1. Lagani 66 C.E. ai, dahaka gaudia idia vara? (Laulau ginigunana herevalaia.)

 Mani oi laloa: Lagani 66 C.E. ai, oi be Keristani tauna ta bona Ierusalema dekenai oi noho. Unai nega ai gau momo idia vara. Roma ena gavamani tauna ta Florus ese dubu ena maua amo koini 17 talent, ena metau be 346 kilogram bamona, ia henaoa. Unai dainai Iuda taudia idia badu, bona Ierusalema ai Roma ena tuari taudia idia hamasea, bona idia ura lasi Roma taudia ese idia biagua. To, hua toi lalonai, Roma be karaharaga ena tuari taudia 30,000 ia haboua bona Ierusalema dekenai idia mai, bona Suria ena gavana Cestius Gallus ese ia gunalaia. Unai tuari taudia be Ierusalema dekenai idia vareai, bona gwau-edeede Iuda taudia be dubu helaga lalonai idia komu. Bena, Roma ena tuari taudia be dubu helaga ena magu idia makohia! Hanua lalonai taunimanima idia gari bada. Idia vara gaudia oi itaia neganai, emu hemami be edena bamona?

 2. Lagani 66 C.E. ai, Keristani taudia be dahaka idia karaia? Bona edena dala ai unai ia vara?

² Iesu ena hereva, Luka ena evanelia bukana ai, oi laloatao, ia  gwau: “Umui itaia Ierusalema be tuari oreadia ese idia hagegea neganai, do umui diba ena hadikaia ore negana be ia mai kahirakahira.” (Luka 21:20) To, reana do oi laloa, ‘Edena dala ai unai hadibaia hereva lau badinaia diba?’ Iesu ma ia gwau: “Iudea dekenai idia noho taudia be ororo dekenai do idia heau lao be namo bona Ierusalema lalonai idia noho taudia be unai gabu do idia rakatania, bona badina hanuadia dekenai idia noho taudia be ia dekenai do idia vareai lasi.” (Luka 21:21) Bema Ierusalema hanua be tuari taudia ese idia hagegea, edena dala ai do oi heau diba? Dala be lasi. To, oi itaia Roma tuari taudia be idia raka giroa noho! Iesu ia peroveta bamona, edia tuari negana idia “hakwadogia.” (Mat. 24:22) Hari be nega namona Iesu ena hadibaia hereva oi badinaia totona. Karaharaga oi bona kamonai Keristani taudia ma haida be Ioridane sinavai badinai ia noho ororo dekenai umui heau lao. a Bena, lagani 70 C.E. ai, Roma ena ami ia gunalaia tauna matamata be Ierusalema dekenai ia lao, bona unai hanua ia hadikaia. To oi roho mauri badina Iesu ena hadibaia hereva oi badinaia.

 3. Daudau lasi ita dekenai dahaka do ia vara? Bona inai stadi lalonai dahaka do ita herevalaia?

³ Daudau lasi ita dekenai unai do ia vara danu. Iesu be Keristani taudia ia hadibaia neganai, Ierusalema ena hadikaia karana sibona ia herevalaia lasi, to unai nega ai ia vara gauna be gabeai do ia vara “hisihisi badana” ida ia hahegeregerea. (Mat. 24:3, 21, 29) To, “hutuma bada” be unai hisihisi badana ai do idia roho mauri. (Apokalupo 7:9, 13, 14 duahia.) Gabeai do idia vara gaudia dekenai Baibel be dahaka ia gwau? Momokani, haere ita diba be namo, badina ita ura diba dahaka ita karaia be namo ita roho mauri totona. Hari, nega vaira ai do idia vara gaudia do ita herevalaia, unai amo ita diba ita be dahaka do ita karaia.

