Ngunda omuapostele Johanes e ri mondeko mokakoverwahi kaPatmos, Jesus we mu raisira ovirimunikise 16 poo oviperendero ohunga noruyaveze. Ovirimunikise mbi aavi raisa kutja ena raJehova mari yapurwa vi, Ouhona we mau ya vi, nokutja ombango ye mai tjitwa vi kombanda yehi otja meyuru.

Motjirimunikise tjimwe, Johanes wa muna Jehova a haama kotjihavero tje tjouhona meyuru, a kondorokwa i ovanene 24 mbe nozombanda ozombapa nomakori wongoldo koviuru vyawo. Ozondjeno nombosiro yotuṱuṱumo aai zuvaka okuza kotjihavero tjouhona. Ovanene 24 va wa komurungu waJehova nave rikotamene ku ye. Motjirimunise tjarwe, Johanes wa muna otjimbumba otjinene tjovandu mba za momihoko avihe noviwaṋa avihe nomaraka aehe mbe rikotamena ku Jehova. Ondjona, ndji ri Jesus, ye ve risa nokuveṱika komeva womuinyo. Kombunda, motjirimunikise tjarwe, Jesus wa uta okuhonapara otjOmbara meyuru, pamwe novanene 24. Motjirimunikise tji tja kongorera ko, Johanes wa muna Jesus ama rwisa otjitjupamuriro, tji tji ri Satan, nozondemone ze. Jesus we ve yumba pehi okuza keyuru.

 Okuzambo Johanes wa muna otjiperendero otjiwa tjOndjona ndja kuramene puna ovandu 144 000 kOndundu Sion. Eye wina wa muna omuengeli ngwaa tuka kombanda yehi arihe, okuraera ovandu kutja ve tire Mukuru nokumupa ondjozikiro.

Motjirimunikise tjarwe, ovita vyaArmagedon vya uta. Movita mbyo, Jesus notjimbumba tje tjovita va taara ouye waSatan ourunde. Motjirimunikise otjisenina, Johanes wa muna ombwaneno ohimise meyuru nakombanda yehi. Satan norukwato rwe va yandekwa oparukaze. Ovandu avehe meyuru na kombanda yehi mave tjindi ena raJehova otjeyapuke nokurikotamena ku ye erike.