Iehova ese Ia Ura Henia Hesiai Tauna

“Lauegu Hesiai Tauna, . . . ia dekenai lau ura henia bada.”​​—⁠ISA. 42:⁠1.

1. Memorial negana ia kahirakahira dainai, Iehova ena taunimanima ese dahaka idia karaia be namo, bona dahaka dainai?

IESU ena mase laloatao negana ia kahirakahira dainai, Dirava ena taunimanima be Paulo ena sisiba idia badinaia be namo, ia gwau: “Iseda matana be Iesu dekenai do ita negea lao. Ia ese iseda abidadama ia havaraia, bona ia ese iseda abidadama do ia durua, ela bona dokona.” Paulo ma ia gwau: “Iesu ena hisihisi do umui laloa namonamo: Kara dika taudia ese mai badu danu ia idia dagedage henia. To ia goada noho. Unai dainai do umui hesiku lasi, bona do umui manoka lasi.” (Heb. 12:​2, 3) Matamana amo, Keriso be mai abidadama ida ena gaukara ia karaia ela bona ia mase. Unai sivarai stadilaia namonamo karana ese horoa Keristani taudia bona mamoe idaudia do ia durua, mai abidadama ida Iehova do idia hesiai henia noho bona do idia ‘hesiku lasi.’​​—⁠Galatia 6:⁠9 hahegeregerea.

2. Isaia ese Dirava ena Natuna ia perovetalaia herevadia amo dahaka do ita dibaia?

² Iehova be Isaia amo Iena Natuna ia perovetalaia. Unai peroveta herevadia ese ita do idia durua, ‘iseda matana be Iesu Keriso dekenai do ita negea lao, badina ia ese iseda abidadama ia havaraia, bona iseda abidadama do ia hagoadaia.’ * Unai peroveta herevadia ese Iesu ena kara, hisihisi bona Dirava ese King bona Mauri Hoia Lou Tauna ai ia halaoa karana idia hahedinaraia. Unai ese ita do idia durua Memorial ariana ita lalopararalaia totona. Inai lagani ai, Memorial be Thursday, April 9, dina ia diho murinai do ita karaia.

Hesiai Tauna be Daika?

3, 4. (a) Isaia bukana lalonai inai hereva “hesiai tauna” be daidia ia herevalaia? (b) Baibel ia gwau Isaia karoa 42, 49, 50, 52, bona 53 ese idia herevalaia Hesiai Tauna be daika?

³ Inai hereva “hesiai tauna” be Isaia bukana lalonai nega momo ia hedinarai. Nega haida unai hereva be peroveta tauna Isaia ia herevalaia. (Isa. 20:3; 44:26) Nega haida unai hereva be Israela besena eiava Iakobo ia gwauraia. (Isa. 41:​8, 9; 44:​1, 2, 21) To, Isaia karoa 42, 49, 50, 52, bona 53 dekenai idia noho peroveta herevadia ese idia herevalaia Hesiai Tauna be daika? Unai karoa lalonai idia perovetalaia Hesiai Tauna be Keristani Greek Revarevadia ese idia gwauraia hedinarai. Kara bukana ese ia sivarailaia Etiopia tauna be unai Isaia ena peroveta herevana ta, Isaia 53:​7, 8 ia duahia noho lalonai, lauma helaga ese haroro tauna Filipo be ia dekenai ia siaia lao. Bena Etiopia tauna be Filipo ia nanadaia: “Mani lau oi hamaoroa, edena tauna be peroveta tauna ese ia herevalaia inai bamona? Ia sibona o idau tauna ta ia herevalaia?” Maoromaoro Filipo ia hahedinaraia, Isaia be Mesia Tauna Iesu ia herevalaia.​​—⁠Kara 8:​26-​35.

