1. Ամուսնություն

Երջանիկ ամուսնության վերաբերյալ մարդիկ տարբեր կարծիքներ ունեն։

ՆՇԱՆԱԿՈՒԹՅՈՒՆ։ Ամուսնությունը Աստծու ստեղծած կառույցն է, հետևաբար նա գիտի, թե զույգին ինչ է անհրաժեշտ երջանիկ լինելու համար (Մարկոս 10։6-9)։ Ամուսնությունը երջանիկ է լինում, երբ կողակիցները ավելի շատ մտածում են մեկը մյուսի, ոչ թե սեփական անձի մասին։ Կնոջը սիրող ամուսինը իր սերը ցույց կտա նրա հանդեպ լավ վերաբերմունքով ու հոգատարությամբ։ Իսկ ամուսնուն հարգող կինը իր հարգանքը ցույց կտա խոսելաձևով ու գործերով։

ԱՍՏՎԱԾԱՇՈՒՆՉ. ԳՈՐԾՆԱԿԱՆ ՈՒՂԵՑՈՒՅՑ։ Վիետնամից Քուանգը և Թին մտածում էին, որ իրենք երբեք երջանիկ միություն չեն ունենա։ Քուանգը հաճախ դաժան էր վարվում կնոջ հետ։ Նա ասում է. «Ես հաշվի չէի առնում Թիի զգացմունքները ու հաճախ էի ստորացնում նրան»։ Կինն ուզում էր բաժանվել։ Նա ասում է. «Կարծում էի, որ այլևս չեմ կարող վստահել ու հարգել ամուսնուս»։

Վերջիվերջո Քուանգը և Թին իմացան, թե ինչ է Աստվածաշունչը սովորեցնում, և իրենց ամուսնական կյանքում սկսեցին կիրառել Եփեսացիներ 5։33-ը։ Քուանգը ասում է. «Այս համարը օգնեց ինձ հասկանալ, որ պետք է բարի լինեմ և այնպես անեմ, որ կինս իրեն սիրված զգա, ու հոգ տանեմ նրա նյութական, ֆիզիկական և էմոցիոնալ կարիքների մասին։ Երբ այդպես եմ վարվում, ձեռք եմ բերում նրա սերն ու հարգանքը»։ Իսկ Թին ասում է. «Որքան շատ եմ կիրառում Եփեսացիներ 5։33-ի՝ հարգել ամուսնուն խորհուրդը, այնքան ավելի է ամուսինս ինձ սիրում և օգնում, որ պաշտպանված ու խաղաղ զգամ»։

 2. Մարդկանց հանդեպ վերաբերմունք

Հաճախ մարդիկ վատ են վերաբերվում մյուսներին նրանց ռասայի, ազգության, արտաքին տեսքի, կրոնի և սեռական կողմնորոշման պատճառով։

ՆՇԱՆԱԿՈՒԹՅՈՒՆ։ Աստվածաշունչը չի սովորեցնում ատել տարբեր ազգերի ու ռասայի պատկանող մարդկանց և համասեռամոլներին։ Հակառակը՝ այն հորդորում է մեզ հարգել ամեն տեսակ մարդկանց՝ անկախ նրանց ռասայից, ազգությունից և սոցիալական կարգավիճակից (Գործեր 10։34)։ Կարող ենք մյուսներին վերաբերվել բարությամբ ու հարգանքով, նույնիսկ եթե համաձայն չենք նրանց հավատալիքներին, և մեզ դուր չեն գալիս նրանց գործերը (Մատթեոս 7։12)։

ԱՍՏՎԱԾԱՇՈՒՆՉ. ԳՈՐԾՆԱԿԱՆ ՈՒՂԵՑՈՒՅՑ։ Դանիելին սովորեցրել էին, որ Ասիայից եկածները սպառնալիք են իր երկրի համար։ Այդ իսկ պատճառով նա ատում էր ասիական ծագում ունեցողներին և հաճախ էր հանրորեն վիրավորում նրանց։ Դանիելն ասում է. «Ես արդարացնում էի իմ արարքը հայրենասիրությամբ։ Մտքովս չէր էլ անցնում, որ իմ մտածելակերպն ու արարքները սխալ են»։

