Hapo u ri pokati kotjiwondo tjozombura 23 no 65 nu u karera Jehova oruveze aruhe? U nouveruke ouwa, nu mo yenene okuvatera akuhe ku ku nouhepe wovazuvarise? Tji wa tja ii komapuriro nga, hapo wa rora okuripurira kokutjita omaningiriro kOskole yOvazuvarise vOuhona? Okuza komahongero omatenga woskole ndji, ovakupasane, ovarumendu novakazendu ovakombe, va tjita omaningiriro. Posiya, tu hepa ovarumendu ovakambe ovengi okutjita omaningiriro. Ningira ombatero ku Jehova kutja me kupe onḓero yokumukarera nokuhorera kotjihorera tjOmuna we. (Eps 40:8; Mat 20:28; Hebr 10:7) Tara komiano mbi mo yenene okuhendurura oviungura vyoye poo omerizirira woye tjiva kokutja u yenene okutjita omaningiriro.

Imba mba mana omahongero koskole ndji mave yenene okukarera Jehova momiano viṋe? Tjiva va hindwa kotuveze ku ku hingirwa omaraka warwe poo okukaungura motjiungura tjapeke tjokuzuvarisa noutemba. Varwe kombunda va kavatera otjovatarere vorukondwa, ovakuramene po vovatarere worukondwa, poo otjovahindwa. Otja tji mo ripurire komiano vyokukarera Jehova, arikana zemburuka omambo womuprofete Jesaja nga: “Owami ngwi, ndji hinda!”​—Jes 6:8.

TARERA OKAVIDIO NGA OVAHINDWA​—MBE UNGURA MOTJIUNGURA TJOMAKONDERO, NU OKUZAMBO ZIRA OMAPURIRO NGA:

• Ovahindwa ve toororwa vi?

• Hapo ovahindwa ve ungura oviungura viṋe oviwa?

• Ozondaya zeṋe ovahindwa nḓu ve muna?