LAGANI 1970 ena siahu negana ia matamaia. Lau be hospital badana ta ena bedi ai lau hekure, unai hospital be Valley Forge, Phoenixville, Pennsylvania, United States dekenai ia noho. Nesi tauna ta be egu rara ena presa ia sekea loulou. Egu mauri lagani be 20 bona lau be soldia ta, bona gorere badana ta lau abia. Lau ia naria nesi tauna ena mauri lagani be bada, bona toana be ia laloa momo. Egu rara ena presa ia maragi noho dainai, ia lau nanadaia: “Nega ta, ta ia mase oi itaia vadaeni, a?” Iena vairana toana ia senisi bona ia gwau: “Lasi.”

Unai neganai lau laloa do lau mase. Dahaka dainai hospital dekenai lau noho? Mani egu mauri sivaraina lau gwauraia.

Vietnam ai tuari ia vara neganai, lau be gorere taudia ivaia gabunai lau gaukara neganai, lau gorere. Gorere bona bero tuari taudia lau durua bona lau ura opereisen karaia doketa ai lau lao. July 1969 ai, lau be Vietnam dekenai lau lao. Nega ginigunana idia ginidae taudia hegeregerena, wiki ta ai gaukara ta lau karaia lasi, unai amo egu tauanina be taim maorona do ia badinaia bona dina ena siahu do lau manadalaia.

Unai murinai lau idia siaia, Mekong Delta, Dong Tam, America edia ami opereisen hospital ta ai. Tuari ai dika idia davaria soldia be helikopeta amo idia abia mai unuseniai heduru idia abia totona. Lau ura gaukara idauidau lau karaia bona egu tano lau laloa bada dainai, tuari taudia lau durua matamaia. Bero o dika idia davaria taudia be konteina badadia, mai edia air-condition, dekenai ai abidia lao haraga, unai amo opereisen idia karaia diba. Unuseniai, opereisen idia karaia doketa, nesi taudia bona doketa ma haida idia noho, bona idia gaukara goada taunimanima idia hamauria totona. Lau itaia helikopeta lalonai blek baege badadia haida idia noho, unai baege be idia kokia lasi. Gabeai, lau idia hadibaia unai baege lalonai be bomu ese ia hamasedia soldia taudia edia tauanina edia kahana idauidau idia noho. Unai be nega ginigunana tuari ai ia vara gauna lau kamonai.

Lau matamata neganai, Iehova ena Witnes taudia ese idia hadibaia hereva momokani lau kamonai sisina. Egu sinana be Witnes taudia ida Baibel ia stadilaia, to ia bapatiso lasi. Ia be ena Baibel stadi totona ia helai neganai, lau be ia ida lau helai. Nega ta lau bona egu sinana ena adavana matamatana be Kingdom Hall ta badinai ai raka hanaia neganai, ia lau nanadaia: “Unai be dahaka?” Bona ia gwau: “Unai taudia kahirakahira oi lao lasi!” Ia lau lalokau henia bona ena hereva lau abia dae bona badinaia. Unai dainai Iehova ena Witnes taudia lau itaia lou lasi.

Vietnam amo lau giroa lou neganai, lau mamia Dirava ese lau ia durua be namo. Tuari ai idia vara gaudia lau laloa momo dainai, lau daradoko. Toana be taunimanima be Vietnam ai idia vara gaudia idia lalopararalaia lasi. Danu taunimanima ese idia karaia protest ta lau laloatao, idia gwau America ena soldia be beibi hamasea taudia, badina idia kamonai unai tuari lalonai maragidia momo idia hamasea kava.

Lau ura Dirava lau dibaia dainai, dubu idauidau dekenai lau lao. Dirava lau lalokau henia, to dubu idauidau ese idia karaia karadia lau moalelaia lasi. Gabeai, Sunday February 1971 ai, Delray Beach, Florida dekenai Iehova ena Witnes taudia edia Kingdom Hall ta dekenai lau lao.

