LAGANI 1949 ai unai ia vara, to egu sivarai be guna momokani ia matamaia. Lau be lagani 1927 ai, Netherlands ena hanua ladana, Donderen ai lau vara. Ai natudia ibounai be 7 bona lau be namba 4. Egu tamana Hendrik, be tamaka karaia tauna bona biru tauna. Emai ruma be hanua ena dala badinai ia gini. Emai neiba taudia momo be biru taudia, bona lau be unai mauri dalana lau moalelaia. Lagani 1947 ai, egu mauri lagani be 19 neganai, emai neiba tauna ladana, Theunis Been amo hereva momokani lau diba. Lau laloatao nega ginigunana Theunis lau hedavari henia neganai, lau ura henia lasi. To, Tanobada Tuarina Iharuana murinai, ia be Iehova ena Witnes tauna ta ai ia lao, bona lau itaia iena kara ia hanamoa. Unai ese egu lalona ia veria dainai, Dirava ena gwauhamata tanobada be paradaiso ai do ia halaoa sivaraina be lau dekenai ia gwauraia neganai, lau kamonai. Hereva momokani lau abia dae bona ai ruaosi be tura namodia ai ai lao. a

May 1948 ai, lau haroro hamatamaia bona June 20 ai, Utrecht ena distrik hebouhebou dekenai lau bapatiso. January 1, 1949 ai painia gaukara lau hamatamaia, bona Netherlands ena ist kahana ai ia noho hanua ta Borculo, ena kongrigeisen maragina dekenai lau idia siaia. Unai gabu ena daudau be kilomita 130 dainai, egu basikele amo lau lao. Lau laloa hora 6 do lau heau, to medu bada herea ia diho bona lai ia toa. Unai dainai, kilomita 90 be trein dekenai lau lao, to hora 12 murinai Borculo  dekenai lau ginidae! Hanuaboi ai, lau idia abia dae Witnes famili edia ruma dekenai lau ginidae.

Tuari murinai, momo be idia ogogami. Lauegu dabua be kouti tamona bona piripou rua sibona​—⁠kouti be bada bona piripou be idia kwadogi! Matamanai lau gwauraia hegeregerena, Borculo dekenai lau painia ena hua ginigunana be ia auka, to Iehova ese lau ia hanamoa bona Baibel stadi haida lau hamatamaia. Hua nain murinai, Amsterdam dekenai lau idia siaia lao.

Lau be biru taudia huanai lau bada, to hari lau be Netherlands ena siti badana Amsterdam dekenai lau noho. Momo idia kamonai, bona hua ginigunana ai buka bona magasin momo lau hariharilaia. Hua nain gunanai be unai bamona lasi. Daudau lasi murinai, egu Baibel stadi ibounai be eit. Elda orea ena kodineita ai lau lao murinai, lau idia hadibaia pablik tok ginigunana do lau henia. Tok henia totona lau gari, to lau moale badina tok do lau henia dinana ia kahirakahira neganai, kongrigeisen ma ta dekenai lau idia siaia. Ena be lau gari, to lagani momo murinai, lau be tok ibounai 5,000 mai kahana lau henia vadaeni!

May 1950 ai, Haarlem dekenai lau idia siaia. Bena sekit gaukara karaia totona lau idia abia hidi. Dina toi lalonai lau mahuta lasi. Brens ofesi dekenai ia gaukara tadikaka, Robert Winkler lau hamaoroa lau laloa lau be hegeregere lasi, to ia gwau: “Inai fom oi hahonua sibona. Gabeai unai gaukara do oi dibaia.” Unai murinai, hua ta lalonai treinini lau abia bona sekit gaukara lau hamatamaia. Kongrigeisen ta lau vadivadi henia neganai, Iehova ia lalokau henia bona ena painia gaukara ia goadalaia taihu matamata ta ladana Janny Taatgen ida lau hedavari. Lagani 1955 ai, ai headava. Hari, Janny ese painia gaukara ia matamaia ena sivarai do ia herevalaia.

Janny: Lagani 1945 ai, egu mauri lagani be 11 neganai, egu sinana be Witnes hahinena ta ai ia lao. Ia laloparara ena natudia toi ida Baibel ia stadilaia be gau badana. To, egu tamana be hereva momokani ia inai henia dainai, ia noho lasi negadiai emai sinana ese ai ia stadi henia.

Lagani 1950 ai, nega ginigunana The Hague dekenai idia karaia distrik hebouhebou lau lao. Wiki ta murinai, Assen (Drenthe) ena Kingdom Hall dekenai egu kongrigeisen hebou ginigunana lau lao. Egu tamana ia badu dikadika bona ruma amo lau ia lulua. Egu sinana ia gwau, “Oi diba vadaeni edeseni do oi lao.” Lau diba ia be egu Keristani tadikaka taihu ia herevalaia. Kahirakahira idia noho Witnes famili ta ida lau noho, to egu tamana be lau ia dagedage henia noho dainai, Deventer (Overijssel) kongrigeisen dekenai lau lao. Ena daudau be kilomita 95 bamona. To, taravatu henunai lau be natu maragina dainai, egu tamana  be maoro lasi ruma amo lau ia lulua, unai dainai gavamani taudia ese idia sisiba henia. Unai murinai, egu tamana be lau ia hamaoroa ruma dekenai do lau giroa. Ena be egu tamana be hereva momokani ia abia dae lasi, to lau ia koua lasi hebou bona haroro lau lao totona.