⁴ Iesu ia do beibi neganai, kara maoromaoro tauna Simeona be lauma helaga ese ia hasiahua bona ia gwau inai “mero maragi  Iesu” be “bese idauidau dekenai diari do ia henia,” Isaia 42:6 bona 49:​6 ena peroveta herevadia hegeregerena. (Luka 2:​25-​32) Danu, Iesu idia hahemaoro henia hanuaboina ai idia karaia karadia be Isaia 50:​6-9 ese ia perovetalaia. (Mat. 26:67; Luka 22:63) Pentekoste 33 C.E. ai, aposetolo Petero ia hahedinaraia Iehova ena “Hesiai Tauna” be Iesu. (Isa. 52:13; 53:11; Kara 3:​13, 26 duahia.) Mesia idia perovetalaia herevadia amo dahaka do ita dibaia?

Iehova ese Ena Hesiai Tauna Ia Hadibaia

5. Daika ese Hesiai Tauna ia hadibaia?

⁵ Iesu be tanobada ai ia do mai lasi neganai, ia bona ena Tamana Iehova edia hetura karana namona be Isaia ena peroveta herevana ta ese ia gwauraia. (Isaia 50:​4-9 duahia.) Hesiai Tauna sibona ese ia hahedinaraia Iehova be hanaihanai ia ia hadibaia, ia gwau: “Daba ibounai ia ese laloa goada lau dekenai ia henia noho, vadaeni iena hadibaia hereva lau kamonaia namonamo.” (Isa. 50:⁠4) Unai nega ibounai lalonai Hesiai Tauna be mai ena manau ida iena Tamana ia kamonai henia bona gau momo ia dibaia. Unai be hahenamo badana, badina guba bona tanobada ia Havaraia Tauna ese ia hadibaia!

6. Hesiai Tauna ese edena dala ai ia hahedinaraia ia be ena Tamana ia kamonai henia?

⁶ Isaia 50:4 lalonai, Hesiai Tauna ese ena Tamana ia gwauraia “Lohiabada Dirava.” Unai ese ia hahedinaraia, unai Hesiai Tauna ia laloparara Iehova Dirava be guba bona tanobada edia Lohia Badana. Iesu ese ia hahedinaraia ia be ena Tamana ia kamonai henia badina ia gwau: “Lohiabada ese diba bona aonega lau dekenai ia henia, bona lau ese iena hereva lau negea lasi. Lohiabada dekena amo lau raka siri lasi.” (Isa. 50:⁠5) Dirava be guba, tanobada bona taunimanima ia karaia neganai, Iesu be “[Iehova] ena badibadinai ia noho, gaukara karaia tauna bamona.” “Dina ibounai [Iehova] be lau [gaukara karaia tauna] dekenai ia moale, bona lau be iena vairana dekenai, lau moale noho nega ibounai. Dirava ena tanobada, mai ena noho taudia ibounai dekenai lau moale noho.”​​—⁠Aon. 8:​22-​31.

7. Edena dala ai Hesiai Tauna ia diba hahetoho negadiai ena Tamana be ia do ia durua?

⁷ Hesiai Tauna be taunimanima ia lalokau henidia bona Tamana amo ia dibaia gaudia ese ia idia durua tanobada ai dagedage ia haheaukalaia totona. Ena be hisihisi bona dagedage bada ia davaria, to mai moale ida Tamana ena ura ia karaia. (Sal. 40:8; Mat. 26:42; Ioa. 6:​38) Iesu ia diba tanobada ai ia davaria hahetoho ibounai lalonai, iena Tamana ese do ia lalonamo henia bona durua. Isaia ena peroveta herevana hegeregerena, Iesu ia gwau: “Dirava be kahirakahira ia noho, bona ia ese lau ia gwauraia kerere lasi dainai, daika ese lau do ia samania? . . . Kamonai! Lohiabada Dirava ese lau ia durua noho.” (Isa. 50:​8, 9) Hesiai Tauna be tanobada ai ia gaukara neganai, Iehova ese ia durua. Isaia ena peroveta herevana ma ta ese unai ia hahedinaraia.

