Ove u tjita vi tji mo tira otjiṋa?— Ngahino u yenda ku mamaa poo ku papaa woye kutja me ku vatere. Posi yokutja pe nomundu warwe ngu ma yenene okukuvatera wina. Eye u nomasa tjinene okukapita ovandu avehe. Ove mo tjiwa kutja omundu ngo ouṋe?— Otjiperi, oJehova Mukuru. Indjo tu hungire ohunga nomuzandona umwe ngu hungirwa mOmbeibela, wena David. Eye aa tjiwa kutja Jehova aruhe ma yenene okumuvatera, okutja eye kaa tira otjiṋa.

Okuza koruveze David ndwa ri okanatje okaṱiṱi, ovanene ve ve mu honga okusuvera Jehova. Otjiṋa hi tja vatera David kutja a ha kara nemuma nandarire kutja kwa tjitwa oviṋa ovivi ku ye. Eye aa tjiwa kutja Jehova Epanga re nokutja Ma yenene okumuvatera. Otjikando tjimwe, ngunda David ama risa ozonḓu ze, ongeyama onene ye ya nu ai hakana onḓu imwe! Ove mo tjiwa kutja David wa tjita vi? Eye wa rambera ongeyama ndjo nu e i zepa nomake we omuini uriri! Okuzambo, ongu tji ya hakana onḓu ye, David we i zepa wina! Ove mo munu kutja ouṋe ngwa vatera David?— Ii, ya ri Jehova.

Pa ri otjikando tjarwe wina indu David tja raisa kutja ombanḓe. Ovaisrael aave ru ku novandu varwe mbaave isanewa kutja Ovafilisti. Omurwe umwe wovita wOvafilisti wa ri omurumendu omure tjinene, omurenaka! Ena re ra ri Goliat. Omurumendu ngwi aa tjiti ouhahu kovarwe vovita vOvaisrael na Jehova. Goliat wa toka Ovaisrael kutja ngave yekumurwisa. Posi yokutja Ovaisrael avehe aave tira okumurwisa. Indu David tja zuva otjiṋa hi, eye wa raera Goliat kutja: ‘Ami me ku rwisa! Jehova me ndji vatere, nu ami me ku taara!’ Ove mo munu kutja David wa ri ombanḓe po?— Ii, wa ri ombanḓe tjinene. Mo vanga okutjiwa kutja okuzambo pa tjitwa tjike?

David wa toora otjitakwa tje nomawe yetano omaheze, okuzambo ookuyenda okukarwisa omurumendu omure tjinene ngo. Indu Goliat tja muna kutja David omuṱiṱi, eye wa tjita David ouhahu. Posi yokutja David we mu raera kutja: ‘Ove mo ya ku ami nengaruvyo, nungwari ami me ya  kove mena raJehova!’ Okuzambo, eye wa twa ewe motjitakwa, a tupuka ku Goliat, nu a yumbu osemba ku ye. Ewe ndo ra veta Goliat motjipara! Neye wa wira pehi a ṱire mbo! Ovafilisti va uruma tjinene, okutja ave tupuka. Pe ya vi omuatje omuṱiṱi tjimuna David ma yenene okutaara omundu omunene nao?— Jehova ongwe mu vatera, nu Jehova wa ri nomasa tjinene okukapita Goliat.

Ove mo rihongere tjike kehungi raDavid?— Jehova u nomasa tjinene okukapita ovandu avehe. Nu eye Epanga roye. Okutja, otjikando tjarwe tji mo tira otjiṋa, zemburuka kutja Jehova ma yenene okukuvatera kutja u rire ombanḓe!