Tama Sina Edia Hereva
Tama Sina Edia Hereva
Emu natudia idia tubu daekau lalonai, edena bamona idia oi durua kamonai karana ena namo idia dibaia totona? Bona edena dala ai idia dekenai gaukara haida oi hadibadia diba? Tanobada hegegemadai tama sina haida edia hereva mani ita itaia.
HEBAMO KARADIA BONA RUMA GAUKARADIA
“Ai aniani hebou bona unai dina dekenai idia vara gaudia ai herevalaidia neganai, emai natudia be kamonai namonamo dalana idia dibaia. Idia itaia ai kamonai namonamo neganai, unai ese idia ia hagoadaia ta ta idia matauraia totona.”—Richard, Britain.
“Ai moale bada badina ai itaia emai natudia idia hemataurai heheni, bona edia hekwakwanai hamaoromaoroa totona, emai heduru idia tahua lasi. Bona taunimanima badadia dekenai mai gari lasi ida idia herevahereva.”—John, South Africa.
“Lau be goevadae lasi dainai, gau haida lau karaia kava bona egu natudia edia hemami lau hadikaia. Unai ia vara neganai, egu kerere dainai lau sori be mai anina bada.” —Janelle, Australia.
“Emai natudia ai hadibaia ruma dekenai gaukara idauidau idia karaia totona. Bona do idia heduru heheni, unai amo emai ruma bese be maino ai idia noho bona emai natudia idia moale.”—Clive, Australia.
“Emai natudia ai hadibaia ta ta ena kara idia lalopararalaia, idia hemataurai, bona idia gwauatao heheni, unai be mai ena hekwarahi.”—Yuko, Japan.
GOEVA KARADIA
“Emai natudia idia maragi neganai, sibona idia digu dalana ai hadibadia bona sopu, shampoo, bona spansi idia gaukaralaia totona.”—Edgar, Mexico.
“Ranu lasi gabuna dekenai ai noho neganai, hanaihanai sopu bona konteina ai ranu lau atoa, unai amo ruma lalonai ai do vareai lasi neganai, emai imana ai huria.”—Endurance, Nigeria.
“Dina ta ta ai, emai natudia dekenai aniani namodia ai henia, bona unai ese edia tauanina ia durua ena namo ai herevalaia. Natudia ese aniani idauidau idia itaia neganai, idia henanadai momo, unai dainai lau noidia aniani ai hegaegaelaia totona. Unai ese emai herevahereva karana ia hagoadaia danu.”—Sandra, Britain.
“Eksasais be mai anina bada, bona ai ura emai natudia dekenai haheitalai namona ai hahedinaraia. Emai natudia ida ai raka, nahu, tennis o basketbol gadara ai karaia hebou, eiava basikele amo ai loaloa hebou karana idia moalelaia. Idia diba eksasais be mai anina bada bona moale gauna.”—Keren, Australia.
“Natudia idia ura bada tama sina ida idia noho hebou, bona gau ta—moni, harihari gaudia o holidei—ese unai ia hereaia lasi. Lau be daba gaukaradia sibona lau karaia, badina unai nega ai natudia be sikuli dekenai idia lao. Bena adorahi ai, idia ida lau noho diba.”—Romina, Italy.
MATAHAKANI
“Matahakani henia daladia be idauidau, badina noho daladia be idauidau. Nega haida matahakani ai henia totona, natuna ida do ai herevahereva namonamo bona nega haida ia karaia moale gaudia ai koua.”—Ogbiti, Nigeria.
“Emai natudia ai nanadaia ai herevalaia gaudia idia gwauraia lou totona, unai amo ai itaia bema ai gwauraia gaudia idia lalopararalaia eiava lasi. Bona emai hereva hegeregerena ai kara. Ai ura emai natudia ese emai hereva idia badinaia, to bema kamonai karana idia hahedinaraia lasi, vadaeni idia ai panisia.”—Clive, Australia.
“Egu natudia lau matahakani henidia neganai, lau tui diho bona edia lata hegeregerenai idia lau hereva henia diba. Unai amo egu hereva idia kamonai namonamo. Bona lau gwauraia herevadia sibona lasi, to egu vairana toana amo egu hereva ena anina idia lalopararalaia danu.”—Jennifer, Australia.
“Emai natudia idia kerere neganai, ai be mai emai maoro idia ai hamaoroa ‘Oi be hereva oi kamonai diba lasi,’ to unai bamona ai karaia lasi. Bona danu, emai natudia haida vairanai idia ai gwau henia lasi. Gado maragina ai idia ai hereva henia eiava idia ai hakaua siri bona ai hereva henia.”—Rudi, Mozambique.