Kingdom Hall lalonai lau vareai neganai, pablik tok ia ore gwauraia, unai dainai Gima Kohorona stadi ena hebou sibona dekenai lau noho. Unai stadi ai idia herevalaia gaudia lau laloatao lasi, to lau laloatao gauna be natu maragidia be edia Baibel idia kehoa bona siri idia tahua. Unai lau itaia neganai lau hoa bada! Tok lau kamonai, bona idia vara gaudia lau itaia noho . Kingdom Hall amo lau raka-lasi gwauraia neganai, mauri lagani 80 tadikaka ta be lau dekenai ia mai. Iena ladana be Jim Gardner. Lau dekenai buka ladana, Mauri ia Lao Henia Hereva Momokanina ia henia, bena ia gwau, “Ia namo inai buka oi abia?” Bena Thursday dabai ai abia hidi emai Baibel stadi ginigunana ai karaia totona.

Unai Sunday hanuaboi lau be moni gaukara totona lau lao. Lau be Florida, Boca Raton ena hospital ta ena emejensi rum dekenai lau gaukara. Lau be 11 oklok hanuaboi amo lau gaukara ela bona 7 oklok dabai. Hanuaboi ai regerege be lasi dainai, Hereva Momokani buka lau duahia. Nesi ta ia mai egu imana amo unai buka ia veria bona buka ena vairana ia itaia, bena ia gwau: “Oi ura idia do oi bamoa, a?” Ia amo buka lau abia bona lau gwau: “Inai buka lau do duahia noho, to lau laloa idia do lau bamoa!” Unai nesi ese lau ia rakatania, bona unai hanuaboi ai buka lau duahia haorea.

Tadikaka Gardner ida egu stadi ginigunana ai karaia neganai, ia lau nanadaia: “Ita be dahaka do ita stadilaia?” Bena ia gwau: “Oi dekenai lau henia  buka.” Ia lau hamaoroa: “Unai buka lau duahia vadaeni.” Tadikaka Gardner ia gwau: “Vadaeni, karoa 1 do ita herevalaia.” Lau hoa badina lau be gau momo lau diba lasi. Lau ia hagoadaia egu King James Version Baibel amo siri momo lau itaia totona. Hari lau be Dirava momokanina Iehova lau dibaia noho. Unai dabai, tadikaka Gardner, nega haida ena ladana lau gwauraia Jim, ida Hereva Momokani buka ena karoa toi ai stadilaia. Unai murinai, Thursday ibounai ai be karoa toi ai stadilaia. Unai stadi negadia lau moalelaia. Lau dekenai unai be hahenamo badana, badina unai horoa tadikaka be lau ia stadi henia, bona ia be Charles T. Russell ia diba!

Wiki haida murinai, lau be sivarai namona ena pablisa ta ai lau lao. Jim ese gau momo dekenai lau ia durua, haroro gaukara ai danu. (Kara 20:20) Jim be lau ida ia gaukara dainai, ruma-ta-ruma-ta haroro gaukara lau moalelaia. Lau dekenai haroro gaukara be hahenamo badana ta. Lau moale bada badina lau be Dirava ida lau gaukara noho!​—1 Kor. 3:9.

Hari lau dekenai ia vara mai anina bada gauna ta do lau herevalaia​—unai be Iehova lau lalokau henia negana ginigunana. (Apok. 2:4) Lau be Iehova lau lalokau henia dainai, unai ese lau ia durua tuari lalonai idia vara gau dikadia bona hahetoho ma haida lau laloa lasi totona.​—Isa. 65:17.

Lagani 1971 ai ia vara spesel gauna lau laloatao. Egu tama sina ese lau dekenai idia henia ruma amo lau idia lulua. Egu sinana ena adavana matamatana ia ura lasi ena noho gabu ai Iehova ena Witnes tauna ta ia vareai! Unai negai egu moni be momo lasi. Hospital dekenai lau gaukara bona  egu pei be fotnait ai lau abia. Moni bada lau negea dabua namodia lau hoia, unai amo haroro ai Iehova ena hesiai tauna ena toana lau hahedinaraia. Moni haida be banika ai lau atoa, to unai banika be Michigan ai ia noho, lau tubu daekau gabuna unai. Unai dainai, dina haida lalonai lau be egu motuka ai lau mahuta. Bema lau ura egu aukina huina lau seivia o toileti lau gaukaralaia, sevis steiseni ena toileti lau gaukaralaia.

