Komurungu wOpaska mombura ndji 32 O.Z., ovaapostele va kotoka okuza kouyenda womazuvarisiro. Owo va urirwe tjinene, nu Jesus we ve twara mokayaha koBetsaida kutja ve kasuve. Posiya okayaha tji kavaza komukuro womuronga, Jesus wa muna kutja ovandu omayovi omengi ve ve kongorere. Nandarire kutja Jesus aa vanga okukara erike puna ovaapostele ve, eye wa yakura ovandu mba nawa. Eye wa verura ovavere na utu okuvehonga. Eyuva arihe ndo, Jesus we ve honga ohunga nOuhona waMukuru. Mongurova ndjo, ovaapostele ve ya ku ye nave tja: ‘Ovandu mba ngahino va ṱondjara, ve raera kutja ngave yaruke ve kapahe ovikurya.’

Jesus wa tja: ‘Owo kavena okuhepa okuyenda. Ve peweye otjiṋa okurya uriri.’ Ovaapostele va pura nave tja: ‘Mo vanga kutja tu keverandere omboroto po?’ Filipus, umwe wovaapostele wa tja: ‘Eṱe nandarire andakuzu tu novimariva ovingi, kamaatu randa omboroto ndja yenene kotjimbumba hi.’

Jesus wa pura a tja: ‘Tu novikurya mbi ṱeki pi?’ Andreas wa tja: ‘Eṱe tu nozomboroto ndano nomahundju yevari omaṱiṱi uriri. Kavi nonḓengu.’ Jesus wa tja: ‘Eteye omboroto nomahundju ngo.’ Eye wa raera ovandu okuhaama pehozu movimbumba vyovandu 50 na tjiva 100. Jesus wa toora ozomboroto nḓa nomahundju, a tara kombanda na rire tja kumbu. Okuzambo wa yandja ovikurya kovaapostele, nowo arire tji ve vi yandja kovandu. Ovandu 5 000 ovarumendu novakazendu novanatje avehe, va rya  ngandu tji ve kuta. Kombunda yanao ovaapostele va wonga otjihupe tjovikurya kutja ape ha ningi tji matji moroka. Pa hupa ovimbamba 12 mbye urire ovikurya! Ihi tjari otjihimise tjapeke nu, poo vi?

Ovandu va himinwe tjinene nga tji va vanga okuzika Jesus otjombara yawo. Posiya Jesus aa tjiwa kutja ngunda karwari oruveze rwaJehova ku ye okurira ombara. Kunao, Jesus opa raerera otjimbumba okuyaruka nu a raere ovaapostele ve okuyenda komukuma warwe wOkuvare kwaGalilea. Ovaapostele va ronda mokayaha, nu Jesus wa ronda kondundu aka kara ngo erike. Omena raye? Orondu aa vanga oruveze okukumba ku Ihe. Kainatja kutja wa ri noviungura pu pe ṱa pi, Jesus aruhe aa twapo oruveze rokukumba.