“Lau ida do umui gima noho.”​—⁠MAT. 26:38.

1-3. Iesu ena hanuaboi ginigabena ai, aposetolo taudia be dahaka idia karaia? Bona edia kara amo dahaka idia dibaia?

 IESU ena hanuaboi ginigabena ai ia vara gauna mani oi laloa. Ia be ena aposetolo taudia ida Ierusalema ena ist kahanai ia noho Getesemane umana dekenai idia lao. Iesu be unuseni ia lao badina ia ura regerege lasi gabuna ta dekenai, mai anina bada gaudia ia lalohadailaia bona ia guriguri.​—⁠Mat. 26:36; Ioa. 18:1, 2.

² Getesemane umana lalonai Iesu ese Petero, Iamesi, bona Ioane ia hamaorodia: “Iniseniai do umui noho bona lau ida do umui gima noho,” bena ia lao ia guriguri totona. Ia giroa lou neganai, ena aposetolo taudia be idia mahuta noho. Idia dekenai ia gwau: “Namona be umui gima noho.” To, nega iharuana ia giroa lou neganai, idia be idia mahuta! Gabeai unai hanuaboi ai, inai taudia ese Iesu idia dogoatao neganai, aposetolo taudia ese Iesu idia rakatania bona idia heau badina idia gima lasi!​—⁠Mat. 26:38, 41, 56.

³ Edia kara dainai idia lalohisihisi bada, bona idia laloparara gima noho karana be mai anina bada. Kara bukana ese ia hahedinaraia, edia haheitalai namona ese Keristani ginigunadia ia durua idia gima noho totona. Hari danu ita gima noho be gau badana. (Mat. 24:42) Kara bukana lalonai idia noho sivarai toi ese ita do idia durua ita gima noho totona.

LAUMA HELAGA ESE HARORO GABUNA IA HADIBADIA

4, 5. Paulo bona ena bamodia be edena dala ai lauma helaga ese ia hakaudia?

⁴ Ita dibaia gauna ginigunana be, aposetolo taudia be edia haroro gabudia idia dibaia neganai, idia badinaia. Baibel ese ia hahedinaraia aposetolo Paulo  bona ena bamodia be Iesu ese lauma helaga amo ia hakaudia. (Kara 2:33) Mani edia sivarai ita duahia.​—⁠Kara 16:6-10 duahia.

⁵ Paulo, Sila, bona Timoteo be Lusitera idia rakatania bona dina haida murinai, Roma ena dala badana dekenai idia ginidae. Unai dala amo idia be Asia provinsi dekenai idia lao diba. Unuseniai taunimanima momo idia noho dainai, idia ura Keriso ena sivarai do idia harorolaia. To, unai dala dekenai gau ta ese idia ia koua. Siri 6 ia gwau: “Idia be Perigia bona Galatia tanona huana amo idia lao, badina lauma helaga ese idia ia koua Asia provinsi dekenai sivarai namona do idia gwauraia lasi.” Lauma helaga ese idia ia koua dalana be Baibel ese ia hahedinaraia lasi, to Paulo bona ena bamodia idia diba Iesu ia ura gabu ma ta dekenai do idia haroro.

6, 7. (a) Bitunia ai Paulo bona ena bamodia dekenai dahaka ia vara? (b) Aposetolo taudia be dahaka abia hidi idia karaia, bona dahaka ia vara?

⁶ Paulo bona ena bamodia be edeseni idia lao? Siri 7ia gwau: “Musia dekenai idia diho lao neganai, dala idia tahua Bitunia dekenai do idia lao, to Iesu ese lauma helaga amo idia ia koua.” Unai dainai, Asia idia lao lasi to not kahana idia lao, badina idia ura Bitunia dekenai idia haroro. To, unai hanua kahirakahira idia ginidae neganai, Iesu ese lauma helaga amo idia ia koua lou. Unai tatau be reana idia daradara. Idia be edia haroro herevana bona haroro dalana idia diba, to do idia haroro gabuna idia diba lasi. Unai be hegeregere: Asia ena iduara dekenai idia pidipidi to ia kehoa lasi. Danu, Bitunia ena iduara dekenai idia pidipidi to ia kehoa lasi. Vadaeni unai haroro goadagoada taudia idia hesiku, a? Lasi!

