1. Israela taudia be dahaka hebou idia karaia, bona dahaka henanadai ita lalodia be namo?

 “UMUI gini, Lohiabada [Iehova] emui Dirava do umui hanamoa. Ia do umui hanamoa ela bona hanaihanai!” Levi taudia be unai hereva amo Israela taudia idia boiria do idia hebou, bona Iehova do idia guriguri henia. Baibel lalonai unai be guriguri latana ta. (Neh. 9:4, 5) Unai hebou be lagani 455 B.C.E., Tishri huana (September/October) ena dina namba 24 ai Ierusalema dekenai idia karaia. Inai stadi lalonai unai hebou ita herevalaia neganai, namona be oi sibona oi nanadaia: ‘Levi taudia be hanaihanai dahaka idia karaia dainai, unai hebou ese anina namona ia havaraia? Levi taudia ese idia gwauraia guriguri namona amo dahaka ita dibaia?’—Sal. 141:2.

2. Edena dala ai ita dekenai Israela taudia be haheitalai namona?

² Hua gunana ai, Israela taudia be Ierusalema ena magu idia haorea. (Neh. 6:15) Dina 52 lalonai unai gaukara idia haorea, bena Tishri huana ai, ariara dekenai idia hebou. Unai hebou ai Esera bona Levi taudia ma haida ese Dirava ena Taravatu idia duahia bona gwauraia hedinarai. Ruma bese, idia “kamonai diba” natudia danu, be “daba rere negana ela bona dina tubu” idia gini bona idia kamonai. Ita dekenai Israela taudia be haheitalai namona. Badina ita be Kingdom Hall namodia ai ita hebou, to nega haida hebou lalonai ita be anina lasi gaudia ita laloa. Mani Israela taudia ita laloa. Idia kamonai sibona lasi, to idia kamonai gaudia idia lalohadailaia, bona idia tai badina idia laloparara idia be Dirava ena Taravatu idia badinaia lasi.—Neh. 8:1-9.

3. Israela taudia be dahaka hereva idia badinaia?

³ To, unai be taunimanima ibounai vairanai kara dika gwauraia hedinarai negana lasi. Ia be aria negana dainai, Iehova ia ura do idia moale. (Num. 29:1) Unai dainai Nehemia ia gwau: “Umui emui ruma dekenai do umui  lao, aniani namona do umui ania, uaina do umui inua.Bona edia aniani bona uaina be lasi taudia dekenai aniani bona uaina do umui henia. Badina hari dina be helaga, iseda Lohiabada ena dina. Unai dainai do umui lalohisihisi lasi, badina be Lohiabada dainai ita moale neganai, goada do ita abia.” Israela taudia be unai hereva idia badinaia bona idia “moale” bada.—Neh. 8:10-12.

4. (a) Iduhu gunalaia taudia be dahaka idia karaia, bona dahaka idia lalopararalaia? (b) Au Raurau Ruma Maragidia ena Aria dekenai, dahaka mai anina bada gauna idia karaia?

⁴ Unai dina murinai, iduhu gunalaia taudia idia hebou bona Dirava ena Taravatu idia stadilaia, bona Israela besena ese unai Taravatu idia badinaia namonamo diba daladia idia tahua. Unai amo idia laloparara, Tishri ena dina namba 15 ia lao 21 ai, Au Raurau Ruma Maragidia ena Aria do idia karaia, bona dina namba 22 ai hebou badana ta amo unai aria do idia koua. Idia hegaegaelaia namonamo dainai, Iosua ena negai idia karaia aria ia hereaia bona ibounai idia “moale bada.” Unai aria dekenai idia karaia mai anina bada gauna be, “ena dina ginigunana ela bona aria ena dina dokona Esera ese dina ta ta ibounai Dirava ena Taravatu ena hereva haida ia duahia.”—Neh. 8:13-18.