Դանիելն իմացավ, թե ինչ է Աստվածաշունչը սովորեցնում։ Նա ասում է. «Ես պետք է ամբողջությամբ փոխեի մտածելակերպս։ Պետք է մարդկանց նայեի Աստծու աչքերով, ում համար բոլորս էլ հավասար ենք՝ անկախ մեր ծագումից»։ Դանիելը նկարագրում է, թե այսօր ինչ է զգում, երբ հանդիպում է մարդկանց. «Ինձ համար կարևոր չէ, թե որտեղից են նրանք։ Այժմ սիրում եմ բոլոր մարդկանց և մտերիմ ընկերներ ունեմ աշխարհի տարբեր ծայրերում»։

 3. Փող

Շատ մարդիկ ձգտում են հարստության, որ երջանիկ լինեն և լավ ապագա ունենան։

ՆՇԱՆԱԿՈՒԹՅՈՒՆ։ Մեզ գումար անհրաժեշտ է, բայց այն երաշխիք չէ, որ երջանիկ կլինենք ու լավ ապագա կունենանք (Առակներ 18։11; 23։4, 5)։ Հակառակը՝ իրական երջանկությունը և ապահով ապագան կախված են աստվածային իմաստությամբ առաջնորդվելուց, որը կարելի է ձեռք բերել Աստվածաշնչից (1 Տիմոթեոս 6։17-19)։

ԱՍՏՎԱԾԱՇՈՒՆՉ. ԳՈՐԾՆԱԿԱՆ ՈՒՂԵՑՈՒՅՑ։ Կարդոն, որ Ինդոնեզիայից է, կենտրոնացել էր հարստություն ձեռք բերելու վրա։ Նա ասում է. «Ես ունեի այն, ինչ շատերը երազում են։ Կարող էի ճանապարհորդել, շքեղ իրեր, մեքենաներ և տներ գնել»։ Բայց նրա ձեռքբերումները երկար կյանք չունեցան։ Նա շարունակում է. «Ինձ խաբեցին, և այս տարիների տքնաջան աշխատանքիս արդյունքը մի ակնթարթում ջուրը լցվեց։ Ես ողջ կյանքս անցկացրի հարստություն կուտակելով, բայց վերջում ունեցա դատարկության, անարժեքության ու հիասթափության զգացում»։

Կարդոն սկսեց կիրառել փողին առնչվող աստվածաշնչյան խորհուրդները։ Նա այլևս իր ողջ ուժը չի ծախսում հարստություն ձեռք բերելու վրա, այլ նախընտրում է ապրել ավելի պարզ կյանքով։ Նա ասում է. «Հիմա ես ունեմ իսկական հարստություն՝ Աստծու հետ մտերիմ հարաբերություններ։ Գիշերները հանգիստ քնում եմ և իսկապես երջանիկ եմ»։

 4. Սեքս

Ընդունելի սեռական հարաբերությունների մասին մարդկանց կարծիքները շատ տարբեր են։

ՆՇԱՆԱԿՈՒԹՅՈՒՆ։ Աստվածաշունչը սահմաններ է դնում սեռական ցանկությունները բավարարելու հարցում։ «Պոռնկություն» տերմինը իր մեջ ներառում է ամուսնական անհավատարմությունը, մարմնավաճառությունը, սեռական հարաբերությունները իրար հետ չամուսնացած մարդկանց միջև, համասեռամոլությունը և անասնապղծությունը (1 Կորնթացիներ 6։9, 10)։ Սեռական հարաբերությունները նվեր են Աստծուց, որը նա տվել է միմյանց հետ ամուսնացած տղամարդուն ու կնոջը (Առակներ 5։18, 19)։

ԱՍՏՎԱԾԱՇՈՒՆՉ. ԳՈՐԾՆԱԿԱՆ ՈՒՂԵՑՈՒՅՑ։ Ավստրալիայում Քեյլի անունով մի կին ասում է. «Երբ ամուրի էի, մտածում էի, որ սեքսով զբաղվելը ինձ կտա սիրված լինելու և ապահովության զգացում։ Բայց հակառակը եղավ։ Ինձ զգում էի չսիրված ու կոտրված»։

Հետագայում, երբ Քեյլին իմացավ սեքսին առնչվող աստվածաշնչյան խորհուրդները, սկսեց կիրառել դրանք։ Նա ասում է. «Աստծու տված չափանիշները օգնում են հեռու մնալ ցավից ու վնասվելուց։ Այժմ ապրում եմ այնպես, ինչպես Եհովան է ուզում։ Հիմա ամուսնացած եմ և ինձ զգում եմ սիրված ու ապահով»։