⁷ To, gabeai idia karaia abia hidi dekenai reana do oi hoa. Siri 8 ia gwau: “Musia idia hanaia bona Troa dekenai idia diho mai.” Unai tatau be west kahana idia lao bona kilomita 563 idia raka, siti haida idia raka hanaia ela bona Troa dekenai idia ginidae, unuseniai bouti idia abia bona Makedonia dekenai idia lao. Siri 9 ia gwau: “Hanuaboi ai Paulo ia matahanai, ia itaia Makedonia tauna ta be unuseniai ia gini, Paulo ia noia, ia gwau: ‘Makedonia dekenai oi mai bona ai oi durua.’” Unai nega ai, Paulo bona ena bamodia be edia haroro gabuna idia diba. Karaharaga bouti dekenai idia guia bona Makedonia dekenai idia lao.

8, 9. Paulo ena laolao amo dahaka ita dibaia?

⁸ Unai sivarai amo dahaka ita dibaia? Paulo be Asia ia lao henia murinai, lauma helaga ese ena dala ia koua. Bona Paulo be Bitunia kahirakahira ia lao murinai, Iesu ese do ia siaia gabuna ia hadibaia. Unai dainai Troa dekenai ia lao. Unuseniai ia ginidae murinai, Iesu ese ia siaia Makedonia dekenai do ia lao. Hari inai negai danu Iesu be kongrigeisen ena kwarana bona ita ia hakaua noho. (Kol. 1:18) Hegeregere, reana oi be painia gaukara, o pablisa be momo lasi gabuna oi lao lalohadaina oi abia. To unai sibona be hegeregere lasi, namona be oi hekwarahi emu tahua gauna oi hagugurua totona. Unai murinai Iesu ese lauma helaga amo oi do ia durua. Unai be motuka bamona, bema ia heau noho, taria tauna ese motuka ia giroa diba laurina o idibana kahana ia lao totona. Unai hegeregerena, bema ita hekwarahi iseda hesiai gaukara ita habadaia totona, Iesu ese ita do ia durua.

⁹ Edena bamona, bema oi gaukara goada to anina namona ta ia vara lasi? Do oi laloa lauma helaga be oi ia hakaua lasi dainai emu hesiai gaukara oi rakatania,  a? Laloatao, Paulo be metau momo ia davaria, to ia gaukara goada ela bona kamonai taudia ia davaria. Unai hegeregerena, bema oi gaukara goada noho, hahenamo do oi abia.​—⁠1 Kor. 16:9.

HANAIHANAI IDIA GURIGURI

10. Dahaka dainai hanaihanai ita guriguri be namo?

¹⁰ Aposetolo taudia amo ita dibaia gauna iharuana be ‘idia laloa maoromaoro bona idia guriguri noho.’ (1 Pet. 4:7) Oibe, ita gima noho totona namona be hanaihanai ita guriguri. Getesemane umana ai Iesu idia do dogoatao lasi neganai, ena aposetolo taudia toi ia hamaorodia: “Namona be umui gima noho bona umui guriguri noho.”​—⁠Mat. 26:41.

11, 12. Dahaka dainai Heroda ese Keristani taudia, Petero danu, ia dagedage henidia? Bona dahaka ia karaia?

¹¹ Getesemane umana ai Iesu ese unai hereva ia gwauraia neganai, Petero ia noho danu. Gabeai ia sibona ese ia hamomokania ma haida edia guriguri be mai ena siahu. (Kara 12:1-6 duahia.) Kara karoa 12 ena siri ginigunadia ese idia hahedinaraia, Heroda ia ura Iuda taudia ia hamoalea dainai, Keristani taudia ia dagedage henidia. Heroda ia diba Iamesi be aposetolo tauna ta, bona Iesu ena turana namona dainai, “tuari kaia amo ia alaia mase.” (Siri 2) Unai be hahetoho badana kongrigeisen taudia dekenai badina idia ese Iamesi idia lalokau henia bada!

¹² Heroda be dahaka ma ia karaia? Siri 3 ia gwau: “Ia itaia Iuda taudia ese unai kara idia moalelaia neganai, Petero danu ia dogoatao.” To guna hoa dalanai, aposetolo taudia haida be dibura ruma amo idia heau, bona Petero be idia danu. (Kara 5:17-20) Reana Heroda be unai ia diba dainai, ia ura Petero do idia gimaia namonamo. “Tuari taudia edia orea 4 ese edia nega ta ta ai ia idia gimaia. Unai orea ta ta lalonai tuari taudia 4 idia noho. Heroda ia ura Pasova aria murinai, Petero be taunimanima vairanai do ia mailaia.” (Siri 4) Mani oi laloa: Heroda ese Petero be seini amo ia guia bona gadi rua ese idia gimaia, gadi ibounai 16 be dina bona hanuaboi Petero idia naria, ia heau lasi totona! Hutuma hamoalea totona Heroda ia ura Pasova murinai Petero ia hamasea. Unai nega aukana ai, Keristani tadikaka be dahaka do idia karaia?

