Gima Kohorona magasin ginigunana be July 1879 ai idia halasia. Unai nega amo ema bona hari gau momo idia idau, inai magasin ia idau danu. (Ataiai laulau itaia.) Hari oi duahia Gima Kohorona bona gabeai do ai halasia magasin edia toana do idia idau sisina. Dahaka gaudia idia idau?

Tano momo ai, taunimanima be Intanet ai infomeisen idauidau idia sekea bona unai idia manadalaia. Oibe, Intanet ai idia ura duahia sivaraidia idia davaria be haraga. Buka, magasin, bona niuspepa momo be Intanet ai idia duahia diba.

Taunimanima momo be Intanet idia gaukaralaia momo dainai, vanegai emai Web sait www.jw.org ai gau haida ai haidaua, unai amo taunimanima be idia ura duahia gaudia idia davaria haraga diba. Unai Web sait idia kehoa taudia be gado 430 dekenai ai hahanaia buka bona magasin idia duahia diba. To inai hua amo, emai magasin dekenai hanaihanai ai hahedinaraia atikol haida be emai Web sait sibona dekenai do idia noho. a

Inai magasin bona gabeai do ai halasia magasin edia atikol momo be emai Web sait sibona dekenai do ai atoa. Unai dainai, pablik Gima Kohorona be rau 32 gaudia do ai printaia lasi, to rau 16 gaudia do ai printaia. Gima Kohorona be gado 204 dekenai ai hahanaia vadaeni. To hari ena rau be momo lasi dainai, gado momo dekenai do ai hahanaia.

Ai laloa inai dala matamatana amo taunimanima momo dekenai Baibel ena hahemauri herevana ai gwauraia diba. Ai ura ai printaia magasin bona Intanet amo Baibel ena hereva namodia ai halasia noho, unai amo Baibel idia matauraia bona ena hahediba herevadia idia ura diba taudia momo ai durua.

Inai Magasin Karaia Taudia