuhina okukara nonḓuviro ku ye. (Genesis 6:2; Judas 6) Owo ve rikuta kuna Satan okupirukira Jehova.—Deuteronomium 32:17; Lukas 8:30; Oviungura 16:16; Jakobus 2:19.

▸ Ekond. 16, opar. 4