 4. Hisihisi badana be edena bamona do ia matamaia?

⁴ Hisihisi badana be edena bamona do ia matamaia? Apokalupo bukana ia hahedinaraia “Babulonia Badana” do idia hadikaia. (Apok. 17:5-7) Tomadiho koikoi ibounai be ariara hahine bamona ia gwauraia! Dubu gunalaia taudia be inai tanobada dikana ena gunalaia taudia ida idia heudahanai bamona. Idia be Iesu bona ena Basileia idia durua lasi, to tanobada ena gunalaia taudia idia durua, bona Dirava ena hakaua herevadia idia badinaia lasi to politikol lalonai idia vareai. Idia be Dirava ena horoa taudia, rami-hebou kekenina, bamona lasi. (2 Kor. 11:2; Iam. 1:27; Apok. 14:4) To, daika ese unai ariara hahine oreana do ia hadikaia? Iehova Dirava ese “iena palani” be “dagedage animal kakakakana” mai ena “doana 10” ena kudouna ai do ia atoa.—Apokalupo 17:3, 16-18 duahia.

5, 6. Dahaka dainai ita gwau lasi Babulonia badana idia hadikaia neganai, tomadiho koikoi taudia ibounai do mase?

⁵ To, do ita gwau lasi, Babulonia Badana idia hadikaia neganai, tomadiho koikoi taudia ibounai do idia mase. Peroveta tauna Sekaraia ese unai nega ia herevalaia. Guna tomadiho koikoi ia badinaia tauna ia herevalaia neganai, ia gwau: “‘Lau be peroveta tauna lasi, to lau be biru tauna. Lau ese egu mauri dinadia ibounai lalonai tano lau birulaia vadaeni.’ ‘Bona bema tau ta ese unai tau ia nanadaia, ia gwau, ‘Unai bero oiemu kemena dekenai be dahaka?’ Vadaeni unai tau ese inai bamona do ia haere, ‘Inai bero be lauegu turana ena ruma dekenai lau davaria.” (Sek. 13:4-6) Unai ese ia hahedinaraia dubu taudia haida be edia tomadiho daladia  do idia rakatania, bona idia gwau idia be tomadiho koikoi taudia lasi.

⁶ Unai nega ai Dirava ena taunimanima dekenai dahaka do ia vara? Iesu ia gwau: “Momokani, bema Dirava ese unai nega ia hakwadogia lasi, taunimanima ta do ia mauri lasi, to ia ese ia abia hidi taudia dainai, unai nega do ia hakwadogia.” (Mat. 24:22) Guna ita hereva bamona, lagani 66 C.E. ai tuari idia “hakwadogia,” unai dainai “abia hidi taudia,” horoa Keristani taudia unai, be edia hanua idia heautania diba. Unai hegeregerena, “abia hidi taudia” totona, unai hisihisi badana do idia “hakwadogia.” Unai nega ai Politikol ena “doana 10” be Dirava ena taunimanima do ia hadikaia lasi. Nega kwadogina lalonai hisihisi badana do ia doko.

7, 8. Tomadiho koikoi idia haorea murinai, dahaka do ia vara? Edena dala ai Dirava ena taunimanima be edia abidadama ai do idia gini goada?

⁷ Tomadiho koikoi idia hadikaia ore murinai, dahaka do ia vara? Unai negai do ita hahedinaraia ita be daika ita badinaia. Taunimanima momo ese tanobada oreadia, “ororo ena nadi badadia” unai, amo heduru do idia tahua. (Apok. 6:15-17) To, Dirava ena taunimanima be Iehova dekenai heduru do idia tahua. Aposetolo taudia edia negai, Roma taudia be tuari idia “hakwadogia” neganai, ia hahedinaraia lasi Iuda taudia momo be unai nega ai Keristani taudia ai idia lao. To, Iesu ia hereva bamona, unai be nega namona Keristani taudia ese Ierusalema idia rakatania totona. Vaira negana be unai bamona, hisihisi badana idia “hakwadogia” neganai, do ita gwau lasi unai negai taunimanima momo be Keristani korikori taudia ai do idia lao. To, unai be nega namona tomadiho momokani taudia do idia hamomokania Iehova idia lalokau henia bona horoa taudia idia durua.—Mat. 25:34-40.

