EHONGWA 58
Jerusalem matji nyonwa
Ovandu vaJuda aruhe aave isa Jehova nave rikotamene koomukuru wovisenginina. Oure wozombura ozengi Jehova aa kondjo okuvevatera. Eye wa hinda ovaprofete okuverakiza, posiya kaave puratene. Nungwari owo aave tjiti ouhahu kovaprofete. Omomuano uṋe Jehova ma yandisa omerikotameneno wokovisenginina?
Ombara yaBabilon Nebukadnesar, ya havera oviwaṋa. Otjikando otjitenga tja havera Jerusalem eye wa kambura Ombara Jojakin, ovanane, ovarwe mba hongwa nawa novahonge vyomiti, neve twara koBabilon. Eye wina wa toora ovihuze avihe okuza mondjuwo yaJehova ondjapuke. Nebukadnesar wa tjita kutja Sidkija ma rire ombara yaJuda.
Rutenga Sidkija wari nonḓuviro ku Nebukadnesar. Posiya oviwaṋa vyopopezu novaprofete woposyo va raera Sidkija okupirukira Babilon. Jeremia we mu rakiza na tja: ‘Tji wa pirukire Babilon mamu ṱu ovandu, mamu kara ondjara nomitjise moJuda.’
Kombunda yozombura 8, Sidkija we ripura okupirukira Babilon. Eye wa ningira otjimbumba tjaEngipte tjovita kutja tji mu vatere. Okuzambo Nebukadnesar wa hinda otjimbumba tje tjovita okukarwisa Jerusalem, nu owo va tona ozondanda ongondoroka notjihuro. Jeremia wa raera Sidkija na tja: ‘Muhona ma tja tji we riwisa kehi yaBabilon ove notjihuro mamu yamwa. Posiya ove tji u hina okutjita nao, Ovababilon mave nyono Jerusalem nu mave ku kambura nave ke ku twa mondeko.’ Sidkija wa tja: ‘Ami me riwisa kehi yawo!’
Ombura imwe nohinga kombunda yanao, otjimbumba tjovita tjaBabilon tja teya orumbo rwaJerusalem atji hiti motjihuro natji nyosa. Owo va nyosa ondjuwo ondjapuke, ave zepa ovandu ovengi nave twara ovengi otjovakamburwa.
Sidkija wa taura okuza moJerusalem posiya Ovababilon ve mu rambera. Owo ve kemuvaza popezu na Jeriko nave mu eta ku Nebukadnesar. Ombara yaBabilon ya tjita kutja Sidkija ma tarere ngunda ovazandu ve amave zepewa. Okuzambo Nebukadnesar wa twisa omeho waSidkija ne mu twa mondeko kombunda ma kaṱira. Posiya Jehova wa kwizikira ovature vaJuda na tja: ‘Kombunda yozombura 70, ami me mu yarura konganda koJerusalem.’
Ovanatje omitanda mba twarewa otjovakamburwa koBabilon nambano mave tjiti vi? Owo mape ya ave ṱakama ku Jehova?
“Muhona, Ndjambi, Omunamasaaehe, ozombanguriro zoye, tjiri, ozatjiri nozosemba!”—Omavandururiro 16:7
