“Sivarai namona ena dala hegeregerena, kara maorona umui karaia.”​—⁠FILI. 1:27.

EDENA BAMONA DO OI HAERE?

Daika be Basileia ena sitisen ai ia lao diba?

Edena dala ai Basileia ena gado, histori bona taravatu oi dibaia diba?

Edena dala ai Basileia ena sitisen taudia idia hamomokania idia be Dirava ena taravatu idia ura henidia?

1, 2. Dahaka dainai Filipi tadikaka dekenai inai hereva, “sivarai namona ena dala hegeregerena, kara maorona umui karaia” be mai anina bada?

 APOSETOLO Paulo ese Filipi kongrigeisen ia hagoadaia ‘namona be sivarai namona ena dala hegeregerena, kara maorona idia karaia.’ (Filipi 1:27 duahia.) Filipi kongrigeisen dekenai unai hereva be mai anina bada. Dahaka dainai? Badina Roma gavamani ese Filipi taudia dekenai gwaumaoro ia henia Roma tanona ena sitisen ai idia lao totona, bona Roma ena taravatu ese idia do ia gimaia. Filipi taudia be Roma ena sitisen ai idia lao dainai idia hekokoroku, badina hahenamo momo idia moalelaia.

² To, Filipi tadikaka be badina ma ta dainai idia moale diba. Paulo ese horoa Keristani taudia ia hamaoroa: “Iseda noho gabuna be guba.” (Fili. 3:20) Idia be Dirava ena Basileia ena sitisen, bona unai Basileia ese taunimanima edia gavamani ibounai ia hereaia. Dirava ena Basileia ese idia ia gimaia bona idia dekenai hahenamo momo ia henia; gavamani ma ta be unai ia karaia diba lasi.​—⁠Efe. 2:19-22.

3. (a) Daika be Dirava ena Basileia ena sitisen ai ia lao diba? (b) Inai stadi lalonai dahaka gaudia do ita herevalaia?

³ Paulo ena hereva, “sivarai namona ena dala hegeregerena, kara maorona umui karaia,” be Keriso ida guba ai do idia lohia taudia totona. (Fili. 3:20) To, Dirava ena Basileia henunai tanobada ai do idia noho taudia dekenai, unai hereva be mai anina bada danu. Dahaka dainai? Badina ita ibounai be Iehova, King tamona ita hesiai henia, bona iena taravatu be tamona iena hesiai taudia iboudiai totona. (Efe. 4:4-6) Hari, momo be idia gaukara goada taga tanona ta ena sitisen ai idia lao totona. To, Basileia ena sitisen ai ita lao be mai anina bada. Unai ita lalopararalaia totona, hari ita ese tanobada gavamani ta ena sitisen ai ita lao ena  taravatu, bona Dirava ena Basileia ena sitisen ai ita lao ena taravatu, do ita hahegeregerea. Bona Basileia ena sitisen ai ita lao totona, do ita karaia gaudia toi do ita herevalaia.

TANO TA ENA SITISEN AI ITA LAO ENA TARAVATU

4. Gado goevadaena be dahaka, bona ita herevalaia ena anina be dahaka?

⁴ Gado oi dibaia. Gavamani haida idia ura edia sitisen ai idia ura lao taudia ese edia gado idia dibaia be namo. To, haida be sitisen ai idia lao murinai, lagani momo idia hekwarahi unai gado idia herevalaia namonamo totona. Reana gado ena taravatu do idia dibaia haraga, to nega daudau murinai gado idia herevalaia namonamo diba. Dirava ena Basileia ia ura iena sitisen ai idia lao taudia ese gado matamata ta do idia dibaia. Baibel ia gwau unai be “gado goevadaena.” (Sepanaia 3:9 duahia.) Unai gado be dahaka? Unai be Baibel lalonai idia noho hereva momokanidia. Idia ese Dirava bona ena ura idia hahedinaraia. Gado goevadaena ita herevalaia anina be, eda mauri lalonai Dirava ena taravatu bona hakaua herevadia ita badinaia. Bona Basileia ena sitisen ai ita lao neganai, reana Baibel ena hahediba hereva badadia ita dibaia haraga bona bapatiso ita abia. To ita bapatiso murinai, namona be ita gaukara goada gado goevadaena ita manadalaia totona. Edena bamona unai ita karaia diba? Namona be ita ta ta ita hekwarahi noho, Baibel amo ita dibaia gaudia be eda mauri lalonai ita badinaia totona.