5. Levi taudia be idia do guriguri lasi neganai, Israela taudia be dahaka idia karaia?

⁵ Aria idia karaia bona dina rua murinai, Tishri ena dina namba 24 ai, Israela taudia ese edia kara dika do idia gwauraia hedinarai. Unai be aniani bona moale dinana lasi. Israela taudia be idia anivaga, bona puse dabua idia hahedokilaia edia lalohisihisi toana hahedinaraia totona. Dabai hora toi lalonai, Levi taudia ese Dirava ena Taravatu be taunimanima dekenai idia duahia lou. Bena adorahi ai, Israela taudia ese “edia kara dika idia gwauraia hedinarai, bona Lohiabada, edia Dirava dekenai idia tomadiho.” Unai murinai, Levi taudia ese taunimanima ibounai totona Dirava dekenai guriguri namo hereana ta idia gwauraia. —Neh. 9:1-4.

6. Dahaka ese Levi taudia ia durua guriguri namodia idia gwauraia totona? Bona edia kara amo dahaka ita dibaia?

⁶ Ita diba Levi taudia be hanaihanai Dirava ena Taravatu idia duahia dainai, unai ese idia ia durua mai anina bada gurigurina idia gwauraia totona. Unai guriguri ena kahana ginigunana be Iehova ese ia karaia gaudia bona ena kara namodia ia herevalaia. Guriguri ena dokonai, Dirava ena ‘hebogahisi bada herea’ idia gwauraia momo. Bona idia gwau ia ese Israela taudia ia hebogahisi henidia be maoro lasi. (Neh. 9:19, 27, 28, 31) Levi taudia amo dahaka ita dibaia? Namona be dina ta ta ai Dirava ena Hereva ita duahia bona laloa dobu. Unai be hegeregere Iehova be ita ia hereva henia. Bena Iehova ita guriguri henia neganai, mai anina bada gaudia ita gwauraia diba.—Sal. 1:1, 2.

7. Levi taudia be Dirava amo dahaka idia noia, bona edia kara amo dahaka ita dibaia?

⁷ Levi taudia be edia guriguri lalonai gau  tamona sibona idia noinoilaia. Unai be siri 32 dekenai, ia gwau: “Dirava e, oi be Dirava badana, mai siahu bada herea, bona mai garina Dirava. Oi ese oiemu gwauhamata oi badinaia noho momokani. Mani emu kara aiemai hisihisi do oi laloa, Asuria king taudia ese ai idia hisihisi henia negana, ia mai bona harihari, aiemai hisihisi be bada. Aiemai king, aiemai gunalaia taudia, aiemai hahelagaia taudia, bona aiemai peroveta taudia be idia hisihisi vadaeni. Aiemai sene taudia, bona aiemai taudia ibounai, be idia hisihisi vadaeni. Mani aiemai hisihisi bada do oi laloa.” Levi taudia edia haheitalai amo ita dibaia gauna be inai: Eda guriguri lalonai namona be Iehova ita hanamoa bona tanikiu henia guna, to iseda ura gaudia be gabeai ita noia.

8, 9. (a) Edena dala ai Levi taudia be mai manau ida edia guriguri idia hamatamaia? (b) Levi taudia be edena guba tuari oreadia rua idia herevalaia?

⁸ Ena be Levi taudia be guriguri namo hereana ta idia gwauraia, to idia manau dainai idia mamia idia gwauraia herevadia be hegeregere lasi Iehova hanamoa totona. Unai dainai, edia guriguri matamanai idia gwau: “Dirava ena ladana namo herea do umui hanamoa. Taunimanima edia hanamoa be hegeregere lasi Dirava do idia hanamoa!”—Neh. 9:5.

