HARI inai negai taunimanima momo be idia moale lasi, unai dainai hanamoa herevadia idia gwauraia diba lasi. Siti badadia idia noho taudia be idia bisi bada bona idia be nega lasi ma haida idia bamoa o laloa bada totona. Nega momo idia be sibodia idia noho.

Unai dainai, profesa Alberto Oliverio ia gwau: “Hari inai negai, taunimanima momo be sibodia idia noho bona turadia lasi dainai idia lalohisihisi. Unai dainai, edia gaukara hebou taudia, dekena taudia, o sitoa dekenai idia gaukara taudia ida idia herevahereva lasi.” Unai ese momo ia hagorerea bona idia lalometau.

To, iseda Keristani tadikaka taihu be unai bamona lasi. Aposetolo Paulo, ia gwau: “Nega ibounai do umui moale.” (1 Tes. 5:16) Tadikaka ida ita moale hebou ena badina haida be inai: Ita be Atai Momokani Diravana Iehova ita diba, Baibel ena hereva momokani ita diba, iseda helaro be mauri hanaihanai do  ita abia. Bona ita ese ma haida ita durua ita abia hahenamo idia abia totona.​—⁠Sal. 106:​4, 5; Ier. 15:16; Roma 12:⁠12.

Keristani momokani taudia be moale taudia bona ma haida ida idia moale hebou. Unai dainai Paulo be Filipi tadikaka dekenai ia gwau: “Egu lalona ia namo bona umui ibounai ida lau moale hebou. Unai hegeregerena, umui danu emui lalona do idia namo bona lau ida umui moale hebou be namo.” (Fili. 2:​17, 18) Unai siri lalonai, Paulo be inai hereva “lalona ia namo” bona “moale hebou” be nega rua ia herevalaia.

Namo lasi Keristani taudia be tadikaka edia hebamo karana idia dadaraia. Unai bamona ia karaia tauna be kongrigeisen lalonai ena tadikaka edia hebamo namona ia reaia diba. Paulo ese ita ia hagoadaia iseda tadikaka ida “Lohiabada ena gaukara lalonai do [ita] moale noho.” Edena dala ai unai ita karaia diba?​—⁠Fili. 3:⁠1.

Tadikaka ida Ita Moale Hebou

Paulo be Filipi taudia ia tore henia neganai, ena haroro gaukara dainai ia be reana Roma ena dibura ruma ai ia noho. (Fili. 1:7; 4:22) Ena be dibura ruma ai ia noho, to ia haroro goadagoada. Oibe, ia moale badina mai ena goada ibounai ida Iehova ia hesiai henia. Momokani, ia ese ena mauri ia “bubua wain boubouna” bamona. (Fili. 2:17) Paulo ena kara ese ita ia hadibaia, herevana eda mauri lalonai dahaka hekwakwanai ita davaria, to ita moale diba. Ena be Paulo be dibura ruma ai ia noho, to ia gwau: “Do lau moale noho.”​—⁠Fili. 1:⁠18.

Paulo ese Filipi dekenai kongrigeisen ginigunana ia haginia dainai, unuseniai idia noho tadikaka ia lalodia bada. Idia ia hamaoroa ia be Iehova hesiai henia gaukarana ia moalelaia bada, bona ia diba unai ese idia ia hagoadaia. Ia gwau: “Tadikaka e, lau ura umui diba, lau dekenai idia vara gaudia ese sivarai namona harorolaia gaukarana idia koua lasi, to idia durua. Unai amo taunimanima ibounai bona King ena gadi taudia idia diba, lau be Keriso lau hesiai henia dainai lau idia guia.” (Fili. 1:​12, 13) Paulo ese unai ia gwauraia neganai, iena tadikaka ia hagoadaia bona idia ida ia moale hebou. Namona be Filipi tadikaka idia laloatao idia moale ena badina badana be idia be Iehova ena hesiai gaukara idia karaia. Bona Paulo dainai do idia lalomanoka lasi, to iena kara idia tohotohoa  be namo. (Fili. 1:14; 3:17) Filipi tadikaka be Paulo totona idia guriguri bona ena dabu gaudia idia siaia.​—⁠Fili. 1:19; 4:​14-16.