“Natudia be ma haida edia kara ese ia veria haraga, bona idia ura unai taudia idia tohotohoa. Unai dainai, gau badana be edia sikuli turadia, TV ai idia halasia gaudia, bona taunimanima ma haida edia laloani karadia amo idia ai koua totona, idia ai durua Baibel ese ia herevalaia kara namodia idia badinaia totona. Unai hakaua hereva namodia dainai dika idia dadaraia.”—Grégoire, Democratic Republic of the Congo.
“Natuna oi matahakani henia neganai, oi hereva goada, ena kerere hegeregerena oi panisia, bona emu hereva oi badinaia. Namona be natudia idia laloparara, edia kerere ena davana do idia abia bona emu hereva oi badinaia be namo.”—Owen, England.
[Blurb on page 22]
“Tamadia e, emui natudia do umui habadua lasi, dika idia lalohisihisi.”—Kolose 3:21
[Box/Picture on page 23]
FAMILI SIVARAINA
Adavana Lasi Tama O Sina Ia Kwalimu Diba
Lucinda Forster idia intaviu henia
Oi be adavana lasi dainai, dahaka hekwakwanai oi davaria?
Tama o sina ena maduna huaia be auka, to lau hekwarahi bada egu nega bona goada lau gaukaralaia totona. Nega bada lau atoa egu natudia dekenai kara maoromaoro taravatudia lau hadibaia totona, to danu nega lau atoa, idia ida lau laga-ani bona kiri hebou. Nega momo egu laga-ani negadia lau gaukaralaia ruma gaukaradia lau karaia totona.
Edena dala ai emu natudia ida oi herevahereva namonamo diba?
Emai headava ia doko murinai, egu natudia idia noho namonamo lasi bona idia badu. Hekwakwanai idia vara neganai, edia matana lau itaia bona mai gado namo ida lau hereva henidia. Lau naria ela bona emai badu ia ore, bena egu lalohadai lau gwauraia, badina lau ura lasi hekwakwanai ia bada. Edia lalohadai diba totona lau nanadaidia, lau kamonai namonamo, bona lau hahedinaraia edia hemami lau laloa bada. Edia sikuli gaukaradia dekenai idia lau durua bona idia karaia gaudia dainai lau hanamodia. Bona aniani negadiai mai maino ida ai helai hebou. Danu, nega ibounai idia lau hamaoroa lau lalokau henidia.
Edena dala ai matahakani oi henia?
Namona be natudia idia diba taravatu idia noho, bona unai taravatu ita haidaua lasi. Lau hereva goada to lau badu lasi. Egu natudia ida lau herevahereva, bona edia kerere ena badina lau gwauraia hedinarai. Lau do matahakani henidia lasi neganai, edia lalohadai diba totona lau henanadai henidia, unai amo idia karaia karana ena badina lau diba. Bema lau kerere—hegeregere gau ta lau lalopararalaia lasi—vadaeni idia dekenai lau sori.
Edena dala ai emu natudia oi hadibaia haida idia matauraia totona?
Idia lau hamaoroa Iesu ena hereva idia laloatao totona—ma haida ese idia kara henia hegeregerena, ma haida dekenai unai bamona idia karaia danu. (Luka 6:31) Idia lau hagoadaia sibona edia hekwakwanai idia hamaoromaoroa, bona bema idia badu heheni, mai manau ida idia hereva be namo.
Emu laga-ani negadiai dahaka oi karaia?
Emai moni ia hegeregere lasi holide totona ai lao, unai dainai niuspepa ai sekea, do ai karaia hebou gaudia ai tahua totona. Piknik ai karaia eiava tubutubu gaudia idauidau idia naria gabudia dekenai ai lao. Emai uma gabu ai aniani avadia (herbs) ai hadoa bona nanadu totona unai ai gaukaralaia. Moale karadia be mai anina bada, ena be park sibona dekenai ai lao.
Dahaka gaudia ese oi idia hamoalea?
Lau be adavana lasi dainai, unai be mai ena hekwarahi, to egu natudia ida ai hetura heheni namonamo, bona Dirava ese ai totona ia karaia gaudia ai moalelaia. Egu natudia edia kara idia namo idia lao dalana lau itaia neganai, lau moale. Hari idia ura nega momo lau ida idia noho, bona edia hebamo lau moalelaia. Lau lalohisihisi neganai unai idia diba, bona lau idia rosia idia hagoadaia totona. Edia lalokau karana ese lau ia hamoalea bada. To mai anina bada gauna be inai, Havaraia Tauna ena lalokau ai mamia, badina Ia ese nega aukadia lalonai ai ia durua. Baibel ena hagoadaia herevadia dainai, lau hekwarahi noho sina namona ai lau lao totona.—Isaia 41:13.
[Picture]
Lucinda bona ena natuna kekeni rua, Brie bona Shae
