Mai Kudouna Ibounai ida Iehova Hesiai Henia

“Egu natuna e, oiemu tamana ena Dirava dekenai do oi manada momokani, bona iena hesiai gaukara do oi karaia mai oiemu kudouna ibounai.”​—⁠1 SIV. 28:9.

INAI HENANADAI EDIA HAERE TAHUA:

Baibel lalonai kudouna be dahaka ia laulaulaia?

Iseda kudouna ita sekea totona, dahaka ita karaia diba?

Edena dala ai mai kudouna ibounai ida Iehova ita hesiai henia diba?

1, 2. (a) Baibel lalonai tauanina ena kahana ta idia herevalaia momo, unai be dahaka? (b) Dahaka dainai Baibel ese ia herevalaia “kudouna” ena anina ita diba be namo?

BAIBEL ese laulau dalanai tauanina ena kahana idauidau ia gaukaralaia gau ta ia herevalaia totona. Hegeregere, Iobu ia gwau: “Lau be matakepulu taudia edia matana, bona aena dika taudia edia aena.” Bona Iesu ia gwau: “Oiemu imana idiba kahana ese bema kerere do ia havaraia oi dekenai, oi utua, oi negea momokani.”​—⁠Iobu 29:15; Mat. 5:30.

² Baibel torea taudia be nega momo laulau dalanai kudouna idia herevalaia. Hegeregere, abidadama hahinena Ana be ena guriguri lalonai ia gwau: “Lohiabada ese lauegu kudouna ia hamoalea.” (1 Sam. 2:1) Idaunegai Baibel idia torea taudia edia toretore lalonai kudouna be nega 1,000 bamona idia gaukaralaia. Baibel ia gwau iseda kudouna do ita gimaia be namo, unai dainai kudouna ese ia laulaulaia gauna ita lalopararalaia be mai anina bada.​—⁠Aonega Herevadia 4:23 duahia.

KUDOUNA BE DAHAKA IA LAULAULAIA?

3. Baibel ese ia herevalaia “kudouna” be edena dala ai ita lalopararalaia diba? Haheitalai gwauraia.

³ Ena be kudouna ese ia laulaulaia gauna be Baibel ese ia gwauraia hedinarai lasi, to ena anina ita lalopararalaia diba. Mani inai haheitalai ita laloa: Tau ta be nadi maragidia momo ia atoa hebou bona laulau hairaina ta ia karaia. Bema gabu daudauna ai ita gini, unai laulau ena toana ita itaia namonamo diba. Unai hegeregerena, inai hereva “kudouna” ena anina ita lalopararalaia diba, bema Baibel ai unai hereva idia gaukaralaia dalana idauidau ita tahua namonamo. Vadaeni, Baibel ese kudouna ia  herevalaia neganai, ia be dahaka ia laulaulaia?

4. (a) Baibel lalonai “kudouna” be dahaka ia hahedinaraia? (b) Mataio 22:37 ena anina be dahaka?

⁴ Baibel torea taudia ese “kudouna” idia gaukaralaia ta ena ura, lalohadai, kara, diba, bona gabeai do ia karaia gaudia idia herevalaia totona. (Deuteronomi 15:10; Aonega Herevadia 16:9; Kara 2:26 duahia.) To nega haida “kudouna” be unai gaudia ia herevalaia lasi. Hegeregere Iesu ia gwau: “Namona be Iehova emu Dirava oi lalokau henia mai emu kudouna ibounai, mai emu mauri ibounai, bona mai emu darana ibounai ida.” (Mat. 22:37) Unai siri lalonai “kudouna” be ta ena ura bona hemami ia herevalaia. Iesu ese kudouna, mauri bona darana ia herevalaia, badina ia ura iseda hemami, kara, bona lalohadai amo ita hahedinaraia ita be Dirava ita lalokau henia. (Ioa. 17:3; Efe. 6:6) To bema siri ta lalonai “kudouna” sibona ia hedinarai, unai be ta ena kara korikorina ia herevalaia.