5. Dahaka dainai Iehova ena orea ena histori ita stadilaia be namo?

⁵ Histori oi stadilaia. Gavamani haida idia ura edia sitisen ai idia ura lao taudia ese edia gavamani ena histori idia diba be namo. Ita ura Dirava ena Basileia ena sitisen ai ita lao dainai, namona be unai Basileia ena histori do ita diba namonamo. Idaunegai Israela besena ai, Kora ena natuna memerodia edia haheitalai ita tohotohoa be namo. Idia be Ierusalema bona dubu helaga idia ura henia bada dainai, ena histori idia herevalaia momo. Unai bamona idia karaia badina Ierusalema be Iehova, “King Badana ena hanua.” Ierusalema ena dubu helaga ai taunimanima be Iehova idia tomadiho henia bona ena Taravatu idia dibaia. Iehova, Ierusalema ena King, be ia lalonamo henia bona ia lalokau henia taudia sibona ia lohiaia. (Salamo 48:1, 2, 9, 12, 13 duahia.) Hari, tanobada ai Dirava danu be mai ena orea ta. Kora ena natuna memerodia hegeregerena, namona be ita danu ese Iehova ena orea ena histori ita stadilaia bona ma haida ita hadibaia. Iehova ena orea ena histori bona Ia ese idia ia durua dalana ita dibaia neganai, unai ese eda abidadama Dirava ena Basileia dekenai ia hagoadaia. Danu, ita ia hagoadaia mai ura bada ida Basileia ena sivarai ita harorolaia totona.​—⁠Ier. 9:24; Luka 4:43.

6. Dahaka dainai Iehova ia ura iena taravatu bona hakaua herevadia ita dibaia bona badinaia?

 ⁶ Taravatu oi dibaia. Tanobada gavamanidia idia ura edia sitisen ai idia lao taudia be edia taravatu do idia dibaia bona badinaia. Unai hegeregerena, Iehova danu ia ura iena Basileia ena sitisen taudia ese iena taravatu bona hakaua herevadia do idia dibaia bona badinaia. (Isa. 2:3; Ioa. 15:10; 1 Ioa. 5:3) Taunimanima edia taravatu be goevadae lasi, bona nega momo ita idia durua lasi. To, “Lohiabada ena Taravatu be ia namo momokani.” (Sal. 19:7) Dina ta ta ai Baibel duahia karana oi moalelaia, bona Dirava ena taravatu bona hakaua herevadia oi dibaia, a? (Sal. 1:1, 2) Ita ta ta do ita gaukara goada Dirava ena taravatu ita stadilaidia totona, badina ma ta ese ita totona unai do ia karaia lasi.

BASILEIA ENA SITISEN TAUDIA BE DIRAVA ENA TARAVATU IDIA URA HENIA

7. Dahaka dainai Basileia ena sitisen taudia ese Dirava ena taravatu idia badinaia be namo?

⁷ Basileia ena sitisen taudia ai ita noho totona, namona be Dirava ena taravatu ita dibaia bona ura henia. Momo idia gwau idia be edia tano ena taravatu idia ura henia. To, bema idia laloa taravatu ta be auka, bona ta ese idia ia itaia lasi neganai, unai taravatu idia utua. Nega momo taravatu idia badinaia badina idia ura taunimanima idia hamoalea. (Kol. 3:22) To, Basileia ena sitisen taudia be badina ta dainai, Dirava ena taravatu idia badinaia. Ita be Iehova ita lalokau henia. Unai dainai, ena be taunimanima ese ita idia itaia lasi, to mai moale ida Dirava ena taravatu ita badinaia noho.​—⁠Isa. 33:22; Luka 10:27 duahia.

8, 9. Edena bamona do oi diba oi be Dirava ena taravatu oi ura henidia?

⁸ Edena bamona do oi diba oi be Dirava ena taravatu oi ura henidia? Namona be sibona emu kara oi laloa namonamo. Hegeregere, emu dabua ena toana dainai, ta ese oi ia sisiba henia neganai, dahaka oi karaia? Oi laloa oi sibona emu ura oi badinaia be kerere lasi, a? Hereva momokani oi do dibaia lasi neganai, reana emu dabua ena toana oi laloa bada lasi, o emu dabua dainai ma haida be matabodaga lalohadaina idia abia. To, emu lalokau Iehova dekenai ia bada ia lao neganai, hemataurai dalanai emu dabua oi hahedokilaia. (1 Tim. 2:9, 10; 1 Pet. 3:3, 4) Reana, hari oi laloa oi be hemataurai dabua oi hahedokilaia. To, bema elda ta ese oi ia hamaoroa kongrigeisen ai momo idia laloa emu dabua ena toana be namo lasi, dahaka do oi karaia? Ekskius do oi gwauraia, do oi badu bona oi ura lasi emu dabua hahedokilaia dalana oi haidaua, a? Basileia ena sitisen taudia ese do idia badinaia taravatu badana ta be, Keriso do idia tohotohoa. (1 Pet. 2:21) Paulo ia gwau: “Namona be ita ta ta ese iseda dekena tauna ita hamoalea bona kara namodia do ita karaia ia ita hagoadaia totona. Badina Keriso danu ese sibona ia hamoalea lasi.” (Roma 15:2, 3) Kongrigeisen ai maino ia noho totona namona be lo Keristani tauna ese ena kara do ia naria namonamo, badina ia ura lasi ma haida edia lalomamina ia hadikaia.​—⁠Roma 14:19-21.

