1, 2. Iesu be edena bamona ia hahedinaraia taunimanima ia lalokau henia bada?

 DIRAVA ese ena vara guna Natuna ia havaraia neganai, unai ese Iena aonega bada ia hahedinaraia. Baibel ese Iesu ia gwauraia aonega bona ena Tamana badibadinai ia be “gaukara ia diba namonamo tauna.” (Aon. 8:30, BHḡ) Ita gwau diba Dirava ese guba ia karaia bona ‘tanobada ena badina ia atoa neganai,’ Iesu ia moale. To unai ibounai amo Dirava ena Natuna roboana be ‘tanobada ai idia noho taudia ibounai ia lalokau henia bada.’ (Aon. 8:22-31; NW) Oibe, Iesu be tanobada dekenai ia do mai lasi neganai, taunimanima ia lalokau henia.

² Iesu be mai ura ida “ia dekenai idia noho gaudia ibounai ia rakatania” bona taunimanima hegeregerena ai ia lao. Unai amo ia hamomokania ia be ena Tamana ia badinaia bona ia lalokau henia. Bona taunimanima ia lalokau henia bada dainai, ‘edia mauri davana ia karaia.’ (Fili. 2:5-8; Mat. 20:28) Iesu be tanobada ai ia noho neganai, Dirava ena siahu amo hoa karadia  ia karaia, unai ese iena lalokau taunimanima totona ia hahedinaraia. Iesu ena hoa karadia ese kahirakahira tanobada hegegemadai do ia karaia gau namodia momo ia laulaulaia.

 3. Inai stadi ai dahaka do ita herevalaia?

³ Iesu be tanobada dekenai ia mai ena badina ta be, ‘Dirava ena Basileia ena sivarai namona ia harorolaia.’ (Luka 4:43) Iesu ia diba unai Basileia amo ena Tamana ena ladana do ia hahelagaia, bona taunimanima edia hekwakwanai ibounai do ia haorea. Ita hoa lasi, badina Iesu ia haroro gabudia ibounai dekenai ia hahedinaraia ia be taunimanima ia laloa bada. Dahaka dainai unai ita laloa be namo? Badina ita dibaia gaudia ese vaira negana totona iseda abidadama bona helaro do ia hagoadaia. Mani Iesu ena hoa karadia foa ita laloa.

 4. Iesu ese lepera tauna ia itaia neganai, dahaka ia karaia?

⁴ Iesu be Galilea ai ena haroro gaukara ia hamatamaia. Galilea ena taoni ta ai, Iesu be hebogahisi gauna ta ia itaia. (Mar. 1:39, 40) Iena vairanai lepera gorere tauna ta ia gini. Doketa tauna Luka ese unai tauna ia herevalaia neganai, ia gwau: “Lepera gorere dikana ia abia tauna.” (Luka 5:12) “Iesu ia itaia neganai, [lepera tauna] ia goru diho bona ia noia, ia gwau: ‘Lohiabada e, bema oi ura, lau oi hanamoa diba.’” Unai tauna ia diba Iesu be mai ena siahu, to ia ura diba bema Iesu ia ura ia do ia hanamoa. Iesu be dahaka do ia karaia? Iesu ese unai tauna—ena tauanina ena toana be ia dika momokani—ia itaia neganai dahaka ia laloa? Farisea taudia be unai bamona gorere taudia idia hebogahisi henia lasi, oi laloa Iesu be unai bamona do ia karaia, a? Bema unai be oi dahaka do oi karaia?

 5. Iesu ese lepera tauna ia hanamoa neganai, dahaka dainai ia gwau “lau ura”?

⁵ Mose ena taravatu hegeregerena, namona be lepera tauna do ia boiboi, “Miro, miro!”, to lepera tauna be unai ia karaia lasi. Iesu be unai ia laloa lasi, ia be unai tauna ena ura gauna sibona ia laloa. (Lev. 13:43-46) Ita diba lasi Iesu be dahaka ia laloa, to ita diba ia be taunimanima ia lalokau henia. Iesu ia hebogahisi dainai gorere tauna ia hanamoa. Iena imana ia toia roro, lepera tauna ia dogoatao bona mai hebogahisi ida ia gwau: “Lau ura, harihari oi goeva.” Bena “maoromaoro ena lepera gorere ia ore.” (Luka 5:13) Momokani, Keriso be Iehova ena siahu amo unai hoa karana ia karaia, bona ia hahedinaraia Iesu be taunimanima ia lalokau henia bada.—Luka 5:17.

