Lalokau Tauna ta Ia Mase Neganai

Lagani 2007, July 17, Tuesday hanuaboi seven o’klok ai, São Paulo, Brazil, ena peleini abia gabuna badana ta dekenai, peleini ta be ena dala ia reaia bona maoromaoro kago idia atoa ruma badana dekenai ia heau lao bona unai ruma ia hadikaia. Unai aksiden lalonai taunimanima 200 bamona idia mase.

BRAZIL ai unai bamona aksiden badana ta be guna ia vara lasi, bona edia lalokau taudia idia mase taudia be unai aksiden idia laloaboio diba lasi. Claudete danu unai ia laloaboio lasi. Ia be TV ia itaia noho lalonai unai sivarai ia kamonai. Iena natuna mero, mauri lagani 26, ena ladana Renato be unai peleini ai. Renato be ia hegaegae October lalonai do ia headava totona. Claudete be mobael amo ena natuna mero ia rini henia, to haere ta ia abia lasi. Ia be foloa dekenai ia moru bona ia tai dikadika.

Antje ena maoheni merona be January 1986 ai, motuka aksiden ai ia mase. Unai sivarai ia kamonai negana ginigunana ai, ia hamomokania lasi. Ia gwau: “Lau hamomokania diba lasi. Lau laloa lau be nihi dikana ta lau abia bona do lau noga neganai, unai be ia vara momokani lasi. Egu tauanina ia heudeheude bona egu bogana ia hisihisi, ta be egu bogana ia botaia bamona.” Lagani toi lalonai Antje ia lalometau. Ena be lagani 20 mai kahana idia hanaia vadaeni, to unai ia laloa lou neganai ia gari.

Bema aksiden ta ia vara bona ruma bese tauna ta ia mase, unai ese gari, lalohisihisi, bona lalometau bada ia havaraia diba. Danu, ena be emu lalokau tauna be nega daudau ia gorere bona ia mase, to unai ese lalometau bada ia havaraia. Ta be ena lalokau tauna ena mase totona ia hegaegae diba lasi. Nanci ena sinana be nega daudau ia gorere bona lagani 2002 ai ia mase. To, Nanci ena sinana ia mase dinana ai, ia be hospital ena foloa ai ia helai bona ia diba lasi dahaka do ia karaia. Toana be ia dekenai mauri be anina lasi. Lagani 5 idia ore vadaeni, to ena sinana ia laloa neganai ia tai.

Dr. Holly G. Prigerson ia gwau: “Ena be eda lalokau tauna ta ia mase bona ita laloparara ia be ia noho lasi, to ia ita laloaboio diba lasi.” Bema emu lalokau tauna be aksiden ai o gorere dainai ia mase, reana do oi laloa: ‘Do lau tai be maoro, a? Edena dala ai inai hisihisi do lau haheaukalaia? Egu lalokau tauna do lau itaia lou, a?’ Hereva gabena ese inai henanadai bona oi daradaralaia henanadai ma haida do ia haerelaia.

[Picture Credit Line on page 3]

EVERTON DE FREITAS/AFP/Getty Images