Mo yenene okuvatera vi kombunda ya indu tji kwa tjitwa oumba?
OKUHUPA OTJOVAKRISTE
Ndino ku tjitwa omaumba omengi tjinene. Indu tji kwa tjitwa oumba ozombatero maze sokuworonganisiwa momuano omusemba, nokukayendisiwa momuano omuhirona. Ku nao, porutavi aruhe rwomberoo, Orutu Orunane rwa zika orupa ndu vatera imba mba wirwa i youmba.
Ovakambure ovakwetu tji va tjiwa kutja kwa tjitwa oviwonga, owo ve hakahana okutoora omukambo okuhakaena ku novanene vombongo vorukondwa ndwo, okutara kutja ovazuvarise mave hepa iye. Tji pa tjitwa onyoneno onyingi tjinene ovazuvarise ndji ve hi nokuyenena okutjinda, orutavi rwomberoo maru ziki ovarumendu ovakambure mbu mave hongorere otjiungura tjokuyandja ombatero hi. Ovarumendu ovakambure mave yenene okuningira ovazuvarise mbu mave yenene okuvatera poo okuningira ombatero yoviṋa kaaṋi, poo okuranda nokuyandja ovihepwa morukondwa ndwo.
Okuungura oviṋa momuano mbwi ku yenena okueta ouwa tjinene. Ku tjita kutja ape ha kara oviungura ovingi, ombambaukisiro, okuhinakumorosa ovimariva noviungurisiwa. Posi ya indu ovazuvarise tji mave toora omikambo oveni pe kara omauzeu ngo.
Ovarumendu mba zikwa i yorutavi rwomberoo mave yenene okutara kutja ovimariva vingapi mbi mavi hepwa, nokutja ovandu vengapi mbu mave hepwa okukavatera koṋa ku kwa tjitwa oumba. Owo ve hakaena ku nouhonapare, mbu tu vatera kutja matu yenene vi okuungura otjiungura tjetu tjokuyandja ombatero tjimanga. Arikaneye amu toora omukambo wokuwonga ovimariva, okuhinda oviṋa, poo okuyenda koṋa ku kwa tjitwa oumba, ndoovazu kamu ningirirwe okutjita nao.
Indu tji kwa tjitwa oumba, eṱe tu vanga okuvatera, mena rokutja twa suvera ovakambure ovakwetu. (Hebr 13:16). Hapo matu sokutjita vi? Otjiṋa otjinanḓengu, eṱe matu yenene okukumbira ovakambure ovakwetu, imba mba wirwa i youmba, na imba mbu mave vatere. Eṱe matu yenene okuyandja oviyandjewa vyouharupu koviungura vyouye auhe. Kehi yOrutu Orunane, orutavi rwomberoo ondu yenena okutya kutja ovimariva vyouharupu mavi ungurisiwa momuano uṋe omusemba. Indu tji matu vanga okukara norupa matu yenene okutjita omaningiriro mokutjanga moforoma ndji Local Design/Construction Volunteer Application (DC-50).
TARERA OKAVIDIO NGA OMUPUPO MBWA TJITA ONYONENO ONENE MOBRAZIL, NU OKUZAMBO U ZIRE EPURIRO NDI:
Otjikwaye tji tje ku tjatere ohunga noviungura vyOvahongonone va Jehova vyokuvatera ku kwa wirwa i youmba kombunda yomupupo mbwa tjitwa moBrazil mombura ndji 2020?