 6. Iesu ena hoa karadia amo dahaka ita dibaia, bona unai ese dahaka ia hahedinaraia?

⁶ Iesu Keriso be Dirava ena siahu amo hoa karadia idauidau ia karaia. Lepera gorere sibona ia hanamoa lasi, to gorere ma haida danu ia hanamoa. Baibel ia gwau: “Hutuma idia hoa bona Israela ena Dirava idia hanamoa, badina idia itaia mu taudia idia hereva, aena dika taudia idia raka bona matakepulu taudia idia itaia.” (Mat. 15:31) Hari, doketa be taunimanima idia durua totona opereisen idia karaia, to Iesu be hoa dalanai gorere taudia edia tauanina ia hanamoa. Bona nega haida ena be gorere tauna be gabu daudau ia noho, to ia hanamoa diba. (Ioa. 4:46-54) Unai hoa karadia ese dahaka idia hahedinaraia? Iesu, hari guba dekenai ia noho King, be mai ena siahu bona ia ura gorere ibounai do ia haorea momokani. Iesu ese taunimanima ia kara henia dalana ese iseda lalona ia hagoadaia,  badina tanobada matamatana ai Baibel ena peroveta herevana do ia guguru, ia gwau: “Ia ese manoka taudia, bona ogogami taudia dekenai do ia bogahisihisi.” (Sal. 72:13) Oibe, unai nega ai Iesu do ia ura bada idia hisihisi taudia ibounai ia hanamoa.

7, 8. Betesata ai, Iesu ese aena dika tauna ia do hanamoa lasi neganai, dahaka ia vara?

⁷ Galilea ai, Iesu ese lepera tauna ia hanamoa bona hua haida ia hanaia murinai, Iesu be Iudea dekenai ia lao bona Dirava ena Basileia sivarai namona ia harorolaia. Ia harorolaia sivaraina bona ena kara ese taunimanima momo edia kudouna ia hamarerea. Iesu ia ura ogogami taudia dekenai sivarai namona do ia harorolaia, kara dika ese ia guia taudia do ia ruhaia, bona kudouna idia makohia taudia do ia hagoadaia.—Isa. 61:1, 2; Luka 4:18-21.

⁸ Nisan huana ai, Iesu be ena Tamana ena hahegani hegeregerena Pasova ariana karaia totona Ierusalema dekenai ia lao. Hutuma be unai aria helagana totona idia mai. Dubu helaga ena not kahana ai digudigu gohuna ta ladana, Betesata ia noho, bona unuseniai Iesu ese gorere tauna ta ia itaia.

9, 10. (a) Dahaka dainai taunimanima be Betesata ena digudigu gohuna dekenai idia lao? (b) Digudigu gohuna ai Iesu be dahaka ia karaia? Bona unai amo dahaka ita dibaia? (Laulau ginigunana herevalaia.)

⁹ Betesata dekenai gorere taudia momo be unuseniai idia haboua. Dahaka dainai unai gabu dekenai idia lao? Ena badina idia gwauraia lasi, to idia abia dae bema ranu ia marere bona gorere tauna be gohu dekenai ia diho, do ia namo lou. Momo be dahaka idia ura? Idia ura edia gorere amo idia namo lou, to haida idia laloa do idia namo lou diba lasi. Herevana Iesu be goevadae tauna bona ia gorere lasi, to dahaka dainai unuseni ia lao? Badina lagani momo lalonai ia gorere tauna ta ia hebogahisi henia bona ia dekenai ia lao.—Ioane 5:5-9 duahia.

