Hahediba Taudia Halaoa Gaukarana Moalelaia
Hahediba Taudia Halaoa Gaukarana Moalelaia
“Unai dainai do umui lao . . . diba tahua taudia do umui halaoa.”—MAT. 28:19.
1-3. (a) Pablisa momo ese Baibel stadi gaukarana be edena bamona idia laloa? (b) Edena henanadai do ita laloa?
UNITED STATES ai, Hindi gado grup ta ia bamoa taihu ta ia gwau: “Wiki 11 lalodiai, Pakistan ruma bese ta lau stadi henidia. Idia be egu tura namodia. Idia lau laloa bona egu matana ranu ia diho, badina kahirakahira idia be Pakistan dekenai do idia giroa lou. Lau tai badina edia hebamo karana do lau reaia, bona lau moale badina idia dekenai Iehova ena sivarai lau hadibaia.”
2 Unai taihu bamona, oi danu be ta oi stadi henia karana oi moalelaia, a? Iesu bona ena hahediba taudia ginigunadia be hahediba taudia halaoa gaukarana idia moalelaia bada. Iesu ese ia hadibaia taudia 70 be mai moale ida edia gaukara idia herevalaia neganai, “Iesu be Lauma Helaga ese ia abia dainai ia moale bada.” (Luka 10:17-21) Hari inai negai, pablisa momo be hahediba taudia halaoa gaukarana idia moalelaia bada danu. Lagani 2007 ai, pablisa taudia be mai moale ida idia gaukara goada bona hua ta ta ai Baibel stadi 6 milioni mai kahana idia karaia!
3 To, pablisa taudia haida be Baibel stadi ta idia karaia lasi. Ma haida be lagani haida idia haroro vadaeni, to Baibel stadi ta idia do davaria lasi. Baibel stadi ta ita ura karaia neganai, dahaka hekwakwanai ita davaria diba? Edena dala ai unai hekwakwanai ita hanaia diba? Iesu ia gwau: “Do umui lao . . . diba tahua taudia do umui halaoa.” Bema unai sisiba ita badinaia, dahaka namo do ita davaria?—Mat. 28:19.
Iseda Moale Idia Hadikaia Diba Hekwakwanai Haida
4, 5. (a) Tano haida dekenai, momo ese eda gaukara be edena bamona idia laloa? (b) Tano ma haida ai, pablisa taudia be dahaka hekwakwanai idia davaria?
4 Tano haida ai, taunimanima be eda buka bona magasin idia abia dae, bona idia ura ita stadi henidia. Australia tadikaka ta bona ena adavana be lagani haida sibona Zambia dekenai haroro gaukara idia karaia bona idia gwau: “Ita kamonai sivaraidia be momokani. Zambia be haroro gabuna namona. Dala haroro be idau momokani! Taunimanima be ai dekenai idia mai, bona haida be idia ura henia magasin idia noia.” Vanegai lagani lalonai, Zambia ena pablisa taudia be Baibel stadi 200,000 mai kahana idia karaia—anina be pablisa ta ta be mai edia stadi haida.
5 To tano haida ai, pablisa idia davaria ia auka buka o magasin idia hariharilaia, eiava stadi ta idia karaia hanaihanai totona. Dahaka dainai? Nega momo pablisa ta be taunimanima edia ruma dekenai ia lao neganai, ruma ai ta ia noho lasi, o idia davaria ruma tauna ia ura lasi Baibel ena hereva ia kamonai. Reana, ruma taudia haida be dubu ta idia lao diba lasi, eiava tomadiho koikoi lalonai idia itaia kara dika dainai idia hesiku. Momo be mamoe naria taudia koikoidia ese idia hahisia. (Mat. 9:36) Unai dainai, momo idia ura lasi Baibel ena hereva idia kamonai.