Hesiai Tauna Ena Haroro Gaukara

8. Dahaka ese ia hamomokania Iesu be Iehova ena “abia hidi” tauna, Isaia 42:⁠1 ena peroveta herevana hegeregerena?

⁸ Iesu be lagani 29 C.E. ai ia bapatiso neganai, Baibel be inai bamona ia gwau: “Lauma Helaga ia diho . . . Iesu ena kwarana dekenai ia kamokau. Bona gado ta guba dekena amo ia boiboi diho, ia gwau, ‘Oi be lauegu Natuna, lauegu lalokau, lau be lau moale oi dekenai.’ ” (Luka 3:​21, 22) Isaia ena peroveta herevana hegeregerena, unai nega ai Iehova ese ia “abia hidi” tauna ia gwauraia hedinarai. (Isaia 42:​1-7 duahia.) Tanobada ai ena haroro gaukara ia karaia lalonai, Iesu be unai peroveta herevana ia hagugurua. Mataio be ena Evanelia bukana ai Isaia 42:​1-4 ena hereva ia gwauraia lou, bona ia gwau Iesu dekenai unai peroveta herevana ia guguru.​​—⁠Mat. 12:​15-​21.

9, 10. (a) Iesu be tanobada ai ia haroro neganai, edena dala ai Isaia 42:3 ia hagugurua? (b) Edena dala ai Keriso be guna tanobada ai ia noho neganai “kota maoromaoro” ia mailaia, bona edena nega ai ‘tanobada dekenai kota maoromaoro do ia haginia’?

⁹ Iuda tomadiho gunalaia taudia be hanua taudia idia kara namo henidia lasi. (Ioa. 7:​47-​49) Ita gwau diba Iuda tomadiho gunalaia taudia dekenai hanua taudia be “siriho manokana” bamona eiava “lamepa ena diari ia maragi” ia lao bona kahirakahira do ia bodo gauna ta bamona. To, Iesu ese unai ogogami bona lalohisihisi taudia ia bogadiahisi. (Mat. 9:​35, 36) Mai hebogahisi ida unai taudia ia boiria, ia gwau: “Tauanina  manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai.” (Mat. 11:28) Ma danu, Iesu ese Iehova ena taravatu hegeregerena dahaka be maoro bona dahaka be kerere be taunimanima dekenai ia hadibaia, bona unai amo kota maoromaorona be taunimanima ibounai dekenai ia mailaia. (Isa. 42:⁠3) Ia hahedinaraia danu, Dirava ena taravatu be mai laloa maoromaoro bona hebogahisi ida do idia gaukaralaia. (Mat. 23:23) Iesu be kota maoromaoro ia karaia tauna, badina ia ese taga taudia bona ogogami taudia ia haroro henidia, ta ia dadaraia lasi.​​—⁠Mat. 11:5; Luka 18:​18-​23.

¹⁰ Isaia ena peroveta herevana ia hahedinaraia danu, Iehova ena “abia hidi” tauna ese “tanobada dekenai kota maoromaoro do ia haginia.” (Isa. 42:⁠4) Iesu be Mesia Basileiana ena King dainai, kahirakahira tanobada ena politikol gavamani iboudiai do ia kokia bona iena kara maoromaoro lohia dalana do ia haginia. Ia ese tanobada matamatana do ia mailaia, bona unuseniai “kara maoromaoro sibona do ia noho.”​​—⁠2 Pet. 3:⁠13; Dan. 2:​44.​

“Diari” Bona “Gwauhamata Taravatuna”

11. Edena dala ai aposetolo edia negai Iesu be ‘bese idauidau dekenai diari ia henia,’ bona edena dala ai hari danu ia be tanobada ena diari?

¹¹ Isaia 42:​6 ena peroveta herevana hegeregerena, Iesu be ‘bese idauidau dekenai diari ia henia.’ Iesu ia haroro neganai, ia be Iuda taudia dekenai diari ia henia guna. (Mat. 15:24; Kara 3:​26) To Iesu ia gwau: “Lau be tanobada ena diari.” (Ioa. 8:​12) Ia be Iuda taudia bona idau bese taudia dekenai Dirava tomadiho henia dalana ena diari ia mailaia, bona danu iena mauri goevadaena ia bouboulaia taunimanima ibounai edia mauri davalaia totona. (Mat. 20:28) Mase amo ia toreisi lou murinai, Iesu ese iena hahediba taudia ia oda henidia “tanobada ena kahana ibounai” dekenai iena sivarai do idia harorolaia totona. (Kara 1:⁠8) Paulo bona Banaba edia haroro gaukara lalonai, idia gwau Iesu be ‘bese idauidau dekenai diari do ia henia,’ bona idia hahedinaraia Iuda lasi taudia idia haroro henia karana ese unai peroveta herevana ia hagugurua. (Kara 13:​46-​48; Isaia 49:6 hahegeregerea.) Hari inai negai, tanobada ai Iesu ena horoa tadikaka bona hutuma bada taudia ese unai haroro gaukara idia karaia noho bona taunimanima idia durua Iesu, tanobada ena “diari” unai, idia abidadama henia totona.

