Rut na Naomi
EHUNGI 51
Rut na Naomi
MOMBEIBELA mo vaza mo embo ndi isanewa Rut. Oro ehungi ohunga neṱunḓu ndi ra hupire moruveze ndwi Ovaisrael ndu va ri novapangure. Rut omukazendu omutanda ngwa za kehi raMoab nungwari eye ka ri Omuisrael. Nungwari Rut tje rihonga ohunga na Mukuru uatjiri Jehova, eye wa uta okumusuvera tjinene. Omukazendu omunene wena Naomi ongwa vatera Rut okurihonga ohunga na Jehova.
Naomi omukazendu Omuisrael. Eye nomurumendu we novazandu vawo vevari va tjindirire kehi raMoab moruveze tji ku ha ri ovikurya ovisemba okurya mu Israel. Okuzambo eyuva rimwe omurumendu wa Naomi wa ṱa. Kombunda ovazandu vaNaomi va kupa ovakazendu vevari Ovamoab womana Rut na Orpa. Nungwari kombunda yozombura ngambeno 10, ovazandu vaNaomi vevari va ṱa. Ihi tjiri tja hihamisa Naomi novasuko vevari mba omitima! Naomi nambano ma tjiti vi?
Eyuva rimwe Naomi wa tya okutoora ouyenda oure okuyaruka kotjiwaṋa tje. Rut na Orpa aave vanga okukara puna ye, okutja va ya puna ye wina. Nungwari kombunda yaindu tji va kayenda okamukato okasupi, Naomi wa tanauka kovasuko na tja: ‘Yarukeye konganda nu mu kakare auhe puna ina.’
Naomi wa hupita ovasuko mba na virikiza. Okuzambo owo va uta okurira, mena rokutja va suverere Naomi tjinene. Owo va tja: ‘Kako! Eṱe matu i puna ove kotjiwaṋa tjoye.’ Nungwari Naomi we ve zira a tja: ‘Yarukeye, vanatje vandje. Ma rire nawa ku eṋe okuyaruka konganda.’ Okutja Orpa wa yaruka konganda. Nungwari Rut ka yarukire.
Naomi wa tanauka ku ye na tja: ‘Orpa wa yaruka. Ove wina yaruka konganda puna ye.’ Nungwari Rut we mu zira: ‘O ndji tjaere okuyenda puna ove! Ndji esa mbi yende puna ove. Akuhe ku mo i ami oku me i, akuhe ku mo katura, ami oku me katura. Omuhoko woye mau rire omuhoko wandje, nu Mukuru woye ma rire Mukuru wandje. Ove ku mo kakokera, ami oku me kakokera, nu oku me kapwa.’ Rut tja hungira nai, Naomi kau harere ame mu kondjisa kutja ma yaruke konganda.
Korusenina ovakazendu vevari mba va vaza mu Israel. Imwi omu va katura. Rut tjimanga wa uta okuungura movikunino, mena rokutja rwa ri oruveze rwomakondero wovirya. Omurumendu wena Boas we mu yandjera okunyanga ovikokotwa motjikunino tje. Ove mo tjiwa kutja ina yaBoas wa ri uṋe? Eye wa ri Rahab wotjihuro tjaJeriko.
Eyuva rimwe Boas wa raera Rut: ‘Ami mba zuva avihe ohunga na ove, nomwano mbu wa tjinda Naomi nawa. Ami me tjiwa omwano mbu wa isa iho na nyoko nehi roye nomwano mbu we yokutura mokati kovandu mbu hi na indu we ve tjivirwe rukuru. Jehova nge ku sere ondaya!’
Rut we mu zira: ‘Muhona, ove u notjari na ami tjinene. Ove we ndji nyandisa omutima tji wa hungire noutarazu ku na ami.’ Boas wa suverere Rut tjinene, nu kombunda yoruveze orusupi owo va kupa. Ihi tja nyandisa Naom omutima! Nungwari Naomi wa ri nonyuṋe kombanda yanao indu Rut na Boas tji va panduka omuzandu wawo omutenga, wena Obed. Kombunda Obed wa karira ihe mukururume waDavid. Kombunda matu ke rihonga ovingi ohunga na David.
Embo rOmbeibela raRut.