⁹ Headava bona mahuta hebou karana dekenai emu lalohadai be dahaka? Basileia ena sitisen ai idia do lao lasi taudia idia laloa, tatau be tatau (o hahine be hahine) ida idia mahuta hebou karana, ponografi, heudahanai bona headava hadokoa karana be kerere lasi. To, Basileia ena sitisen taudia idia diba idia karaia karana ta ese ma haida ia hahekwakwanaia diba. Momo be hereva momokani idia do diba lasi neganai, matabodaga karadia idia karaia. To, hari idia be Iehova ena taravatu idia ura henia, bona idia diba headava bona mahuta hebou karana be Dirava amo ia mai harihari gaudia. Danu, idia laloparara Iehova ena taravatu idia utua taudia be Basileia ena sitisen ai do idia lao lasi. (1 Kor. 6:9-11) To, idia laloparara danu edia kudouna ese idia ia koia diba. (Ier. 17:9) Unai dainai, Dirava ena kara maoromaoro  taravatudia idia badinaia noho totona, hanaihanai sisiba idia abia neganai idia moale.

BASILEIA ENA SITISEN TAUDIA BE HADIBAIA HEREVA IDIA ABIA DAE

10, 11. Dirava ena Basileia ese ita dekenai dahaka hadibaia hereva ia henia? Bona unai hadibaia hereva dekenai emu lalohadai be dahaka?

¹⁰ Tanobada gavamanidia be edia taunimanima dekenai, aniani o muramura haida edia dika idia gwauraia hedinarai. Momokani, aniani bona muramura ibounai be dika lasi. To, bema aniani o muramura ta be gorere ia havaraia diba, gavamani be ena sitisen taudia dekenai hadibaia hereva do ia henia. Unai be gavamani ena maduna. Unai hegeregerena, Dirava ena Basileia danu be ena sitisen taudia dekenai hadibaia hereva ia henia. Ita ia hadibaia edena bamona kara ese Dirava ena taravatu idia utua bona iseda hetura karana Dirava ida ia hadikaia diba. Hegeregere, momo ese Intanet idia gaukaralaia ma haida ida idia herevahereva, sikuli, bona moale karadia haida idia karaia totona. Dirava ena orea ese Intanet ia gaukaralaia danu gaukara namodia momo ia karaia totona. To, kara maoromaoro idia badinaia taudia dekenai Web sait momo be dika. Badina unai Web sait haida dekenai ponografi laulaudia idia hahedinaraia. Lagani momo lalodiai, igui hesiai tauna ese unai Web sait dainai hadibaia herevadia ia henia, bona ena sisiba ita badinaia be namo!

¹¹ Vanegai laganidia ai, momo be Web sait idauna ma ta idia gaukaralaia. Unai be social networking Web sait idauidau. Idia be mai edia namo, to dika idia havaraia danu. Unai dainai, unai bamona Web sait ita gaukaralaia neganai, ita naria namonamo be gau badana. Badina unai Web sait dekenai ita hereva henia taudia be reana hebamo dikadia. (1 Kor. 15:33) Unai dainai, igui hesiai tauna be ita dekenai sisiba ia henia, unai Web sait idauidau gaukaralaia dalana ita lalohadailaia namonamo totona. Magasin ai idia halasia social networking Web sait edia atikol ibounai oi duahia vadaeni, a? Bema unai atikol ita duahidia lasi bona social networking Web sait ita gaukaralaia, dika ita davaria diba. a Unai be hegeregere, muramura ta ita inua kava, to ena kavabu ai idia noho hadibaia herevadia ita duahia lasi.

12. Dahaka dainai Dirava ena hadibaia hereva ita dadaraia be kavakava karana?

¹² Igui hesiai tauna ena hadibaia hereva idia dadaraia taudia be idia sibona bona edia lalokau taudia dekenai, lalohisihisi idia havaraia diba. Haida be ponografi laulau itaia karana o heudahanai karadia idia manadalaia bona idia rakatania be auka, bona idia laloa Iehova ese edia kara ia itaia lasi. Bema ita laloa eda kara be Iehova amo ita hunia diba, unai be lalohadai kavakavana! (Aon. 15:3; Heberu 4:13 duahia.) Tanobada gavamanidia ese taravatu idia utua taudia be edia tano ai idia abidia dae lasi hegeregerena, Iehova ena taravatu idia utua bona idia helalo-kerehai lasi taudia, be iena Basileia ena sitisen ai do idia lao lasi. b (1 Kor. 5:11-13) To, Iehova be hebogahisi Diravana bona elda taudia amo kara dika idia karaia taudia ia durua toho. (Gal. 6:1) Idia helalo-kerehai bona edia kara dika idia rakatania taudia be Iehova idia tura henia lou diba, bona Basileia ena sitisen ai idia noho diba. (2 Kor. 2:5-8) Unai bamona lalokau King ita tomadiho henia be hahenamo badana ta!