Dina ta, motuka amo lau lao Kingdom Hall dekenai, bona hora ta murinai haroro grup taudia do idia hebou. Lau be gaukara gabu amo lau giroa mai. Kingdom Hall murinai lau helai, ta ese lau ia itaia diba lasi gabunai, bena Vietnam ai idia vara gaudia lau laloa lou​—taunimanima edia tauanina be lahi ese ia araia ena bonana bona taunimanima edia rara bona tauanina ena kahana haida be gabu idauidau ai idia noho​—bena lau lalohisihisi. Lau kamonai bona egu lalona ai lau piksaia matamata taudia idia taitai bona lau idia nanadaia, “Do lau mauri o lasi? Do lau mauri o lasi?” Lau diba do idia mase, to hagoadaia herevadia lau gwauraia toho, lau ura lasi egu matana ranu idia itaia. Lau helai neganai, egu matana ranu idia diho.

Mai taitai danu lau guriguri. (Sal. 56:8) Toreisi lou ena helaro lau laloa matamaia. Lau laloa Iehova Dirava ese toreisi lou karana amo lau itaia metau ibounai do ia haidaua, bona Ia ese lau bona ma haida emai lalohisihisi do ia haorea. Dirava ese inai matamata taudia do ia hamauria lou bona idia ese Dirava bona hereva momokani do idia dibaia. (Kara 24:15) Unai negai egu lalokau Iehova dekenai ia bada. Unai dina lau laloatao noho. Ema bona hari, hahetoho lau davaria, to lau gaukara goada Iehova lau lalokau henia nega ginigunana lau laloatao noho.

Tuari lalonai, taunimanima be kara dika rohorohodia idia karaia. Lau danu be unai bamona lau karaia. To lau ura henia Baibel siridia rua ese lau idia durua bada. Ginigunana be, Apokalupo 12:10, 11 ia gwau Mamoe Natuna ena rarana bona ita harorolaia herevana dainai, ita ese Diabolo ita hadarerea. Iharuana be Galatia 2:20. Unai siri amo lau diba Keriso Iesu be “lau totona ia sibona ia henia.” Iehova be Iesu ena rara amo dala ia kehoa egu dika ia gwauatao totona. Unai dainai, egu lalomamina ia namo bona unai ese lau ia durua ma haida lau hadibaia Iehova be hebogahisi Diravana!​—Heb. 9:14.

Egu mauri gunana lau laloa lou neganai, Iehova lau tanikiu henia badina hanaihanai lau ia naria. Hegeregere Jim ia kamonai lau be egu motuka dekenai lau mahuta neganai, lau ia hamaoroa taihu ta ena ruma lau rentaia diba. Lau abia dae Iehova be Jim bona unai taihu amo lau ia durua, ruma namona ta ai lau mahuta totona. Iehova ena kara be namo herea! Ia ese ena hesiai taudia ia naria namo herea.

May 1971 ai, Michigan dekenai lau lao gaukara haida lau karaia totona. Florida ai Delray Beach Kongrigeisen lau do rakatania lasi neganai, egu motuka ai litrisa lau udaia, bena haiwei dekenai lau heau. Georgia ai lau ese litrisa ibounai lau hariharilaia. Lau ese Basileia ena sivarai namona be gabu idauidau ai lau harorolaia. Dibura rumadia lau vadivadi henia bona tatau edia toileti dekenai pepapepa lau atoa. Ema bona hari, lau ura diba unai taudia haida be hereva momokani idia abia eiava lasi.​—1 Kor. 3:6, 7.

