BAIBEL BE SAIENS BUKANA LASI, TO ENA HEREVA MOMO BE SAIENS TAUDIA ESE HARI IDIA HAMOMOKANIA. HAHEITALAI HAIDA OI LALOA.

Oi laloa Dirava ese iunives ia karaia, a?

Matamanai, saiens taudia idia gwau unai henanadai ena haere be lasi. Hari, idia abia dae Dirava ese iunives ia karaia. Baibel ese idaunegai unai ia gwauraia vadaeni.​—Genese 1:1.

Tanobada ena toana be edena bamona?

Idaunegai, momo idia laloa tanobada be ia palaka. Lagani 500 B.C.E. ai, Grik saiens taudia idia gwau tanobada be ia kuboru. To, lagani 800 B.C.E. gunanai, peroveta tauna Isaia be ena buka lalonai inai hereva, “tanobada kuboruna” ia torea. ​—Isaia 40:22, NWT.

Oi laloa guba ia dika diba, a?

Lagani 400 B.C.E. ai ia noho Grik saiens tauna, Aristotle ia gwau, tanobada sibona be ia dika diba, to guba mai ena hisiu be idia senisi diba lasi o dika diba lasi. Lagani momo lalodiai, momo be unai lalohadai idia abia dae. To lagani 1800 B.C.E murinai, saiens taudia be lalohadai matamata ta idia halasia. Idia gwau, guba bona tanobada be idia dika diba. Unai lalohadai ia sapotia saiens tauna Lord Kelvin ia gwau Baibel ese guba bona tanobada be inai bamona ia herevalaia: “Idia be do idia dika lao, dabua idia dika lao bamona.” (Salamo 102:25, 26) Kelvin ia laloa, Baibel ena hereva ena anina be, Dirava be mai ena siahu dainai, ia ese guba bona tanobada ia gimaia diba, unai amo idia dika diba lasi.​—Hadibaia Tauna 1:4

Planeti ibounai hegeregere tanobada be dahaka ese ia durudia noho?

Aristotle ia gwau, planeti ibounai be kuboru gauna ta ese ia koudia hagegea, bona planeti ta ta be planeti ma haida lalonai idia noho, bona tanobada be idia huanai ia noho. Lagani 1700 C.E. murinai, saiens taudia idia davaria hisiu bona planeti be gau ta ese ia dogoatao lasi. To lagani 1500 B.C.E. ai idia torea Baibel bukana, Iobu, ese ia hahedinaraia, Dirava ese ia havaraia tanobadana be “gau ta latanai ia noho lasi.”​—Iobu 26:7, NWT.

BAIBEL, HEREVANA IA BE MEDIKOL BUKANA TA LASI, TO ENA SISIBA HAIDA ESE HELT DALANAI ITA IA DURUA DIBA.

Gorere taudia hapararaia.

Mose ena Taravatu ia gwau, lepera taudia be taunimanima huanai do idia noho lasi. Lagani 500 bona 1500 C.E. huanai, taunimanima be gorere badadia idia abia murinai, doketa be unai sisiba idia badinaia matamaia ema bona hari.​—Levitiko karoa 13 bona 14.

Mase tauna ena tauanina oi dogoatao murinai oi digu be namo.

Lagani 1900 gunanai, doketa taudia be mase taudia edia tauanina idia dogoatao murinai, edia imana idia huria lasi bena gorere taudia idia durua. Unai kara dainai momo idia mase. To Mose ena Taravatu ia gwau, bema tau ta ese mase tauna ena tauanina ia dogoatao, ia be do ia miro. Ma ia gwau, unai tauna be ena dabua do ia huria bona ranu lalonai do ia digu. Unai tomadiho karadia ese helt dalanai momo ia durua.​—Numera 19:11,19.

Kukuri negea dalana.

Lagani ta ta ai, natudia 500,000 mai kahana be diarrhea o kukuri ranu amo idia mase​—unai natudia idia gorere badina taunimanima be gabu maorodia ai idia kukuri lasi. Mose ena Taravatu ia gwau, taunimanima be murimuri ai idia kukuri neganai, namona be guri idia geia bona edia kukuri idia koua.​—Deuteronomi 23:13.

Circumcision eiava kopina utua negana.

Dirava ena Taravatu ia gwau, dina namba 8 ai beibi o mero ena usina kopina idia utua be namo. (Levitiko 12;3) Beibi ta ia vara bena wiki ta ia ore murinai, ena tauanina ai rara do ia heau namonamo. Baibel negadiai, medikol heduru gaudia be lasi dainai, aonega karana be idia naria ela bona wiki ta ia ore murinai beibi ena kopina idia utua.

Lalona bona tauanina edia helt.

Doketa taudia bona saiens taudia idia gwau, bema tau ta ia moale, gau namodia ia naria noho, bona haida edia dika ia gwauatao, ia be do ia gorere momo lasi. Baibel ia gwau: “Iena kudouna ia moale tauna ese namo ia havaraia noho, muramura namona bamona, to laloa metau tauna ese turia dika gorere ia havaraia noho.”​—Aonega Herevadia 17:22.