Ինչո՞ւ։ Այս հարցը հաճախ է հնչում, երբ ողբերգական դեպք է պատահում։ Շատ մխիթարական է, որ Աստվածաշունչը սպառիչ կերպով պատասխանում է այդ հարցին։

1. Սատանան ինչպե՞ս աշխարհը չարությամբ լցրեց

Բանսարկու Սատանան ապստամբեց Աստծու դեմ։ Նա ցանկանում էր իշխել ուրիշների վրա, ուստի առաջին մարդկանց՝ Ադամին ու Եվային, դրդեց միանալ իր ապստամբությանը։ Սատանան դա արեց, երբ խաբեց Եվային (Ծննդոց 3։1–5)։ Նա Եվային դրդեց մտածելու, որ Եհովան զրկում է իրենց ինչ-որ լավ բանից։ Նա ակնարկեց, որ մարդիկ ավելի երջանիկ կլինեն, եթե չհնազանդվեն Աստծուն։ Նաև ասաց, որ Եվան չի մահանա. դա երբևէ ասված առաջին սուտն էր։ Այդ իսկ պատճառով Աստվածաշնչում ասվում է, որ Սատանան «ստախոս է և ստության հայրը» (Հովհաննես 8։44)։

2. Ադամն ու Եվան ի՞նչ ընտրություն կատարեցին

Եհովան մեծ առատաձեռնություն էր դրսևորել Ադամի ու Եվայի հանդեպ։ Նա ասել էր, որ նրանք կարող են ուտել պարտեզի ցանկացած ծառից՝ բացի մեկից (Ծննդոց 2։15–17)։ Այնուամենայնիվ, նրանք որոշեցին ուտել այդ ծառի պտուղը։ Եվան «վերցրեց նրա պտղից և սկսեց ուտել», իսկ հետո Ադամը «կերավ» (Ծննդոց 3։6)։ Նրանք երկուսն էլ չհնազանդվեցին Աստծուն։ Քանի որ Ադամն ու Եվան կատարյալ էին, նրանք սխալ անելու հակում չունեին։ Սակայն գիտակցաբար ըմբոստանալով Աստծու դեմ՝ նրանք մեղք գործեցին և մերժեցին նրա իշխանությունը։ Այդ որոշումը ցավալի հետևանքներ ունեցավ նրանց համար (Ծննդոց 3։16–19)։

3. Ադամի ու Եվայի որոշումն ի՞նչ ազդեցություն ունեցավ մեզ վրա

Երբ Ադամն ու Եվան մեղք գործեցին, նրանք անկատար դարձան և անկատարությունը փոխանցեցին իրենց բոլոր ժառանգներին։ Ադամի վերաբերյալ Աստվածաշունչն ասում է. «Մեկ մարդու միջոցով մեղքը մտավ աշխարհ, և մեղքով էլ մահը, և այդպիսով մահը տարածվեց բոլոր մարդկանց վրա» (Հռոմեացիներ 5։12)։

Մենք տառապում ենք տարբեր պատճառներով. երբեմն՝ մեր կայացրած սխալ որոշումների հետևանքով, իսկ երբեմն էլ՝ ուրիշների։ Որոշ դեպքերում էլ տառապում ենք, քանի որ սխալ ժամին գտնվում ենք սխալ վայրում (կարդա Ժողովող 9։11)։

 ԻՄԱՆԱՆՔ ԱՎԵԼԻՆ

4. Ո՞ւմ պատճառով ենք տառապում

Շատ մարդիկ կարծում են, որ Աստված է ղեկավարում աշխարհը։ Արդյո՞ք դա ճիշտ է։ Դիտեք ՏԵՍԱՆՅՈՒԹԸ։

Կարդացեք Հակոբոս 1։13 և 1 Հովհաննես 5։19 համարները, այնուհետև քննարկեք հետևյալ հարցը։

• Աստվա՞ծ է պատասխանատու տառապանքի ու չարության համար։

5. Սատանայի իշխանության հետևանքները

1. Ա) Ադամն ու Եվան կատարյալ էին և ապրում էին դրախտում, սակայն նրանք լսեցին Սատանային և ըմբոստացան Եհովայի դեմ

2.  Բ) Այդ ըմբոստությունից հետո աշխարհը լցվեց մեղքով, տառապանքով ու մահով

3. Գ) Եհովան վերջ կդնի մեղքին, տառապանքին և մահվանը։ Մարդիկ նորից կատարյալ կլինեն և կապրեն դրախտում

6. Եհովան անտարբեր չէ մեր կրած տառապանքի նկատմամբ

Եհովայի համար միևնո՞ւյն է, որ տառապում ենք։ Տես, թե Դավիթ թագավորն ու Պետրոս առաքյալը ինչ են գրել այս առնչությամբ։ Կարդացեք Սաղմոս 31։7 և 1 Պետրոս 5։7 համարները, այնուհետև քննարկեք հետևյալ հարցը։

• Ի՞նչ ես զգում՝ իմանալով, որ Եհովան տեսնում է քո տառապանքը և անտարբեր չէ քո հանդեպ։

 ԱՄՓՈՓՈՒՄ

Աշխարհում տիրող չարության գլխավոր պատճառը Սատանան և առաջին մարդկային զույգն են։ Եհովան խորապես մտահոգված է մեզնով և շուտով վերջ է դնելու տառապանքին։

Վերհիշենք

• Բանսարկու Սատանան ի՞նչ սուտ ասաց Եվային։

• Ադամի և Եվայի ըմբոստությունը ի՞նչ ազդեցություն է ունեցել մեզ վրա։

• Որտեղի՞ց գիտենք, որ Եհովան անտարբեր չէ մեր տառապանքի նկատմամբ։