ANTOINE SKALECKI be mero neganai, nega momo hosi maragina ta ida ia loaloa. Idia be ororo ena guri lalonai idia vareai bona coal idia abia bona guri amo idia abia raka-lasi. Unai guri ena diari be bada lasi, bona ena daudau be 500 mita bamona, unuseniai coal mine ia noho. Antoine ena tamana be unai mine ai aksiden ia davaria dainai, Antoine ia gaukara matamaia, bona dina ta ta ai hora 9 ia gaukara. Nega ta tano ia makohia neganai, Antoine be kahirakahira unai guri lalonai ia mase.

Lagani 1925 bamona lalonai, Antoine be France ai ia vara, bona ena tama sina be Poland taudia. Dahaka dainai Poland taudia be France dekenai idia lao? Tanobada Tuarina Ginigunana murinai Poland be independens ia abia, bona ena popiuleisen be bada herea. To, France ai, tuari lalonai tatau milioni momo idia mase dainai, coal mine ena gaukara totona tatau be momo lasi. Unai dainai France bona Poland edia gavamani be September 1919 ai pepa idia sainia, Poland taudia be France dekenai idia lao totona. Lagani 1931 ai, France ai idia noho Poland taudia edia popiuleisen be 507,800. Idia momo be not kahana ai idia noho, bona mine ai idia gaukara.

Poland taudia be gaukara goada taudia bona edia kastom bona tomadiho daladia idia badinaia. Antoine, hari ena mauri lagani be 90, ia gwau: “Egu tubuna tau Joseph be mai hemataurai ida Baibel ia herevalaia, ena tamana danu be unai bamona ia karaia.” Sunday ai, mine dekenai idia gaukara Poland taudia be dabua namodia idia hahedokilaia bena dubu dekenai idia lao, hanaihanai idia karaia bamona, to France taudia be unai bamona kara idia ura henia lasi.

Ena be lagani 1904 amo Bible Student taudia be edia haroro gaukara idia karaia matamaia, to Poland taudia momo idia haroro henia negana ginigunana be Nord-Pas-de-Calais dekenai. Lagani 1915 ai, The Watch Tower be Poland ai hua ta ta lalonai idia printaia matamaia, bona 1925 ai The Golden Age (o hari be Awake!) be Polish gado ai idia halasia matamaia. Famili momo be unai magasin ena hereva bona Poland gado buka ladana The Harp of God idia ura henia.

Lagani 1924 ai, Antoine ena vavana be Bible Student taudia edia hebou ginigunana dekenai ia lao, bena Antoine ena famili be ena vavana amo hereva momokani idia dibaia. Unai lagani ai,  Bruay-en-Artois taoni ai Bible Student taudia be Poland gado ai edia hebouhebou ginigunana idia karaia. Wiki haida murinai, Joseph F Rutherfort be hedikwota amo ia mai, bona hebou badana ta idia karaia. Unuseniai taunimanima 2,000 bamona idia hebou. Tadikaka Rutherford be hutuma ia itaia neganai, idia momo be Poland taudia, ia gwau: “Iehova ese France dekenai umui ia mailaia hereva momokani dibaia totona. Unai dainai umui bona emui natudia ese France taudia do umui durua. Haroro gaukara badana ia do noho, bona Iehova ese pablisa do ia gaukaralaia unai idia karaia totona.”

Bona Iehova be unai bamona ia karaia! Poland Keristani taudia be mai kudouna ibounai ida haroro gaukara idia karaia, mine ai idia gaukara goadagoada bamona! Poland taudia haida be edia tano dekenai idia giroa lou, bona idia dibaia hereva momokani idia harorolaia. Teofil Piaskowski, Szczepan Kosiak, and Jan Zabuda bona ma haida be Poland dekenai idia giroa lou bona unuseniai haroro gaukara idia habadaia.

To Poland tadikaka taihu momo be France dekenai idia noho bona unuseniai idia noho tadikaka taihu ida idia haroro. Lagani 1926 ena hebouhebou badana be Sin-le-Noble taoni ai idia karaia, Poland gado hebouhebou dekenai idia mai taudia be 1,000, bona French gado hebouna dekenai idia mai Poland taudia ibounai be 300. Lagani 1929 Yearbook ia gwau: “Unai lagani ai Poland tadikaka taihu 332 idia bapatiso.” Tanobada Tuarina Iharuana ia do vara lasi neganai, France gado kongrigeisen be 52 bona 32 be Poland gado kongrigeisen.

Lagani 1947 ai, Poland gavamani ese Poland taudia idia hamaoroa edia hanua dekenai idia giroa neganai, Iehova ena Witnes taudia momo be Poland dekenai idia giroa lou. Herevana edia tano dekenai idia giroa lou, to idia bona France tadikaka taihu edia gaukara namona dainai, unai lagani ai pablisa ena namba be 10 pesen amo ia bada. Bena lagani 1948 amo ia lao 1950 ai, pablisa ena namba be 20 pesen, bena 23 pesen, bona gabeai 40 pesen amo ia bada daekau. Pablisa matamata durudia totona, France brens ese lagani 1948 ai sekit naria taudia idia abia hidi. Idia abia hidi sekit naria taudia faiv amo, foa be Poland amo, bona idia ta be Antoine Skalecki.

France ai idia noho Iehova ena Witnes taudia momo edia tamadia edia ladadia be Poland amo, idia momo be mine gaukara idia karaia bona idia haroro gaukara goadagoada. Hari danu, tano ma haida amo idia mai taudia momo be France dekenai hereva momokani idia dibaia noho. Ena be tano ma haida amo idia mai taudia be edia tano dekenai idia giroa lou eiava unuseniai idia noho, to idia be Basileia idia harorolaia goadagoada noho, guna idia mai Poland taudia idia karaia bamona.—Orea ena histori France amo.