⁹ Levi taudia ma idia gwau: “Oi be [Iehova], oi sibona be Lohiabada. Oi ese guba oi karaia. Oi ese guba ena hisiu ibounai oi karaia. Oi ese tanobada, bona tanobada lalonai gaudia ibounai oi karaia. Oi ese gau ibounai dekenai mauri oi henia noho. Guba dekenai idia noho aneru ese oi dekenai idia tomadiho noho.” (Neh. 9:6) Oibe, Iehova Dirava ese guba bona ia lalonai idia noho hisiu oreadia momo ia havaraia. Ma danu Ia ese iseda tanobada hairaina ia havaraia, bona dala ia kehoa mauri gaudia be edia orea hegeregerena natudia idia havaraia totona. Dirava ena aneru helagadia o “guba ena tuari oreadia” ese Dirava ia karaia gaudia idia itaia. (Apok. 19:14; Iobu 38:4, 7) Unai aneru be mai manau ida Dirava ena ura idia karaia, bona “do ia hamauria taudia idia hesiai henia.” (Heb. 1:14) Unai aneru be haheitalai namodia ita dekenai. Oibe, namona be ami orea badana ta bamona, mai lalotamona ida Iehova ita hesiai henia!—1 Kor. 14:33, 40.

10. Dirava ese Aberahamo ia kara henia dalana amo dahaka ita dibaia?

¹⁰ Gabeai, Levi taudia edia guriguri lalonai Dirava ese Aberamo ia kara henia dalana idia gwauraia. Iena mauri lagani be 99, to ena adavana Sarai be natuna ta ia havaraia lasi. Unai nega ai Iehova ese Aberamo ena ladana ia haidaua Aberahamo, ena anina be “bese momo havaraia tauna.” (Gen. 17:1-6, 15, 16) Dirava ese Aberahamo dekenai ia gwauhamata iena tubudia ese Kanana tanona do idia abia. Nega momo taunimanima be idia karaia gwauhamata idia laloa boio, to Iehova be unai bamona lasi. Levi taudia ese Iehova ena gwauhamata badinaia karana idia gwauraia. Idia gwau: “Oi, Lohiabada Dirava, ese Aberamo oi abia hidi. Oi ese Aberamo  oi hakaua, vadaeni Uru, Kaledea hanua dekena amo ia raka mai. Oi ese iena ladana oi atoa ‘Aberahamo.’ Oi ese Aberahamo oi tahua, bona oi davaria, Aberahamo ese oi dekenai ia abidadama henia, bona oi ese ia danu gwauhamata taravatuna oi karaia. Oi ese Kanana taudia, . . . edia tano Aberahamo dekenai oi henia, iena tubuna taudia be unai tano dekenai do idia noho. Oi ese oiemu gwauhamata oi badinaia, badina oi be maoromaoro.” (Neh. 9:7, 8) Namona be eda kara maoromaoro Diravana ita tohotohoa bona eda gwauhamata ita hagugurudia.—Mat. 5:37.

11, 12. Iehova ena ladana ena anina be dahaka? Bona edena dala ai Aberahamo ena tubudia ia kara henia dalana ese unai ia hamomokania?

¹¹ Inai ladana Iehova ena anina be, “Ia ese Ia Halaoa.” Unai ena anina be Iehova ese kara haida ia karaia noho, ena gwauhamata iboudiai ia hagugurua totona. Unai ia karaia dalana ta be, ia ese Aberahamo ena tubudia be Aigupito ena igui amo ia ruhadia. Unai nega ai, toana be dala be lasi Israela besena ibounai be Aigupito do idia rakatania bona Gwauhamata Tanona dekenai do idia lao. To, Iehova be kara haida ia karaia, unai amo ena gwauhamata ia hagugurudia bona ena ladana ena anina ia hamomokania.

