1, 2. Edena dala ai Iehova ese ita ia itaia karana be stoa ai idia atoa kamera amo ia idau?

 TANO momo ai, stoa biagudia ese kamera be stoa lalonai idia atoa unai amo kastoma bona henaohenao taudia idia itaia diba. Unai kamera ese pulisi idia durua henaohenao taudia idia abia totona. Oibe, unai kamera idia noho dainai, raskol taudia be idia hunia diba lasi.

² Baibel ia gwau Iehova be “gabu ibounai ia itaia noho.” (Aon. 15:3) To, unai ena anina be Ia ese ita karaia gaudia ibounai ia itaia noho, a? Iehova be ita ia itaia noho ela bona ena taravatu ita utua, bena ita ia panisia, a? Lasi! (Ier. 16:17; Heb. 4:13) Iehova be ita ia itaia noho badina ita ia lalokau henia bona eda namo ia laloa bada.—1 Pet. 3:12.

3. Edena dala faiv amo Dirava ese ia hahedinaraia ita ia lalokau henia?

³ Edena dala ai do ita laloparara Dirava be ita ia lalokau henia? Mani Iehova ese ita ia naria daladia faiv ita herevalaia. (1) Kara dika ita do karaia lasi neganai, ita ia hadibaia guna unai be kerere, (2) ita kerere neganai, ita ia hamaoromaoroa, (3) Baibel ena hakaua herevadia amo ita ia hakaua, (4) hahetoho idauidau ita davaria neganai, ita ia durua, bona (5) kara  maoromaoro ita badinaia neganai, ita ia hanamoa.

4. Dahaka dainai Iehova ese Kaino ia hadibaia, ‘kara dika be iena iduara dekenai ia naria noho’?

⁴ Mani ita itaia, edena dala ai lalohadai o ura dikadia ita abia neganai, Dirava ese ita ia hadibaia guna unai be kerere. (1 Siv. 28:9) Unai ita lalopararalaia totona, Dirava ese Kaino ia kara henia dalana mani ita laloa. Kaino be Dirava ese ia lalonamo henia lasi neganai, “ia badu maragi lasi.” (Genese 4:3-7 duahia.) Iehova ese Kaino ia hamaoroa ‘kara namo do ia karaia.’ Ia gwau, bema unai bamona ia karaia lasi, ‘kara dika be iena iduara dekenai ia naria noho.’ Dirava ese Kaino ia hamaoroa: “Oi ese do oi halusia be namo.” Ia ura Kaino ese iena hadibaia hereva do ia badinaia, unai amo iena ‘boubou gauna do ia abia dae.’ Bema Kaino be Dirava ena hadibaia hereva ia kamonai, iena hetura karana Iehova ida be do ia dika lasi.

5. Bema Iehova ia itaia ita be dala kererena ita badinaia noho, edena dala ai ita ia hadibaia guna?

⁵ Ita be edena bamona? Iehova ese iseda kudouna ia itaia diba; ia amo eda lalohadai bona ura gaudia ita hunia diba lasi. Iseda lalokau Tamana ia ura kara maoromaoro dalana do ita badinaia; to ita ia doria lasi unai ita karaia totona. Bema ia itaia dala kererena ita badinaia noho, Baibel amo ita ia hadibaia guna unai be dala kererena. Edena dala ai? Hanaihanai Baibel bona pablikeisen idauidau ita duahia, bona kongrigeisen heboudia ita lao neganai, ita ese Dirava ena hadibaia herevadia ita abia. Baibel o pablikeisen ta oi duahia karana, eiava tok ta ena hereva ese oi ia durua emu manoka gauna ta oi hanaia totona, a? Iehova ese nega korikori ai unai hadibaia herevadia ia halasia!

6, 7. (a) Dahaka ese ia hamomokania Iehova be ena hesiai taudia ia laloa bada? (b) Edena dala ai Iehova ena lalokau karana amo namo oi davaria diba?

⁶ Unai dala idauidau ese idia hamomokania Iehova be ita ia lalokau henia. Momokani, Baibel, iseda pablikeisen idauidau bona kongrigeisen heboudia be taunimanima milioni momo durua totona idia hegaegaelaia. To, Iehova ese oi ia noia Baibel ena hadibaia herevadia do oi badinaia, unai amo emu lalohadai o ura dikadia oi haidaua diba. Oibe, unai ese ia hamomokania Iehova be oi ia laloa bada.

