Taia Kudima Tadikaka Taihu Lalodia Bada!

HARI, Dirava ena ruma bese lalonai be tadikaka bona taihu momo herea idia noho. Idaunegai, unai ruma bese lalonai idia noho taudia haida be Samuela, Davida, Samson, Rahaba, Mose, Aberahamo, Sara, Noa, bona Abela. Iehova ena hesiai taudia huanai be taia kudima taudia momo idia noho danu. Hegeregere, Mongolia ai, Iehova ena Witnes taudia ai idia lao taudia ginigunadia be, taia kudima tauna bona ena hahine. Danu, Russia ai, taia kudima tadikaka taihu edia Dirava badinaia karana dainai, ita be European Court of Human Rights dekenai ita kwalimu.

Hari, “hesiai tauna mai ena kamonai, bona mai ena kara maoromaoro” be taia kudima taudia totona saini gado ai buka idauidau idia halasia, bona hebou badadia bona maragidia idia hegaegaelaia. (Mat. 24:45) Unai ese taia kudima taudia idia durua bada. * To gunaguna unai gaudia idia noho lasi neganai, oi laloa taia kudima taudia be edena dala ai Dirava momokanina idia dibaia, bona hereva momokani lalonai idia goada idia lao? Oi laloa edena dala ai emu teritori ai idia noho taia kudima taudia do oi durua?

Durua Gaudia be Do Lasi Neganai

Bema taia kudima buruka taudia haida oi nanadaia Dirava idia diba dalana idia gwauraia totona, dahaka idia gwau? Reana nega ginigunana Dirava ena ladana idia dibaia neganai, edia hemami be edena bamona be oi dekenai do idia herevalaia​​—⁠reana oi idia hamaoroa edena dala ai unai hereva momokani tamona ese edia mauri ia haidaua bona lagani momo lalonai idia ia durua, to hari idia be orea ese idia halasia saini gado vidio program o DVD amo hereva momokani ena dobu gaudia momo idia dibaia. Reana oi idia hamaoroa gunaguna idia hekwarahi bada, badina kongrigeisen heboudia ai tok be ta ese saini gado ai ia hahanaia lasi. To, ta be taia kudima taudia badinai ia helai bona tok ena hereva be pepa ta dekenai ia torea, unai amo idia ia durua tok idia lalopararalaia totona. Taia kudima tadikaka ta be lagani seven lalonai unai bamona dala amo hereva momokani ia dibaia, gabeai saini gado ia diba tauna ta be unuseniai ia ginidae.

Taia kudima tadikaka taihu burukadia be haroro dekenai taia kudima lasi taudia idia haroro henia negana idia laloatao. Unai negadiai, edia imana ta dekenai pepa aukana ta idia dogoatao, bona unai pepa dekenai ruma tauna ese ia duahia diba hamatamaia hereva kwadogina ta ia noho. Ma edia imana ta dekenai be Gima Kohorona bona Awake! idia dogoatao. Nega momo taia kudima tauna ta ese taia kudima tauna ma ta ia stadi henia be ia auka, badina unai stadi bukadia be saini gado gaudia lasi. Taia kudima pablisa burukadia haida idia gwau, nega haida idia lalohisihisi badina ruma taudia ese edia hereva idia lalopararalaia namonamo lasi neganai, hereva momokani idia herevalaia noho be auka. Danu, taia kudima taudia be Iehova lalokau henia karana ena mamina idia abia, to idia gari idia dibaia herevadia badinaia totona. Dahaka dainai? Badina idia daradara gauna be, idia dibaia gauna ena anina idia lalopararalaia dalana be maoro eiava lasi.

Herevana taia kudima tadikaka taihu be unai bamona hekwakwanai idia davaria, to Dirava idia badinaia noho. (Iobu 2:⁠3) Idia be Iehova idia naria noho. (Sal. 37:⁠7) Hari, Iehova be idia ia hanamoa noho.

Taia kudima tadikaka ta be mai ena adavana bona natudia, to ena gaukara badana mani oi laloa. Orea ese saini gado vidio ia do karaia lasi negadiai, unai tadikaka be ruma bese stadi ia karaia. Ena natuna merona ia gwau: “Nega ibounai  egu tamana ia hekwarahi bada ruma bese stadi ia hakaua totona, badina ai ia hadibaia bukadia be saini gado gaudia lasi. Nega momo, buka dekenai idia torea herevadia ia lalopararalaia namonamo lasi. Danu, aiemai kara dainai, emai tamana ia hekwarahi stadi ia hakaua totona. Ia ese gau ta ia herevalaia namonamo lasi neganai, ai be karaharaga ia ai hamaoromaoroa. To herevana dahaka ia vara, emai tamana be hanaihanai ruma bese ena stadi ia hakaua. Ena be nega haida ia hemarai badina English gado ia diba namonamo lasi, to ia laloa ai ese Iehova ai dibaia be mai anina bada.”

Brooklyn, New York, U.S.A. ai, mauri lagani 70 tadikaka ta ladana, Richard ena haheitalai ita laloa danu; ia be taia kudima bona matakepulu tauna. Momo idia diba, ia be hanaihanai Keristani heboudia dekenai ia lao. Hebou lao henia totona, ia be trein ai ia guia, bona trein ia stopu gabudia ta ta ia duahia, unai amo ia diba edena gabu ai do ia diho. Keru negana ta ai, sinou ia diho dainai hebou negana idia senisia. Elda taudia be kongrigeisen tadikaka taihu ibounai idia hadibaia, to Richard idia hadibaia lasi. Gabeai, tadikaka idia laloparara Richard idia hadibaia lasi neganai, ia idia tahua bona Kingdom Hall ena murimuri kahana ai ia gini noho lalonai idia davaria​—⁠ia be ia naria noho Kingdom Hall ena iduara idia kehoa totona. Tadikaka ese idia nanadaia, ‘Dahaka dainai sinou lalonai oi lao Kingdom Hall dekenai.’ Richard ia haere, “Badina Iehova lau lalokau henia.”