KUDOUNA ITA GIMAIA ENA BADINA

5. Dahaka dainai ita ura mai kudouna ibounai ida Iehova ita hesiai henia?

⁵ King Davida be Solomona dekenai ia gwau: “Egu natuna e, oiemu tamana ena Dirava dekenai do oi manada momokani, bona iena hesiai gaukara do oi karaia mai oiemu kudouna ibounai, bona mai oiemu lalona tamona danu. Dirava ese iseda laloa ibounai bona iseda ura ibounai ia diba.” (1 Siv. 28:9) Iehova be ita ibounai eda kudouna ia tahua noho. (Aon. 17:3; 21:2) Bona bema iseda kudouna ai ia itaia gauna ia ura henia, iena turana ai ita lao diba bona nega vairai mauri namona ita moalelaia diba. Unai dainai, namona be Davida ena sisiba ita badinaia bona ‘mai iseda kudouna ibounai’ ida Iehova ita hesiai henia.

6. Ita ura mai eda kudouna ibounai ida Iehova ita hesiai henia, to dahaka ita laloatao be namo?

⁶ Ita Iehova ena Witnes taudia be eda hesiai gaukara ita goadalaia, bona unai ese ia hamomokania ita ura mai eda kudouna ibounai ida Dirava ita hesiai henia. To namona be ita laloatao, Satani ena tanobada bona sibona eda ura dikadia ese ita idia veria diba eda hesiai gaukara ita rakatania totona. (Ier. 17:9; Efe. 2:2) Unai ia vara lasi totona, namona be iseda kudouna ita sekea loulou. Edena bamona unai ita karaia diba?

7. Dahaka ese ia hahedinaraia iseda kudouna be ia namo eiava ia dika?

⁷ Iseda kudouna be ta ese ia itaia diba lasi, au badana ta ena lalona ita itaia diba lasi bamona. To, Iesu ena Ororo Harorona ai ia gwau au ena huahua ese do ia hahedinaraia ia be au namona eiava au dikana. Unai hegeregerena, eda kara ese do ia hahedinaraia iseda kudouna be ia namo eiava ia dika. (Mat. 7:17-20) Mani unai ita herevalaia.

KUDOUNA ITA SEKEA DALANA TA

8. Mataio 6:33 ena hereva bamona, edena dala ai iseda kudouna ai ia noho gauna ita hahedinaraia?

⁸ Ororo Harorona ai, Iesu be kamonai taudia ia hamaorodia bema idia ura mai edia kudouna ibounai ida Iehova idia hesiai henia, kara ta idia karaia be namo. Ia gwau: “Nega ibounai Dirava ena Basileia bona ena kara maoromaoro do umui tahua guna, bona unai gaudia ibounai be umui dekenai do ia henia.” (Mat. 6:33) Iseda mauri lalonai ita atoa guna gaudia ese iseda palani, ura, bona lalohadai idia hahedinaraia. Unai dainai, eda mauri lalonai ita atoa guna  gaudia ita tahua namonamo be namo, unai amo do ita diba bema ita be mai eda kudouna ibounai ida Dirava ita hesiai henia eiava lasi.