12. Edena dala ai Iehova ese iena Hesiai Tauna dekenai bese ibounai totona “gwauhamata taravatuna” ta ia karaia?

¹² Unai peroveta herevana lalonai, Iehova be iena abia hidi Hesiai Tauna ia hamaoroa: “Oi dekena amo lau ese bese ibounai danu, gwauhamata taravatuna do lau karaia.” (Isa. 42:⁠6) Satani ia hekwarahi Iesu ia hamasea bona ena haroro gaukarana ia hadikaia totona, to Iehova ese Iesu ia gimaia ela bona nega korikorina ai ia mase. (Mat. 2:​13; Ioa. 7:​30) Bena Iehova ese Iesu ia hatorea isi lou bona tanobada besedia ibounai totona Iesu dekenai “gwauhamata taravatuna” ta ia karaia. Unai gwauhamata ese ia hamomokania Dirava ena Hesiai Tauna be ‘bese idauidau dekenai diari do ia henia’ bona tomadiho dalanai dibura dekenai idia noho taudia do ia ruhaia.​​—⁠Isaia 49:​8, 9 duahia. *

13. Iesu ia haroro neganai edena dala ai ‘dibura ruma ai idia noho taudia ia ruhaia,’ bona edena dala ai hari iseda negai unai ia do karaia noho?

 ¹³ Unai gwauhamata hegeregerena, Iehova ena abia hidi Hesiai Tauna ese ‘matakepulu taudia edia matana do ia kehoa,’ bona ‘dibura ruma ai idia noho taudia do ia ruhaia.’ (Isa. 42:⁠7) Iesu ia haroro neganai, tomadiho koikoi herevadia ia hahedinaraia bona Basileia ena sivarai namona ia harorolaia, unai amo unai peroveta herevana ia hagugurua. (Mat. 15:3; Luka 8:⁠1) Ia ese tomadiho koikoi dalanai dibura ai idia noho Iuda taudia ia ruhadia bona iena hahediba taudia ai idia lao. (Ioa. 8:​31, 32) Unai hegeregerena, Iesu ese Iuda lasi taudia milioni momo ia ruhadia danu. Iena hahediba taudia ia oda henidia, do ‘idia lao, bese ibounai be diba tahua taudia do idia halaoa,’ bona ia gwauhamata henidia ia be idia ida do ia noho “ela bona tanobada dokona.” (Mat. 28:​19, 20) Oibe, guba amo, Iesu Keriso be tanobada hegegemadai haroro gaukara ia hakaua noho.

Iehova ese “Hesiai Tauna” Ia Hanamoa

14, 15. Dahaka dainai bona edena dala ai Iehova ese ena Hesiai Tauna ena ladana ia abia isi?

¹⁴ Iehova be peroveta herevana ma ta amo iena Mesia Hesiai Tauna ia herevalaia neganai, ia gwau: “Lauegu Hesiai Tauna be, iena gaukara lalonai do ia kwalimu. Ia ese mataurai bona hanamoa do ia davaria.” (Isa. 52:13) Iesu be hahetoho badadia ia davaria neganai, Tamana ena lohia siahuna ia badinaia bona ia abidadama henia noho dainai, Iehova ese ena ladana ia abia isi.