Ruma dekenai lau giroa bona daudau lasi murinai egu sinana ia gorere dainai, lau ese ruma gaukara ibounai lau karaia. To hereva momokani lalonai lau goada lau lao, bona lagani 1951 ai egu mauri lagani be 17 neganai lau bapatiso. Lagani 1952 ai egu sinana ena gorere ia namo. Unai murinai, lau bona painia taihu rua be hua rua lalonai laga-ani (heduru) painia gaukara ai karaia. Ai be bouti ta mai ena ruma dekenai ai noho, bona Drenthe ai idia noho taoni rua lalonai ai haroro. Lagani 1953 ai, regula painia gaukara lau hamatamaia. Lagani ta murinai, sekit naria tadikaka matamata ta ladana Markus ese emai kongrigeisen ia vadivadi henia. Ai laloa ai ruaosi be Iehova do ai hesiai henia namonamo diba. Unai dainai May 1955 ai, ai headava.​—⁠Had. 4:9-12.

Markus: Ai headava murinai, Veendam (Groningen) dekenai ai idia siaia painia gaukara ai karaia totona. Ai noholaia daiutu maragina ena lata be mita rua bona ena lababa be mita toi. To, Janny ese unai daiutu ia hagoevaia namonamo. Hanuaboi ibounai, emai teibolo bona sea maragidia rua ai kokidia, unai amo bedi ai atoa bona ai mahuta diba.

Hua siks murinai, ai idia boiria Belgium dekenai loaloa naria gaukara ai karaia totona. Lagani 1955 ai, Belgium dekenai pablisa ibounai be 4,000 bamona. Hari, pablisa ibounai be 24,000 ia hanaia! Flanders, Belgium ena hanua ta dekenai idia herevalaia gado be Netherlands taudia edia gado hegeregerena. To, Belgium gado be ia idau sisina, unai dainai matamanai ai hekwarahi unai gado ai herevalaia totona.

Janny: Loaloa naria gaukara ai karaia totona, sibona emai ura ai dadaraia. Emai basikele amo kongrigeisen ta ta ai vadivadi henidia, bona tadikaka taihu edia ruma dekenai ai noho. Ai be ruma lasi dainai, tadikaka taihu edia ruma dekenai ai noho ela bona Tuesday dabai, bena kongrigeisen ma ta dekenai ai lao. To, hanaihanai ai laloatao emai hesiai gaukara be Iehova amo ia mai hahenamo ta.

Markus: Matamanai, kongrigeisen ai idia noho tadikaka taihu ai diba namonamo lasi, to ai dekenai heabidae karana idia hahedinaraia. (Heb. 13:2) Idia hanaia laganidia lalonai, Belgium ai idia noho Dutch-gado kongrigeisen ibounai ai vadivadi henia. Unai ese ai dekenai hahenamo momo ia mailaia. Hegeregere, Dutch distrik ai idia noho tadikaka taihu momo ai diba bona ai lalokau henidia. Ai itaia, matamata taudia momo idia bada bona hereva momokani lalonai idia goada, Iehova dekenai edia mauri idia gwauhamatalaia, bona Basileia idia atoa guna. Danu, ai moale badina idia momo  be ful-taim hesiai gaukara idia karaia. (3 Ioa. 4) Unai ese ai ia hagoadaia mai emai kudouna ibounai ida emai hesiai gaukara ai karaia noho totona.​—⁠Roma 1:12.

Markus: Ai headava dinana amo, emai ura gauna badana be Gilead Sikuli do ai lao. Dina ta ta ibounai, hora ta lalonai English gado ai stadilaia. To, buka amo English gado ai dibaia be auka. Unai dainai, holidei totona England dekenai ai lao, bona unuseni ai haroro lalonai English gado ai dibaia. Bena lagani 1963 ai, Brooklyn hedikwota amo revareva rua ai abia. Ta be lauegu bona ta be Janny ena. Egu revareva ai lau idia boiria hua 10 lalonai do idia karaia Gilead Sikuli lau lao totona. Unai kosi idia karaia tadikaka dekenai orea ena hakaua daladia idia hadibaia totona. Idia boiria stiuden 100 amo, 82 be tadikaka.

Janny: Egu revareva lalonai lau idia noia, do lau guriguri bona abia hidi do lau karaia, bema hegeregere Belgium ai lau noho bona Markus be Gilead Sikuli do ia lao. Momokani, matamanai lau lalohisihisi bona lau laloa Iehova ese egu tahua gauna ia hanamoa lasi. To, Gilead Sikuli ena anina lau laloa loulou​—⁠unai sikuli idia lao taudia be idia hadibadia sivarai namona be tanobada hegegemadai idia harorolaia totona. Unai dainai, abia hidi lau karaia do lau noho, bona lau idia siaia Ghent siti ai, spesel painia taihu goadadia rua Anna bona Maria Colpaert ida do lau gaukara.