13, 14. (a) Petero be dibura ruma ai idia atoa neganai, Keristani tadikaka be dahaka idia karaia? (b) Edia kara amo dahaka ita dibaia?

¹³ Kongrigeisen taudia be idia diba vadaeni dahaka do idia karaia. Siri 5 ia gwau: “Petero be dibura ruma lalonai ia do noho, to kongrigeisen taudia be ia dainai Dirava idia guriguri henia noho, mai goada ida.” Oibe, idia be mai edia kudouna ibounai ida Petero totona idia guriguri. Ena be Iamesi ia mase to edia abidadama ia goada, bona idia diba Dirava ese edia guriguri do ia kamonai. Badina Iehova be abidadama taudia edia guriguri ia laloa bada. Bona bema eda guriguri be Dirava ena ura hegeregerena, do ia kamonai.​—⁠Heb. 13:18, 19; Iam. 5:16.

¹⁴ Unai Keristani tadikaka edia kara amo dahaka ita dibaia? Ita gima noho totona, namona be sibona totona ita guriguri lasi, to eda tadikaka taihu totona ita guriguri danu. (Efe. 6:18) Hekwakwanai idia davaria tadikaka taihu haida oi diba, a? Haida be dagedage, tano mareremarere o dika ma haida idia davaria, eiava gavamani ese edia haroro gaukara ia koua. Idia totona ita guriguri be gau badana. Reana oi diba taudia haida be ruma bese ena hekwakwanai idia davaria, idia lalomanoka, o idia gorere.  Iehova, ‘guriguri ia kamonai’ Diravana oi guriguri henia neganai, ta ta edia ladana oi gwauraia diba.​—⁠Sal. 65:2.

15, 16. (a) Edena dala ai Iehova ena aneru ese Petero be dibura ruma amo ia ruhaia? (Henunai laulau itaia.) (b) Dahaka dainai Petero ena sivarai ese ita ia hagoadaia?

¹⁵ Petero dekenai dahaka ia vara? Hanuaboi ginigabena ai Petero be dibura ruma ai ia mahuta noho lalonai, hoa gauna ta ia vara. (Kara 12:7-11 duahia.) Mani oi laloa: Petero ia noho dibura rumana lalonai diari ta ia hedinarai. Ena be gadi rua ese Petero idia gimaia, to Petero badinai ia gini aneru idia itaia lasi. Aneru ese Petero ia hanogaia bona seini be ena imana amo idia moru! Aneru ese dibura ruma amo Petero ia hakaua bona murimuri ai idia gini gadi edia vairanai idia raka-lasi. Bena auri geiti badana be sibona ia kehoa, bona aneru bona Petero idia raka-lasi. Unai murinai, aneru ese Petero ia rakatania. Oibe, aneru ese Petero ia ruhaia!

¹⁶ Iehova be mai ena siahu ena hesiai taudia ia hamauria totona, bona unai ita laloa dobu neganai, iseda abidadama ia hagoadaia, ani? Momokani, hari, ita gwau lasi Iehova be hoa dalanai ita do ia hamauria. To, ita diba momokani Iehova be mai ena siahu ena taunimanima ia durua totona. (2 Siv. 16:9) Iena lauma helaga amo ita ia hagoadaia hekwakwanai idauidau ita haheaukalaia totona. (2 Kor. 4:7; 2 Pet. 2:9) Bona kahirakahira Iehova ese Iesu dekenai siahu do ia henia taunimanima milioni momo be mase ena dibura ruma amo ia ruhadia totona. (Ioa. 5:28, 29) Dirava ena gwauhamata abidadama henia karana ese ita ia hagoadaia diba ita davaria hekwakwanai ita haheaukalaia totona.

HEKWAKWANAI BE MOMO, TO IDIA HARORO

17. Dahaka dainai Paulo be haheitalai namona?

¹⁷ Aposetolo taudia amo ita dibaia gauna ihatoina be inai: Ena be hekwakwanai momo idia davaria, to idia haroro. Ita gima noho totona, mai ura bada ida haroro gaukara ita karaia be mai anina bada. Aposetolo Paulo be haheitalai namona. Ia be mai ura bada ida ia haroro, gabu momo dekenai ia lao bona kongrigeisen momo ia haginia. Ena be hekwakwanai momo ia davaria, to ia haroro goadagoada.​—⁠2 Kor. 11:23-29.

