ՃԱՓՈՆԻ Նակոյիա քաղաքին մէջ, 28 ապրիլ 2013–ին, մասնաւոր ժողով մը գումարուեցաւ։ Կառավարիչ մարմինի անդամ՝ Էնթընի Մորիս, ունկնդիրները անակնկալի բերաւ հիանալի ծանուցումով մը,– ճափոներէն նոր հրատարակութիւն մը ի լոյս ընծայուեցաւ՝ Աստուածաշունչ. Աւետարան ըստ Մատթէոսի վերնագրով։ Թէ՛ անձամբ եւ թէ համացանցային հեռարձակումով ներկայ եղող աւելի քան 210,000 անհատներ երկարատեւ ծափահարութեամբ ընդառաջեցին։

Ճափոներէն Նոր աշխարհի թարգմանութիւն–էն վերատպուած ըլլալով հանդերձ, Մատթէոսի Աւետարանի այս 128 էջնոց տարբերակը առանձնայատուկ է։ Եղբայր Մորիս բացատրեց, թէ այս գրքոյկը պատրաստուած է «ճափոնական թաղամասին կարիքներուն գոհացում տալու համար»։ Այս Աւետարանը ի՞նչ բանով տարբեր է։ Ինչո՞ւ պատրաստուեցաւ։ Եւ ի՞նչ ընդունելութիւն գտած է։

Մատթէոս–ի ձեւաչափը զարմացուց ունկնդիրները։ Ճափոներէն տառերը կրնան դասաւորուիլ թէ՛ ուղղահայեացօրէն եւ թէ հորիզոնականօրէն. եւ բազմաթիւ հրատարակութիւններ,– ներառեալ՝ մեր վերջին հրատարակութիւնները,– գրուած են հորիզոնական տեսքով։ Սակայն այս նոր հրատարակութիւնը ուղղահայեաց բնագիր ունի, գործածելով դասաւորութիւն մը, որ համատարած է ճափոնական լրագիրներու եւ գրական գործերու մէջ։ Ճափոներէն կարդացողներէն շատեր այս ոճը դիւրընթեռնլի կը նկատեն։ Ասկէ զատ, էջերուն մակագիրները տեղադրուած են գրութեան մէջ որպէս ենթավերնագիրներ, որպէսզի ընթերցողը դիւրութեամբ տեսնէ գլխաւոր կէտերը։

Եղբայրներն ու քոյրերը անմիջապէս սկսան Մատթէոս–ը կարդալ։ «Նախապէս, շատ անգամ կարդացած էի Մատթէոսի գիրքը», ըսաւ 80–ական տարիքի մէջ եղող քոյր մը, «բայց ուղղահայեաց տեսքը եւ ենթավերնագիրները ինծի օգնեցին Լերան քարոզը աւելի լաւ հասկնալու»։ Երիտասարդուհի քոյր մը գրեց. «Մէկ նիստով ամբողջ Մատթէոս–ը կարդացի։ Ես հորիզոնական տեսքին վարժուած եմ, բայց շատ մը ճափոնցիներ ուղղահայեաց դասաւորումը կը նախընտրեն»։

Աստուածաշունչի այս մէկ գիրքը ինչո՞ւ յատկապէս գործնական է ճափոնական թաղամասին մէջ։ Թէեւ շատ մը ճափոնցիներ ծանօթ չեն Աստուածաշունչին, բայց յօժար են զայն ընթերցելու։ Շատեր, որոնք Աստուածաշունչը բնաւ չեն տեսած, այժմ առիթը ունին անկէ մաս մը ձեռք ձգելու եւ կարդալու։

Ինչո՞ւ Մատթէոսի գիրքը ընտրուեցաւ։ «Աստուածաշունչ» բառը ճափոնցիներուն մեծամասնութեան միտքը կը բերէ Յիսուս Քրիստոսը։ Ուստի Մատթէոսի գիրքը ընտրուեցաւ, քանի որ կը բովանդակէ Յիսուսի ծննդաբանութիւնն ու ծնունդը, իր հռչակաւոր Լերան քարոզը եւ վերջին օրերուն մասին տուած իր մարգարէութիւնը,– նիւթեր՝ որոնք պիտի հետաքրքրեն շատ մը ճափոնցիներ։

Ճափոնի մէջ, Թագաւորութեան հրատարակիչները  սկսան այս նոր հրատարակութիւնը նախանձախնդրաբար բաշխել դռնէ դուռ եւ վերայցելութիւններու ատեն։ «Հիմա աւելի առիթներ ունիմ Աստուծոյ Խօսքը մեր թաղամասին մէջ բաշխելու», գրեց քոյր մը։ «Նոյնիսկ կրցայ մասնաւոր ժողովի օրը, յետմիջօրէին, Մատթէոս գրքոյկէն օրինակ մը բաշխել»։

Հրատարակիչները Մատթէոս գրքոյկը ինչպէ՞ս կը ներկայացնեն թաղամասին մէջ։ Ճափոնցի տանտէրերէն շատեր ծանօթ են որոշ արտայայտութիւններու, ինչպէս՝ «նեղ դուռը», «մարգարիտները խոզերուն առջեւ» եւ «վաղուան համար բնաւ հոգ մի՛ ընէք» (Մատ. 6։34. 7։6, 13)։ Անոնք կը զարմանան, երբ կը գիտնան թէ ասոնք Յիսուս Քրիստոսի խօսքերն են։ Մատթէոսի Աւետարանին մէջ այս խօսքերը կարդալով, շատեր կ’ըսեն. «Միշտ ուզած եմ Աստուածաշունչը գոնէ մէկ անգամ կարդալ»։

Մատթէոս գրքոյկը ընդունողներուն վերայցելելու ատեն, հրատարակիչները յաճախ կ’իմանան թէ տանտէրերը անմիջապէս կարդացին գրքոյկէն մաս մը, եթէ ոչ ամէնը։ 60–ական տարիքի մէջ եղող մարդ մը հրատարակիչի մը ըսաւ. «Ես քանի մը անգամ զայն կարդացի եւ մխիթարուեցայ։ Հաճիս ինծի աւելի սորվեցուցէք Աստուածաշունչին մասին»։

Մատթէոս գրքոյկը հանրային վկայութեան մէջ ալ կը ներկայացուի։ Այդ տեսակ քարոզչութեան ատեն, Վկայ մը իր ե–նամակի հասցէն տուաւ երիտասարդուհիի մը, որ գրքոյկէն օրինակ մը առաւ։ Մէկ ժամ ետք, ան քրոջ ե–նամակ ուղարկեց, ըսելով թէ Աւետարանէն մաս մը կարդաց եւ կ’ուզէ աւելին գիտնալ։ Մէկ շաբաթ ետք, ան Աստուածաշունչի իր առաջին ուսումնասիրութիւնը ունեցաւ եւ շուտով սկսաւ ժողովներու ներկայ գտնուիլ։

Աստուածաշունչ. Աւետարան ըստ Մատթէոսի գրքոյկէն աւելի քան 1,600,000 օրինակներ ուղարկուած են Ճափոնի ժողովքներուն, եւ իւրաքանչիւր ամիս, Վկաները տասնեակ հազարաւոր օրինակներ կը բաշխեն։ Գրքոյկին նախաբանը զայն հրատարակողներուն զգացումները կ’արտայայտէ, ըսելով. «Անկեղծօրէն կը յուսանք, որ այս հատորիկը կարդալով, աւելի՛ հետաքրքրուիք Աստուածաշունչով»։