Markus: Gilead Sikuli ia do hamatamaia lasi neganai, lau idia boiria Brooklyn dekenai hua faiv do lau noho, unai amo egu English gado lau hanamoa diba. Brooklyn hedikwota ai, lau be Buka Siaia Dipatmen bona Haroro Naria Dipatmen dekenai lau gaukara. Buka siaia dipatmen lau durua neganai, ai be Asia, Europe, bona South America dekenai buka bona magasin ai siaia, bona unai ese lau ia durua iseda tadikaka oreana lau dibaia totona. Tadikaka A. H. Macmillan lau laloatao, ia be Tadikaka Russell ena negai loaloa gaukara ia karaia. Ena be ia buruka momokani bona ia taia kudima, to kongrigeisen heboudia ia reaia lasi. Unai ese lau ia hagoadaia, Keristani tadikaka oreana bamoa karana lau laloa bada totona.​—⁠Heb. 10:24, 25.

Janny: Lau bona Markus be ta ta ai itaia lasi dainai, wiki ta ta ai nega momo revareva ai torea heheni! To, Markus be Gilead Sikuli ia moalelaia bona lau be egu haroro gaukara lau moalelaia danu. Markus be United States amo ia giroa mai neganai, egu Baibel stadi ibounai be 17! Ena be hua 15 ai parara, to Iehova ese emai hekwarahi ia hanamoa. Markus do ia giroa mai dinana ai hora momo lalonai peleini be ia leiti dainai, ia ginidae neganai ai herosi bona ai tai. Unai dina amo ema bona hari, gau ta ese ai ia hapararaia lasi.

Markus: December 1964 ai Gilead Sikuli amo lau giroa mai neganai, ai idia boiria Betele dekenai ai gaukara totona. To, unai neganai ai diba lasi, ai be unuseniai do ai noho daudau lasi. Hua toi murinai ai idia siaia Flanders dekenai distrik gaukara ai karaia totona. To misinari taudia, Aalzen bona Els Wiegersma be Belgium dekenai idia siaia distrik gaukara idia karaia totona. Unai dainai, lau  bona Janny be Betele dekenai ai giroa lou. Bona lau be Haroro Naria Dipatmen dekenai lau gaukara. Lagani 1968 ela bona 1980 lalodiai, nega momo emai gaukara idia haidaua. Hegeregere, nega haida Betele dekenai ai gaukara bena ai idia siaia loaloa naria gaukara ai karaia totona. To, lagani 1980 amo ela bona 2005, lau be distrik naria tauna ena gaukara lau karaia.

Ena be unai ia vara, to ai laloaboio lasi emai mauri ai gwauhamatalaia ena badina be, ai ura emai kudouna ibounai ida Iehova do ai hesiai henia. Unai gaukara idauidau ai moalelaia, bona ai laloparara ai be Dirava ena Basileia ai durua.

Janny: Lau moale bada badina lagani 1977 ai, Markus ida Brooklyn dekenai lau lao. Gabeai lagani 1997 ai, Patterson dekenai ai lao bona unuseniai Markus be Brens Komiti ena sikuli ia karaia.

Markus: Lagani 1982 ai, Janny be opereisen ia abia bona ia namo lou. Lagani toi murinai, Louvain kongrigeisen ese gwaumaoro idia henia Kingdom Hall ataiai ia noho daiutu ta dekenai do ai noho. Lagani 30 lalodiai ai be gabu idauidau dekenai ai noho, to hari ai be mai emai noho gabuna. Tuesday ai, kongrigeisen ma ta do ai vadivadi totona emai kohu ai haboua murinai, emai ruma ena vadavada 54 dekenai lau diho daekau, emai kohu lau abia diho totona! Ai moale badina lagani 2002 ai, ai dekenai henunai ia noho daiutu ta idia henia. Egu mauri lagani be 78 neganai, ai idia siaia Lokeren ena taoni dekenai spesel painia gaukara ai karaia totona. Ai moale badina spesel painia gaukara ai karaia bona dina ta ta ai haroro diba.

Janny: Ai ruaosi be lagani 120 mai kahana lalodiai ful-taim hesiai gaukara ai karaia vadaeni! Ai be Iehova ena gwauhamata ai mamia momokani, ia gwau: “Lau ese umui do lau negea lasi.” Bona mai abidadama ida Dirava ai hesiai henia noho neganai, ai do ia “rakatania lasi momokani.”​—⁠Heb. 13:5; Deu. 2:7

Markus: Ai matamata neganai, Iehova dekenai emai mauri ai gwauhamatalaia. Sibona emai ladana abia isi gaudia ai tahua lasi. Ai dekenai idia henia gaukara ai karaia sibona, badina ai abia dae edeseniai o dahaka ai karaia be gau badana lasi. To mai anina bada gauna be Iehova ai hesiai henia.