Dahaka Oi Karaia Diba?

Emu teritori ai taia kudima taudia haida idia noho, a? Ia namo saini gado oi dibaia, unai amo idia oi haroro henia diba, a? Nega momo taia kudima taudia be edia gado ai ma haida idia hadibaia neganai, idia manau bona haheauka. Reana taia kudima tauna ta be haroro gaukara lalonai o gabu ma ta ai do oi davaria. Dahaka oi karaia diba? Ia oi haroro henia toho. Emu imana oi gaukaralaia, o emu hereva be pepa ta dekenai oi torea, o laulau ta oi hahedinaraia o unai bamona dala ta oi gaukaralaia. Bema ia hahedinaraia hereva momokani ia ura lasi kamonai, vadaeni taia kudima o saini gado ia diba Witnes tauna ta oi hadibaia. Reana taia kudima tauna ia ura saini gado ai sivarai namona ia kamonai.

Reana oi be taia kudima taudia edia saini gado oi dibaia noho bona edia kongrigeisen ta dekenai oi lao. Edena dala ai unai gado oi dibaia o lalopararalaia namonamo? Ena be emu kongrigeisen ai pablisa haida be hereva idia kamonai diba, to saini gado oi gaukaralaia be namo. Unai ese oi do ia durua saini gado gaukaralaia dalana oi laloa totona. Nega haida ai, reana oi ura dikadika uduna dekenai hereva ta oi gwauraia, to imana amo saini oi karaia be namo. Gado ma ta oi dibaia totona oi haheauka hegeregerena, oi haheauka ela bona saini gado gaukaralaia dalana oi dibaia namonamo.

Bema ita hekwarahi saini gado ita gaukaralaia totona, anina be ita hahedinaraia taia kudima tadikaka taihu ita lalokau henidia bona matauraia. Mani ita laloa: Taia kudima taudia be dina ta ta ai moni gaukara gabunai o sikuli gabunai, taunimanima edia herevahereva karana idia lalopararalaia lasi neganai, idia lalohisihisi. Taia kudima tadikaka ta ia gwau: “Dina ta ta ai, lau kahirakahira idia noho taudia ibounai idia  herevahereva. Nega haida lau mamia lau sibona lau noho bamona o ta be lau ia bamoa lasi, unai dainai lau lalohisihisi bona nega haida lau badu. Unai bamona hemami be hereva amo lau gwauraia hedinarai diba lasi.” Iseda hebou be gabu namona taia kudima tadikaka taihu ese lauma aniani idia abia, idia herevahereva bona hebamo namona idia davaria.​​—⁠Ioa. 13:​34, 35.

Kongrigeisen ai idia hebou taia kudima taudia ita laloa bada be namo. Hebou ai saini gado idia diba taudia idia noho, tok idia hahanaia totona. Taia kudima taudia be hereva henia tauna ena tok idia lalopararalaia totona, Kingdom Hall ena vairana kahanai idia helai. Unai amo idia be saini gado ia hahanaia tauna bona tok henia tauna idia itaia namonamo diba. Kongrigeisen taudia be unai kara idia manadalaia neganai, gabeai unai ese edia kamonai karana ia hadikaia lasi. Danu, hebouhebou badadia ai saini gado hahanaia taudia be unai dala idia badinaia. Unai gaukara idia goadalaia tadikaka taihu ita tanikiu henidia, saini gado ai tok idia hahanaia namonamo dainai, taia kudima taudia be hereva ibounai idia lalopararalaia namonamo.

Reana emu kongrigeisen ai taia kudima taudia haida idia noho, o emu kongrigeisen ese taia kudima taudia edia grup maragina ta ia naria bona hebou ena tok be saini gado ai idia hahanaia danu. Dahaka oi karaia diba, unai amo oi hahedinaraia oi be taia kudima tadikaka taihu oi lalodia bada? Idia oi boiria diba emu ruma dekenai idia mai totona. Saini gado oi dibaia be namo. Unai gado amo taia kudima taudia oi hereva henia, oi gari lasi. Dala ia noho idia ida oi herevahereva totona, bona unai bamona lalokau oi hahedinaraia neganai, anina namona do ia vara bona mai moale ida unai do oi laloa loulou. (1 Ioa. 4:⁠8) Taia kudima tadikaka taihu edia kara namodia ese ita idia hagoadaia bada. Idia be gau namodia idia herevalaia, mai edia lalohadai namodia, idia kiri bona idia moale. Tadikaka ta, ena tama sina be taia kudima taudia, ia gwau: “Egu mauri ibounai lalonai lau be taia kudima taudia ida lau noho, bona idia ese lau dekenai gau momo idia hadibaia, unai gaudia edia davana ibounai lau henia diba lasi. Iseda taia kudima tadikaka taihu amo gau momo ita dibaia diba.”

Iehova be ia idia tomadiho henia taudia​—⁠taia kudima taudia danu​—⁠ia lalokau henia. Edia abidadama bona hahetoho negadiai idia haheauka karana dainai, Iehova ena orea be namo bada ia davaria. Unai dainai, taia kudima tadikaka taihu ita lalodia bada!

[Footnote]

[Picture on page 31]

Reana taia kudima tauna ia ura saini gado ai sivarai namona ia kamonai

[Pictures on page 32]

Iseda hebou be gabu namona taia kudima tadikaka taihu ese lauma aniani idia abia, idia herevahereva bona hebamo namona idia davaria