Daika ese Guriguri Ia Kamonai?

BEMA ta be eda guriguri ia kamonai, ita gwau diba ia be iseda Havaraia Tauna. Ia ese eda harana ia havaraia dainai eda lalohadai ia diba. Danu, eda guriguri ia haerelaia bona eda ura gaudia ia henia. To reana oi laloa, ‘Momokani, Havaraia Tauna ia noho, a?’

Taunimanima momo idia laloa, bema oi abia dae Havaraia Tauna ia noho, namona be saiens ese ia hamomokania gaudia oi dadaraia. Bona idia gwau Dirava ia noho lalohadaina bona saiens taudia edia lalohadai be idia hegeregere lasi, to unai be momokani lasi. Mani inai oi laloa.

◼ Vanegai, United States ena iunivesiti ibounai 21 edia profesa 1,646 idia nanadaia neganai, idia toi toi amo ta ta idia gwau, “Lau abia dae lasi Dirava ia noho.”

To, saiens taudia momo idia abia dae Dirava ia noho.

Dahaka ese Ia Hamomokania Havaraia Tauna Ia Noho?

Hamomokania gaudia haida ita itaia murinai, do ita abia dae guriguri ia kamonai Diravana ia noho, a? Oibe. Heberu 11:1 ia gwau, abidadama ena anina be inai, oi ‘itaia gaudia’ amo “oi diba momokani, oi abia dae gaudia be momokani.” To haida idia gwau, unai be lalohadai kererena. Haheitalai be inai: Ena be reidio ena siahu (wave) oi itaia diba lasi, to emu reidio dekenai taunimanima edia gado regena oi kamonai neganai, oi diba unai siahu (wave) ia noho. Unai hegeregerena, ena be guriguri ia kamonai Diravana ita itaia diba lasi, to ia havaraia gaudia ita itaia o stadilaia neganai, do ita hamomokania Dirava ia noho.

Edena dala ai ita hamomokania Dirava ia noho? Namona be tanobada ai idia noho gaudia ita itaia. Baibel ia gwau: “Momokani,  ruma ibounai be mai edia karaia tauna, to gau ibounai ia karaia tauna be Dirava.” (Heberu 3:4) Unai hereva oi abia dae, a? Reana iunives ai idia noho gaudia edia heau dalana, mauri ia matamaia dalana, o iseda harana oi laloa neganai, do oi abia dae taunimanima ia hereaia tauna ta ia noho. a

To, Dirava ese ia havaraia gaudia sibona amo ia ita dibaia be hegeregere lasi. Mani inai haheitalai oi laloa: Oi kamonai tau ta be iduara kahirakahira ia raka mai noho, to oi diba lasi ia be daika? Oi diba totona, iduara oi kehoa be namo. Unai hegeregerena, Havaraia Tauna ita diba totona, kara ta ita karaia be namo.

Baibel be unai iduara bamona, bema oi kehoa bona ia lalonai idia noho peroveta herevadia bona idia guguru daladia oi lalodia, do oi diba Dirava ia noho. b To danu, Dirava ese taunimanima ia durua sivaraidia ese iena kara idia hahedinaraia.

Guriguri ia Kamonai Diravana be Daika?

Baibel ese ia hahedinaraia guriguri ia kamonai Diravana ita dibaia diba. Baibel ia gwau: “Oi ese aiemai guriguri oi kamonai. Taunimanima ibounai be oi dekenai do idia mai.” (Salamo 65:2) Mai abidadama ida ia idia guriguri henia taudia ia kamonai henia. Ia be mai ena ladana. Baibel ia gwau: “Iehova  bona kara dika taudia edia padana be daudau. To kara maoromaoro taudia edia guriguri ia kamonai.”​—⁠Aonega Herevadia 15:29 BHğ.

Iehova be mai ena hemami danu. Baibel ia gwau, ia be “lalokau” bona “moale Diravana.” (2 Korinto 13:11; 1 Timoteo 1:11) Tanobada ai kara dika ia bada neganai, Baibel ia gwau: “Ena lalona be ia hisihisi.” (Genese 6:5, 6) Haida idia gwau Dirava ese hisihisi ia havaraia, badina ia ura taunimanima ia tohoa, to unai be momokani lasi. Baibel ia gwau: “Dirava be nega ta do ia kara dika diba lasi.” (Iobu 34:10) To reana do oi laloa, ‘Bema siahu ibounai Diravana be Havaraia Tauna, dahaka dainai hisihisi ia koua lasi?’

Iehova ese taunimanima dekenai ura kwalimu ia henia; unai ia karaia dainai ita diba ia be edena bamona Diravana. Eda ura kwalimu ita gaukaralaia namonamo, a? Taunimanima momo be edia ura kwalimu idia gaukaralaia kerere dainai, idia bona ma haida dekenai hisihisi idia havaraia. Namona be inai henanadai ita laloa: Bema Dirava ese taunimanima edia ura kwalimu ia kokia lasi, vadaeni edena dala ai hisihisi do ia haorea? Murina atikol ese unai do ia haerelaia.

[Footnotes]

[Box on page 5]

Dubu Taudia Edia Kara Dainai, Oi Daradara, A?

Dubu taudia edia kara dainai momo idia daradara Dirava be guriguri ia kamonai o lasi. Dubu taudia ese tuari, terorist, bona natuna hadikaia karadia idia durua dainai, guriguri idia laloa bada taudia idia gwau, “Lau abia dae lasi Dirava ia noho.”

Dahaka dainai dubu taudia ese dika idia havaraia? Kara dika taudia be dubu ladanai kara dikadia idia karaia. Baibel ia peroveta haida ese Keristani taudia do idia hakaua kerere, bona dika idauidau do idia havaraia. Aposetolo Paulo be Keristani elda taudia ia hamaoroa: “Umui huana amo tatau haida do idia toreisi bona hereva momokani do idia mogea. Bona hahediba taudia do idia hakaua siri, edia murinai idia raka totona.”​—⁠Kara 20:29, 30.

Dirava be tomadiho koikoi ia inai henia. Baibel ia gwau tomadiho koikoi ese “tanobada ai idia alaia mase taudia ibounai edia rara” idia bubua. (Apokalupo 18:24) Dirava ena matanai tomadiho koikoi be rara dekenai idia kerere, badina idia ese taunimanima dekenai Dirava momokanina idia herevalaia lasi, ia be lalokau Diravana.​—⁠1 Ioane 4:8.

Dubu taudia ese idia hahisia taudia be guriguri ia kamonai Diravana ese ia hebogahisi henidia. Dirava be taunimanima ia lalokau henidia dainai, kahirakahira Iesu amo tomadiho koikoi ibounai do ia kota henia. Iesu ia gwau: “Unai dina dekenai momo be lau dekenai do idia gwau: ‘Lohiabada e, Lohiabada e, emu ladana dekenai ai peroveta, . . . ani?’ To idia dekenai do lau gwau, umui lau diba lasi! Umui siri, umui taravatu utua taudia!”​—⁠Mataio 7:22, 23.