⁸ Ena be unai hahetoho bada negana ai do idia vara gaudia ibounai do ita lalopararalaia lasi, to ita diba unai negai eda ura gaudia haida do ita dadaraia. Aposetolo edia negai, Keristani taudia idia roho mauri totona, edia kohu o moni idia rakatania bona unai nega aukana idia haheaukalaia. (Mar. 13:15-18) Eda abidadama ai ita gini goada noho totona, iseda kohu do ita haboioa, a? Do ita hegaegae, unai amo ita hamomokania ita be Iehova ita badinaia. Mani oi laloa! Unai negai, ita ese peroveta tauna Daniela ena haheitalai do ita tohotohoa, herevana dahaka idia vara Dirava do ita tomadiho henia noho.—Dan. 6:10, 11.

9, 10. (a) Dirava ena taunimanima be dahaka sivarai do idia harorolaia? (b) Dirava ena taunimanima idia inai henia taudia be dahaka do idia karaia?

⁹ Unai nega ai “Basileia ena sivarai namona” do idia harorolaia lasi. Unai nega be ia ore vadaeni. To, “Dokona” be kahirakahira do ia ginidae! (Mat. 24:14) Unai dainai Dirava ena taunimanima be hahemaoro sivaraina ta do idia harorolaia goadagoada. Satani ena tanobada be kahirakahira do ia ore ena hadibaia herevana do idia gwauraia. Baibel ese unai hahemaoro herevana be inai bamona ia gwauraia: “Medu badana, aisi nadi bamona idia diho. Unai nadi ta ta edia metau be kilogram 20 bamona, idia be guba amo taunimanima latanai idia moru. Vadaeni unai dika badana dainai, taunimanima ese Dirava ena ladana idia hadikaia, badina unai dika be bada herea momokani.”—Apok. 16:21.

¹⁰ Eda inai taudia ese unai gaudia do idia itaia. Magoga tauna Goga, tanobada besedia unai, ese do ia karaia gaudia be peroveta tauna Esekiela ese ia gwauraia: “Lohiabada Dirava ese inai bamona Goga dekenai ma ia gwau, ‘Unai dina do ia ginidae neganai,  laloa haida be oi dekenai do idia vara, vadaeni kara dika ta do oi palania, do oi gwau, ‘Lau ese mai edia magu lasi hanuadia edia tano do lau tuari henia. Lau ese mai maino danu idia noho taudia, tuari idia laloa lasi taudia do lau tuari henia. Badina idia be mai hanua magudia lasi, mai edia magu iduaradia lasi, mai edia auri ba loka gaudia lasi. Unai guna idia dika hanuadia lalonai idia noho taudia edia kohu do lau henaoa, bona edia gau do lau abia kava. Idia be bese idauidau edia huanai, gabu idauidau dekena amo idia haboua lou, bona hari, mai edia boromakau bona mamoe momo Israela tano ena huanai momokani idia noho.’” (Ese. 38:10-12; BHḡ) Dirava ena taunimanima be tanobada taudia edia huanai idia noho bona idia amo do idia idau. Unai dainai tanobada besedia do idia moale lasi. Oibe do idia ura kara ta do ia karaia Iehova ena horoa taudia bona edia bamodia idia hadikaia totona.

11. (a) Hisihisi badana ai do idia vara gaudia dekenai dahaka ita laloatao be namo? (b) Taunimanima be guba ai idia vara gaudia idia itaia neganai, dahaka do idia karaia?

¹¹ Gabeai idia vara gaudia ita tahua lalonai, namona be ita laloatao do idia vara gaudia edia nega korikoridia be Dirava ese ia gwauraia hedinarai lasi. Toana be idia vara gaudia haida be do idia vara hebou. Iesu ese iena peroveta herevana lalonai nega dokonai idia vara gaudia ia herevalaia, ia gwau: “Dina, hua, bona hisiu dekenai toa do idia vara bona tanobada ai bese idauidau be do idia hisihisi, do idia diba lasi dahaka do idia karaia, badina davara ena hurehure ena regena be bada. Bona taunimanima do idia gari dikadika bona edia goada do ia ore, tanobada dekenai kahirakahira do idia vara gaudia dainai bona guba ena siahu gaudia be do idia mareremarere. Bena idia ese taunimanima ena Natuna do idia itaia, mai ena siahu bona hairai bada ida ori lalonai do ia mai.” (Luka 21:25-27; Mareko 13:24-26 duahia.) Unai peroveta herevadia ese guba gaudia korikoridia ia herevalaia, a? Namona be ita naria bona itaia. Herevana dahaka do idia vara, unai toa gaudia ese Dirava ena inai taudia do idia hagaria bada.