¹⁵ Aposetolo Petero ese Iesu ia herevalaia, ia gwau: “Keriso ese guba dekenai ia vareai vadaeni, Dirava ena idiba kahanai ia helai noho. Aneru bona lohia bona siahu taudia ibounai be Keriso henunai idia noho.” (1 Pet. 3:​22) Aposetolo Paulo danu ia gwau: “Ia ese Dirava ia kamonai henia ela bona ia mase, oibe, satauro dekenai ia mase. Unai dainai Dirava ese Keriso ia abia isi, gabu bada herea momokani ia henia. Bona ladana ta ia henia, inai ladana ese ladana ibounai ia hereaia. Bona Iesu ena ladana hanamoa totona ibounai be dohore idia tui diho, guba taudia, tanobada taudia, bona tanobada henunai noho taudia danu. Bona taunimanima ibounai ese Iesu Keriso do idia gwauraia hedinarai ‘Lohiabada,’ badina be unai dekena amo Tamana Dirava ena ladana do idia abia isi momokani.”​​—⁠Fili. 2:​8-​11.

16. Edena dala ai lagani 1914 ai Iesu ena “ladana ese ladana ibounai ia hereaia,” bona unai nega amo ema bona hari Iesu be dahaka ia karaia noho?

¹⁶ Lagani 1914 ai, Iehova ese Iesu ena dagi ma haida ia henia. Iehova ese Iesu be Mesia ena Basileia ena King ai ia halaoa, unai amo ena “ladana  ese ladana ibounai ia hereaia.” (Sal. 2:⁠6; Dan. 7:​13, 14) Unai nega amo ema bona hari, Keriso be ‘ena inai taudia huanai do ia lohia.’ (Sal. 110:​2, BHğ ) Ia ese Satani bona ena demoni ia tuari henidia guna, bona tanobada dekenai ia negedia diho. (Apok. 12:​7-​12) Bena, Kurese Badana bamona, Keriso ese “Babulonia Badana” amo iena horoa tadikaka ia ruhadia. (Apok. 18:2; Isa. 44:28) Ia ese tanobada hegegemadai haroro gaukara ia gunalaia noho, unai dainai iena horoa tadikaka “oredia” ia gogoa bona edia turadia “mamoe idaudia” milioni momo danu ia haboudia noho.​​—⁠Apok. 12:17; Ioa. 10:16; Luka 12:⁠32.

17. “Hesiai Tauna” idia perovetalaia herevadia ita stadilaia karana amo dahaka ita dibaia?

¹⁷ Isaia ena peroveta herevadia ita stadilaia karana ese ita ia durua, iseda King bona Mauri Hoia Lou Tauna, Keriso Iesu ena gaukara ita lalopararalaia bona ita tanikiu henia totona. Iesu ia haroro neganai, ia ese Tamana ena ura ia badinaia, unai amo ia hahedinaraia ia be Tamana amo ia dibaia gaudia ia hadibaia. Iesu ese guna tanobada ai ia karaia haroro gaukarana bona hari guba amo ia gunalaia noho haroro gaukarana amo ia hamomokania, ia be ‘bese idauidau dekenai diari do ia henia’ tauna. Stadi gabena ai do ita itaia gauna ta be inai: Peroveta hereva ta ese ia hahedinaraia Mesia Hesiai Tauna be iseda namo dainai, hisihisi ia davaria bona iena mauri ia bouboulaia. Namona be unai gaudia do ita “laloa namonamo,” badina Iesu ena mase ena Memorial negana be ia kahirakahira noho.​​—⁠Heb. 12:​2, 3.

[Footnotes]

Riviu

• Isaia ese ia perovetalaia “hesiai tauna” be daika, bona edena bamona unai ita diba?

• Iehova ese Hesiai Tauna dekenai dahaka ia hadibaia?

• Edena dala ai Iesu be ‘bese idauidau dekenai diari do ia henia’ tauna?

• Edena dala ai Dirava ese ena Hesiai Tauna ena ladana ia abia isi?

[Study Questions]

[Picture on page 21]

Filipo ia gwau Isaia ese ia herevalaia “Hesiai Tauna” be Iesu, Mesia unai

[Picture on page 23]

Iehova ena Hesiai Tauna, Iesu, be ogogami bona lalohisihisi taudia ia bogadiahisi

[Picture on page 24]

Iesu be iena Tamana ese ena ladana ia abia isi bona Mesia Basileiana ena King ai ia halaoa