LAGANI 1958 ai egu natuna Gary ia vara neganai, lau itaia gau ta ia maoro lasi. To, doketa ese hua 10 murinai Gary ena gorere idia davaria, bona lagani faiv murinai London ena doketa badadia ese unai gorere idia hamomokania. Egu natuna kekeni Louise, be lagani 9 murinai ia vara, to lau lalohisihisi badina ia danu be unai gorere ia abia, bona ena gorere be bada.

Doketa taudia idia gwau: “Oiemu natuna ruaosi be LMBB a gorere idia abia bona hanamoa muramurana ta be lasi.” Unai nega ai, doketa be unai gorere ena badina idia lalopararalaia namonamo lasi. Unai gorere idia abia taudia be idia matakepulu, edia tauanina ia bada herea, imana o aena kwakikwaki ma haida idia vara, edia tubu dalana be metairametaira, roki bona suga gorere idia abia, bona edia kidni ia gaukara namonamo lasi. Unai dainai, egu natudia lau naria be mai ena hekwarahi. Vanegai, tahua gaukarana ta amo idia davaria Britain ai taunimanima 125,000 amo ta ta sibona be unai gorere idia abia. Taunimanima momo be unai gorere idia abia danu, to edia gorere be bada momokani lasi.

Lau headava murinai Iehova ena Witnes hahinena ta lau hereva henia, bona karaharaga lau laloparara ia herevalaia gaudia be Baibel ena hereva momokani. To, egu adavana be ia ura lasi ia kamonai. Danu ena moni gaukara dainai, ai be gabu idauidau dekenai ai lao, unai dainai kongrigeisen ta lau bamoa lasi. To, hanaihanai Baibel lau duahia bona Iehova lau guriguri henia. Baibel ia gwau: “Tau dikadia ese idia dagedage henia taudia, be Lohiabada ese do ia bogahisihisi henia. Ia be edia heau mauri gabuna momokani, dika ia ginidae neganai” bona “[ia] dekenai idia mai taudia, be [ia] ese idia do [ia] rakatania lasi, lasi momokani.” Unai lau duahia neganai lau moale bada.​—⁠Sal. 9:9, 10.

Gary ena matana idia dika, unai dainai ena mauri lagani be 6 neganai, England ena saut kahana ena bodini sikuli ta dekenai ia lao. Unai sikuli be gorere taudia idia durua gabuna. Gary be hanaihanai lau ia rini henia ena lalohekwarahi gaudia ia herevalaia totona, bona lau ese Baibel ena hakaua hereva badadia amo ia lau durua. Louise ia vara bena lagani haida murinai, multiple sclerosis bona fibromyalgia gorere lau abia. Gary ena mauri lagani be 16 neganai, bodini sikuli amo ia giroa mai. To, ena matana idia dika idia lao, bena lagani 1975 ai doketa idia hamomokania iena matana idia kepulu vadaeni. Lagani 1977 ai egu adavana ese ai ia rakatania.

Gary ia giroa murinai, ai ese kongrigeisen namona ta ai bamoa, bona lagani 1974 ai bapatiso lau abia. Lau moale badina elda ta ese Gary ia durua ia tubu daekau lalonai ia davaria hekwakwanai ia hanaia totona. Tadikaka taihu haida ese lau idia durua bona ruma gaukara idia karaia, bena gabeai welfea taudia ese idia faiv idia abia hidi ai idia naria totona. Ai dekenai unai be hahenamo badana!

Gary be hereva momokani lalonai ia goada ia lao, bona lagani 1982 ai ia bapatiso. Ia ura dikadika heduru painia gaukara ia karaia. Unai dainai, egu lalona lau hadaia ia ida do lau painia totona; bona lagani haida lalonai ai painia hebou. Egu natuna ia moale badina lagani haida murinai sekit naria tauna ese ia nanadaia, “Gary, oi ura regula painia gaukara oi karaia, a?” Unai ese Gary ia durua bona lagani 1990 ai, regula painia gaukara ia hamatamaia.