6. Haida be dahaka lalohadai kereredia dainai idia ura lasi ma haida idia stadi henia?
6 Pablisa haida be edia moale ia hadikaia diba hekwakwanai haida idia davaria. Ena be guna idia be hahediba taudia halaoa gaukarana idia goadalaia, to hari idia gorere eiava idia buruka. Nega haida ita sibona be lalohadai kererena ita abia. Hegeregere, oi laloa oi hegeregere lasi Baibel stadi ta oi karaia totona, a? Reana emu hemami be Mose hegeregerena. Nega ta, Iehova ese Mose ia hamaoroa do ia lao Farao ia hereva henia totona, to Mose ia laloa ia be hegeregere lasi. Ia gwau: “Lauegu Lohiabada e, lau be hereva dekenai egu malana be ia haraga lasi, guna ia mai bona harihari.” (Eso. 4:10) Bema ta ia gwau ia be hegeregere lasi Baibel stadi ta ia karaia totona, anina be ia gwau ena gaukara be anina ta do ia havaraia lasi. Eiava ita laloa ita be tisa namona lasi dainai, ita stadi henia tauna be hahediba tauna ai do ia lao lasi. Unai lalohadai kereredia ita abia dainai, do ita ura lasi kamonai tauna ita stadi henia. Edena dala ai unai hekwakwanai idauidau ita hanaia diba?
Emu Lalona Hegaegaelaia
7. Dahaka dainai Iesu ia ura haroro gaukara ia karaia?
7 Namona be iseda lalona do ita hegaegaelaia guna. Iesu ia gwau: “Taunimanima ese edia lalona dekenai idia honu gaudia, be do idia gwauraia, edia uduna dekenai.” (Luka 6:45) Iesu ia ura haroro gaukara ia karaia badina ia ese ma haida edia namo ia laloa bada. Hegeregere, nega ta ai, ia itaia Iuda taudia be Dirava amo idia daudau bamona bona, “ia bogahisihisi idia dekenai.” Iena hahediba taudia ia hamaoroa: “Uiti ena anina abia negana ia ginidae vadaeni. . . . Uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.”—Mat. 9:36-38.
8. (a) Dahaka lalohadai maorona ita abia be namo? (b) Stadi tauna ta ena hereva amo dahaka ita dibaia?
8 Ma ta ita stadi henia neganai, namona be inai ita laloatao: Tadikaka o taihu ta ese ena nega bada ia gaukaralaia ita ia stadi henia dainai namo ita davaria. Haroro gaukara ai ta ita davaria neganai, namona be ita laloa edena dala ai ia do ita durua ia kamonai sivaraina amo namo ia abia totona. Hahine ta be Iehova ena Witnes taudia edia brens opesi ta ia tore henia, bona ia gwau: “Lau ura umui lau hadibaia, lauegu ruma dekenai idia mai bona lau idia hadibaia Witnes taudia dainai, lau tanikiu bada. Lau diba, reana nega haida lau dekenai idia hesiku badina henanadai momo lau henia o hanaihanai idia makaia negana ai hanaia. To, mai haheauka bona ura bada ida idia dibaia gaudia be lau dekenai idia hadibaia. Unai taudia dainai, Iehova bona Iesu lau tanikiu henidia.”
9. Iesu be dahaka ia laloa bada, bona edena dala ai Iesu ena kara ita tohotohoa diba?
9 To, Iesu ena hereva idia kamonai taudia haida be hahediba taudia ai idia lao lasi. (Mat. 23:37) Idia be nega sisina Iesu murinai idia raka, to gabeai ena hahediba herevadia idia dadaraia bona “ia danu idia raka hebou lou lasi.” (Ioa. 6:66) To, unai ese Iesu ia koua lasi, badina ia diba ia harorolaia sivaraina be mai anina bada. Ena be Iesu ese ia hadoa uhe haida sibona be huahua idia atoa, to Iesu be do idia tubu uiti namodia sibona ia laloa bada. Ia itaia uma ena “anina be idia auka bona idia mage vadaeni” dainai, mai moale ida gogoa gaukarana ia durua. (Ioane 4:35, 36 duahia.) Namona be Iesu ita tohotohoa. Eda teritori lalonai idia noho taunimanima namodia ita tahua be namo. Unai lalohadai maorona ita dogoatao noho totona, dala haida mani ita laloa.