¹² Levi taudia edia guriguri lalonai, idia ese Iehova be ena taunimanima totona ia karaia gaudia idia herevalaia. Idia gwau: “Oi ese aiemai sene taudia edia hisihisi oi itaia Aigupito dekenai, bona edia taitai oi kamonai Davara Kakakaka dekenai. Toa bona hoa karadia oi karaia. Farao bona iena hesiai taudia ibounai, bona iena tano taudia danu oi hadikaia, badina be oi diba vadaeni, idia ese aiemai sene taudia idia dagedage henia, bona oiemu ladana oi habadaia, ia mai bona hari. Oi ese idia edia vairanai davara oi hapararaia, vadaeni idia be davara ena huanai dekena amo, idia raka hanaia, tano kaukau dekenai. Bona idia luludia taudia be davara dobu lalonai, oi negedia, idia diho, nadi be ranu dobu lalonai ia diho bamona.” Bena Levi taudia ma idia gwau: “Oiemu bese ese hanua mai magudia, be tuari dekenai idia abia, bona tano namona danu, ruma mai kohu namo herea danu, bona ranu haboua gabudia, nadi lalonai idia geia gaudia, bona olive audia, huahua audia momo herea, vain audia danu, ibounai idia abia, edia. Idia ese edia ura gaudia ibounai idia ania, edia tauanina idia bada. Idia ese oi henidia gaudia ibounai idia moalelaia.”—Neh. 9:9-11, 24, 25.

13. Israela taudia be Aigupito idia rakatania murinai, Iehova be idia totona dahaka ia karaia? To gabeai dahaka ia vara?

¹³ Dirava be kara ma haida ia karaia ena ura ia hagugurua totona. Hegeregere, Israela taudia be Aigupito idia rakatania murinai, Iehova ese idia dekenai Taravatu ia henia bona ia do idia tomadiho henia daladia ia hadibaia. Levi taudia idia guriguri idia gwau: “Sinai Ororo dekenai oi be guba dekena amo oi diho mai, oiemu bese dekenai oi hereva. Oi ese taravatu namodia, bona hadibaia hereva namodia idia dekenai oi henia.” (Neh. 9:13) Iehova ese Israela taudia ia hadibaia, unai amo do idia hegeregere momokani iena ladana helagana idia abia, bona Gwauhamata Tanona ai do idia vareai. To, iena hereva idia badinaia lasi.—Nehemia 9:16-18 duahia.

14, 15. (a) Edena dala ai Iehova ese kara dika Israela taudia ia hebogahisi henidia? (b) Iehova ese Israela taudia ia kara henia dalana amo dahaka ita dibaia?

¹⁴ Sinai ororona ai Israela taudia idia gwauhamata Dirava ena Taravatu do idia badinaia. To, gabeai idia be kara dika rua idia karaia bona Levi taudia edia guriguri lalonai, unai idia herevalaia. Unai kara dika dainai, Israela taudia be tano gagaena ai idia mase ore be maoro. To, Iehova ese idia dekenai ia hebogahisi bona edia dabu gaudia ia henia. Unai dainai, Levi taudia edia guriguri lalonai Iehova idia hanamoa, idia gwau: “Oiemu bogahisihisi bada herea dainai, taunimanima idia noho lasi tano dekenai oi rakatanidia lasi. . . . Lagani 40 lalonai taunimanima noho lasi tano dekenai oi hamauridia. Oi naridia dainai, edia aniani bona gau be hegeregere,  edia dabua danu idia dika lasi, bona edia aena be idia gudu lasi.” (Neh. 9:19, 21) Hari, Iehova ese iseda dabu gaudia ia henia, unai amo ita hesiai henia noho diba. Ita ura lasi Israela taudia ita tohotohoa. Idia be Iehova idia gwau-edeede henia bona idia abidadama henia lasi dainai, idia tausen momo be tano gagaena ai idia mase. Oibe, “unai gaudia be idia dekenai idia vara bona idia be haheitalai bamona, bona unai gaudia idia torea, inai nega oromana ena dokona ai ita noho taudia idia hadibaia totona.”—1 Kor. 10:1-11.

¹⁵ To madi, Israela taudia be Gwauhamata Tanona ai idia vareai neganai, idia ese matabodaga bona ala-ala karadia idia karaia, bona Kanana taudia edia dirava idia tomadiho henidia. Unai dainai, Iehova ese idia badinai idia noho besedia ia gaukaralaia Israela besena idia tuari henia totona. To, Israela taudia idia helalo-kerehai neganai, Iehova ese mai hebogahisi ida edia dika ia gwauatao bona edia inai taudia amo ia hamauridia. “Nega momo” ia ese unai bamona ia karaia. (Nehemia 9:26-28, 31 duahia.) Levi taudia idia gwau: “Lagani momo lalonai oi ese mai haheauka danu sisiba oi henidia. Oiemu Lauma dekena amo idia oi sisiba henia, peroveta taudia edia uduna hereva dekena amo, to idia ura lasi kamonai. Unai dainai oi ese idau bese taudia edia siahu henunai oi atodia.”—Neh. 9:26-28, 30.