12, 13. (a) Iesu be “siahu bona hairai” ida ia mai neganai, dahaka do ia vara? (b) Unai negai Dirava ena hesiai taudia be dahaka do idia karaia?

¹² Iesu be “siahu bona hairai” ida ia mai neganai, dahaka do ia vara? Abidadama taudia be ahuna namona do idia abia bona abidadama lasi taudia be panisi do idia abia. (Mat. 24:46, 47, 50, 51; 25:19, 28-30) Mataio ena sivarai bamona, Iesu ese mamoe bona nanigosi edia idau ia herevalaia murinai, ia gwau: “Taunimanima ena Natuna be mai hairai ida ena aneru ibounai danu do ia mai neganai, ena terona hairaina latanai do ia helai. Bona ia vairanai bese iboudiai do idia hebou, bona ia ese taunimanima do ia hapararaia, mamoe naria tauna ese mamoe be nanigosi amo ia hapararaia bamona. Ia ese mamoe be ena idibana kahanai do ia atoa bona nanigosi be ena laurina kahanai do ia atoa.” (Mat. 25:31-33) Nanigosi bona mamoe bamona taudia be dahaka hahemaoro herevana do idia abia? Unai parabole ena dokonai, ia gwau: “Bona unai taudia be do idia mase ela bona hanaihanai, to kara maoromaoro taudia be mauri hanaihanai do idia abia.”—Mat. 25:46.

¹³ Bema nanigosi bamona taudia idia diba do idia “mase ela bona hanaihanai,” dahaka do idia karaia? “Mai taitai danu edia kemena do idia botaia.” (Mat. 24:30) Keriso ena tadikaka bona idia bamoa abidadama taudia be unai negai dahaka do idia karaia? Mai abidadama goadana ida idia ese Iehova Dirava bona iena Natuna, Iesu Keriso ena hahegani do idia kamonai henia: “Unai gaudia idia vara matamaia neganai, umui gini tore  bona emui kwarana umui abia isi, badina emui hahemauri be kahirakahira.” (Luka 21:28) Oibe, namona be ita abia dae momokani iseda hahemauri be ia kahirakahira.

14, 15. Magoga tauna Goga ena tuari ia havaraia murinai, dahaka haboua gaukarana do ia vara? Unai nega ai dahaka do ia vara?

¹⁴ Magoga tauna Goga ese Dirava ena taunimanima ia tuari henia neganai, dahaka do ia vara? Mataio bona Mareko ese unai sivarai idia torea: “[Taunimanima ena natuna] ese aneru do ia siaia, bona idia ese not, saut, ist, bona west amo Dirava ena abia hidi taudia do idia haboua, tanobada ena kahana ta amo ela bona guba ena kahana ta dekenai.” (Mar. 13:27; Mat. 24:31) Unai be horoa taudia haboua karana ia herevalaia lasi; eiava horoa taudia ese edia maka ginigabena idia abia karana ia herevalaia lasi. (Mat. 13:37, 38) Hisihisi badana ia do matamaia lasi neganai, horoa taudia ese edia maka ginigabena idia abia. (Apok. 7:1-4) Vadaeni, Iesu be dahaka haboua gaukarana ia herevalaia? Unai ena anina be tanobada ai idia do noho horoa taudia ese edia guba ahuna do idia abia. (1 Tes. 4:15-17; Apok. 14:1) Magoga tauna Goga ese Dirava ena taunimanima idia hahisia lalonai unai do ia vara. (Ese. 38:11) Iesu ena hereva do ia guguru: “Unai nega ai, kara maoromaoro taudia be edia Tamana ena Basileia lalonai dina bamona do idia diaridiari.”—Mat. 13:43. b

