Ombara yaSirie, Benhadad aai rwisa Ovaisrael aruhe. Posiya omuprofete Elisa aa raere ombara yaIsrael otjikando atjihe, kokutja i yenene okuyamwa. Okutja Benhadad we ripura okukambura Elisa. Eye wa zuva kutja Elisa uri motjihuro tjaDotan, nu otja hinda otjimbumba tjovita tjaSirie kokutja tji ke mu kambure.

Ovasirie va ya ku Dotan ouṱuku. Omuhuka omunene, omukarere waElisa wa ya pendje nu ookumuna kutja otjihuro tja koverwa i otjimbumba otjinene tjovita. Eye wa urumine tjinene na ravaere a tja: ‘Elisa matu tjiti vi?’ Elisa we mu raera na tja: ‘Tuna ovandu ovengi komunda wetu pu wo.’ Moruveze ndwo Jehova wa tjita kutja omukarere waElisa ma mune kutja kombanda yozondundu kwe ura oukambe womuriro nomatemba wovita.

Indu otjimbumba tjOvasirie tjovita tji tje yekukambura Elisa, eye wa kumba na tja: ‘Jehova ve poṱuparisa.’ Nu tjimanga, nandarire kutja aave munu, ovarwe vovita mba kaave tjiwa kutja ve ri pi. Elisa wa raera ovarwe na tja: ‘Eṋe mu ri motjihuro tjarwe, ndji kongorereye  me mu twara komurumendu ngu mamu paha.’ Owo va kongorera Elisa nga koSamaria, poruveze ombara yaIsrael paa i kara.

Kombunda, Ovasirie va uta okumuna kutja ve ri pi. Ombara yaIsrael ya pura Elisa nai tja: “Hi ve zepe?” Hapo Elisa wa ungurisa oruveze ndwi okuvera ovandu mbaave vanga okumuhihamisa? Kako, Elisa wa tja: ‘Amu ve zepa. Ve peye ovikurya nu mu ve se ve yende.’ Okutja ombara ye ve tjitira omukandi omunene, ave ri, okuzambo ave i koyawo.