9. Iesu ese tatau haida ia boiria dahaka idia karaia totona? Edia haere ese dahaka ia hahedinaraia?

⁹ Iesu be ena hahediba taudia ia hamaorodia Basileia do idia tahua murinai gau ta ia vara. Mani unai ita herevalaia. Luka ia gwau Iesu be ena lalona ia hadaia Ierusalema dekenai do ia lao, ena be ia diba unuseniai hisihisi do ia davaria. Ia bona ena aposetolo taudia be dala dekenai idia lao neganai, tatau haida idia davaria bona Iesu ese ia boiridia ena murinai idia raka totona. Iesu ena boiboi herevana idia abia dae, to idia ura gau haida idia karaia guna. Idia ta ia gwau: “Mani lau lao bona egu tamana lau guria guna.” Bona ma ta ia gwau: “Lohiabada e, oi murinai do lau raka. To mani lau lao bona egu ruma bese taudia lau bamahuta henidia guna.” (Luka 9:51, 57-61) Ita itaia Iesu be lalona ia hadaia haraga Dirava ena ura ia karaia totona, to ia boiria tatau be unai bamona lasi. Idia be edia ura idia atoa guna, bona unai ese ia hahedinaraia idia ura lasi mai edia kudouna ibounai ida Dirava idia hesiai henia. Unai sivarai amo ita dibaia gauna be inai: Ta be ena mauri lalonai ia atoa guna gaudia ese idia hahedinaraia ia be dahaka ia laloa bada.

10. (a) Iesu ese ita ia boiria neganai, dahaka ita karaia? (b) Iesu be dahaka haheitalai ia gaukaralaia?

¹⁰ Ita be unai tatau bamona lasi, badina Iesu ena boiboi herevana ita abia dae bona dina ta ta Iehova ita hesiai henia. Unai amo ita hahedinaraia Dirava ita lalokau henia. Ena be Iehova ena hesiai gaukara lalonai ita bisi, to namona be ita naria namonamo gau haida ese iseda hesiai gaukara idia hadikaia garina. Unai gaudia be dahaka? Iesu ese ia boiria taudia dekenai ia gwauraia herevana amo haere ita davaria. Ia gwau: “Tano makohia gauna ia dogoatao bona murinai idia noho gaudia ia itaia tauna, be ia hegeregere lasi Dirava ena Basileia totona.” (Luka 9:62) Unai haheitalai amo dahaka ita dibaia?

‘KARA NAMO ITA DOGOATAO AUKA,’ A?

11. Dahaka dainai tano ia geia tauna be ena gaukara ia karaia namonamo lasi?

¹¹ Iesu ena haheitalai ita lalopararalaia totona, idia vara gaudia ma haida mani ita herevalaia. Tau ta be tano makohia gauna amo tano ia geia noho. To, tano ia geia lalonai, ia be ena ruma bese ia laloa noho. Ia laloa bema ia be ruma ai ia noho, dina siahu ai do ia gaukara lasi, ena ruma bese bona turadia ida do ia aniani, do idia hevaseha hebou, bona miusiki namodia do idia moalelaia. Ia ura dikadika unai gaudia ia karaia. Reana hora haida lalonai tano ia geia murinai, ia ura henia gaudia ese ena lalona idia veria dainai, ia giroa bona “murinai idia noho gaudia” ia itaia. Ena be tano geia gaukarana ia do ore lasi, to unai gaudia sibona ia laloa dainai, ena gaukara ia karaia namonamo lasi, bona ena biaguna ia lalohisihisi.

12. Edena dala ai tano geia tauna ese Keristani tauna ia laulaulaia?

¹² Iseda negai ia vara diba gauna mani ita herevalaia. Ita gwau diba tano ia geia tauna be ia gaukara goadagoada Keristani tauna ta ia laulaulaia. Reana ia be hebou ibounai ia lao, bona hanaihanai ia haroro, to iena kudouna ia gimaia lasi. Ia be tanobada gaudia haida ia laloa momo bona unai gaudia ia ura henia dikadika. Lagani haida Dirava ia  hesiai henia murinai, unai gaudia ese ena lalona idia veria dainai, ia giroa bona “murinai idia noho gaudia” ia itaia. Ena be haroro gaukara bada herea ia do noho, to tanobada gaudia ia laloa momo dainai, ena hesiai gaukara ia karaia namonamo lasi. (Fili. 2:16) Iehova, “gogoa gaukara ena Biaguna” be ia lalohisihisi bema Keristani tauna ta be ena gaukara ia rakatania.​—⁠Luka 10:2.

