Inai magasin ese ia herevalaia hahinena, Delphine ia gwau ia lalohekwarahi negadiai bia momo ia inua. Baibel be alkahol inua karana ia taravatua lasi, to ia gwau “Kekero muramura momo idia inua taudia, danu do oi inua hebou lasi.” (Aonega Herevadia 23:20) Bia momo idia inua taudia be gorere badadia idia abia, edia hetura karana idia hadikaia, bona lagani ta ta ai taunimanima milioni momo idia mase. Unai bamona metau do idia vara lasi bema taunimanima be Baibel ena sisiba namona idia badinaia.

Delphine be unai bamona ia karaia. Hari, ia gwau: “Lau laloparara bia be egu lalohekwarahi ia haorea lasi. Lau ese Filipi 4:6, 7 ena sisiba namona lau badinaia, ia gwau: ‘Namo lasi gau ta umui lalohekwarahilaia, to . . . Dirava dekenai emui noinoi herevadia do umui gwauraia hedinarai.’ Hanuaboi ta ta ai lau lalohekwarahi neganai, Iehova dekenai lau noinoi. Ia dekenai egu badu, lalohisihisi, wari, o hemami ibounai lau gwauraia, bona lau noia dala haida amo lau ia durua lalohadai maorona lau abia totona. Daba ai, lau gaukara goada unai hemami ta lau abia lasi totona. Iehova guriguri henia karana ese lau ia durua lau karaia diba gaudia lau laloa totona bona lau karaia diba lasi gaudia lau laloa lasi. Hari, bia lau inua lasi. Badina lalomaino hereadaena lau davaria vadaeni, bona lau ura lasi gau ma ta ese unai maino ia hadikaia.”

Matabodaga karana ese taunimanima edia lalona o hemami ia hadikaia bona lalohisihisi ia havaraia. To unai ia vara lasi totona, Baibel ena hakaua herevadia be ita do idia durua matabodaga urana idia havaraia karadia—hegeregere, hauraia kava (flirting) bona ponografi—ita dadaraia totona. Mero ta ladana Samuel ia gwau: “Ta ita hauraia kava be auka lasi. Ena be kekeni ta lau ura lasi, to lau itaia kekeni ta be lau ia ura henia dainai, ia lau hauraia kava matamaia.” Nega momo, haida idia gwau Samuel be kekeni ia hauraia kava momo—ena be Samuel be unai bamona ia laloa lasi—to gabeai unai kara ia manadalaia. To gabeai unai kara dekenai ia hesiku. Hari ia gwau: “Unai be kara dikana, badina unai kara dainai lau be sibona egu namo lau laloa bada.”

Samuel be jw.org websait dekenai matamata taudia edia atikol ta ia duahia. Bona ia ese Aonega Herevadia 20:11 ena sisiba ia laloa, ia gwau: “Mero maragina ese iena kara dekena amo, sibona ena mauri ia hedinaraia noho. Iena kara dekena amo do oi diba, unai mero ia goeva bona ia maoro, o lasi.” Unai siri ese edena bamona ia durua? Samuel ia laloparara ena hauraia kava karana be kara goevana lasi bona maorona lasi. Hari ia gwau: “Lau dibaia gauna ta danu be inai: Kekeni ia hauraia kava merona be kara dikadia do ia manadalaia bona ia headava neganai ena mauri do ia namo lasi. Lau laloa gauna ta be, bema lau headava, egu hahine be dahaka do ia laloa bema lau ese kekeni ma ta lau hauraia kava. Bona lau laloparara unai kara ese egu noho dalana do ia hadikaia. Ena be kekeni ta ita hauraia kava diba, to unai be kara maorona lasi.” Samuel ese ena mauri ia senisia. Ia ese kekeni hauraia kava karana ia hadokoa dainai, unai ese ia durua matabodaga karana dekenai ia moru lasi.

Antonio be kara mirona ia karaia: Hanaihanai ponografi o matabodaga piksa dikadia ia itaia. Ena be ia ese ena adavana hahinena ia lalokau henia bada, to ponografi ia itaia loulou. Ia gwau 1 Petero 5:8 ese ia durua bada herea. Unai siri ia gwau: “Do umui laloa maoromaoro bona do umui gima noho. Emui inai tauna, Diabolo, be ia boiboi bada laiona bamona ia raka loaloa, do ia ania ore tauna ia tahua noho.” Antonio ia gwau: “Inai tanobada ai, ponografi piksa dikadia be ita idia hagegea, bona unai laulau dikadia ita laloatao, eda lalona amo ita kokia be auka. Lau be 1 Petero 5:8 ese lau ia hadibaia unai hahetoho be Satani ese ia havaraia. Oibe, karaharaga lau laloparara laulau dikadia be Satani ese ia havaraia. Hari, lau diba Iehova sibona ese lau ia durua diba lau ‘laloa maoromaoro bona lau gima noho’ sibona lasi, to do lau hekwarahi egu lalona, kudouna, bona headava lau gimaia totona.” Antonio be heduru maorona ia abia, bona ponografi itaia loulou karana ia dadaraia. Unai bamona ia karaia dainai, dika badana ia davaria lasi.

Momokani, Baibel ena sisiba namodia ese ita ia durua diba dika badadia ita dadaraia totona. To idia ore diba lasi hekwakwanai be edena bamona? Mani ita itaia edena dala ai Dirava ena Hereva ese ita ia durua diba unai hekwakwanai badadia ita hanaia totona.