¹⁰ Iesu ese unai gorere tauna ia nanadaia bema ia ura ia namo neganai, ena toana mani oi laloa? Unai tauna be maoromaoro Iesu ia haere henia. Badina ia ura do ia namo, to ia diba lasi edena bamona unai do ia vara, eiava gohu dekenai ia diho totona durua tauna be lasi. Bena Iesu ese unai tauna ia hagania ena mahuta patana do ia abia bona ia raka. Unai tauna be Iesu ena hereva hegeregerena ia karaia. Unai be Iesu ese tanobada matamatana ai do ia karaia gaudia ia hahedinaraia! Danu, unai hoa karana amo Iesu ena hebogahisi karana ita itaia. Heduru idia abia be namo taudia ia tahua. Iesu ena haheitalai ese ita ia hagoadaia, inai tanobada ai idia vara gau dikadia dainai idia lalohisihisi taudia ita durua.

11. Edena dala ai Mareko 5:25-34 ese ia hahedinaraia Iesu be gorere taudia ia hebogahisi henia?

¹¹ Mareko 5:25-34 duahia. Hahine ta be ena gorere dainai, lagani 12 lalonai taunimanima amo ia hunia badina ia hemarai. Ia gorere dainai, ena mauri lalonai gau momo ia karaia diba lasi. Bona Dirava tomadiho henia totona dubu helaga dekenai ia lao diba lasi. Ena be “doketa momo ia itaia ena gorere hanamoa totona, to hisihisi bada ia abia. Bona ena moni ibounai ia haorea,” to ena gorere ia namo lasi. To nega ta, heduru abia dalana ta ia laloa. Ia  ura Iesu badinai do ia lao. Hutuma huanai ia lao bona Iesu ena dabua ia dogoatao. (Lev. 15:19, 25) Iesu ia mamia siahu be ia amo ia raka-lasi, bona ia ura diba daika ese ia dogoatao. Unai hahine ia “gari bada bona ia heudeheude, vadaeni ia mai Iesu vairanai ia tui diho bona ia vara gauna ia gwauraia.” Iesu ia laloparara iena Tamana, Iehova ese unai hahine ia hanamoa dainai, mai hebogahisi ida ia gwau: “Natugu e, emu abidadama ese oi ia hanamoa vadaeni. Mai maino ida oi lao bona inai gorere dikana ese oi do ia hahisia lou lasi.”

12. (a) Iesu ena kara haida ita herevalaia murinai, ia be edena bamona ita laloa? (b) Iesu be ita dekenai dahaka haheitalai namona ia hahedinaraia?

¹² Iesu be hebogahisi tauna! Ita itaia Iesu be gorere taudia ia lalokau henia. To, Satani ia ura ita laloa Iesu bona Iehova be ita idia lalokau henia lasi bona ita be anina lasi. Iesu ena hoa karadia amo ia hahedinaraia, ia be ita ia laloa bada bona ia ura ita ia durua. Ia be King bona Hahelaga Tauna Badana namona bona iseda manoka ia mamia momokani! (Heb. 4:15) Bema gorere badana ta ita do davaria lasi, reana do ia auka gorere badadia idia davaria taudia edia hemami ita lalopararalaia totona. Laloatao, Iesu be nega ta ia gorere lasi, to gorere taudia edia hemami ia lalopararalaia. Iesu ena haheitalai ese ita ia durua ia ita tohotohoa totona.—1 Pet. 3:8.

13. Iesu ese Lasaro ia hatorea isi lou karana amo ia hahedinaraia ia be edena bamona tauna?

¹³ Iesu be ma haida edia hisihisi ia mamia danu. Iena turana Lasaro ia mase bona idia taitai taudia ia itaia neganai, “ena lalona ia hisihisi bada bona ia lalohekwarahi.” Unai bamona hemami ia abia, herevana ia diba Lasaro do ia  hatorea isi lou. (Ioane 11:33-36 duahia.) Iesu ia hemarai lasi ia tai totona. Haida idia itaia Iesu be Lasaro bona ena famili ia lalokau henia. Iesu be Dirava ena siahu amo Lasaro ia hatorea isi lou neganai, ena hebogahisi ia hahedinaraia!—Ioa. 11:43, 44.