13. Mai kudouna ibounai ida Iehova ita hesiai henia anina be dahaka?

¹³ Ita dibaia gauna be inai: Mai iseda kudouna ibounai ida Iehova ita hesiai henia totona, hanaihanai hebou ita lao, bona ita haroro sibona be hegeregere lasi. (2 Siv. 25:1, 2, 27) Bema Keristani tauna ta be “murinai idia noho gaudia,” anina be tanobada taudia edia mauri dalana ia ura henia, unai ese ena hetura karana Iehova ida ia hadikaia diba. (Luka 17:32) Unai dainai, mai kudouna ibounai ida Dirava ita hesiai henia totona, ‘kara dika do ita inai henia, bona kara namo do ita dogoatao auka’ be gau badana. (Roma 12:9; Luka 9:62) Ena be inai tanobada ai heduru gaudia momo idia noho, to namona be ita naria namonamo, dika unai gaudia ese ita idia koua bona eda hesiai gaukara ita rakatania.​—⁠2 Kor. 11:14; Filipi 3:13, 14 duahia.

GIMA NOHO!

14, 15. (a) Edena dala ai Satani be iseda hesiai gaukara ia hadikaia toho? (b) Satani ese ita ia koia dalana ena haheitalai ta gwauraia.

¹⁴ Iehova ita lalokau henia dainai ia dekenai eda mauri ita gwauhamatalaia. Unai nega amo, ita momo be eda lalona ita hadaia mai iseda kudouna ibounai ida Iehova ita hesiai henia totona. To, Satani be ita ia do tohoa noho; ia ura iseda kudouna do ia hadikaia. (Efe. 6:12) Ia diba ita be maoromaoro Iehova do ita rakatania lasi. Unai dainai, inai tanobada gaudia ia gaukaralaia ita ia dibagania totona, unai amo metairametaira iseda hesiai gaukara do ita rakatania. (Mareko 4:18, 19 duahia.) Dahaka dainai Satani ia kwalimu?

¹⁵ Haheitalai ta ese unai do ia haerelaia. Mani oi laloa: Hanuaboi ta oi be buka oi duahia lalonai laiti ia bodo. Oi be dibura dekenai oi helai dainai oi diba  golobu ia dika bona maoromaoro matamatana oi atoa bona emu daiutu ia hadiaria lou. Hanuaboi iharuana ai unai laiti ena diari henunai emu buka oi duahia lou, to oi diba lasi gauna be tau ta ese golobu idauna ia atoa. Ena be unai golobu be ia diari momokani lasi, to oi be unai oi lalopararalaia lasi. Dina ihatoina ai, unai tauna ese golobu ma ta ia atoa bona laiti ena diari be ia goada lasi, to oi be unai oi lalopararalaia lasi danu. Dahaka dainai? Badina laiti ena goada be metairametaira ia ore ia lao. Unai hegeregerena, tanobada ena lalona veria gaudia ese metairametaira oi ia veria diba bona Iehova ena hesiai gaukara do oi rakatania. Bema Keristani tauna ia gima lasi Satani do ia kwalimu.​—⁠Mat. 24:42; 1 Pet. 5:8.

ITA GURIGURI BE NAMO

16. Satani ita dadaraia totona dahaka ita karaia be namo?

¹⁶ Satani ita dadaraia bona mai kudouna ibounai ida Iehova ita hesiai henia noho totona, dahaka ita karaia be namo? (2 Kor. 2:11) Ita guriguri be gau badana. Paulo ese Keristani taudia ia hamaorodia do idia gini goada bona “Diabolo ena koikoi karadia” do idia dadaraia, bona “nega ibounai” Dirava do idia “guriguri” henia.​—⁠Efe. 6:11, 18; 1 Pet. 4:7.

