Duahia Taudia Edia Henanadai . . .

Bese Ta Ese Bese Ma Ta Ia Hereaia Karana Be Dirava Ese Ia Abia Dae, A?

▪ Lasi. Baibel ia gwau: “Dirava be taunimanima edia toana ia laloa lasi, to bese ibounai lalonai ia idia gari henia bona kara maoromaoro idia karaia taudia be ia ese ia abia dae.”​—Kara 10:​34, 35.

Dirava ena lalohadai be goevadae lasi taudia edia laloa dalana ia hanaia momokani. Taunimanima momo idia abia dae, bese ta (nega momo unai be edia bese) ese bese ma ta ia hereaia. Unai bamona taudia ese Charles Darwin ena lalohadai idia abia, ia gwau: “Vaira nega ta ai, . . . diba taudia ese diba lasi taudia do idia haorea bona edia gabu do idia abia.” Madi unai ia momokani, badina sibodia idia abia isi besedia ese bese ma haida be dala idauidau ai idia hahisidia.

Bese abia isi karana ese namo ia havaraia, a? Hegeregere, saiens taudia idia hamomokania diba bese haida ese bese ma haida idia hereaia, a? Lasi, saiens tauna ta, Bryan Sykes, ia gwau: “Taunimanima edia gene ita laloa neganai, namo lasi ita laloa bese ta ese bese ma ta ia hereaia. Nega momo lau idia nanadaia, Greek tauna eiava Italy tauna be mai edia gene neganai, lau gwau, lasi. . . . Taunimanima ibounai edia gene be kahirakahira idia hegeregere.”

Saiens taudia edia hereva be Baibel ena hereva ida ia hegeregere. Baibel be ita ia hadibaia, Dirava ese tau tamona bona hahine tamona ia karaia, bona idia amo taunimanima ibounai idia vara. (Genese 3:20; Kara 17:26) Dirava vairanai, taunimanima ibounai be idia hegeregere.

Iehova ese taunimanima edia kopina kala eiava toana ia laloa bada lasi. To, Ia ese taunimanima edia kudouna dekenai idia noho gaudia ia laloa bada. Ia gwau: “Taunimanima ese tau ena toana idia itaia, to Lohiabada ese tau ena kudouna ia itaia.” (1 Samuela 16:7) Unai ese ita ia hagoadaia bada. Edena dala ai?

Herevana iseda kopina kala be idauidau, ita momo be iseda toana dainai ita moale lasi, to ita be mai eda siahu lasi unai gaudia ita haidaua totona. To iseda kudouna dekenai idia noho gaudia ita haidaua diba. (Kolose 3:9-11) Bema mai momokani ida eda kara ita tahua, do ita laloparara, bese ta ese ita idia hereaia eiava ita ese idia ita hereaia. Unai bamona lalohadai be Dirava ena lalohadai amo ia idau, unai dainai ita hekwarahi unai lalohadai dikana be iseda kudouna amo ita kokia.​—Salamo 139:​23, 24.

Iehova ena lalohadai hegeregerena ita bona ma haida ita laloa neganai, ita diba momokani Ia ese ita do ia durua. Iena Hereva ia gwau: “Lohiabada ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.” (2 Sivarai 16:9) Herevana ita be bese idauidau taudia, to bema Ia ita badinaia momokani, ita do ia durua.