Ita be Paulo bamona ita moale, a? Iseda mauri bona haroro gaukara ai ekspiriens namodia ita davaria, a? Iseda tadikaka ida inai gaudia ita kikilaia diba: Hamatamaia hereva namona ta o iseda haroro dalana namona dainai, ruma tauna be Basileia ena sivarai ia kamonai. Eiava ruma tauna ida Baibel ena siri ta ita herevalaia. Eiava ena be taunimanima ita haroro henidia lasi, to eda toana amo idia diba ita be Iehova ena Witnes taudia bona iseda gaukara idia hanamoa. Iseda tadikaka ida ita moale hebou negadiai, unai ekspiriens ita herevalaia diba.

Idaunega amo ema bona hari, Iehova ena taunimanima momo be sibodia edia ura idia dadaraia, sivarai namona idia harorolaia totona. Painia taudia, loaloa naria taudia, Betele taudia, misinari taudia, bona intanesinol konstraksen taudia be ful-taim hesiai gaukara idia moalelaia. Edia gaukara namona ita moalelaia, a? Namona be ita hamaorodia ita be edia gaukara ita laloa bada, bona ita ibounai be “Dirava ena Basileia totona [ita] gaukara hebou” dainai ita moale. (Kol. 4:11) Kongrigeisen heboudia o hebouhebou badadia ai idia ita hagoadaia, bona edia haheitalai namodia ita tohotohoa. Danu, ita boiridia ita aniani hebou totona, unai amo edia ekspiriens bona hagoadaia herevadia do ita kamonai.​—⁠Fili. 4:⁠10.

Haheauka Taudia ida Ita Moale Hebou

Paulo be dagedage bona nega aukadia ia haheaukalaia dainai, mai lalogoada ida Iehova ia badinaia noho diba. (Kol. 1:24; Iam. 1:​2, 3) Ia diba Filipi tadikaka danu be unai bamona hahetoho do idia davaria. Paulo be hekwakwanai ia haheaukalaia neganai, ena haheitalai ese ena tadikaka ia hagoadadia, bona unai dainai ia moale. Ia gwau: “Keriso dainai umui ese unai hahenamo umui abia, ia umui abidadama henia sibona lasi, to danu ia dainai hisihisi umui abia. Lau dekenai umui itaia hegeregerena, umui danu be unai bamona hekwarahi umui abia, bona hari umui kamonai bamona lau be lau do hekwarahi noho.”​—⁠Fili. 1:​29, 30.

Hari inai negai danu, iseda haroro gaukara dainai taunimanima be ita idia ura henia lasi. Nega haida idia dagedage, bona dala idauidau ai ita idia hahisia. Hegeregere, aposteit taudia ese koikoi herevadia idia gwauraia, eiava eda ruma bese taudia idia badu, eiava gaukara o sikuli gabunai ita idia kirikirilaia. Unai bamona hahetoho dainai, Iesu ia gwau namo lasi ita hoa eiava ita lalomanoka, to ita moale be namo. Ia gwau: “Lau dainai taunimanima ese umui idia gwauraia dika, idia dagedage henia bona mai koikoi ida hereva dikadia idauidau idia gwauraia neganai, do umui moale. Do umui moale bada badina emui davana guba dekenai be bada.”​—⁠Mat. 5:​11, 12.

Bema ita kamonai tano haida dekenai eda tadikaka be dagedage bada idia davaria do ita gari lasi, to idia haheauka dainai, ita moale be namo. Idia totona ita guriguri bona Iehova ita noia edia abidadama do ia hagoadaia bona idia haheauka noho. (Fili. 1:​3, 4) Reana idia ita durua dalana tamona be guriguri karana amo. To, iseda kongrigeisen lalonai, hekwakwanai idia davaria tadikaka ita durudia diba. Hegeregere, nega haida ita boiridia iseda Ruma Bese Ena Tomadiho lalonai idia helai totona, o haroro gaukara ai ita bamodia o moale karana ta ita karaia hebou. Unai nega idauidau ai iseda tadikaka ida ita moale hebou diba.

Namo lasi ita be tanobada taudia bamona ma haida edia hebamo karana ita dadaraia. To, namona be iseda tadikaka ita bamoa bona ita moale hebou! Unai bamona ita karaia neganai, kongrigeisen lalonai lalokau bona lalotamona do ia noho. (Fili. 2:​1, 2) Paulo be ita ia hagoadaia, ia gwau: “Nega ibounai Lohiabada dainai do umui moale. Ma lau gwau lou, umui moale!”​—⁠Fili. 4:⁠4.

[Picture Credit Line on page 6]

Globe: Courtesy of Replogle Globes