⁷ Dirava ena hadibaia herevadia amo namo ita abia totona, namona be ita abia dae Ia ese ita ia laloa bada. Danu, namona be ita gaukara goada iena Hereva ita badinaia totona. Anina be eda lalohadai dikadia do ita kokia. (Isaia 55:6, 7 duahia.) Bema Dirava ena hadibaia herevadia ita badinaia, gabeai do ita lalohisihisi lasi. To, dahaka do ia vara bema ita badinaia lasi? Iseda lalokau Tamana ese ita do ia durua, a?

8, 9. Edena dala ai Iehova ese elda taudia amo ia henia sisiba ese ia hamomokania ita ia laloa bada? Haheitalai gwauraia.

⁸ Iehova ese ita ia hamaoromaoroa neganai, ita diba ia be ita ia lalokau henia. (Heberu 12:5, 6 duahia.) Momokani, sisiba o matahakani ita abia neganai, ita moale lasi. (Heb. 12:11) To, ta ese Baibel amo ita ia sisiba henia neganai, unai sisiba ia henia ena badina ita lalopararalaia be gau badana. Ia be ita ia hahisia totona sisiba ia henia lasi, to unai bamona ia karaia badina ia itaia eda hetura karana Iehova ida be ia dika ia lao. Unai dainai, ia ese mai ena ura ida ena nega bona goada ia gaukaralaia, Baibel amo ita ia durua Iehova dekenai ita giroa lou totona. Namona be iena sisiba  ita abia dae badina unai be Iehova amo ia mai.

⁹ Mani ita itaia edena dala ai elda edia sisiba ese idia hahedinaraia Dirava be ita ia laloa bada. Tadikaka ta be hereva momokani ia do abia lasi neganai, ia be ponografi itaia karana ia manadalaia. To, gabeai unai kara ia hadokoa. To, iena lalohadai dikana be lahi gidana bamona ia araia noho. Gabeai, mobael fon matamata ta ia hoia neganai, ponografi itaia urana ia hamatamaia lou. (Iam. 1:14, 15) Ia ese unai fon amo Intanet ai ponografi ia itaia. Dina ta, telefon haroro gaukara idia karaia lalonai ia ese ena fon be elda ta ia henia ruma haida edia adres ia sekea totona. Elda tauna ese unai fon ia gaukaralaia neganai, ponografi Web sait idia hedinarai. Elda ese maoromaoro unai tadikaka ia sisiba henia. Tadikaka be nega korikori ai sisiba ia abia, bona unai ese ia durua dainai, gabeai ponografi itaia karana ia hadokoa vaitani. Ita moale badina iseda lalokau guba Tamana be ita hunia kara dika ia itaia, bona ita ia hamaoromaoroa haraga, unai amo iseda hetura karana ia ida do ita hadikaia lasi!

10, 11. (a) Edena dala ai Dirava ena heduru ita abia diba? (b) Edena dala ai famili ta be mai aonega ida Iehova ena hakaua herevadia idia badinaia?

¹⁰ Salamo torea tauna be Iehova dekenai inai ane ia abia: “Oi ese oiemu sisiba dekena amo lau oi hakaua noho.” (Sal. 73:24) Heduru ita ura abia neganai, Baibel duahia karana amo Iehova ena “laloa” ita dibaia diba. Baibel ena hakaua herevadia badinaia karana ese iseda hetura karana Iehova ida ia hagoadaia, bona ita ia durua tauanina dalanai sibona ita naria totona.—Aon. 3:6.

¹¹ Hegeregere, Philippines ai biru tauna ta, ena adavana bona edia famili be tau ta ena tano ai ruma ta idia rentaia. Unai tadikaka bona ena adavana be regula painia bona edia famili be bada. Dina ta, idia hoa badina tano ena biaguna amo revareva ta idia davaria bona idia ia hamaoroa iena tano do idia rakatania. Dahaka dainai? Ta ese tano ena biaguna dekenai idia ia samania, ia gwau idia be koikoi karadia idia karaia. Ena be tadikaka ia lalohekwarahi famili be edeseniai do ia noho, to ia gwau: “Iehova ese dala do ia kehoa. Herevana dahaka ia vara, to ia ese hanaihanai emai dabu gaudia ia henia.” Unai tadikaka be Iehova ia abidadama henia goada. Dina  haida murinai, idia kamonai idia be unai tano do idia rakatania lasi. Dahaka ia vara? Tano biaguna ia itaia ena be haida ese unai Witnes famili idia samania, to unai famili be Baibel ena hakaua herevadia idia badinaia dainai hemataurai bona maino idia hahedinaraia. Tano biaguna be edia kara ia ura henia dainai ia hamaorodia iena tano do idia rakatania lasi, bona tano ena kahana ta ia henia idia birulaia totona. (1 Petero 2:12 duahia.) Oibe, Iehova ese Baibel amo ita ia durua, mauri ena lalohekwarahi gaudia ita haheaukalaia totona.