18. Paulo be Roma ai ia noho neganai, edena dala ai ia haroro?

¹⁸ Kara karoa 28 ai Paulo ena sivarai ginigabena mani ita laloa. Paulo be Roma dekenai idia abia lao, pavapava Nero vairanai ia gini totona. Ena be ruma ta dekenai idia koua, bona reana gadi ta dekenai ia idia seinia, to unai ese Paulo ena haroro dalana ia koua lasi! Ia be dala idauidau  ai ma haida ia haroro henidia. (Kara 28:17, 23, 24 duahia.) Paulo be Roma ai ia ginidae, bona dina toi murinai, “Iuda taudia edia dagi bada taudia ia boiridia” ia haroro henidia totona. Bena Iuda taudia ese dina ma ta idia abia hidi Paulo idia itaia totona. Siri 23 ia gwau: “Idia momo be iena ruma dekenai idia mai. Daba amo ela bona hanuaboi ai, idia dekenai gau ibounai ia herevalaia namonamo, oibe, ia ese Dirava ena Basileia ia gwauraia guguru. Bona lalona veria dalanai, Mose ena taravatu bona Peroveta Taudia edia toretore amo, Iesu ia herevalaia.”

19, 20. (a) Dahaka dainai momo idia ura Paulo ena hereva idia kamonai? (b) Ena be haida ese sivarai namona idia dadaraia, Paulo be dahaka ia karaia?

¹⁹ Dahaka dainai momo idia ura Paulo ena hereva idia kamonai? Siri 23 ese badina foa ia hahedinaraia. (1) Dirava ena Basileia bona Iesu Keriso ena sivarai ia harorolaia. (2) “Lalona veria dalanai” ena kamonai taudia ia haroro henidia. (3) Toretore Helagadia ia gaukaralaia. (4) Taunimanima ia laloa bada dainai, ia be “daba amo ela bona hanuaboi” ia haroro. Oibe, ena be Paulo be lalona veria dalanai ia haroro, to ibounai ese sivarai namona idia abia dae lasi. Siri 24 ia gwau: “Haida ese Paulo ia herevalaia gaudia idia abidadama henia, to ma haida ese idia abidadama henia lasi.” Unai dainai idia hepapahuahu, bona momo be unai gabu idia rakatania.

²⁰ Taunimanima momo be sivarai namona idia abia dae lasi dainai, Paulo ia lalomanoka, a? Lasi! Kara 28:30, 31 ia gwau: “Lagani rua lalonai Paulo be ia rentaia rumana ai ia noho, bona ia dekenai idia mai taudia ibounai be mai moale ida ia abia dae, idia dekenai Dirava ena Basileia ia herevalaia, bona mai gari lasi ida Lohiabada Iesu Keriso ena sivarai be idia dekenai ia hadibaia, bona gau ta ese ia koua lasi.” Kara bukana ena siri dokonai idia noho herevadia ese ita ibounai ia hagoadaia.

21. Herevana Paulo be dibura tauna, to dahaka ia karaia, bona ena kara amo dahaka ita dibaia?

²¹ Paulo ena sivarai amo dahaka ita dibaia? Paulo be dibura tauna dainai, ruma-ta-ruma-ta ai ia haroro diba lasi. To ia lalomanoka lasi, badina idia vadivadi taudia ibounai ia haroro henidia. Unai hegeregerena, hari ena be Dirava ena hesiai taudia momo be edia abidadama dainai dibura ruma ai idia koudia, to idia moale bona idia haroro noho. Iseda tadikaka taihu haida be idia buruka o gorere dainai, edia ruma o hospital dekenai idia noho. To, edia goada hegeregerena ai doketa, nesi, vadivadi taudia, bona ma haida idia haroro henidia. Edia ura badana be Dirava ena Basileia do idia harorolaia. Bona edia haheitalai namona ita laloa bada!

22. (a) Edena buka ese ita do ia durua Kara bukana ita diba namonamo totona? (Ataiai maua itaia.) (b) Tanobada dikana ena dokona oi naria noho lalonai, emu lalona oi hadaia dahaka oi karaia totona?

²² Kara bukana ese ia herevalaia aposetolo taudia bona Keristani taudia ginigunadia edia sivarai amo gima noho karana ita dibaia. Tanobada dikana ena dokona ita naria noho lalonai, namona be Keristani ginigunadia bamona ita haroro goadagoada. Oibe, Dirava ena Basileia harorolaia gaukarana be hahenamo badana!​—⁠Kara 28:23.

[Study Questions]

[Box on page 13]

“KARA BUKANA ENA NAMO LAU DIBAIA”

Loaloa naria tauna ta ese“Bearing Thorough Witness” About God’s Kingdom bukana be inai bamona ia herevalaia: “Ena be Kara bukana be nega momo lau duahia vadaeni, to ena hereva namodia lau lalopararalaia lasi. To, inai buka matamatana lau duahia neganai, Kara bukana ena namo lau dibaia.”

[Picture on page 12]

Aneru ese auri geiti badana amo Petero ia hakaua raka-lasi