¹⁵ Kerisendom oreadia idia laloa Keristani taudia be tanobada tauanina ai guba dekenai do idia daekau. Danu idia gwau Iesu be tanobada lohiaia totona ia mai neganai, ia do idia itaia. To Baibel ia gwau, “Taunimanima ena Natuna ena toa be guba ai do ia hedinarai” bona Iesu be “guba ena ori latanai do ia mai.” Anina be taunimanima ena Natuna  ia mai neganai ta ese do ia itaia lasi. (Mat. 24:30) Danu Baibel ia gwau: “Hidio bona rara ese Dirava ena Basileia do idia abia diba lasi.” Unai dainai guba dekenai do idia daekau taudia be “do idia idau, kibi dokona idia hiriria neganai, unai do ia vara haraga, ia be matana hakapua bona kehoa haraga bamona.” c (1 Korinto 15:50-53 duahia.) Tanobada ai idia noho abidadama horoa taudia be do idia haboua haraga.

16, 17. Mamoe Natuna ena headava do lasi neganai, guba ai dahaka do ia vara?

¹⁶ Horoa taudia ibounai 144,000 be guba dekenai idia daekau murinai, mamoe natuna ena headava aria totona do idia hegaegae matamaia. (Apok. 19:9) To unai ia do matamaia lasi neganai, gau ta do ia vara guna. Laloatao, tanobada ai idia do noho 144,000 taudia be guba dekenai idia daekau bona daudau lasi murinai, Goga ese Dirava ena taunimanima do ia tuari henia. (Ese. 38:16) Unai neganai dahaka do ia vara? Tanobada ai Dirava ena taunimanima be ta ese do ia gimaia lasi. Idia ese Iehosapata ena negai idia henia hadibaia herevana do idia badinaia, ia gwau: “Emui gabu dekenai do umui gini, bona naria noho sibona, vadaeni Lohiabada ena kwalimu umui dainai do umui itaia. Do umui gari lasi, bona do umui laloa manoka lasi, kerukeru be idia tuari henia totona do umui lao, bona Lohiabada be umui danu do ia noho.” (2 Siv. 20:17) To guba ai kara idauna ta do ia vara. Unai negai horoa taudia ibounai be guba dekenai idia daekau vadaeni. Apokalupo 17:14 ese Dirava ena taunimanima idia inai henia taudia ia herevalaia: “Idia be Mamoe Natuna ida do idia tuari, to Mamoe Natuna be lohia ibounai edia Lohia, bona king ibounai edia King dainai, ia ese idia do ia hadarerea. Danu, Dirava ese ia boiria bona ia abia hidi taudia, ia idia badinaia taudia unai, ese unai king taudia do idia hadarerea danu.” Guba ai idia lohia 144,000 taudia bona Iesu ese tanobada ai Dirava ena taunimanima do idia hamauria.

¹⁷ Aramagedono tuarina ese Iehova ena ladana helagana do ia hanamoa. (Apok. 16:16) Unai negai nanigosi bamona taudia be “do idia mase ela bona hanaihanai.” Kara dika tanobadana do idia hagoevaia, bona hutuma bada be hisihisi badana ai do idia roho mauri. Unai gaudia ibounai idia ore murinai, Apokalupo bukana ese ia herevalaia, mamoe natuna ena headava do ia matamaia. (Apok. 21:1-4) d Tanobada ai do idia mauri noho taudia ibounai ese Dirava ena ura do idia badinaia bona ena lalokau bada do idia itaia. Unai be headava aria idauna momokani! Oi ura unai nega namona do oi itaia, a?—2 Petero 3:13 duahia.

18. Vaira neganai do idia vara gaudia ita naria noho lalonai, dahaka ita karaia be namo?

¹⁸ Unai gaudia be vaira neganai do idia vara dainai, dahaka ita karaia be namo? Aposetolo Petero ia gwau: “Unai gaudia ibounai be inai dala ai do idia veve ore dainai, namona be emui kara idia helaga bona Dirava badinaia karadia umui hahedinaraia. Bona Iehova ena dina ia mai negana umui naria bona umui laloa noho. . . . Unai dainai lalokau taudia e, unai gaudia umui naria noho dainai, do umui gaukara goada bona Dirava vairanai do umui miro lasi, umui kerere lasi, bona mai maino ida umui noho.” (2 Pet. 3:11, 12, 14) Namona be ita gaukara goada Dirava vairanai ita miro lasi, bona Maino ena King ita durua.