 BASILEIA ENA SITISEN TAUDIA BE EDUKEISEN IDIA LALOA BADA

13. Edena dala ai Basileia ena sitisen taudia idia hahedinaraia edukeisen idia laloa bada?

¹³ Gavamani momo idia hekwarahi edia taunimanima idia hadibaia totona. Sikuli idia haginia unai amo taunimanima be diba idia abia. Basileia ena sitisen taudia be unai sikuli ai duahiduahi, toretore, bona gaukara ma haida karaia totona diba idia abia. Idia hekwarahi bada unai sikuli amo diba idia abia totona. To, Iehova ena orea amo idia abia edukeisen idia laloa bada. Hegeregere, iena orea ese ita idia durua ita duahiduahi totona. Danu, tama sina ia hagoadaia natudia dekenai idia duahiduahi totona. Hua ta ta ai igui hesiai tauna ese Gima Kohorona bona Awake! ia halasia. Bema dina ta ta ai unai magasin edia rau ta o rua oi duahia, Iehova ese ia henia edukeisen amo namo bada do oi davaria.

14. (a) Ita be edena bamona treinini ita abia? (b) Ruma Bese Ena Tomadiho totona, edena dala oi tohoa vadaeni?

¹⁴ Wiki ta ta ai, Basileia ena sitisen taudia be kongrigeisen heboudia amo treinini idia abia. Hegeregere, Tiokratik Haroro Sikuli be lagani 60 mai kahana lalodiai idia karaia, bona stiuden taudia ia durua Dirava ena Hereva idia hadibaia namonamo totona. Oi be unai sikuli lalonai oi vareai vadaeni, a? Danu, igui hesiai tauna ese ita ia hagoadaia wiki ta ta ai Ruma Bese Ena Tomadiho ita karaia be mai anina bada. Unai stadi karana ese ruma bese ia hatamonaia. Eda magasin ese idia herevalaia Ruma Bese Ena Tomadiho daladia idauidau oi tohoa vadaeni, a? c

15. Ita be dahaka hahenamo badana ita abia?

¹⁵ Tanobada gavamanidia edia sitisen taudia be ma haida idia boiria politikol pati ta idia durua totona. Unai idia karaia totona haida be ruma-ta-ruma-ta idia lao. Tanobada hegegemadai, Basileia ena sitisen taudia be dala ai bona ruma-ta-ruma-ta ai, ma haida dekenai Dirava ena Basileia idia harorolaia. Unai amo idia hahedinaraia idia be Dirava ena Basileia idia durua. Hegeregere, Gima Kohorona idia karaia ena badina be Dirava ena Basileia do ia harorolaia. Bona stadi ginigunana ai ita herevalaia bamona, Gima Kohorona be tanobada hegegemadai idia hariharilaia momo magasin! Ma haida dekenai Dirava ena Basileia ita harorolaia be hahenamo badana. Oi be mai emu ura bada ida Basileia ena sivarai namona oi harorolaia, a?​—⁠Mat. 28:19, 20.

16. Edena dala ai oi hamomokania diba oi be Basileia ena sitisen namona ta?

¹⁶ Kahirakahira Dirava ena Basileia sibona ese tanobada do ia lohiaia. Unai Basileia ena taravatu sibona ese taunimanima do ia hakaua. Dirava ena Basileia henunai oi be sitisen tauna namona ai do oi lao, a? Namona be hari inai negai oi hamomokania oi be sitisen tauna namona ai do oi lao. Dina ta ta ai abia hidi oi karaia neganai, namona be gau ibounai oi karaia Iehova oi hamoalea totona, bona oi hamomokania oi be Basileia ena sitisen namona ta bamona oi kara.​—⁠1 Kor. 10:31.

[Footnotes]

[Study Questions]

[Blurb on page 14]

Igui hesiai tauna ese Intanet dainai ia henia sisiba oi badinaia, a?

[Picture on page 12]

Kora ena natudia memero bamona, oi be tomadiho goevana bona ena histori oi ura henia, a?

[Picture on page 15]

Ruma Bese ena Tomadiho ese oi bona emu famili do ia durua, Basileia ena sitisen namodia ai umui lao totona