2023 թ. մայիսի 23-ին ԱՄՆ առողջապահության ոլորտի առաջատար մասնագետը զգուշացրել է հանրությանը, որ սոցիալական ցանցերը բացասաբար են ազդում բազմաթիվ պատանիների վրա։

•   «Թեպետ սոցիալական ցանցերը կարող են օգտակար լինել որոշ երեխաների ու պատանիների համար, սակայն կան նաև անժխտելի փաստեր, որ դրանք կարող են մեծապես վնասել երեխաների ու պատանիների հոգեկան և ֆիզիկական առողջությունը» (Սոցիալական ցանցերն ու պատանիների հոգեկան առողջությունը. ԱՄՆ գլխավոր վիրաբույժի տեղեկատու, 2023)։

 Տեղեկատուում նշված էին ուսումնասիրությունների արդյունքներ, որոնք մտահոգվելու տեղիք են տալիս։

•   12-15 տարեկան անչափահասները, «ովքեր օրական ավելի քան 3 ժամ էին անցկացնում սոցցանցերում, հոգեկան խնդիրների կրկնակի ռիսկի տակ էին, այդ թվում՝ դեպրեսիայի և տագնապային խանգարումների»։

•   14-ամյա պատանիների շրջանում «սոցցանցերի առավել ակտիվ օգտագործումը հող էր նախապատրաստել քնի խանգարումների, առցանց բուլիինգի, արտաքին տեսքից ամաչելու, ցածր ինքնագնահատականի և դեպրեսիայի ավելի ցայտուն դրսևորումների համար։ Ընդ որում՝ հարվածի տակ ավելի մեծ թվով աղջիկներ էին, քան տղաներ»։

 Ծնողներն ինչպե՞ս կարող են պաշտպանել իրենց երեխաներին այս վտանգներից։ Աստվածաշունչը գործնական լուծումներ է առաջարկում։

 Ներգրավված եղեք։ Որպես ծնողներ՝ պարզեք հնարավոր վտանգները և որոշեք՝ ձեր երեխան օգտվի սոցցանցերից, թե ոչ։

•   Աստվածաշնչյան սկզբունք. «Կրթիր երեխային ճիշտ ճանապարհի համաձայն» (Առակներ 22։6)։

•   Ավելին իմանալու համար ընթերցեք «Արդյո՞ք երեխաս պետք է օգտվի սոցիալական ցանցերից» հոդվածը։

 Եթե թույլ եք տալիս ձեր երեխային օգտվել սոցցանցերից, տեղեկացեք պոտենցիալ վտանգների մասին և ներգրավված եղեք ձեր երեխայի օնլայն կյանքում։ Ինչպե՞ս։

 Պաշտպանեք ձեր երեխային վնասակար նյութերից։ Սովորեցրեք նրան հասկանալ, թե որ նյութերն են վնասակար, և հեռու մնալ դրանցից։

•   Աստվածաշնչյան սկզբունք. «Թող պոռնկություն և ամեն տեսակ անմաքրություն կամ ագահություն նույնիսկ չհիշատակվեն ձեր մեջ.... Ձեր մեջ թող չլինի ամոթալի վարք, հիմար խոսակցություններ կամ անպարկեշտ կատակներ» (Եփեսացիներ 5։3, 4)։

•   Գործնական առաջարկներ գտնելու համար ընթերցեք «Երեխայիդ սովորեցրու՝ ինչպես անվտանգ օգտվել սոցիալական ցանցերից» հոդվածը։

 Սահմաններ դրեք։ Օրինակ՝ կանոններ սահմանեք այն մասին, թե ձեր երեխան երբ և որքան ժամանակով կարող է օգտվել սոցցանցերից։

•   Աստվածաշնչյան սկզբունք. «Ամենայն ուշադրությամբ հետևեք, որ վարվեք.... իմաստունների պես, և ձեզ համար գնեք հարմար ժամանակը» (Եփեսացիներ 5։15, 16)։

•   Օգտագործելով «Գրագետ մոտեցում դրսևորիր սոցիալական ցանցից օգտվելիս» անիմացիան՝ օգնեք ձեր երեխային հասկանալ, թե սահմանները ինչու են անհրաժեշտ։