12, 13. Edena bamona negadiai, reana haida do idia laloa Dirava ese edia hisihisi ia itaia lasi?

¹² Nega haida, hahetoho ta be nega daudau lalonai ita haheaukalaia. Hegeregere, reana gorere badana ta ita davaria, famili taudia ese ita idia koua, o ma haida ese ita idia dagedage henia. Eiava nega haida kongrigeisen lalonai ma ta ida ita lalotamona lasi dainai, hepapahuahu ia vara.

¹³ Hegeregere, reana tadikaka ta ena hereva ese emu lalona ia hahisia dainai do oi gwau: ‘Dirava ena orea lalonai inai ia vara be maoro lasi!’ To, unai tadikaka be kongrigeisen lalonai hahenamo haida ia abia bona ma haida ese ia idia ura henia. Reana do oi gwau: ‘Dahaka dainai unai bamona ia vara? Iehova be unai ia itaia o lasi? Kara ta do ia karaia o lasi?’—Sal. 13:1, 2; Hab. 1:2, 3.

14. Dahaka dainai hekwakwanai ita davaria neganai, nega haida Iehova be kara ta ia karaia haraga lasi?

¹⁴ Reana Iehova be badina maorona ta dainai kara ta ia karaia haraga lasi. Hegeregere, reana oi laloa kerere be unai tadikaka ese ia havaraia, to Dirava ena lalohadai be idau. Reana Dirava ia itaia, oiemu kerere be bada. Reana oi ese tadikaka ena hereva oi lalohisihisilaia, to unai be sisiba namona oi ia durua totona. Hegeregere, guna Hakaua Oreana ena memba ta, Tadikaka Karl Klein, ese ena mauri sivaraina lalonai, Tadikaka J. F. Rutherford ese ia sisiba henia negana ta ia herevalaia. Gabeai, Tadikaka Rutherford be mai moale ida Tadikaka Klein ia hanamoa ia gwau, “Namo, Karl!” To, Tadikaka Klein be Tadikaka Rutherford ena sisiba dekenai ia do lalohisihisi noho dainai, ia haere namonamo lasi. Tadikaka Rutherford ia itaia Tadikaka Klein be ia do badu noho dainai, ia hamaoroa: “Oi naria namonamo. Diabolo ia ura oi do ia abia.” Tadikaka Klein be gabeai ia gwau: “Bema iseda kudouna ai tadikaka ta ita badu henia noho, badina ia ese ita ia sisiba henia, ita be dala ita kehoa Diabolo ena tarapu lalonai ita moru totona.” a

15. Hekwakwanai ita davaria neganai, dahaka ita laloatao be namo?

¹⁵ Ita ura eda hahetoho do idia ore haraga, to ita haheauka be gau badana. Hahetoho be hegeregere motuka amo oi heau noho bena dala ai motuka be momo dainai oi stopu. Mai haheauka ida oi naria diba ela bona dala do ia kehoa. To, oi haheauka lasi dainai dala kwadogina ta oi tahua, bena oi boio, bona oi ura lao gabuna dekenai oi ginidae leiti. Matamanai, bema oi haheauka bona dala ginigunana oi badinaia sibona, reana oi ura lao gabuna dekenai oi ginidae haraga. Unai hegeregerena, bema ita haheauka bona Baibel ena hakaua herevadia ita badinaia, eda hetura karana Iehova ida do ia goada bona Paradaiso ai do ita ginidae.