Nega ginigunana hereva momokani lau dibaia neganai, egu famili taudia lau haroro henia. Idia lau haroro henia neganai, lau hereva auka bona lau fosidia, to Iehova lau lalokau henia bada dainai unai lau karaia. Egu tadikaka rua, John bona Ron, lau lalokau henia dainai, lau fosidia hereva momokani idia kamonai totona. To gabeai, egu kara dainai idia lau sori henia. Nega momo lau  guriguri idia ese hereva momokani idia abia dae totona. Unai nega amo, Iehova ese lau ia hadibaia namonamo dainai, mai aonega ida haroro bona hadibaia gaukara lau karaia.​—Kol. 4:6.

Egu mauri ai taunimanima ma haida lau lalokau henia danu. Idia ta be egu adavana Susan. Lau ura ta ese lau ia durua Basileia ena gaukara ai karaia totona. Susan be Dirava ena Hereva ia laloa bada hahinena. Ai do turana noho negana ta lau laloatao. Susan be ena tama sina edia ruma ena dehe ai ia helai, idia be Cranston, Rhode Island dekenai idia noho. Ia be Gima Kohorona ia duahia sibona lasi, to Baibel siridia ia itaia danu. Lau hoa badina ia be Gima Kohorona ena stadi gaudia sibona lasi to atikol ma haida ia duahia bona edia Baibel siri ia duahia danu. Lau sibona dekenai lau gwau, ‘Inai hahine be Dirava ena Hereva momokani ia ura henia!’ Ai be December 1971 dekenai ai headava, bona lau moale bada badina ia ese lau ia durua ema bona hari. Bona lau ia lalokau henia sibona lasi, to Iehova ia lalokau henia bada danu.

Emai natudia memero be rua, Jesse bona Paul. Idia tubu daekau lalonai, Iehova ese idia ia bamoa. (1 Sam. 3:19) Lau bona Susan ai moale badina idia be hereva momokani idia badinaia. Idia be Iehova idia lalokau henia bada dainai, Iena hesiai  gaukara idia karaia. Idia ruaosi be lagani 20 lalodiai ful-taim hesiai gaukara idia karaia. Danu, lau moale badina egu ravana hahinedia rua, Stephanie bona Racquel, be egu natudia bamona. Egu natuna memero edia adavana be Iehova Dirava idia lalokau henia bada danu.​—Efe. 6:6.

Bapatiso lau abia murinai, lagani 16 lalonai Rhode Island dekenai Dirava ena hesiai gaukara lau karaia, unuseniai turana namodia lau davaria. Elda taudia edia kara namodia lau laloatao noho. Danu, lau moale bada badina loaloa naria taudia bona ma haida ese lau idia durua namonamo. Iehova idia lalokau henia taudia ida lau gaukara hebou be hahenamo hereadaena! Lagani 1987 ai, North Carolina dekenai ai lao badina unuseniai pablisa be momo lasi, bona turadia ma haida ai davaria danu. a

August 2002 ai, ai idia boiria Patterson United States ena Betele dekenai ai gaukara totona. Lau be Haroro Naria Dipatmen ai lau gaukara, bona Susan be dabua huria gabunai ia gaukara. Bona ena asainmen ia ura henia bada! August 2005 ai, lau be Hakaua Oreana (Governing Body) ena memba ta ai lau lao. Mai manau ida unai asainmen lau abia dae. Egu adavana ia laloa unai be maduna o gaukara badana bona do ai loaloa momo. Susan be peleini guia karana dekenai ia gari, to nega momo ai be peleini ai guia! Susan ia gwau, Hakaua Oreana ena memba tadikaka ma haida edia hahine ese ia idia hagoadaia dainai, iena lalona ia hadaia lau do ia durua noho. Bona ia lau lalokau henia badina ia be unai bamona ia karaia.

Egu ofesi ai lau idia durua taudia edia laulau idia noho! Unai ese lau idia durua egu mauri lalonai idia vara gau namodia lau laloa totona. Iehova lau lalokau henia nega ginigunana lau laloatao dainai, hahenamo momo lau abia!