Baibel Stadi Hamatamaia Gaukarana Laloa Bada
10, 11. Dahaka oi karaia diba haroro gaukara oi moalelaia totona?
10 Biru tauna be uhe ia hadoa neganai, ia ura huahua do ia abia. Unai hegeregerena, haroro gaukara ita karaia neganai, ita ura Baibel stadi ta ita hamatamaia. Edena bamona bema hanaihanai haroro gaukara oi karaia to haida sibona be edia ruma ai oi davaria, eiava oi lou henia taudia be oi davaria lasi? Unai be lalohisihisi ia havaraia diba. Anina be ruma-ta-ruma-ta haroro gaukara oi rakatania be namo, a? Lasi! Badina idaunega amo ema bona hari, ruma-ta-ruma-ta haroro gaukarana amo taunimanima momo ita davaria.
11 To, haroro gaukara oi moalelaia noho totona, namona be taunimanima haroro henia daladia ma haida oi tohoa. Hegeregere, dala ai eiava moni gaukara gabudiai taunimanima oi haroro henia toho, a? Telefon amo haida oi haroro henia o oi haroro henia vadaeni taudia edia telefon namba oi abia, gabeai telefon amo lou henia oi karaia totona, a? Bema oi hesiku haraga lasi bona haroro daladia idauidau oi tohoa, vadaeni do oi moale badina oi davaria taudia haida be Basileia sivaraina do idia abia dae.
Haida Idia Ura Lasi Kamonai —Hanaia Dalana
12. Bema momo idia ura lasi Baibel ena hereva idia kamonai, dahaka ita karaia be namo?
12 Bema momo idia ura lasi Baibel ena hereva idia kamonai, dahaka oi karaia be namo? Idia oi haroro henia neganai, namona be edia lalona veria herevana ta oi gwauraia. Aposetolo Paulo be ena Korinto tadikaka dekenai ia gwau: “Iuda taudia danu lau noho neganai, Iuda edia kara bamona lau karaia . . . Unai bamona danu, Dirava ena Taravatu lau utua lasi . . . To Iuda lasi taudia danu lau noho neganai, lau be Taravatu laloa lasi tauna bamona lau lao.” Dahaka dainai Paulo be unai bamona ia karaia? Ia gwau: “Lau ese taunimanima idauidau ibounai edia mauri dalana lau abia dae, dala idauidau ibounai dekena amo, haida do lau veria mauri totona.” (1 Kor. 9:20-22) Edena dala ai ita danu be haida edia lalona veria hereva ta ita gwauraia diba? Dubu idia lao lasi taudia momo idia ura edia ruma bese maurina idia hanamoa. Eiava mauri namona idia tahua noho. Unai bamona taudia ita haroro henidia neganai, edia lalona ia veria Baibel herevana ta ita gwauraia diba, a?
13, 14. Edena dala ai hahediba taudia halaoa gaukarana do ita moalelaia?
13 Ena be momo idia kamonai lasi, to pablisa taudia momo be hahediba taudia halaoa gaukarana idia moalelaia bada. Edena dala ai? Gado ma ta idia dibaia karana amo. Tadikaka ta bona ena adavana—edia mauri lagani be 60 mai kahana—idia itaia edia kongrigeisen ena teritori dekenai China taudia edia ruma bese momo idia noho, bona unuseniai idia sikuli. Tadikaka ia gwau: “Unai ese ai ia doria China taudia edia gado ai dibaia totona. Ena be dina ta ta lalonai ai hekwarahi hora haida lalonai unai gado ai dibaia totona, bona unai ese dala ia kehoa emai gabu ai idia noho China taudia ai stadi henia totona.”