14, 15. (a) Edena bamona ita diba Iehova ia ura taunimanima edia hisihisi ia haorea? (b) Inai hereva “guria gabuna” ena anina be dahaka?

¹⁴ Baibel ese Iesu ia gwauraia “ia be [Dirava ena] toana hegeregerena.” (Heb. 1:3) Unai dainai Iesu ena hoa karadia ese ia hamomokania, ia bona iena Tamana idia ura gorere bona mase ese idia havaraia hisihisi do idia haorea. Unai ita diba badina Baibel ese mase amo idia toreisi lou taudia haida edia sivarai ia gwauraia. Iesu ia gwau: “Badina nega ia mai noho, guria gabuna lalonai idia noho taudia ibounai. . . do idia raka-lasi.”—Ioa. 5:28, 29.

¹⁵ Greek herevana idia hahanaia “guria gabuna” ena anina be ‘laloatao.’ Unai be maoro badina Siahu Ibounai Diravana, guba bona tanobada ia havaraia Tauna, be idia mase vadaeni taudia edia kara ibounai bona toana ia laloatao. (Isa. 40:26) Iehova bona ena Natuna idia ura mase taudia idia hatorea isi lou. Baibel lalonai Lasaro bona idia toreisi lou taudia ma haida edia sivarai ese tanobada matamatana ai do ia vara toreisi lou ia laulaulaia.

16. Dirava idia badinaia taudia be dahaka hahenamo do idia abia?

¹⁶ Bema Dirava ita badinaia noho, hisihisi badana amo do ita roho mauri, bona unai be hoa kara badana ta. Aramagedono tuarina murinai, hoa karadia momo do idia vara, hegeregere taunimanima be do idia gorere lou lasi. (Isa. 33:24; 35:5, 6; Apok. 21:4) Mani oi laloa, taunimanima ese edia mata galasi, raka audia, wilisea, bona kudima taudia ese idia atoa taia gaudia be do idia gaukaralaia lou lasi. Aramagedono amo do idia roho mauri taudia be do idia gorere lou lasi bona edia tauanina do ia goada dainai, Iehova ese idia do ia gaukaralaia tanobada be paradaiso ai idia halaoa totona. Unai be moale bada negana bona Dirava ena harihari gauna.—Sal. 115:16.

17, 18. (a) Dahaka dainai Iesu ese hoa karadia ia karaia? (b) Tanobada matamatana ai oi noho totona, dahaka oi karaia be namo?

¹⁷ Iesu ese ia hanamoa gorere taudia edia sivarai ese hari “hutuma bada” taudia ia hagoadaia, badina vaira nega ai gorere ibounai do idia ore. (Apok. 7:9) Unai ese ia hamomokania Dirava ena Natuna roboana be taunimanima ibounai ia lalokau henia. (Ioa. 10:11; 15:12, 13) Iesu ena hebogahisi karadia ese ita ia hadibaia, Iehova be iena hesiai taudia ta ta ia lalokau henia bada.—Ioa. 5:19.

¹⁸ Taunimanima be idia taitai, hisihisi bona idia mase noho. (Roma 8:22) Ita ura tanobada matamatana ai do ita noho, bona Iehova ena gwauhamata hegeregerena, hisihisi ibounai do idia ore. Malaki 4:2 (BHḡ) ena hereva ita abia dae momokani, badina ia hahedinaraia gorere taudia do idia namo lou bona goevadae taudia ai idia lao neganai, mai moale ida do idia “roho isi.” Ita ura Dirava ita tanikiu henia bona iena gwauhamata ita abidadama henia, unai ese ita do ia durua Dirava ita badinaia, unai amo do ita hegeregere tanobada matamatana ai ita noho. Iesu be tanobada ai ia noho neganai, ia karaia hoa karadia be iena Mesia lohia henunai do ia karaia gaudia idia laulaulaia. Unai ese iseda abidadama ia hagoadaia, ani?