17. Iesu ena guriguri dalana amo dahaka ita dibaia?

¹⁷ Dirava ita badinaia noho totona, namona be Iesu ita tohotohoa bona mai iseda kudouna ibounai ida Iehova ita hesiai henia. Getesemane ai Iesu ena guriguri dalana be Luka ese ia herevalaia, ia gwau: “Ia lalohisihisi bada bona ia guriguri goadagoada.” (Luka 22:44) Iesu be nega momo unai bamona ia guriguri, to ia diba unai hanuaboi ai hahetoho badana ta do ia davaria dainai, “ia guriguri goadagoada” bona Dirava ese ena guriguri ia haerelaia. Iesu ena kara ese ia hahedinaraia, nega haida ita guriguri goadagoada be namo. Unai dainai, hekwakwanai momo eiava Satani ena hahetoho badadia ita davaria neganai, namona be ita guriguri goadagoada Iehova ese ita ia gimaia totona.

18. (a) Edena henanadai ita laloa be namo, bona dahaka dainai? (b) Dahaka ese ita ia durua diba? (Rau 16 ena maua itaia.)

¹⁸ Guriguri goadagoada karana be edena dala ai ita ia durua diba? Paulo ia gwau: “Gau ibounai lalonai do umui guriguri bona noinoi goadagoada, bona mai tanikiu ida Dirava dekenai emui noinoi herevadia do umui gwauraia hedinarai. Bona Dirava ena maino, laloparara ibounai ia hereaia gauna, ese emui kudouna . . . do ia gimaia.” (Fili. 4:6, 7) Bema ita ura mai kudouna ibounai ida Iehova ita hesiai henia, namona be nega ibounai ita guriguri goadagoada. (Luka 6:12) Namona be sibona ita nanadaia: ‘Nega ibounai lau guriguri goadagoada, a?’ (Mat. 7:7; Roma 12:12) Emu haere ese do ia hahedinaraia oi be mai emu kudouna ibounai ida Dirava oi hesiai henia eiava lasi.

19. Mai kudouna ibounai ida Iehova oi hesiai henia totona, dahaka do oi karaia?

¹⁹ Inai stadi amo ita dibaia gauna be, eda mauri ai ita atoa guna gaudia ese iseda kudouna ena ura idia hahedinaraia. Ita ura lasi ita rakatania vadaeni gaudia eiava Satani ena koikoi karadia ese iseda hesiai gaukara idia hadikaia. (Luka 21:19, 34-36 duahia.) Davida bamona, namona be Iehova ita guriguri henia, ita gwau: “Lauegu lalona [o kudouna] do oi hatamonaia momokani.”​—⁠Sal. 86:11.

[Study Questions]

[Box on page 16]

KUDOUNA ITA NARIA DALADIA TOI

Iseda kudouna korikorina ita naria namonamo totona gau haida ita karaia be namo. Unai hegeregerena, Baibel ese ia herevalaia kudouna ita gimaia totona gau haida ita karaia be namo. Mani dala toi ita herevalaia.

1 Aniani namodia: Iseda kudouna korikorina ia gaukara namonamo totona, aniani namodia ita ania be gau badana. Unai hegeregerena, iseda hesiai gaukara ita goadalaia totona, nega ibounai sibona eda stadi ita karaia, ita laloa dobu bona hebou dekenai ita lao be namo.​—⁠Sal. 1:1, 2; Aon. 15:28; Heb. 10:24, 25.

2 Eksasais: Iseda kudouna korikorina ia gaukara goadagoada totona, ita eksasais be namo. Unai hegeregerena, Baibel ese ia herevalaia kudouna ia goada totona, namona be ita haroro hanaihanai bona ita hekwarahi eda haroro horadia ita habadaia totona.​—⁠Luka 13:24; Fili. 3:12.

3 Tura namodia: Dirava idia diba lasi taudia huanai ita noho dainai, ita lalometau diba bona Baibel ese ia herevalaia kudouna ia manoka diba. To, unai ita hanaia diba bema tadikaka taihu ita bamodia momo, badina idia be ita idia laloa bada bona mai edia kudouna ibounai ida Dirava idia hesiai henia.​—⁠Sal. 119:63; Aon. 13:20.