14 Bema gado ma ta oi dibaia dalana be lasi, buklet ladana Good News for People of All Nations oi gaukaralaia diba, oi davaria taudia be edia gado ai oi haroro henidia totona. Danu, oi davaria taudia edia gado ai idia halasia buka eiava magasin abia totona oda oi atoa diba. Oibe, gado bona kastom idaudia taudia ita haroro henia totona, eda nega bona goada ita gaukaralaia be gau badana. To, inai hakaua herevana ita laloatao be namo, ia gwau: “Uhe momo do ia hadoa tauna be anina momo do ia geia.”—2 Kor. 9:6.
Kongrigeisen Taudia Ibounai
15, 16. (a) Dahaka dainai ita gwau diba kongrigeisen taudia ibounai be hahediba taudia halaoa gaukarana idia durua? (b) Tadikaka taihu burukadia be dahaka idia karaia diba?
15 To, hahediba taudia halaoa gaukarana be pablisa tamona ese do ia karaia lasi. Kongrigeisen taudia ibounai be unai gaukara idia durua diba. Edena dala ai? Iesu ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioa. 13:35) Momokani, stadi taudia be iseda hebou dekenai idia mai neganai, nega momo idia be tadikaka taihu edia kara namodia idia moalelaia. Stadi tauna ta ia gwau: “Hebou lao henia karana lau moalelaia. Badina taunimanima be mai moale ida lau idia hereva henia!” Iesu ia gwau, ena murinai idia raka taudia be edia ruma bese taudia korikoridia ese do idia badu henia. (Mataio 10:35-37 duahia.) To, Iesu ia gwauhamata idia be kongrigeisen lalonai ‘tadikaka, taihu, sina, natu’ momo herea do idia davaria.—Mar. 10:30.
16 Eda tadikaka taihu burukadia danu be gaukara badana idia karaia, badina stadi taudia idia durua idia goada idia lao totona. Edena dala ai? Ena be idia buruka dainai idia hegeregere lasi stadi ta idia karaia totona, to kongrigeisen heboudia dekenai idia henia haere bona hagoadaia herevadia ese kamonai taudia idia durua. Idia be lagani momo lalonai “kara maoromaoro” ena dala ai idia raka dainai, kongrigeisen taudia ese idia matauraia bona unai ese kudou-maoro taudia ia veria Dirava ena orea lalonai idia vareai totona.—Aon. 16:31.
Lalohadai Kereredia Hanaia Dalana
17. Dahaka ita karaia diba bema ita laloa ita be hegeregere lasi stadi ta ita karaia totona?
17 Bema oi laloa oi be hegeregere lasi stadi ta oi karaia totona, dahaka oi karaia be namo? Laloatao, Iehova be Mose dekenai gau rua ia henia: Lauma helaga bona ena kakana Arona. (Eso. 4:10-17) Iesu ia gwauhamata, iseda haroro gaukara lalonai Dirava ena lauma helaga ese ita do ia durua. (Kara 1:8) Ma danu, Iesu be gaukara taudia rua rua ia siaia, haroro gaukara idia karaia totona. (Luka 10:1) Unai dainai, bema oi laloa stadi ta oi karaia be ia auka, vadaeni oi guriguri Dirava ese ena lauma helaga amo aonega ia henia totona, bona tadikaka (o taihu ta) oi bamoa, unai amo idia ese oi idia durua eiava hagoadaia diba. Iehova be oi bona lau—“tanobada ena manoka gaudia”—ia abia hidi ena gaukara hereadaena ita karaia totona. Unai ita laloatao neganai, unai ese eda abidadama do ia hagoadaia bada.—1 Kor. 1:26-29.
