Daika ese Natudia Dekenai Dirava Ia Hadibaia?

“Stiuden tauna be ena hadibaia tauna ia hereaia lasi, to idia hadibaia namonamo taudia ta ta ibounai be ena hadibaia tauna bamona do ia lao.”​—⁠LUKA 6:⁠40.

TAMA sina haida idia laloa idia hegeregere lasi, edia natudia dekenai Dirava idia hadibaia totona. Idia laloa edia edukeisen be bada lasi o tomadiho dekenai edia diba be bada lasi dainai, hadibaia taudia namodia ai idia lao diba lasi. Unai dainai, unai mai anina bada maduna be varavara ta o dubu gunalaia tauna ta dekenai idia henia.

Daika be hegeregere natudia dekenai tomadiho ena hereva momokani bona kara maoromaoro taravatudia ia hadibaia? Baibel ena lalohadai bona tahua gaukara idia karaia taudia edia hereva mani ita hahegeregerea.

Tamana Ena Maduna be Dahaka?

Baibel ena hereva: “Tamadia e, emui natudia do umui habadua lasi, to idia tubu noho lalonai, Iehova ena matahakani bona sisiba amo idia umui hadibaia be namo.”​—⁠Efeso 6:⁠4.

Tahua gaukara idia karaia taudia edia hereva: Bema tamadia ese tomadiho karadia dekenai abidadama goadana idia abia, edena dala ai namo idia davaria? Lagani 2009 ai idia halasia bukana (Fathers’ Religious Involvement and Early Childhood Behavior) ia gwau: “Bema tatau be tomadiho  oreana ta lalonai idia noho, unai ese do ia durudia tama namodia ai idia lao totona. Tomadiho herevadia ese ta ia durua ena kara ia hanamoa, bona haida tura henia daladia ia dibaia.”

Baibel ia hahedinaraia, tamana ena maduna be mai anina bada, gau badana be ia ese natudia do ia naria bona hadibaia. (Aonega Herevadia 4:1; Kolose 3:21; Heberu 12:⁠9) To, hari unai sisiba herevana be mai anina bada, a? Lagani 2009 ai, Florida ena iunivesiti ese atikol ta ia halasia, unai atikol lalonai tama edia kara ese natudia ia durua eiava lasi dalana ia herevalaia. Tahua gaukara idia karaia taudia idia davaria, bema tamadia be natudia ida gau idauidau idia karaia hebou, unai natudia be haida edia hemami do idia laloa bona sibodia do idia laloa maragi lasi. Memero idia gwau-edeede lasi bona kekeni be do idia lalohekwarahi momo lasi. Momokani, Baibel ena sisiba be do mai anina bada.

Sinana Ena Maduna be mai Anina Bada, A?

Baibel ena hereva: ‘Oiemu sinana ena hadibaia hereva do oi kamonai henia.’​—⁠Aonega Herevadia 1:⁠8.

Tahua gaukara idia karaia taudia edia hereva: Lagani 2006 ai buka ta (Handbook of Child Psychology) ia gwau: “Sina momo be nega bada idia atoa edia natudia ta ta ida idia hereva totona, to tamadia be unai bamona idia karaia lasi. Tano momo ai unai be ia momokani.” Unai dainai natuna ta ia bada ia lao lalonai, sina ena hereva, kara, bona lalohadai be mai anina bada.

Bema tama sina be natudia dekenai Dirava ena hereva momokani idia hadibaia, idia dekenai harihari gaudia rua idia henia bamona. Ginigunana be, dala ia kehoa natudia be edia guba Tamana idia tura henia totona. Bona unai ese mauri lalonai idia do ia durua bada. Iharuana be, natudia ese tama sina edia haheitalai idia itaia, edena dala ai idia gaukara hebou mai anina bada gaudia idia hagugurua totona. (Kolose 3:​18-20) Ena be haida ese tama o sina ta idia durua diba, to unai be edia maduna edia natudia dekenai Dirava bona ena ura idia hadibaia totona.

Edena dala ai tama sina ese edia natudia idia hadibaia? Edena hadibaia daladia ese anina namona idia havaraia diba?