16, 17. (a) Israela taudia be Iehova idia gwau-edeede henia lou neganai, dahaka ia vara? (b) Israela taudia be dahaka idia gwauraia hedinarai, bona dahaka gwauhamata idia karaia?

¹⁶ Israela taudia be Babulonia ena igui amo idia giroa lou murinai, Iehova idia gwau-edeede henia lou. Dahaka ia vara? Levi taudia ese edia guriguri lalonai unai idia herevalaia, idia gwau: “Unai dainai harihari oi ese aiemai sene dekenai oi henia tanona, ena lalonai ai be hesiai mai guia taudia. Inai anina namona ia havaraia tano, bona aniani namona ia henia tano ena lalonai, madi, ai be hesiai mai guia danu taudia. Ai ese ai kara dika dainai, aiemai tano ena anina be king taudia ese idia abia, unai king taudia be oi ese aiemai latanai oi atodia vadaeni. . . . Bona ai be ai hekwarahi bada herea noho.”—Neh. 9:36, 37.

¹⁷ Levi taudia idia gwau Dirava be mai ena kerere, badina unai hekwakwanai ia koua lasi, a? Lasi! Levi taudia ese edia dika idia gwauraia hedinarai, idia gwau: “Oi be kara maoromaoro Diravana. Oi ese ai oi matakani henia neganai, oi be maoromaoro momokani, badina oi be oi kara momokani, to ai be ai kara dika.” (Neh. 9:33) Levi taudia edia guriguri dokonai, idia gwauhamata Israela besena ese Dirava ena Taravatu do idia badinaia. (Nehemia 9:38 duahia; 10:29) Idia hamomokania totona, gwauhamata be pepa dekenai idia torea, bona gunalaia taudia 84 ese idia sainia.—Neh. 10:1-27.

18, 19. (a) Tanobada matamatana lalonai ita vareai totona, dahaka ita karaia be namo? (b) Dahaka totona ita guriguri noho be namo, bona dahaka dainai?

¹⁸ Iehova ese ita ia matahakani henia be maoro, badina unai amo do ita hegeregere iena kara maoromaoro tanobada matamatana lalonai ita vareai diba. Aposetolo Paulo ia henanadai: “Edena mero be ena tamana ese ia matahakani henia lasi?” (Heb. 12:7) Bema iseda mauri lalonai Iehova ena hakaua dalana ita abia dae bona ena hesiai gaukara ita karaia noho, ita hahedinaraia ita ura lauma helaga ese iseda kara ia hamaoromaoroa. Danu, bema kara dika badana ta ita karaia to ita helalo-kerehai bona mai manau ida ena matahakani ita abia dae, ita diba Iehova ese eda dika do ia gwauatao.

¹⁹ Guna Iehova ese Aigupito amo Israela taudia ia hamauria neganai, ena ladana ia abia isi. To, kahirakahira Ia ese kara ma haida do ia karaia, bona bese ibounai do idia diba ia be siahu ibounai Diravana. (Ese. 38:23) Idaunegai, Israela taudia be Gwauhamata Tanona ai idia vareai hegeregerena, hari, mai abidadama ida Iehova idia tomadiho henia Keristani taudia be Dirava ena kara maoromaoro tanobada matamatana lalonai do idia vareai. (2 Pet. 3:13) Unai dainai, Iehova ese ena ladana hairaina do ia hahelagaia totona ita guriguri noho be namo. Stadi gabena ese guriguri ma ta do ia herevalaia. Bema unai guriguri ita badinaia, Dirava ena hahenamo do ita moalelaia ela bona hanaihanai.