Morutuu rwe ku Titus, omuapostele Paulus wa tjanga kutja ovarumendu omitanda, na Titus wina, mave sokukondja nomasa kutja ve rire “otjihorera tjomeritjindiro omawa.” (Tit 2:6, 7) Kombunda mekondwa otjingero, eye wa raisa kutja Jesus ma kohorora ovakarere va Jehova kokutja ve yenene ‘okuramangera okutjita oviungura oviwa.’ (Tit 2:14) Otjiungura tjimwe otjiwa okuzuvarisa nokuhonga ohunga nOuhona wa Mukuru. Tjinangara oove omutanda, hapo mo yenene okuungurisa omasa woye okukarera otjomukandjira omuvatere poo omukarerere?​—Omiano 20:29.

Ove tji mo vanga okukarera otjomukandjira, ṱuna ehupo roye kutja u yenene okutjita nao. (Luk 14:28-30) Otjotjihorera, hapo mo yenene okuriparura vi ngunda amo karere Jehova motjiungura tjokuzuvarisa oruveze aruhe? Mo yenenisa vi ozoiri nḓe undjirwa kovakandjira? Ningira ku Jehova mongumbiro kutja me ku vatere. (Eps 37:5) Raera ondando yoye kovanene voye, na imba mba muna ondoṋeno motjiungura tjoukandjira. Okuzambo toora omikambo kutja u yenenise ondando yoye. Jehova tjiri ma sere ondaya kozongondjero zoye motjiungura tje!

TARERA OKAVIDIO NGA YOUTHS HONORING JEHOVAH, OKUZAMBO U ZIRE OMAPURIRO NGU MAYE KONGORERE MBA:

• Omauzeu waye tjiva mu va tuurunga kutja ve yenene okukarera otjovakandjira, nu va yenena vi okutjita nao?

• Ovanene mave yenene vi okuvatera ovanatje vawo kutja ve yenene okukarera otjovakandjira ovakarerere?

• Ongwaye tje ri otjiṋa otjinanḓengu okukara noprograma yomazuvarisiro?

• Ovandu mombongo mave yenene vi okutunduuza nokuvatera omukandjira?

• Imba mbe karera otjovakandjira ve muna ozondaya zaye?