18. Lalohadai kererena be edena dala ai ita hanaia diba?
18 Nega haida ita laloa ita be hegeregere lasi dainai, ita stadi henia tauna be hahediba tauna ai do ia lao lasi. Unai lalohadai kererena be edena dala ai ita hanaia diba? Namona be ita laloatao: Hahediba taudia halaoa gaukarana be aniani nadua gaukarana bamona lasi. Bema aniani ia maeda namonamo lasi, unai be tau tamona—aniani ia nadua tauna—ena kerere. To, hahediba taudia halaoa gaukarana be taunimanima toi ese idia karaia. Iehova be kahana badana ia karaia, badina Ia ese taunimanima ia veria ia kahirakahira idia lao totona. (Ioa. 6:44) Ita bona kongrigeisen taudia ma haida be hahediba daladia idauidau ita gaukaralaia diba, stadi tauna ita durua ia goada ia lao totona. (2 Timoteo 2:15 duahia.) Bona danu, gau badana be stadi tauna ese ia dibaia gaudia do ia karaia. (Mat. 7:24-27) Bema stiuden ta ese ena stadi ia hadokoa, reana ita lalohisihisi. Momokani, ita ura stadi tauna be abia hidi maorona ia karaia, to taunimanima ta ta ese ena ‘kara ena badina be Dirava ena vairana dekenai do ia gwauraia hedinarai.’—Roma 14:12.
Dahaka Namo Do Ita Abia?
19-21. (a) Baibel stadi ita karaia ena namo haida be dahaka? (b) Iehova ese haroro gaukara idia karaia taudia ibounai be edena bamona ia laloa?
19 Haida ita stadi henia karana ese ita ia durua Basileia ita tahua guna totona. Danu, unai ese ita ia durua hereva momokani be eda kudouna bona lalona ai ia vareai momokani totona. Edena dala ai unai bamona ia vara diba? Painia ta ladana Barak ia gwau: “Stadi ta ita karaia neganai, unai ese ita ia doria Baibel ita diba namonamo totona. Lau davaria, stadi ta lau hadibaia namonamo totona, namona be lau dibaia gaudia lau abidadama henia momokani namonamo guna.”
20 Bema oi be Baibel stadi ta oi do karaia lasi, anina be emu hesiai gaukara be anina lasi, a? Lasi, emu hesiai gaukara be mai anina bada! Iehova be ena ladana hanamoa totona ita karaia gaukaradia ia laloa bada. Haroro gaukara idia karaia taudia ibounai be ‘Dirava ena gaukara idia karaia.’ To, ta ita stadi henia karana ita moalelaia bada bema Iehova ese ita hadoa uhena ia hatubua. (1 Kor. 3:6, 9) Painia taihu ta ladana Amy ia gwau: “Oi itaia stadi tauna ta ia goada ia lao neganai, Iehova oi tanikiu henia badina oi ia gaukaralaia harihari gauna hereadaena ta oi henia totona. Unai gauna be, Iehova ia diba bona mauri hanaihanai do ia abia.”
21 Bema ita gaukara goada Baibel stadi ta ita hamatamaia bona ita karaia totona, unai ese ita do ia durua hari Iehova hesiai henia karana ita laloa bada noho. Bona danu, ita do ia durua tanobada matamatana do ita noholaia helarona ita dogoatao noho totona. Iehova ena heduru dainai, reana ita durua kamonai taudia haida do idia roho mauri danu. (1 Timoteo 4:16 duahia.) Unai be moale bada gauna!
Oi Laloatao, A?
• Pablisa haida be dahaka hekwakwanai idia davaria?
• Bema Baibel ena hereva idia ura lasi kamonai taudia ita davaria, dahaka ita karaia be namo?
• Baibel stadi ita karaia ena hahenamo haida be dahaka?
[Study Questions]
[Pictures on page 9]
Oi be haroro daladia idauidau oi gaukaralaia kudou-maoro taudia oi davaria totona, a?