16. Hahetoho ita davaria neganai, edena badina ma ta dainai Iehova be gau ta do ia karaia haraga lasi?

¹⁶ Hahetoho ita davaria neganai, reana Iehova be gau ta ia karaia haraga lasi, badina  ia ura ita ese unai hahetoho amo gau ta ita dibaia. (1 Petero 5:6-10 duahia.) Namo lasi ita laloa ita davaria hahetoho be Dirava ese ia havaraia. (Iam. 1:13) Unai hekwakwanai momo be ‘iseda inai tauna, Diabolo’ ese ia havaradia. To, Dirava ese unai bamona hekwakwanai amo iseda abidadama ia hagoadaia diba. Ia be iseda hekwakwanai ia itaia bona ita “ia laloa bada” dainai, dala do ia kehoa iseda hekwakwanai be “nega sisina” sibona do ia noho. Hahetoho oi davaria neganai, oi abia dae Iehova ese oi ia laloa bada bona dala do ia kehoa unai hahetoho oi hanaia totona, a?—2 Kor. 4:7-9.

17. Dahaka dainai Iehova be taunimanima ia itaia noho?

¹⁷ Iehova be badina namona ta dainai ita ia itaia noho. Peroveta tauna Hanani be King Asa dekenai ia gwau: “Lohiabada ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.” (2 Siv. 16:9) Oibe, Iehova ese oi “do ia hagoadaia,” anina be oi do ia gimaia bona hanamoa.

18. Bema oi laloa emu kara namodia be ma haida ese idia laloa bada lasi, dahaka oi laloatao be namo? (Laulau ginigunana itaia.)

¹⁸ Dirava ia ura ita ese ‘kara namo do ita tahua,’ ‘kara namo do ita ura henia noho’ bona ‘kara namodia ita karaia,’ unai amo ita do ia “lalonamo henia.” (NW) (Amo. 5:14, 15; 1 Pet. 3:11, 12) Iehova ese kara maoromaoro taudia ia laloa bada bona ia hanamodia. (Sal. 34:15) Hegeregere, mara hahine idia durua Heberu hahinedia, Sipora bona Pua, mani oi laloa. Israela taudia be Aigupito ai igui hesiai taudia bamona idia noho neganai, Farao ese unai hahine rua ia oda henia Heberu beibi memerodia idia vara neganai do idia hamasea, to idia ese Dirava idia gari henia bada. Edia lalomamina idia badinaia dainai, idia ese beibi maragidia idia alaia lasi. Gabeai, Sipora bona Pua dekenai Dirava ese natuna ia henidia. (Eso. 1:15-17, 20, 21) Iehova ese edia kara namodia ia itaia. Nega haida, reana ita laloa iseda kara namodia be ma haida ese idia laloa bada lasi. To, Iehova ese unai ia laloa bada. Ia ese ita karaia kara namodia ia itaia bona ita dekenai ahuna namona do ia henia.—Mat. 6:4, 6; 1 Tim. 5:25; Heb. 6:10.

19. Edena dala ai taihu ta ia laloparara, Iehova ese iseda gaukara goada karana ia laloa bada?

¹⁹ Austria ai, taihu ta ia laloparara iena gaukara goada karana be Iehova ese ia laloa bada. Taihu be Hungary gado ia diba dainai, unai gado ia diba hahinena ta ena adres idia henia ia vadivadi henia totona. Taihu be maoromaoro unai ruma dekenai ia lao, to ta ia davaria lasi. To ia be unai ruma dekenai ia lao loulou. Nega haida, ia mamia ta ia noho, to iduara ia kehoa lasi. Ia ese unai ruma dekenai pablikeisen, revareva haida, ena telefon namba, bona gau ma haida ia rakatania. Lagani ta mai kahana murinai, hahine ta ese iduara ia kehoa bona taihu dekenai ia gwau: “Mani oi vareai mai. Lau be oi rakatania gaudia ibounai lau duahia bona oi lau naria noho.” Unai hahine be kemoterapi medikol heduru ia abia dainai, ia ura lasi taunimanima ia hereva henia. To, ia ese Baibel stadi ia abia dae. Oibe, taihu ena gaukara goada karana dainai Dirava ese ia hanamoa!

20. Iehova ena naria karana be edena bamona oi laloa?

²⁰ Iehova ese emu kara namodia ibounai ia itaia noho, bona oi dekenai ahuna namona do ia henia. Bema oi laloparara Dirava be oi ia itaia noho, namo lasi oi laloa ia be oiemu kerere ia tahua, stoa lalonai idia atoa kamera bamona. To, namona be Dirava kahirakahira oi lao, badina ia be oiemu namo ia laloa bada!