 Gary ena koekoena dekenai opereisen rua ia abia. Ginigunana be lagani 1999 ai bona iharuana be 2008 ai. To Louise ia gorere dikadika. Ia vara neganai, ia be matakepulu bona ena aena ta dekenai aena kwakikwaki siks idia tubu. Unai lau itaia neganai, lau diba ia danu be LMBB gorere ia abia. Doketa ese idia sekea murinai idia davaria iena tauanina ena kahana momo be idia dika. Lagani momo lalodiai Louise be opereisen badadia momo ia abia, hegeregere ena kidni dekenai opereisen faiv idia karaia. Gary bamona, ia danu be suga gorere ia abia.

Louise ia diba opereisen negadiai hekwakwanai do idia vara dainai, ia ese ivaia doketa, anestetik doketa bona hospital idia gunalaia taudia dekenai rara do ia abia lasi ena badina ia herevalaia. Unai dainai, ia bona ia idia durua doketa taudia be tura namodia.

Emai ruma lalonai Iehova tomadiho henia totona gau momo ai karaia. Guna kompiuta be do lasi neganai, hora momo lalodiai Gary bona Louise dekenai buka lau duahia. To hari, emai ruma bese tomadiho ai moalelaia badina CD, DVD, bona www.jw.org amo ai abia rekodia gaudia ai gaukaralaia, bona Keristani heboudia dekenai haere ai henia diba.

Nega haida Gary ese ena haere be kwarana dekenai ia laloatao bona ia gwauraia sibona, bona Tiokratik Haroro Sikuli ai tok ia henia neganai sibona ena hereva amo ia karaia. Lagani 1995 ai, ia be hesiai tauna ena maduna ia abia, bona hanaihanai Kingdom Hall ai kongrigeisen taudia ia welkam henidia, bona saun naria gaukara ia karaia.

Gary be mai ena roki gorerena dainai, haroro gaukara negadiai, kongrigeisen taudia ese iena wilsea idia doria. Witnes tauna ta ese Gary ia durua kamonai tauna ta ia stadi henia totona. Danu, Gary ese lagani 25 ia manoka Keristani taihu ta ia hagoadaia. Hari, idia be Keristani heboudia idia lao noho.

Louise ena mauri lagani be nain neganai, ena tubuna hahinena ese vulu turia dalana ia hadibaia, bona lau bona Louise ia naria hahinena ta ese ia dekenai dabua latanai herahera gaudia turia dalana ai hadibaia. Unai bamona turituri dalana ia moalelaia dainai, ia ese kongrigeisen ai idia noho beibi bona buruka taudia totona kala idauidau blanketi ia turia. Danu, ma haida totona kadi ia karaia bona edia latanai laulau maragidia ia kapaia. Unai kadi idia abia taudia idia moale bada. Louise ena mauri lagani be 13 bamona neganai, touch-typing dalana ia dibaia. Hari ena teknoloji dainai, Louise be kompiuta amo ena turadia dekenai e-mail ia siaia bona idia herevahereva diba. Louise ena mauri lagani be 17 neganai, bapatiso ia abia. Invateisen o pepapepa hariharilaia negadiai, heduru painia gaukara ai karaia hebou. Gary bamona, Louise danu be Baibel siridia ia laloatao. Unai siri haida ese tanobada matamatana ai Dirava ia gwauhamatalaia gaudia idia herevalaia, hegeregere “matakepulu taudia ese do idia itaia diba” bona “ta ese do ia gwau lasi, ‘Lau be gorere.’”​—⁠Isa. 33:24; 35:5.

Iehova ena Hereva helagana lalonai idia noho hereva momokanidia ai ura henia bada! Aiemai kongrigeisen taudia be mai lalokau ida ai idia durua dainai, idia ai tanikiu henia bada. Edia heduru dainai, ai be gau momo ai karaia diba. Bona Iehova ai tanikiu henia bada badina iena heduru dainai, emai mauri be mai ena anina.