HAPO omundu ngamwa mape ya a rire omuṱakame ku Mukuru indu tji ma rorwa tjinene, na indu tji mape munika aayo onḓuviro ye kai nokumuyetera ouwa? Epuriro ndo ra purwa nu ra zirwa okupitira momurumendu wena Job.

Ngunda Ovaisrael ave ri mu Engipte, Job omuzamumwe wa Abraham, wa turire morukondwa ndu rwa isanewa kutja oArabia nai. Ovaengeli meyuru va woronganene komurungu wa Mukuru, nu Satan omupirukire wa ri mokati kawo. Komurungu wotjimbumba tjomeyuru ho, Jehova wa raisa ongamburiro ndja ri na yo momukarere we omuṱakame Job. Jehova wa tja kape nomundu ngwa ri nouṱakame tjimuna owa Job. Posi ya, Satan wa tja Job u karera Mukuru mena rokutja Mukuru ee mu sere ondaya nokumutjevera. Satan aa tja indu oviṋa avihe Job mbye na vyo tji vi isapewa, eye ma sengi Mukuru.

Mukuru wa yandjera Satan okurora Job nokumuyeka outumbe, ovanatje, nouveruke we. Nandarire kutja Job kaa tjiwa kutja Satan u norupa moviṋa avihe mbi, nu kaa zuu nawa kutja ongwaye Mukuru tji we mu yandjere kutja ma mune omauzeu nga, eye ke na pa senga Mukuru.

Omapanga yetatu woposyo ye ya ku Job. Owo aave kondjo okutjita kutja Job ma mune kutja Mukuru ee mu vere mena rouvi we, mbwa tjita mohamunika. Omahungi wawo ngo ya tjangwa membo ra Job. Owo nandarire va tja Mukuru ka kara nonyuṋe movakarere ve nu ke nongamburiro mu wo. Job wa nakaura oumune wawo woposyo mbwo. Job nongamburiro wa tja eye ma panḓere po ouṱakame we nga konḓiro.

Posi ya Job wa tjita ondataiziro mokuyandja ombango tjinene ku ye omuini mokuraera varwe kutja eye ke nondjo. Omurumendu omutanda wena Elihu, ngwa puratene kombata aihe, wa ronga Job nomapanga we woposyo. Elihu wa ronga Job mena rokutja ke na wa raisa kutja ousemba wa Jehova womananeno ounanḓengu tjinene okukapita okuraisa kutja omundu ngamwa ke nondjo. Elihu wina wa yandja omaronga omakukutu komapanga wa Job woposyo.

Okuzambo, Jehova Mukuru wa hungira ku na Job nu wa rundurura oumune wa Job. Eye wa hungira ohunga noviutwa mbya memwa momuano omuhimise. Ihi tja tjita kutja Job ma mune kutja Mukuru u nomasa nounongo tjinene okukapita ovandu. Job wa yakura omaronga okuza ku Mukuru nomerisusuparisiro. Jehova, ngwe “ura notjari nounyaṋutima,” wa verukisa Job nu we mu pa potuvari outumbe we mbwaa ri na wo rukuru, nokumusera ondaya novanatje omurongo. (Jakobus 5:11) Mokukara nouṱakame ku Jehova ngunda ee ri kehi yomarorero omanene, Job wa raisa kutja Satan wa ri posyo indu tja tja ovandu kamaave kara nouṱakame ku Mukuru indu tji mave rorwa.

​—Orupa ndwi ra zikamene kembo ra Job.